⏭ 1وَكَانَ لأَخْآبَ سَبْعُونَ ابْنًا فِي السَّامِرَةِ. فَكَتَبَ يَاهُو رَسَائِلَ وَأَرْسَلَهَا إِلَى السَّامِرَةِ، إِلَى رُؤَسَاءِ يَزْرَعِيلَ الشُّيُوخِ وَإِلَى مُرَبِّي أَخْآبَ قَائِلاً: الآيات من 1 لـ 17ربنا استخدم ياهو، كعصا تأديب.
ياهو حط خطة لإبادة 70 ابن وحفيد لآخاب، في السامرة. من غير ما يتورط هو شخصيا فيها. نفذ خطته بدهاء ومكر. هو كان رجل سياسي ماهر، أو الأصح سياسي ماكر. وكل ده علشان يحقق أغراضه ومصالحه. بيعرف يستغل الظروف والمواقف، لصالحه.
ياهو خلي الرؤساء والشيوخ اللي في السامرة، هما اللي ينفذوا قتل ال 70 شخص من عيلة آخاب.
"وَكَانَ لأَخْآبَ سَبْعُونَ ابْنًا فِي السَّامِرَةِ." ... احنا متفقين أن عيلة آخاب كلها لازم تتباد.
70 ابن، مش كلهم أولاد آخاب لكن كمان أحفاده. وموجودين في السامرة عاصمة مملكة إسرائيل.
"فَكَتَبَ يَاهُو رَسَائِلَ وَأَرْسَلَهَا إِلَى السَّامِرَةِ،" ... الرسائل كانت موجهة للسامرة، مملكة إسرائيل، المملكة الشمالية.
"إِلَى رُؤَسَاءِ يَزْرَعِيلَ الشُّيُوخِ وَإِلَى مُرَبِّي أَخْآبَ قَائِلًا:" ... ياهو الملك الجديد، اللي اترشم علي ايد تلميذ أليشع النبي، بعت رسايل لشيوخ يزرعيل. " وَإِلَى مُرَبِّي أَخْآبَ" ... اللي ربوا أولاد آخاب وأحفاده.
بعت رسايل ليهم. وقالهم:
2«فَالآنَ عِنْدَ وُصُولِ هذِهِ الرِّسَالَةِ إِلَيْكُمْ، إِذْ عِنْدَكُمْ بَنُو سَيِّدِكُمْ، وَعِنْدَكُمْ مَرْكَبَاتٌ وَخَيْلٌ وَمَدِينَةٌ مُحَصَّنَةٌ وَسِلاَحٌ، فَالآنَ عِنْدَ وُصُولِ هذِهِ الرِّسَالَةِ إِلَيْكُمْ،" ... لما توصل لكم الرسالة ديه.
"إِذْ عِنْدَكُمْ بَنُو سَيِّدِكُمْ، وَعِنْدَكُمْ مَرْكَبَاتٌ وَخَيْلٌ وَمَدِينَةٌ مُحَصَّنَةٌ وَسِلاَحٌ،" ... عندكم أسلحة وعندكم أولاد آخاب. فلو عاوزين تحاربوا، ديه حاجة ترجع لكم.
ياهو: عاوز يأخد المملكة، لأنه اترشم ملك علي ايد تلميذ أليشع النبي. وياهو عارف أنهم مش هيسلموه المملكة بسهولة.
3انْظُرُوا الأَفْضَلَ وَالأَصْلَحَ مِنْ بَنِي سَيِّدِكُمْ وَاجْعَلُوهُ عَلَى كُرْسِيِّ أَبِيهِ، وَحَارِبُوا عَنْ بَيْتِ سَيِّدِكُمْ». ياهو قالهم: شوفوا أفضل واحد عندكم من عيلة آخاب، وملّكوه ملك علي كرسي آخاب.
"وَحَارِبُوا عَنْ بَيْتِ سَيِّدِكُمْ." ... وحاربوا ودافعوا بقي عن بيت آخاب سيدكم.
وكأنه بيقولهم: أنا جاي مع رجالتي وجيشي. شوفوا بقي مين في الـ 70، اللي عندكم، ينفع يبقي ملك. وخلوه يبقي ملك عليكم. وجهزوا نفسكم، علشان أحاربكم.
هو بيخوفهم. المعني الغير مباشر لرسالته: لو عاوزين سلام، خلصونا من الـ 70 دول، اللي عندكم.
4فَخَافُوا جِدًّا جِدًّا وَقَالُوا: «هُوَذَا مَلِكَانِ لَمْ يَقِفَا أَمَامَهُ، فَكَيْفَ نَقِفُ نَحْنُ؟» "فَخَافُوا جِدًّا جِدًّا وَقَالُوا: هُوَذَا مَلِكَانِ لَمْ يَقِفَا أَمَامَهُ،"... رؤساء الشيوخ في يزرعيل، والمسئولين عن تربية أولاد وأحفاد آخاب، كلهم خافوا واترعبوا منه ومن رسالته. لأنهم عرفوا أنه قتل يهورام ملك إسرائيل. وأخزيا ملك يهوذا.
