⪡ 1فِي السَّنَةِ الثَّانِيَةِ لِيُوآشَ بْنِ يَهُوأَحَازَ مَلِكِ إِسْرَائِيلَ، مَلَكَ أَمَصْيَا بْنُ يُوآشَ مَلِكِ يَهُوذَا. - الاصحاح الـ 13: انتهي بموت أليشع النبي. ومعجزة: عظامه التي أقامت ميت.
وكان يوآش ملك يهوذا في المملكة الجنوبية. وياهو ملك إسرائيل في المملكة الشمالية.
- في الاصحاح الـ14 : هنتكلم شوية عن المملكة الجنوبية.
يوآش أو يهوآش ملك إسرائيل. (وعلشان نفرّق بين يوآش ملك يهوذا، اللي قام بالإصلاحات. وبين يهوآش ملك إسرائيل، وده ملك شرير. ومذكور في سفر أخبار الأيام باسم: يهوآش. فهنقول علي ملك إسرائيل: يهوآش)
"مَلَكَ أمصيا بْنُ يُوآشَ مَلِكِ يَهُوذَا." ... في وقت مُلك يهوآش ملك إسرائيل. مَلك أمصيا علي مملكة يهوذا. وهو ابن يوآش ملك يهوذا.
ملحوظة: كل ملوك الجنوب، المملكة الجنوبية، مملكة يهوذا. كلهم من عيلة داود الملك والنبي.
في فترة كان ملك يهوذا وملك إسرائيل، ليهم نفس الأسماء. زي يوآش أو يهوآش.
وده كان نتيجة التحالف اللي حصل بين المملكتين. التحالف كان بين أسرة أخاب الملك الشرير، ملك إسرائيل. وبين أسرة يهوشافاط ملك يهوذا.
لكن من أول هنا: ابتديت الأسماء تختلف.
2كَانَ ابْنَ خَمْسٍ وَعِشْرِينَ سَنَةً حِينَ مَلَكَ، وَمَلَكَ تِسْعًا وَعِشْرِينَ سَنَةً فِي أُورُشَلِيمَ، وَاسْمُ أُمِّهِ يَهُوعَدَّانُ مِنْ أُورُشَلِيمَ. أمصيا ملك يهوذا، ابتدي مُلكه، وكان عنده 25 سنة.
"وَمَلَكَ تِسْعًا وَعِشْرِينَ سَنَةً فِي أُورُشَلِيمَ، وَاسْمُ أُمِّهِ يَهُوعَدَّانُ مِنْ أُورُشَلِيمَ." ... مُلكه استمر 29 سنة. واتذكر اسمه أمه، يَهُوعَدَّانُ. وهي برده من أورشليم، عاصمة مملكة يهوذا.
3وَعَمِلَ مَا هُوَ مُسْتَقِيمٌ فِي عَيْنَيِ الرَّبِّ، وَلكِنْ لَيْسَ كَدَاوُدَ أَبِيهِ، عَمِلَ حَسَبَ كُلِّ مَا عَمِلَ يُوآشُ أَبُوهُ. كان ماشي كويس قدام ربنا، في طريق ربنا. لكن مكانش زي داود الملك. مكانش بقلب كامل زي داود. هو من أحفاد داود الملك. مش ابنه طبعا المباشر. بينهم أجيال كتير.
داود الملك والنبي: كان نموذج بيتقاس عليه كل اللي جه بعده. نموذج في محبته لربنا. في طيبته. ومعاملات الله معاه.
"عَمِلَ حَسَبَ كُلِّ مَا عَمِلَ يُوآشُ أَبُوهُ." ... يوآش أبوه ملك يهوذا، عمل إصلاح وشال الأوثان. وعَمّر الهيكل. وأمصيا ابنه، عمل نفس الكلام.
الكلام ده يوضح: أنه مش علشان ابتدي بداية كويسة. يبقي لازم ينتهي نهاية كويسة.
وهنشوف أن البديات الحلوة، لوحدها مش كفاية.
4إِلاَّ أَنَّ الْمُرْتَفَعَاتِ لَمْ تُنْتَزَعْ، بَلْ كَانَ الشَّعْبُ لاَ يَزَالُونَ يَذْبَحُونَ وَيُوقِدُونَ عَلَى الْمُرْتَفَعَاتِ. "إِلاَّ أَنَّ الْمُرْتَفَعَاتِ لَمْ تُنْتَزَعْ،"... علي المرتفعات، كانوا بيعبدوا ربنا له المجد. مش في الهيكل. فهو كان المفروض يشيل المرتفعات.
وربنا له المجد كان قالهم، ميكونش ليكم آلهة أخري. ولا تقدموا ذبائح علي المرتفعات. لكن تقديم الذبيحة في الهيكل فقط. مش في أي مكان تاني. لكن هما كانوا بيسهلوا علي نفسهم مشقة النزول لأورشليم. علشان الهيكل في أورشليم.
طبعا ربنا له المجد في كل مكان. لكن ربنا كان بيعلمهم، لأنهم شعب بدائي. فربنا كان ماشي معاهم واحدة واحدة. وكان بيعلهم وحدة شعبه، اللي اختاره.
"بَلْ كَانَ الشَّعْبُ لاَ يَزَالُونَ يَذْبَحُونَ وَيُوقِدُونَ عَلَى الْمُرْتَفَعَاتِ." ... لكن كان في ناس بتعند وتُصر أنها تقدم لربنا ذبائح علي المرتفعات.
كان يوآش وابنه أمصيا، حاولوا انهم ينهوا فكرة المرتفعات. لكن منجحوش في كده.
5وَلَمَّا تَثَبَّتَتِ الْمَمْلَكَةُ بِيَدِهِ، قَتَلَ عَبِيدَهُ الَّذِينَ قَتَلُوا الْمَلِكَ أَبَاهُ. "وَلَمَّا تَثَبَّتَتِ الْمَمْلَكَةُ بِيَدِهِ،"... جميلة الآية ديه.
المملكة اللي ثبتها هو ربنا له المجد. لكن بإيد بشر. بمعني: ربنا هو اللي بيربي أولادنا، وبيهتم بيهم. بس عن طريقنا احنا، بإيد بابا وماما.
ربنا بيقول الكلمة. لكن علي لسان أبونا.
ربنا بيحول الخبز والخمر، لجسد ودم . لكن عن طريق الكهنة. عن طريق أبونا اللي بيصلي.
ربنا بيديك الرزق، لكن في شكل المجهود اللي بتبذله.
"قَتَلَ عَبِيدَهُ الَّذِينَ قَتَلُوا الْمَلِكَ أَبَاهُ." ... فالمملكة اتثبتت بإرادة ربنا له المجد. لكن بإيد أمصيا ملك يهوذا. وبعد ما اتثببت مملكته.. لو نفتكر في الاصحاح اللي فات، بالرغم أن يوآش ملك يهوذا، كان إنسان كويس. لكن قاموا عليه اتنين وقتلوه.
فأول ما المملكة اتثبتت، ابتدي أمصيا بن يوآش ملك يهوذا، ينتقم لأبوه. وراح موت الناس اللي موتوا أبوه.
6وَلكِنَّهُ لَمْ يَقْتُلْ أَبْنَاءَ الْقَاتِلِينَ حَسَبَ مَا هُوَ مَكْتُوبٌ فِي سِفْرِ شَرِيعَةِ مُوسَى، حَيْثُ أَمَرَ الرَّبُّ قَائِلاً: «لاَ يُقْتَلُ الآبَاءُ مِنْ أَجْلِ الْبَنِينَ، وَالْبَنُونَ لاَ يُقْتَلُونَ مِنْ أَجْلِ الآبَاءِ. إِنَّمَا كُلُّ إِنْسَانٍ يُقْتَلُ بِخَطِيَّتِهِ». أمصيا قتل اللي قتلوا أبوه يوآش ملك يهوذا. ومقتلش أولاد اللي قتلوا أبوه.
"حَسَبَ مَا هُوَ مَكْتُوبٌ فِي سِفْرِ شَرِيعَةِ مُوسَى،" ... لأن الشريعة كانت بتقول: الشخص اللي يخطئ، دمه علي نفسه. لكن أولاده أو قرايبه ملهومش ذنب.
"حَيْثُ أَمَرَ الرَّبُّ قَائِلًا: لاَ يُقْتَلُ الآبَاءُ مِنْ أَجْلِ الْبَنِينَ، وَالْبَنُونَ لاَ يُقْتَلُونَ مِنْ أَجْلِ الآبَاءِ. إِنَّمَا كُلُّ إِنْسَانٍ يُقْتَلُ بِخَطِيَّتِهِ." ... وديه كانت شريعة موسي النبي، حسب أمر ربنا له المجد، لشعب إسرائيل.
7هُوَ قَتَلَ مِنْ أَدُومَ فِي وَادِي الْمِلْحِ عَشَرَةَ آلاَفٍ، وَأَخَذَ سَالِعَ بِالْحَرْبِ، وَدَعَا اسْمَهَا يَقْتَئِيلَ إِلَى هذَا الْيَوْمِ. أمصيا ملك يهوذا، دخل حرب. وانتصر فيها.
ربنا نصره علي أدوم. أدوم: كان بيعادي شعب ربنا.
" سَالِعَ" ... كانت بلد في أدوم. وأدوم من نسل عيسو، أخو يعقوب.
8حِينَئِذٍ أَرْسَلَ أَمَصْيَا رُسُلاً إِلَى يَهُوآشَ بْنِ يَهُوأَحَازَ بْنِ يَاهُو مَلِكِ إِسْرَائِيلَ قَائِلاً: «هَلُمَّ نَتَرَاءَ مُواجَهَةً». أمصيا ملك يهوذا، عمل مشكلة. بعت ليهوآش ملك إسرائيل، رسالة:
"قَائِلًا: هَلُمَّ نَتَرَاءَ مُواجَهَةً." ... تعالي نعمل مواجهة مع بعض. نحارب بعض. نشوف مين فينا الأقوى.