"فَكَيْفَ نَقِفُ نَحْنُ؟" ... خافوا، وقالوا اذا كان قتل الملكين يهورام وأخزيا. ازاي احنا هنقدر نقف قدامه؟
5فَأَرْسَلَ الَّذِي عَلَى الْبَيْتِ وَالَّذِي عَلَى الْمَدِينَةِ وَالشُّيُوخُ وَالْمُرَبُّونَ إِلَى يَاهُو قَائِلِينَ: «عَبِيدُكَ نَحْنُ، وَكُلَّ مَا قُلْتَ لَنَا نَفْعَلُهُ. لاَ نُمَلِّكُ أَحَدًا. مَا يَحْسُنُ فِي عَيْنَيْكَ فَافْعَلْهُ». بعتوا رد علي ياهو، وقالوله: احنا عبيدك. احنا معاك. وكل اللي قولته لينا، هننفذه.
"لاَ نُمَلِّكُ أَحَدًا." ... مش هنملّك حد علينا. مش هنخلي أي حد يبقي ملك علينا، من عيلة آخاب.
"مَا يَحْسُنُ فِي عَيْنَيْكَ فَافْعَلْهُ." ... أعمل اللي شايفه صح. واللي تحبه.
6فَكَتَبَ إِلَيْهِمْ رِسَالَةً ثَانِيَةً قَائِلاً: «إِنْ كُنْتُمْ لِي وَسَمِعْتُمْ لِقَوْلِي، فَخُذُوا رُؤُوسَ الرِّجَالِ بَنِي سَيِّدِكُمْ، وَتَعَالَوْا إِلَيَّ فِي نَحْوِ هذَا الْوَقْتِ غَدًا إِلَى يَزْرَعِيلَ». وَبَنُو الْمَلِكِ سَبْعُونَ رَجُلاً كَانُوا مَعَ عُظَمَاءِ الْمَدِينَةِ الَّذِينَ رَبَّوْهُمْ. بعت لهم رسالة تانية
"قَائِلًا: إِنْ كُنْتُمْ لِي وَسَمِعْتُمْ لِقَوْلِي،" ... لو أنتم معايا، وسمعتم كلامي.
اقتلتوا الـ 70 من عيلة آخاب. وتعالوا في نفس الميعاد ده غدا، الي يزرعيل. وهاتوا معاكم الـ 70 رأس غدا، ونتقابل في يزرعيل.
7فَلَمَّا وَصَلَتِ الرِّسَالَةُ إِلَيْهِمْ أَخَذُوا بَنِي الْمَلِكِ وَقَتَلُوا سَبْعِينَ رَجُلاً وَوَضَعُوا رُؤُوسَهُمْ فِي سِلاَل وَأَرْسَلُوهَا إِلَيْهِ إِلَى يَزْرَعِيلَ. وفعلا نفذوا كلام ياهو. وقتلوا الـ 70 رجُل. وحطوا رؤوسهم الـ 70، في سلال.
"وَأَرْسَلُوهَا إِلَيْهِ إِلَى يَزْرَعِيلَ." ... وبعتوهم ليزرعيل. حسب المكان المتفق عليه، مع ياهو.
8فَجَاءَ الرَّسُولُ وَأَخْبَرَهُ قَائِلاً: «قَدْ أَتَوْا بِرُؤُوسِ بَنِي الْمَلِكِ». فَقَالَ: «اجْعَلُوهَا كُومَتَيْنِ فِي مَدْخَلِ الْبَابِ إِلَى الصَّبَاحِ». الرسول بلغ ياهو الملك. وقاله: انهم خلاص نفذوا كلامه. وجابوا الـ 70 رأس.
"فَقَالَ: اجْعَلُوهَا كُومَتَيْنِ فِي مَدْخَلِ الْبَابِ إِلَى الصَّبَاحِ." ... قالهم: حطوهم وقسموهم في مجموعتين، وطلب منهم انهم يحطوهم، عند مدخل باب المدينة. علشان كل اللي داخل واللي خارج، يشوفهم.
9وَفِي الصَّبَاحِ خَرَجَ وَوَقَفَ وَقَالَ لِجَمِيعِ الشَّعْبِ: «أَنْتُمْ أَبْرِيَاءُ. هأَنَذَا قَدْ عَصَيْتُ عَلَى سَيِّدِي وَقَتَلْتُهُ، وَلكِنْ مَنْ قَتَلَ كُلَّ هؤُلاَءِ؟ تاني يوم الصبح، قالهم متخافوش أنتم أبرياء. صحيح أنا عصيت علي سيدي يهورام وقتلته.
"وَلكِنْ مَنْ قَتَلَ كُلَّ هؤُلاَءِ؟" ... بس أنا مقتلتش كل دول. فبيسأل مين اللي قتلهم وعمل كده؟
طبعا هو صاحب كل التخطيط ده. بس هو جايز يبرأ نفسه. فهنا يبان أنه مش مستقيم ومش كويس. هو كان مجرد أداه لتأديب آخاب وعيلته. بس بعد كده هو كمان هيتأدب وهيتعاقب.
لأن واحدة من طرق ربنا له المجد، أن الأشرار يأكلوا في بعض. ويخلصوا علي بعض. وهنا نتعلم روحيا: أن ربنا له المجد بيشيل كل الشر عن أخره.