وابتديت العداوة ترجع تاني بين المملكتين.
وديه أول مرة ملك الجنوب، المملكة الجنوبية. يحارب ملك الشمال، المملكة الشمالية.
لأن من أيام آخاب ملك إسرائيل، الشرير: ملك المملكة الجنوبية وملك المملكة الشمالية، الاتنين أصحاب.
ومرة كانت بين يربعام بن بناط، ورحبعام بن سُليمان، قلق ما بينهم. وحاول رحبعام بن سُليمان، يحارب يربعام بن نباط. وجاله نبي، وحذره من أنه يحارب يربعام. فسحب جيشه ورجع.
لكن هنا ديه أول مرة يطلع ملك، بعد ما ثبُتت مملكته، ويدور علي حرب مع المملكة الشمالية.
9فَأَرْسَلَ يَهُُوآشُ مَلِكُ إِسْرَائِيلَ إِلَى أَمَصْيَا مَلِكِ يَهُوذَا قَائِلاً: «اَلْعَوْسَجُ الَّذِي فِي لُبْنَانَ أَرْسَلَ إِلَى الأَرْزِ الَّذِي فِي لُبْنَانَ يَقُولُ: أَعْطِ ابْنَتَكَ لابْنِي امْرَأَةً. فَعَبَرَ حَيَوَانٌ بَرِّيٌّ كَانَ فِي لُبْنَانَ وَدَاسَ الْعَوْسَجَ. يهوآش ملك إسرائيل، استخف بأمصيا ملك يهوذا.
وكلمه بتشبيهات:
" اَلْعَوْسَجُ" ... نبات صغير ضعيف. زي العُشب اللي بيطلع شيطاني. يعني محدش زرعه.
وطبعا بيقصد بالعوسج: هو أمصيا ملك يهوذا.
" الأَرْزِ" ... يوآش ملك إسرائيل، بيقصد نفسه، وبيشه نفسه: بالأرز. لأنه شجر ضخم جدا وقوي جدا.
" فَعَبَرَ حَيَوَانٌ بَرِّيٌّ كَانَ فِي لُبْنَانَ" ... يهوآش ملك إسرائيل، يقصد بالحيوان البري، هو جيشه.
المعني هنا:
العوسج أتجرأ، وقال للأرز: أنا هأخد منك أرضك. فالأرز بتاع لبنان، بعت للعوسج: الحيوان البري، اللي هو جيش يهوآش ملك إسرائيل. وداس عليه.
يهوآش ملك إسرائيل، عاوز يقوله: لو فكرت أحاربك. هأمحيك خالص يا أمصيا ملك يهوذا.
وكأن يوآش ملك إسرائيل، بالتشبيه ده، بيستفز أمصيا ملك يهوذا.
10إِنَّكَ قَدْ ضَرَبْتَ أَدُومَ فَرَفَعَكَ قَلْبُكَ. تَمَجَّدْ وَأَقِمْ فِي بَيْتِكَ. وَلِمَاذَا تَهْجُمُ عَلَى الشَّرِّ فَتَسْقُطَ أَنْتَ وَيَهُوذَا مَعَكَ؟». أنت يا أمصيا، علشان انتصرت علي أدوم، فافتكرت نفسك حاجة؟
"تَمَجَّدْ وَأَقِمْ فِي بَيْتِكَ." ... خد المجد كله يا أمصيا، وخليك في بيتك. (يعني: بلاش تيجي وتجُر شَكلّي)
"وَلِمَاذَا تَهْجُمُ عَلَى الشَّرِّ فَتَسْقُطَ أَنْتَ وَيَهُوذَا مَعَكَ؟" ... يهوآش ملك إسرائيل، كأنه بيقول: أنا بتاع الشر كله. هيتجي تهجم عليا؟ لو عملت كده، هتضيع نفسك وهتضيع مملكتك معاك.
السر اللي وصّل أمصيا لكده " فَرَفَعَكَ قَلْبُكَ." ... حسيت أنك بقيت حاجة. بقيت مغرور.
11فَلَمْ يَسْمَعْ أَمَصْيَا، فَصَعِدَ يَهُوآشُ مَلِكُ إِسْرَائِيلَ وَتَرَاءَيَا مُواجَهَةً، هُوَ وَأَمَصْيَا مَلِكُ يَهُوذَا فِي بَيْتِ شَمْسٍ الَّتِي لِيَهُوذَا. بسبب كبرياء أمصيا ملك يهوذا. مسمعش لكلام يهوآش ملك إسرائيل.
وفعلا حصل حرب ما بينهم. وانتصر يهوآش ملك إسرائيل علي أمصيا. في بيت شمس.
" بَيْتِ شَمْسٍ الَّتِي لِيَهُوذَا." ... عند الحدود الشمالية لأرض يهوذا وتبعد عشرين ميلًا غرب أورشليم.
وهي المدينة التي وُضِعَ فيها تابوت العهد عندما ردَّه الفلسطينيون. (1 صم 6).
سفر أخبار أيام التاني:
ايه اللي خلي أمصيا ملك يهوذا، يعمل كده. وينتهي النهاية الصعبة ديه؟
ده هيوضح هنا في سفر أخبار أيام التاني إصحاح 25.
إصحاح 25: وديه قصة لطيفة. بتورينا ازاي الإنسان بعد ما بيبتدي صح. بيرجع ويتوه ويضيع.
آية 1 و2 ... "وعمل المستقيم في عيني الرب ولكن ليس بقلب كامل." ... ساعات الإنسان ممكن يعمل حاجة صح في حياته. لكن قلبه مش كامل تجاه ربنا.
مثلا ممكن حد يصلي مرة بأمانة. أو يخدم أو يصوم من قلبه. أو يحضر قداس، بكل مشاعره ومركز وقلبه مع ربنا.
لكن ميكونش ربنا هو كل حاجة في حياته. القلب مش كله لربنا.
وده اللي حصل مع أمصيا النبي.
آية 5 ... "وجمع أمصيا يهوذا وأقامهم حسب بيوت الآباء رؤساء ألوف ورؤساء مئات في كل يهوذا وبنيامين وأحصاهم من ابن عشرين سنة فما فوق فوجدهم ثلاث مئة ألف مختار خارج للحرب حامل رمح وترس" ... عد القوة العسكرية بتاعته، وأحصاهم: من سن 20 سنة فما فوق. وكانوا 300 ألف واحد للحرب.
ولأن قلبه مش كامل قدام ربنا له المجد، حس أن ال 300 ألف دول، قوته هو. وأن عنده قوة حربية جامدة جدا.
آية 6 ... "واستأجر من إسرائيل مئة ألف جبار باس بمئة وزنة من الفضة." ... وكمان راح أستأجر من مملكة إسرائيل، 100 ألف تاني.
ب 100 وزنة من الفضة، وده ثمن قليل جدا.
آية 7 ... "وجاء إليه رجل الله قائلا أيها الملك لا يأتي معك جيش إسرائيل لان الرب ليس مع إسرائيل مع كل بني افرايم." ... النبي قاله: أن ربنا مش مع المملكة الشمالية. لأنهم بيعبدوا البعل.
آية 8 ... "وان ذهبت أنت فاعمل وتشدد للقتال لان الله يسقطك أمام العدو لان عند الله قوة للمساعدة وللإسقاط" ... النبي قاله: لا تعتمد علي قوة حد، يكون ضد ربنا له المجد. متعتمدش علي حد مش ماشي مع ربنا.
لو عاوز مساعدة، خلي اعتمادك كامل علي ربنا.
آية 9 ... "فقال أمصيا لرجل الله فماذا يعمل لأجل المئة الوزنة التي أعطيتها لغزاة إسرائيل فقال رجل الله ان الرب قادر ان يعطيك أكثر من هذه." ...
" فقال أمصيا لرجل الله فماذا يعمل لأجل المئة الوزنة التي أعطيتها لغزاة إسرائيل" ... أمصيا الملك: بيسأل: طيب والفلوس اللي دفعتها؟
ساعات لما الواحد يروح يعمل حاجة شر وغلط، ويكون دافع فلوس كتير. بيستخسر يسيبها، علشان اللي دفعه.
"فقال رجل الله ان الرب قادر ان يعطيك أكثر من هذه." ... ربنا قادر أنه يديك أكتر من اللي أنت هتخسره.
بس متحطش ايدك في ايد الناس اللي اتخلو عن عبادة ربنا.
آية 10 ... "فافرز أمصيا الغزاة الذين جاءوا إليه من افرايم لكي ينطلقوا إلى مكانهم فحمي غضبهم جدا على يهوذا ورجعوا إلى مكانهم بحمو الغضب." ... وهنا أمصيا الملك بيعمل حاجة تانية كويسة. أن سمع كلام رجل الله.
الحاجة الأولي: أنه لما انتقم لأبوه، نفذ شريعة موسي.
والجيش اللي استأجره من مملكة إسرائيل، رجعوا غضبانين. لأنهم حسوا انها عملية احتقار ليهم، من الملك. لأنه بعد ما اتفق معاهم، قالهم أنا مش عاوزكم.
بس برده، بيعمل مرة واتنين حاجة كويسة. لكن قلبه مش كامل مع ربنا.
ودلوقتي هيبتدي يبان عدم كمال قلبه:
آية 11 ... ديه قصة النُصرة اللي انتصرها علي أدوم (اللي احنا شوفناه هنا في اصحاح 14 من سفر ملوك التاني).
"و اما أمصيا فتشدد واقتاد شعبه وذهب إلى وادي الملح وضرب من بني ساعير عشرة آلاف."
آية 12 ... "وعشرة آلاف أحياء سباهم بنو يهوذا وأتوا بهم إلى راس سالع وطرحوهم عن راس سالع فتكسروا اجمعون."