فآخاب وأولاده وأحفاده، وكل عيلته. ربنا سمح انهم يموتوا. لأن شرهم كان زاد جدا، وانتشر جدا في المملكة.
لأن الخطية ليها بنات. علشان كده خلص علي آخاب وعيلته.
مثلا خطية الكبرياء، ليها بنات زي: الإدانة – الغضب – الطمع – التذمر. فمينفعش أن واحد يخلص من خطية، ويسيب خطية تانية.
زي مزمور: يا بنت بابل الشقية. طوبي لمن يُمسك أطفالك ويدفنهم عند الصخرة.
بابل كانت رمز للوثنية. للفساد والشر. فيابخت اللي يمسك أطفالك ويدفنهم عند الصخرة.. يعني يابخت اللي يمسك الخطية في أولها. وهي صغيرة ويرميها تحت رجلين السيد المسيح له المجد (الصخرة).
يلحق الخطية، قبل ما تبقي عادة شريرة. يأخدها بسرعة ويحطها عند ربنا يسوع له المجد. قبل ما تكبر وتسيطر عليه.
فالتخلص من الأشرار هنا: هو اشارة للتخلص من جذور الشر كلها.
10فَاعْلَمُوا الآنَ أَنَّهُ لاَ يَسْقُطُ مِنْ كَلاَمِ الرَّبِّ إِلَى الأَرْضِ الَّذِي تَكَلَّمَ بِهِ الرَّبُّ عَلَى بَيْتِ أَخْآبَ، وَقَدْ فَعَلَ الرَّبُّ مَا تَكَلَّمَ بِهِ عَنْ يَدِ عَبْدِهِ إِيلِيَّا». وبكده كل كلام ربنا له المجد اتنفذ بالظبط.
"وَقَدْ فَعَلَ الرَّبُّ مَا تَكَلَّمَ بِهِ عَنْ يَدِ عَبْدِهِ إِيلِيَّا." ... الكلام اللي قاله ربنا له المجد، لايليا النبي، حصل.
11وَقَتَلَ يَاهُو كُلَّ الَّذِينَ بَقُوا لِبَيْتِ أَخْآبَ فِي يَزْرَعِيلَ وَكُلَّ عُظَمَائِهِ وَمَعَارِفِهِ وَكَهَنَتِهِ، حَتَّى لَمْ يُبْقِ لَهُ شَارِدًا. وفعلا ياهو، أمر بقتل كل بيت آخاب و كهنة البعل بتوع آخاب وكل معارفه. اللي كانوا في يزرعيل.
"حَتَّى لَمْ يُبْقِ لَهُ شَارِدًا." ... أفناهم كلهم. مبقاش في أي حد لآخاب خالص.
12ثُمَّ قَامَ وَجَاءَ سَائِرًا إِلَى السَّامِرَةِ. وَإِذْ كَانَ عِنْدَ بَيْتِ عَقْدِ الرُّعَاةِ فِي الطَّرِيقِ، ياهو ماشي، وراجع للسامرة. 13صَادَفَ يَاهُو إِخْوَةَ أَخَزْيَا مَلِكِ يَهُوذَا، فَقَالَ: «مَنْ أَنْتُمْ؟» فَقَالُوا: «نَحْنُ إِخْوَةُ أَخَزْيَا، وَنَحْنُ نَازِلُونَ لِنُسَلِّمَ عَلَى بَنِي الْمَلِكِ وَبَنِي الْمَلِكَةِ». ياهو وهو في طريقه للسامرة. قابل في طريقه، أخوة أخزيا ملك يهوذا. هما أصلا أولاد أخوات أخزيا. لأن أخواته اتقتلوا. "وَإِذْ كَانَ يَاهُو يَقْضِي عَلَى بَيْتِ أَخْآبَ وَجَدَ رُؤَسَاءَ يَهُوذَا وَبَنِي إِخْوَةِ أَخَزْيَا الَّذِينَ كَانُوا يَخْدِمُونَ أَخَزْيَا فَقَتَلَهُمْ." (2 أخبار أيام22: 8).
سألهم ياهو، علشان يعرف هما مين. وعرفوه بنفسهم. أنهم من عيلة أخزيا ملك يهوذا.
"وَنَحْنُ نَازِلُونَ لِنُسَلِّمَ عَلَى بَنِي الْمَلِكِ وَبَنِي الْمَلِكَةِ." ... احنا رايحين نسلم عليه.
واضح طبعا أن معندهوش أي معلومات عن اللي حصل ليهورام ملك إسرائيل وأخزيا ملك يهوذا. وايزابل.
14فَقَالَ: «أَمْسِكُوهُمْ أَحْيَاءً». فَأَمْسَكُوهُمْ أَحْيَاءً وَقَتَلُوهُمْ عِنْدَ بِئْرِ بَيْتِ عَقْدٍ، اثْنَيْنِ وَأَرْبَعِينَ رَجُلاً وَلَمْ يُبْقِ مِنْهُمْ أَحَدًا. "فَقَالَ: أَمْسِكُوهُمْ أَحْيَاءً."... طلب من عبيده اللي معاه، أنهم يمسكوا كل أهل أخزيا.