آية 13 ... "وأما الرجال الغزاة الذين أرجعهم أمصيا عن الذهاب معه إلى القتال فاقتحموا مدن يهوذا من السامرة إلى بيت حورون و ضربوا منهم ثلاث آلاف و نهبوا نهبا كثيرا." ...
يعني يارب أنا سمعت كلام النبي. تكون ديه النتيجة؟ أن جيش إسرائيل اللي رجعتهم، راحوا أخدوا شوية بلاد من عندي، ونهبوها؟
طبعا مملكة إسرائيل عملت كده، علشان اتغاظوا من أمصيا ملك يهوذا، انهم رجعهم.
هو ده جزاء اني سمعت كلام النبي، يارب؟
لكن هنا بيوضح: أن الإنسان اللي قلبه مش كامل مع ربنا، ربنا بيبقي كاشفه من الأول.
ربنا له المجد عارف، اذا كان فعلا الإنسان ماشي معاه بقلب كامل ولا لأ. ولا مجرد طاعة شكلية ظاهرية؟
آية 14 ... "ثم بعد مجيء أمصيا من ضرب الآدوميين اتى بآلهة بني ساعير وأقامهم له آلهة وسجد أمامهم وأوقد لهم." ... بعد ما انتصر علي بين ساعير، جاب الآلهة بتاعتهم.
" وأقامهم له آلهة وسجد أمامهم وأوقد لهم." ... كانت فكرته. هو اللي جاب الآلهة ديه. وابتدي يعبدها ويقدم ذبائح ليها. مع أن الآلهة ديه متقدرش تحمي لا شعب ولا حتي نفسها، لكنه أوقد لهم. قدم ذبائح.
هو قال: صحيح أنا انتصرت علي بني ساعير (الأدوميين). فهو عنده فكرة أن آلهة بني ساعير، يمكن أنها تساعد بني ساعير والمرة الجاية ينتصروا عليا.
فقال: أحسن حاجة، علشان أضمن النُصرة علطول، وان بني ساعير ميرجعوش يحاربوني. وينتصروا عليا.
اني أخد الآلهة بتاعتهم وأكرمهم. واعبدهم. علشان يبقوا معايا. وميقدروش ينتصروا عليا بعد كده.
وديه خطورة القلب اللي مش كامل مع ربنا. ولا ماشي كامل في طريق ربنا، ووصاياه.
وده يورينا أنه كان بيعتبر ربنا له المجد، كأنه اله من ضمن الآلهة بتاعة بني سعير.
صحيح هو بيسمع كلام ربنا. بس قلبه مش كامل مع ربنا.
آية 15 ... "فحمي غضب الرب على أمصيا وأرسل إليه نبيا فقال له لماذا طلبت آلهة الشعب الذي لم ينقذوا شعبهم من يدك." ... ربنا غضب عليه. وبعت له نبي.
آية 16 ... "وفيما هو يكلمه قال له هل جعلوك مشيرا للملك كف لماذا يقتلونك فكف النبي وقال قد علمت ان الله قد قضى بهلاكك لأنك عملت هذا و لم تسمع لمشورتي." ...
"وفيما هو يكلمه قال له هل جعلوك مشيرا للملك" ... بصفتك ايه جاي تقولي الكلام ده؟
"كف لماذا يقتلونك" ... أمصيا بيقول للنبي: متكلمنيش كده.
وديه تعتبر غباوة روحية. لأنه مش عاوز يسمع كلام ربنا له المجد. مش عاوز توبيخ. ولا عاوز يسمع ولا يطيع.
"فكف النبي وقال قد علمت ان الله قد قضى بهلاكك" ... عاوزني اسكت؟ أنا هأسكت.
"لأنك عملت هذا ولم تسمع لمشورتي." ... هأسكت. لأنك سمعت ووصللك مني كلام ربنا. وفي الأخر مسمتعتش مشورتي.
آية 17 ل 23: هيبتدي يحكي قصة المواجهة مع يهوآش ملك إسرائيل (الموجودة في سفر ملوك التاني 14).
لأن قلبه مش كامل. فعاوز يعمل اللي علي مزاجه. ومش عاوز يسمع. فابتدي يحس أنه كبير واتكبر.
آية 17 ... فراح قال لملك إسرائيل " قائلا هلم نتراء مواجهة." ... وحصلت المواجهة فعلا.
آية 24 ... أخد ملك إسرائيل، كل الذهب والفضة والأنية الموجودة في بيت ربنا. وفي خزائن بيت الملك.
آية 27 ... "ومن حين حاد أمصيا من وراء الرب فتنوا عليه في أورشليم فهرب إلى لخيش فأرسلوا وراءه إلى لخيش وقتلوه هناك."
"ومن حين حاد أمصيا من وراء الرب" ... لما مشي وحاد عن طريق ربنا.