"فَأَمْسَكُوهُمْ أَحْيَاءً وَقَتَلُوهُمْ عِنْدَ بِئْرِ بَيْتِ عَقْدٍ، اثْنَيْنِ وَأَرْبَعِينَ رَجُلًا وَلَمْ يُبْقِ مِنْهُمْ أَحَدًا." ... مسكوهم، وقتلوهم. حسب أوامر ياهو. قتل 42 رجُل. خلّص عليهم كلهم.
واضح طبعا أن ياهو: مش بيقف عند حد معين. عمال يخلص علي الكل. وطبعا ربنا له المجد، مطلبش منه كده. وربنا مش موافق أكيد علي اللي بيحصل ده.
15ثُمَّ انْطَلَقَ مِنْ هُنَاكَ فَصَادَفَ يَهُونَادَابَ بْنَ رَكَابٍ يُلاَقِيهِ، فَبَارَكَهُ وَقَالَ لَهُ: «هَلْ قَلْبُكَ مُسْتَقِيمٌ نَظِيرُ قَلْبِي مَعَ قَلْبِكَ؟» فَقَالَ يَهُونَادَابُ: «نَعَمْ وَنَعَمْ». «هَاتِ يَدَكَ». فَأَعْطَاهُ يَدَهُ، فَأَصْعَدَهُ إِلَيْهِ إِلَى الْمَرْكَبَةِ. دلوقتي مملكة يهوذا ومملكة إسرائيل من غير ملوك.
ياهو بن نِمشي، هو حاليا الملك الممسوح من قِبل ربنا، علي ايد تلميذ أليشع النبي.
"ثُمَّ انْطَلَقَ مِنْ هُنَاكَ" ... ياهو وهو راجع، بعد قتله كل أهل آخاب. وكمان قرايب أخزيا الملك.
"فَصَادَفَ يَهُونَادَابَ بْنَ رَكَابٍ يُلاَقِيهِ،" ... يهوناداب بن ركاب: شخصية فريدة وعجيبة من شخصيات الكتاب المقدس.
يهوناداب: (موجود في سفر ارميا النبي) ... هو مكانش من شعب إسرائيل. لكنه انضمن لشعب إسرائيل، لأنه أحب ربنا من كل قلبه. وعاش عيشة البدو.
يهوناداب: عيلة الركابيين.. دول عيلة قابلهم موسي النبي. لما خرج من أرض مصر. وانضموا لموسي النبي. لأنهم كانوا نفس عيلة مديان، حما موسي النبي. وانضموا لشعب إسرائيل. وتحديدا لسبط يهوذا. وسكنوا مع سبط يهوذا.
الركابيين: مكانش أصلهم يهود. لكنهم انضموا لليهود. وعاشوا معاهم. وهما أتقياء جدا. بالرغم أن مش أصلهم يهودي.
ووصي أولاده، وصيتين:
- أنه ميشربوش خمر نهائي، طول حياتهم.
- وتاني وصية: انهم يعيشوا طول حياتهم علي الأرض، في خيام. ميسكنوش في بيوت. خيام وبس.
ووصية عدم شرب الخمر: كانت رمز لحياة النذر والتقديس لربنا له المجد.
ووصية حياة الخيمة: كانت رمز لإحساسهم الدايم، للغربة علي الأرض.
وفعلا أولاد يهوناداب، سمعوا ونفذوا الوصية بتاعته لحد أيام ارميا النبي. وفضلوا حافظين الوصيتين، لمئات السنين.
لدرجة أن ربنا له المجد، قال لارميا النبي: اذا كانت وصية انسان، أولاده احترموها لأجيال كتير.
لكن وصيتي لشعبي: اللي أديتها لشعبي، بني إسرائيل، محدش حفظ الوصية. ولا مشي فيها.
يهوناداب وأولاده: صاروا مثال للناس اللي اتمسكوا بالعهد. وحفظوا الوصية، بتاعة آبائهم.
يهوناداب: كان إنسان بيحب ربنا أوي. رغم أنه عاش عيشة بسيطة. وعاش حياة النقاوة.
"فَبَارَكَهُ وَقَالَ لَهُ: هَلْ قَلْبُكَ مُسْتَقِيمٌ نَظِيرُ قَلْبِي مَعَ قَلْبِكَ؟ فَقَالَ يَهُونَادَابُ: نَعَمْ وَنَعَمْ." ... ياهو: حس أن يهوناداب، فيه غيرة ناحية ربنا.
ياهو قاله: أنت معايا؟ هتيجي معايا ولا لأ؟ يهوناداب قاله: لو الموضوع يخص ربنا، فأنا قلبي مستقيم بكل تأكيد.
"هَاتِ يَدَكَ. فَأَعْطَاهُ يَدَهُ، فَأَصْعَدَهُ إِلَيْهِ إِلَى الْمَرْكَبَةِ." ... مد ايده لياهو. وديه علامة عهد، انهم يمشوا في الطريق ده سوا. مع بعض.. ويهوناداب صعد المركبة مع ياهو.
16وَقَالَ: «هَلُمَّ مَعِي وَانْظُرْ غَيْرَتِي لِلرَّبِّ». وَأَرْكَبَهُ مَعَهُ فِي مَرْكَبَتِهِ. "وَقَالَ: هَلُمَّ مَعِي وَانْظُرْ غَيْرَتِي لِلرَّبِّ."... ياهو قاله: تعالي أوريك أنا عملت ايه، علشان خاطر ربنا. ده أنا قتلت كل الأشرار، كل بيت آخاب. وكمان أخزيا ملك يهوذا وعيلته.
"وَأَرْكَبَهُ مَعَهُ فِي مَرْكَبَتِهِ." ... ويهوناداب ركب مع ياهو في مركبته.
17وَجَاءَ إِلَى السَّامِرَةِ، وَقَتَلَ جَمِيعَ الَّذِينَ بَقُوا لأَخْآبَ فِي السَّامِرَةِ حَتَّى أَفْنَاهُ، حَسَبَ كَلاَمِ الرَّبِّ الَّذِي كَلَّمَ بِهِ إِيلِيَّا. ولما وصل ياهو الي السامرة، أهلك جميع الباقين من مؤيدي آخاب. قتل كل اللي من طرف آخاب. اللي كانوا موجودين في السامرة.
"حَسَبَ كَلاَمِ الرَّبِّ الَّذِي كَلَّمَ بِهِ إِيلِيَّا." ... محققًا بذلك قضاء الرب الذي كلم به إيليا.
وبكده خلص علي كل بيت آخاب وكل الشر بتاع آخاب وعيلته. حسب كلام ربنا له المجد، لايليا النبي.
هو قضي عليهم، مش علشان هو غيران لربنا. لكن هو غيران لنفسه. وعاوز يستقل بالحكم لنفسه.
18ثُمَّ جَمَعَ يَاهُو كُلَّ الشَّعْبِ وَقَالَ لَهُمْ: «إِنَّ أَخْآبَ قَدْ عَبَدَ الْبَعْلَ قَلِيلاً، وَأَمَّا يَاهُو فَإِنَّهُ يَعْبُدُهُ كَثِيرًا. ياهو، لجأ لحيلة وخدعة. علشان يخلّص علي كل عبدة البعل، اللي كانوا تبع ايزابل.
"ثُمَّ جَمَعَ يَاهُو كُلَّ الشَّعْبِ وَقَالَ لَهُمْ: إِنَّ أَخْآبَ قَدْ عَبَدَ الْبَعْلَ قَلِيلًا،"... الخدعة اللي عملها: أنه قالهم: آخاب كان بيعبد البعل، قليل. مش كفاية.
"وَأَمَّا يَاهُو فَإِنَّهُ يَعْبُدُهُ كَثِيرًا." ... أنا بقي هأوريكم، ازاي عبادة البعل بجد.
هو قال كده، علشان يشجع كل كهنة البعل، انهم يظهروا. حيلة كان بيعملها علشان يديهم الأمان.
19وَالآنَ فَادْعُوا إِلَيَّ جَمِيعَ أَنْبِيَاءِ الْبَعْلِ وَكُلَّ عَابِدِيهِ وَكُلَّ كَهَنَتِهِ. لاَ يُفْقَدْ أَحَدٌ، لأَنَّ لِي ذَبِيحَةً عَظِيمَةً لِلْبَعْلِ. كُلُّ مَنْ فُقِدَ لاَ يَعِيشُ». وَقَدْ فَعَلَ يَاهُو بِمَكْرٍ لِكَيْ يُفْنِيَ عَبَدَةَ الْبَعْلِ. كل كهنة البعل، وكل اللي بيعبدوا البعل، يجوا. محدش ميجيش.
"لأَنَّ لِي ذَبِيحَةً عَظِيمَةً لِلْبَعْلِ. كُلُّ مَنْ فُقِدَ لاَ يَعِيشُ." ... الكل يجي، علشان في ذبيحة عاوز أقدمها للبعل. واللي مش هيجي، هنخلص عليه. هنموته.
"وَقَدْ فَعَلَ يَاهُو بِمَكْرٍ لِكَيْ يُفْنِيَ عَبَدَةَ الْبَعْلِ." ... وده كان مكر ودهاء من ياهو. علشان يقدر يخلّص علي كل اللي بيعبدوا البعل.
20وَقَالَ يَاهُو: «قَدِّسُوا اعْتِكَافًا لِلْبَعْلِ». فَنَادَوْا بِهِ. "اعْتِكَافًا لِلْبَعْلِ" ... خلي اليوم ده مخصص لعبادة البعل وبس. وكأنه إجازة. علشان الكل يروح.
وعلشان يكمل الخدعة: أذاع بوجوب الاعتكاف، تقديسًا للنفس، قبل حفل الذبيحة، فأذيع هذا النداء. ولم يعارض أحد من عابدى البعل؛ لخوفهم من ياهو. لأنه عارف طقوس العبادة الوثنية. فطلب منهم أنهم يعملوا الطقوس ديه.
21وَأَرْسَلَ يَاهُو فِي كُلِّ إِسْرَائِيلَ، فَأَتَى جَمِيعُ عَبَدَةِ الْبَعْلِ وَلَمْ يَبْقَ أَحَدٌ إِلاَّ أَتَى، وَدَخَلُوا بَيْتَ الْبَعْلِ، فَامْتَلأَ بَيْتُ الْبَعْلِ مِنْ جَانِبٍ إِلَى جَانِبٍ. "وَأَرْسَلَ يَاهُو فِي كُلِّ إسرائيل،"... بعت لكل مملكة إسرائيل. علشان يجمعهم كلهم.