" فتنوا عليه في أورشليم فهرب إلى لخيش فأرسلوا وراءه إلى لخيش وقتلوه هناك." ... حصل فتنة، أن حتي شعبه، اللي كان هو ملك عليهم. الشعب نفسه فتن عليه ورفضه. وقتلوه.
آية 28 ... "وحملوه على الخيل ودفنوه مع ابائه في مدينة يهوذا." ... ودفنوه. مع أبائه في مدينة يهوذا.
12فَانْهَزَمَ يَهُوذَا أَمَامَ إِسْرَائِيلَ وَهَرَبُوا كُلُّ وَاحِدٍ إِلَى خَيْمَتِهِ. "فَانْهَزَمَ يَهُوذَا أَمَامَ إسرائيل"... أمصيا ملك يهوذا وجيشه، اتهزم من جيش يهوآش ملك إسرائيل.
"وَهَرَبُوا كُلُّ وَاحِدٍ إِلَى خَيْمَتِهِ." ... وكل جيش أمصيا، جيش مملكة يهوذا، كل واحد رجع وهرب لخيمته.
13وَأَمَّا أَمَصْيَا مَلِكُ يَهُوذَا ابْنُ يَهُوآشَ بْنِ أَخَزْيَا فَأَمْسَكَهُ يَهُُوآشُ مَلِكُ إِسْرَائِيلَ فِي بَيْتِ شَمْسٍ، وَجَاءَ إِلَى أُورُشَلِيمَ وَهَدَمَ سُورَ أُورُشَلِيمَ مِنْ بَابِ أَفْرَايِمَ إِلَى بَابِ الزَّاوِيَةِ، أَرْبَعَ مِئَةِ ذِرَاعٍ. يهوآش ملك إسرائيل، مسك أمصيا ملك يهوذا.
"وَجَاءَ إِلَى أُورُشَلِيمَ وَهَدَمَ سُورَ أُورُشَلِيمَ مِنْ بَابِ أَفْرَايِمَ إِلَى بَابِ الزَّاوِيَةِ، أَرْبَعَ مِئَةِ ذِرَاعٍ." ... وأخده ودخل بيه أورشليم. كنوع من الإذلال لأمصيا ملك يهوذا. وهد سور أورشليم.
وبكده بقت المدينة من غير أسوار. وده معناه: أن مبقاش عندهم حماية. لأن سور المدينة، بيحافظ علي المدينة، من أي هجوم للأعداء.
وده كان تأديب من ربنا له المجد، لمملكة يهوذا. لأن يهوذا بعد انتصارهم على أدوم، عبدوا آلهة أدوم.
14وَأَخَذَ كُلَّ الذَّهَبِ وَالْفِضَّةِ وَجَمِيعَ الآنِيَةِ الْمَوْجُودَةِ فِي بَيْتِ الرَّبِّ وَفِي خَزَائِنِ بَيْتِ الْمَلِكِ وَالرُّهَنَاءَ وَرَجَعَ إِلَى السَّامِرَةِ. ملك إسرائيل، يهوآش: أخد كل الذهب والفضة وكل آنية الهيكل، بيت ربنا. وكل اللي في خزائن بيت أمصيا ملك يهوذا. حاجة في منتهي الذل والإهانة. 15وَبَقِيَّةُ أُمُورِ يَهُوآشَ الَّتِي عَمِلَ وَجَبَرُوتُهُ وَكَيْفَ حَارَبَ أَمَصْيَا مَلِكَ يَهُوذَا، أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ إِسْرَائِيلَ؟ كل أمور يهوآش ملك إسرائيل، الباقية. وحربه مع أمصيا ملك يهوذا.
"أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ إسرائيل؟" ... مكتوبة في سفر خاص بملوك إسرائيل. وهو سفر غير أخبار الأيام، الموجود في الكتاب المقدس.
16ثُمَّ اضْطَجَعَ يَهُُوآشُ مَعَ آبَائِهِ، وَدُفِنَ فِي السَّامِرَةِ مَعَ مُلُوكِ إِسْرَائِيلَ، وَمَلَكَ يَرُبْعَامُ ابْنُهُ عِوَضًا عَنْهُ. مات يهوآش ملك إسرائيل واتدفن في السامرة مع ملوك إسرائيل.
"وَمَلَكَ يَرُبْعَامُ ابْنُهُ عِوَضًا عَنْهُ." ... وجه ابنه يربعام بن يهوآش ملك إسرائيل، بعده.
17وَعَاشَ أَمَصْيَا بْنُ يُوآشَ مَلِكُ يَهُوذَا بَعْدَ وَفَاةِ يَهُوآشَ بْنِ يَهُوأَحَازَ مَلِكِ إِسْرَائِيلَ خَمْسَ عَشَرَةَ سَنَةً. "عَاشَ" ... عاش. مقالش مَلك. لأنه عاش مهزوز، لمدة 15 سنة.
لحد ما فتنوا عليه وقتلوه. وبعد موت يهوآش ملك إسرائيل، عاش أمصيا ملك يهوذا 15 سنة.