"فَأَتَى جَمِيعُ عَبَدَةِ الْبَعْلِ وَلَمْ يَبْقَ أَحَدٌ إِلاَّ أَتَى،" ... كلهم راحوا، حسب أوامر وطلب ياهو.
"وَدَخَلُوا بَيْتَ الْبَعْلِ، فَامْتَلأَ بَيْتُ الْبَعْلِ مِنْ جَانِبٍ إِلَى جَانِبٍ." ... ودخلوا بيت البعل، علشان يعبدوا البعل.
" مِنْ جَانِبٍ إِلَى جَانِبٍ." ... عدد الناس كان كتير جدا. وملوا البيت من جوة.
22فَقَالَ لِلَّذِي عَلَى الْمَلاَبِسِ: «أَخْرِجْ مَلاَبِسَ لِكُلِّ عَبَدَةِ الْبَعْلِ». فَأَخْرَجَ لَهُمْ مَلاَبِسَ. ياهو طلب من الشخص المسئول عن الملابس. انه يدي لكل الناس اللي جت تعبد البعل، ملابس. ملابس مخصوصة ليهم.
"فَأَخْرَجَ لَهُمْ مَلاَبِسَ." ... وفعلا نفذ كلام الملك. وده علشان عبدة البعل، يكونوا مميزين في لبسهم.
23وَدَخَلَ يَاهُو وَيَهُونَادَابُ بْنُ رَكَابٍ إِلَى بَيْتِ الْبَعْلِ. فَقَالَ لِعَبَدَةِ الْبَعْلِ: «فَتِّشُوا وَانْظُرُوا لِئَلاَّ يَكُونَ مَعَكُمْ ههُنَا أَحَدٌ مِنْ عَبِيدِ الرَّبِّ، وَلكِنَّ عَبَدَةَ الْبَعْلِ وَحْدَهُمْ». ياهو ويهوناداب، دخلوا بيت البعل. ياهو طلب من عبدة البعل، يبصوا كويس، لأحسن يكون حد من اللي بيعبد ربنا، يكونوا في وسطيهم.
"وَلكِنَّ عَبَدَةَ الْبَعْلِ وَحْدَهُمْ." ... وأتأكدوا أن كل اللي في بيت البعل، هما اللي بيعبدوا البعل. ومفيش حد تاني معاهم جوة هيكل البعل.
24وَدَخَلُوا لِيُقَرِّبُوا ذَبَائِحَ وَمُحْرَقَاتٍ. وَأَمَّا يَاهُو فَأَقَامَ خَارِجًا ثَمَانِينَ رَجُلاً وَقَالَ: «الرَّجُلُ الَّذِي يَنْجُو مِنَ الرِّجَالِ الَّذِينَ أَتَيْتُ بِهِمْ إِلَى أَيْدِيكُمْ تَكُونُ أَنْفُسُكُمْ بَدَلَ نَفْسِهِ». "وَدَخَلُوا لِيُقَرِّبُوا ذَبَائِحَ وَمُحْرَقَاتٍ."... وفعلا دخلوا المعبد، علشان يقدموا الذبائح والمحرقات للبعل.
"وَأَمَّا يَاهُو فَأَقَامَ خَارِجًا ثَمَانِينَ رَجُلًا" ... ياهو عين بره بيت البعل، 80 راجل مسئول.
"وَقَالَ: الرَّجُلُ الَّذِي يَنْجُو مِنَ الرِّجَالِ الَّذِينَ أَتَيْتُ بِهِمْ إِلَى أَيْدِيكُمْ تَكُونُ أَنْفُسُكُمْ بَدَلَ نَفْسِهِ." ... وقالهم:
اللي هيهرب وينجو من جوة، هأخلص عليه مكان اللي هيهرب.
يعني: قصاد أي إنسان هيهرب من جوة، هيكون نفس واحد من الـ 80 اللي واقفين بره المعبد.
25وَلَمَّا انْتَهَوْا مِنْ تَقْرِيبِ الْمُحْرَقَةِ قَالَ يَاهُو لِلسُّعَاةِ وَالثَّوَالِثِ: «ادْخُلُوا اضْرِبُوهُمْ. لاَ يَخْرُجْ أَحَدٌ». فَضَرَبُوهُمْ بِحَدِّ السَّيْفِ، وَطَرَحَهُمُ السُّعَاةُ وَالثَّوَالِثُ. وَسَارُوا إِلَى مَدِينَةِ بَيْتِ الْبَعْلِ، "وَلَمَّا انْتَهَوْا مِنْ تَقْرِيبِ الْمُحْرَقَةِ"... وفعلا ما قدموا الذبائح والمحرقة للبعل ياهو أمر الحراس والمسئولين، انهم يموتوا كل اللي جوة المعبد. وقتلوهم بالسيف.
" السُّعَاةُ" ... الحراس.
" وَالثَّوَالِثِ" ... رتب عسكرية. يعني: ظابط.
"وَسَارُوا إِلَى مَدِينَةِ بَيْتِ الْبَعْلِ،" ... مجموع أبنية مختصة بعبادة البعل.
26وَأَخْرَجُوا تَمَاثِيلَ بَيْتِ الْبَعْلِ وَأَحْرَقُوهَا، في مدينة البعل، طلعوا كل التماثيل اللي كانت موجودة، وحرقوها كلها.27وَكَسَّرُوا تِمْثَالَ الْبَعْلِ، وَهَدَمُوا بَيْتَ الْبَعْلِ، وَجَعَلُوهُ مَزْبَلَةً إِلَى هذَا الْيَوْمِ. خلصوا علي كل حاجة تخص البعل. كسروا التماثيل. وهدوا المعبد أو هيكل البعل.
"وَجَعَلُوهُ مَزْبَلَةً إِلَى هذَا الْيَوْمِ." ... خلوه خراب ومزبلة، لغاية وقت كتابة السفر.
28وَاسْتَأْصَلَ يَاهُو الْبَعْلَ مِنْ إِسْرَائِيلَ. وبكده ياهو، شال كل عبادة البعل من إسرائيل. وقضي علي العبادة ديه، اللي أدخلتها ايزابل.
صحيح هو خلص علي كل تماثيل البعل، بتاعة ايزابل. لكن عبادة البعل هتفضل موجودة. بدليل:
29وَلكِنَّ خَطَايَا يَرُبْعَامَ بْنِ نَبَاطَ الَّذِي جَعَلَ إِسْرَائِيلَ يُخْطِئُ لَمْ يَحِدْ يَاهُو عَنْهَا، أَيْ عُجُولِ الذَّهَبِ الَّتِي فِي بَيْتِ إِيلَ وَالَّتِي فِي دَانَ. كل اللي عمله ياهو: أنه خلّص علي عيلة آخاب كلها. وده مقابل أنه هو يمسك الحُكك. يبقي ملك إسرائيل.
"وَلكِنَّ خَطَايَا يَرُبْعَامَ بْنِ نَبَاطَ الَّذِي جَعَلَ إسرائيل يُخْطِئُ لَمْ يَحِدْ يَاهُو عَنْهَا،"... بعد كل اللي عمله ده، لكن برده فضل ماشي في طريق يربعام بن نباط. اول ملك قسّم مملكة داود النبي. ومَلك هو علي مملكة إسرائيل، العشر أسباط.
"أَيْ عُجُولِ الذَّهَبِ الَّتِي فِي بَيْتِ إِيلَ وَالَّتِي فِي دَانَ." ... لأن يربعام لما قسّم مملكة داود، ومسك حُكم المملكة الشمالية، مملكة إسرائيل. عمل عجلين من الذهب، علشان محدش يروح يقدم ذبائح ومحرقات في أورشليم. وخاف لأحسن الشعب، لما يروح يقدم العبادة في أورشليم. يحنوا للمملكة الجنوبية. ويرجعوا يتحدوا تاني مع المملكة الجنوبية.
فهو عمل العجلين من الذهب، علشان يفضلوا معاه في المملكة الشمالية.
لكن لم يتحول ياهو بالكامل عن الوثنية، ليخدم الله وحده، فقد أبقى عجلى يربعام الذهبيين، الذين في بيت ايل وفى دان. (1مل 12 :25 – 33). والتي كانت ديانة قومية في إسرائيل وأصبحت طبقًا للعرف السائد معترفًا بها.
ياهو شال حاجات البعل وقتل كل كهنة أنبياء البعل. البعل اللي أدخلته ايزابل.
هو شال كل حاجة، كانت مش علي مزاجه. بس لسه ماشي في طريق وخطايا يربعام.
30وَقَالَ الرَّبُّ لِيَاهُو: «مِنْ أَجْلِ أَنَّكَ قَدْ أَحْسَنْتَ بِعَمَلِ مَا هُوَ مُسْتَقِيمٌ فِي عَيْنَيَّ، وَحَسَبَ كُلِّ مَا بِقَلْبِي فَعَلْتَ بِبَيْتِ أَخْآبَ، فَأَبْنَاؤُكَ إِلَى الْجِيلِ الرَّابعِ يَجْلِسُونَ عَلَى كُرْسِيِّ إِسْرَائِيلَ». ربنا ذكر له الخير اللي عمله. وأنه استأصل العبادة الوثنية، وأنهي علي بيت آخاب.
كان ربنا عاوز أن ياهو، يخلص علي الأشرار، بيت آخاب.
وفعلا آخاب عمل كده. صحيح بأسلوب كله عنف. بس عامة ياهو: قلبه مش كويس.
"فَأَبْنَاؤُكَ إِلَى الْجِيلِ الرَّابعِ يَجْلِسُونَ عَلَى كُرْسِيِّ إسرائيل." ... علشان كده أولادك، هيقعدوا ملوك علي كرسي مملكة إسرائيل، حتي الجيل الرابع.
وليس معنى مكافأة الله لياهو، موافقته على وحشيته، أو كبريائه. ولكن يكافئه فقط على إزالة شر آخاب. وهذه المكافأة المادية، بجلوس أبنائه على عرش مملكة إسرائيل إلى الجيل الرابع، لا تعنى خلاص نفسه، أو دخوله الملكوت ولكنه يعطيه مكافأة أرضية، مقابل عمله.