18وَبَقِيَّةُ أُمُورِ أَمَصْيَا، أَمَا هِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ يَهُوذَا؟ باقي قصته موجودة في سفر خاص بملوك يهوذا. 19وَفَتَنُوا عَلَيْهِ فِتْنَةً فِي أُورُشَلِيمَ، فَهَرَبَ إِلَى لَخِيشَ، فَأَرْسَلُوا وَرَاءَهُ إِلَى لَخِيشَ وَقَتَلُوهُ هُنَاكَ. "لَخِيشَ" ... مدينة محصنة تبعد حوالي خمس وثلاثين ميلًا جنوب غرب أورشليم.
في ناس عملوا ثورة علي أمصيا ملك يهوذا، وقتلوه. بعد هروبه الي لخيش. قتلوه هناك.
20وَحَمَلُوهُ عَلَى الْخَيْلِ فَدُفِنَ فِي أُورُشَلِيمَ مَعَ آبَائِهِ فِي مَدِينَةِ دَاوُدَ. لما قتلوه، حطوه علي ظهر الخيل، ورجعوا بيه علي أورشليم. واتدفن مع أبائه في مدينة داود. 21وَأَخَذَ كُلُّ شَعْبِ يَهُوذَا عَزَرْيَا، وَهُوَ ابْنُ سِتَّ عَشَرَةَ سَنَةً، وَمَلَّكُوهُ عِوَضًا عَنْ أَبِيهِ أَمَصْيَا. الشعب أخد عَزَرْيَا. وكمان اسمه عُزيا. هو نفس اسم عَزَرْيَا. لأن بعد كده هيتذكر ليه اسم عُزيا. وكان عُمره 16 سنة.
"وَمَلَّكُوهُ عِوَضًا عَنْ أَبِيهِ أمصيا." ... عَزَرْيَا أو عُزيا، هو ابن أمصيا ملك يهوذا. وبعد قتل أمصيا، مَلكوه علي يهوذا.
22هُوَ بَنَى أَيْلَةَ وَاسْتَرَدَّهَا لِيَهُوذَا بَعْدَ اضْطِجَاعِ الْمَلِكِ مَعَ آبَائِهِ. عُزيا: عرف يرجع البلد اللي اسمها، أَيْلَةَ. اللي هي إيلات حاليا. علي خليج العقبة.
(سُليمان الحكيم كان عاملها مصيف ليه.)
أمصيا لغاية دلوقتي كان إنسان كويس. وحاول يمشي في طريق يوآش أبوه. لكن مشكلته أنه دخله الكبرياء. حس بنفسه أنه كبير.
زي بعض الخدام: في الأول يبقي مُتضع. وبيسأل علي الحاجات اللي مش فاهمها. وبيأخد إرشاد الأب الروحي أو أب اعترافه.
وبعد كده يقول: احنا مش محتاجين نحضّر للخدمة. قولنا الكلام ده كتير قبل كده.
ولما يجي خادم زميله يقول درس مدارس الأحد، يقعد يعّدل عليه في دماغه.
وأول ما يرتفع قلبه، يجي له يهوأش ، يهزمه. لأن يهوآش يُمثل الشيطان.
لأن دايما ملك المملكة الشمالية، يُمثل عدو الخير.
فأول ما الإنسان يرتفع قلبه. يسقط..
23فِي السَّنَةِ الْخَامِسَةَ عَشَرَةَ لأَمَصْيَا بْنِ يُوآشَ مَلِكِ يَهُوذَا، مَلَكَ يَرُبْعَامُ بْنُ يُوآشَ مَلِكِ إِسْرَائِيلَ فِي السَّامِرَةِ إِحْدَى وَأَرْبَعِينَ سَنَةً. أمصيا ملك يهوذا، كان ليه في الحُكم 15 سنة في الوقت ده
"مَلَكَ يَرُبْعَامُ بْنُ يُهوآشَ مَلِكِ إسرائيل فِي السَّامِرَةِ إِحْدَى وَأَرْبَعِينَ سَنَةً." ... يربعام بن يهوآش ملك إسرائيل، مَلك علي مملكة إسرائيل. وحَكم مدة 40 سنة.
وعلشان نفرق يربعام ين يوآش ملك المملكة الشمالية. عن يربعام بن نباط. هنسميه : يربعام التاني.
ويربعام التاني مَلك 40 سنة. وديه فترة طويلة في الحُكم.
يربعام ملك إسرائيل: مذكور في التاريخ. مش بس في الكتاب المقدس. مذكور في التاريخ والآثار. لأنه قعد مدة حُكم طويلة. وأعاد للمملكة الشمالية مجدها. المملكة بقت غنية جدا، المستوي الاقتصادي ارتفع جدا. ازدهرت المملكة زراعيا واجتماعيا.
فالناس مستواها ارتقي. وبقي معاها فلوس. فزادوا في الرفاهية. وبالتالي في الخطية.