31وَلكِنْ يَاهُو لَمْ يَتَحَفَّظْ لِلسُّلُوكِ فِي شَرِيعَةِ الرَّبِّ إِلهِ إِسْرَائِيلَ مِنْ كُلِّ قَلْبِهِ. لَمْ يَحِدْ عَنْ خَطَايَا يَرُبْعَامَ الَّذِي جَعَلَ إِسْرَائِيلَ يُخْطِئُ. طبعا ياهو مكملش حلو. مشي بعيد عن طريق ربنا. ربنا قاله: أنت يا ياهو، محفظتش شريعتي. مكنتش ماشي في طريقي.
" لَمْ يَتَحَفَّظْ" ... كلمة التحفظ، كلمة جميلة. أن الواحد يعمل الكلام اللي ربنا بيقوله.
السلوك بتحفظ أو بتدقيق: يعني الواحد يكون مراقب نفسه. تصرفاته. يخلي باله من كلامه وأفعاله.
"لَمْ يَحِدْ عَنْ خَطَايَا يَرُبْعَامَ الَّذِي جَعَلَ إسرائيل يُخْطِئُ." ... فضل ماشي في خطايا وطريق يربعام.
32فِي تِلْكَ الأَيَّامِ ابْتَدَأَ الرَّبُّ يَقُصُّ إِسْرَائِيلَ، فَضَرَبَهُمْ حَزَائِيلُ فِي جَمِيعِ تُخُومِ إِسْرَائِيلَ يَقُصُّ: القصاص والعقاب.
ربنا له المجد، ابتدي يأدب إسرائيل.
"فَضَرَبَهُمْ حَزَائِيلُ فِي جَمِيعِ تُخُومِ إسرائيل." ... حزائيل: لسه عايش. وضرب كل مملكة إسرائيل. حزائيل، ربنا استخدمه، كعصا تأديب لياهو. وشعب إسرائيل.
قبل كده لما أليشع النبي، بص لحزائيل وبكي. قاله: أنا شايفك هتموت شعب إسرائيل. وده اللي هيحصل دلوقتي. وفعلا حزائيل، ملك ارام، بهدل شعب إسرائيل.
33مِنَ الأُرْدُنِّ لِجِهَةِ مَشْرِقِ الشَّمْسِ، جَمِيعَ أَرْضِ جِلْعَادَ الْجَادِيِّينَ وَالرَّأُوبَيْنِيِّينَ وَالْمَنَسِّيِّينَ، مِنْ عَرُوعِيرَ الَّتِي عَلَى وَادِي أَرْنُونَ وَجِلْعَادَ وَبَاشَانَ. " الْجَادِيِّينَ وَالرَّأُوبَيْنِيِّينَ وَالْمَنَسِّيِّينَ،" ... اشمعنا التلاتة دول؟
كان في سبطين ونص، وقت تقسيم أرض الموعد. أخدوا أراضي شرق الأردن. وقت يشوع.
السبطين ونص: هما جاد ورأوبين ونص سبط منسيّ. أخدوا نصيبهم في شرق الأردن. مكانوش مع باقي الأسباط، اللي عبروا نهر الأردن وسكنوا هناك. وشرق الأردن، كان اسمها أرض جلعاد. وديه اللي سكن فيها السبطين ونصف السبط.
34وَبَقِيَّةُ أُمُورِ يَاهُو وَكُلُّ مَا عَمَلَ وَكُلُّ جَبَرُوتِهِ، أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ إِسْرَائِيلَ؟ وَكُلُّ جَبَرُوتِهِ: يعني كان إنسان مفتري. دموي.
"أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ إسرائيل؟" ... كل حاجة مكتوبة عن ياهو: موجودة في سفر أخبار الأيام لملوك إسرائيل.
وده غير سفر أخبار الأيام، الموجود في الكتاب المقدس.
في سفر أخبار أيام: واحد لملوك يهوذا. والتاني خاص بملوك إسرائيل.
" أَمَا هِيَ مَكْتُوبَةٌ" ... ان كان علي الأرض بتتسجل أعمال الشر. احنا كمان كل واحد فينا، متسجلة حياته عند ربنا، سواء الحلو أو الوحش. طيب هل احنا مهتمين بكده؟
من رحمة ربنا علينا، أن اللي متسجل علينا من شرور حاليا، ربنا مدينا فرصة للتوبة. وطول ما احنا عايشين، قادرين اننا نتوب عنه. ونمسحه طول ما احنا لسه علي الأرض.
فلازم نعيش حياة الجهاد، طول ما احنا لسه هنا علي الأرض. لازم نستفيد من مراحم ربنا علينا.
35وَاضْطَجَعَ يَاهُو مَعَ آبَائِهِ فَدَفَنُوهُ فِي السَّامِرَةِ، وَمَلَكَ يَهُوأَحَازُ ابْنُهُ عِوَضًا عَنْهُ. دفنوه في مدينة السامرة، عاصمة مملكة إسرائيل، المملكة الشمالية.
وابنه يهوأحاز، مَلك بعده.
36وَكَانَتِ الأَيَّامُ الَّتِي مَلَكَ فِيهَا يَاهُو عَلَى إِسْرَائِيلَ فِي السَّامِرَةِ ثَمَانِيًا وَعِشْرِينَ سَنَةً. ياهو، حياته كملك علي إسرائيل، كانت 28 سنة. ⏮