24وَعَمِلَ الشَّرَّ فِي عَيْنَيِ الرَّبِّ. لَمْ يَحِدْ عَنْ شَيْءٍ مِنْ خَطَايَا يَرُبْعَامَ بْنِ نَبَاطَ الَّذِي جَعَلَ إِسْرَائِيلَ يُخْطِئُ. يربعام التاني بن يهوآش ملك إسرائيل، مشي في طريق الشر. علي نفس نهج يربعام بن نباط. وكمان اسمه علي نفس اسم يربعام بن نباط.
وبالغم من كده، لكن ربنا له المجد أداله الغني والانتصار. وهنشوف ليه:
25هُوَ رَدَّ تُخُمَ إِسْرَائِيلَ مِنْ مَدْخَلِ حَمَاةَ إِلَى بَحْرِ الْعَرَبَةِ، حَسَبَ كَلاَمِ الرَّبِّ إِلهِ إِسْرَائِيلَ الَّذِي تَكَلَّمَ بِهِ عَنْ يَدِ عَبْدِهِ يُونَانَ بْنِ أَمِتَّايَ النَّبِيِّ الَّذِي مِنْ جَتَّ حَافِرَ. بالرغم أن ملك إسرائيل، كان شرير. والشعب كان شرير جدا. الا أن ربنا له المجد، أداهم غِني ونُصرة.
" حَمَاةَ" ... هي سوريا. المملكة الآرامية. وكانت المملكة الآرامية، أعداء شعب إسرائيل.
والمملكة الآرامية (سوريا) كانت أخدت أرض من شعب إسرائيل، وهزموهم.
لكن بصلاة يونان النبي، قدر ملك إسرائيل، أنه يسترد أرضه من تاني اللي أتاخدت منهم.
يونان النبي.
الأنبياء المشهورين، ظهروا في الوقت ده: هوشع النبي – يوئيل النبي - عاموس النبي - عوبديا النبي – يونان النبي - ميخا النبي.. فالأنبياء الستة دول، كانوا موجودين في العصر ده.
- يُقال أن لما يونان راح يبشر في نينوي. ولقي الناس تابوا، وأن البلد ازدهرت. وربنا محرقهاش بعد 40 يوم، حسب النبوة. وده لأن الناس تابت.
في كتاب التلمود اليهودي (خاص باليهود): بيقول أن يونان النبي رجع علي بلده إسرائيل، في المملكة الشمالية. لأنه كان من مملكة إسرائيل. وقال لربنا: يارب معقول تسامح بتوع نينوي. وتخليهم يزدهروا، ويبقوا عايشين في حضارة كويسة. وهو كان ممكن تحرقهم بسبب خطاياهم.
واحنا شعبك وأولادك، نتدهور وحالتنا تسوء. فيارب: يربعام ده ابنك. وفيه منه أمل. وممكن يعمل حاجات كويسة.
فكان بسبب صلوات يونان النبي، ربنا خلي أيام يربعام التاني ملك يهوذا، أيام كويسة.. لعله يتوب.
فلما يكون الشعب في راحة من الحروب، يلتف يربعام وشعبه لربنا ويتوبوا.
لكن اللي حصل هو العكس. لما استراحوا، زادوا في الشر والشهوة. وعبادة الأصنام.
نبوات يهوشع النبي ويوئيل النبي وعاموس النبي، كانت في أيام يربعام التاني ملك إسرائيل. وبالأخص في سفر هوشع النبي وعاموس النبي: مكتوب في أول سطر من نبواتهم، أن فترة نبواتهم كانت في أيام يربعام التاني.
26لأَنَّ الرَّبَّ رَأَى ضِيقَ إِسْرَائِيلَ مُرًّا جِدًّا، لأَنَّهُ لَمْ يَكُنْ مَحْجُوزٌ وَلاَ مُطْلَقٌ وَلَيْسَ مُعِينٌ لإِسْرَائِيلَ. " مَحْجُوزٌ" ... يعني: العبيد.
" مُطْلَقٌ" ... يعني: الانسان الحُر.
فالشعب كان صعبان علي ربنا له المجد أوي. وبالرغم أن الشعب مقدمش توبة. لكن ربنا حن عليهم. لأنه شاف ضيق إسرائيل مُر جدا.
يونان النبي قال لربنا له المجد: يارب إسرائيل ملهوش حد، إسرائيل غلبان. لو شجعتنا بالخير (يكون عند الشعب خير)، الناس ديه هتتغير وهتبقي كويسة.
آية جميلة أوي ولازم نمسك فيها.
لما الواحد يكون متضايق، يقول لربنا له المجد: صحيح يارب أنا وحش أوي وخاطي. حتي توبتي توبة ضعيفة ومش حقيقية. وغير كاملة.
لكن يارب أنت بتحبني، زي ما بتحب شعب إسرائيل. وشايف ضيقي انه ضيق عظيم. ومُر جدا. لكن يارب أنت حنين.
فلازم نمسك في رحمة ربنا.
ربنا صعب عليهم منهم، أن مفيش حد قادر يتمتع بالحرية من الخطية والشر. وفقدوا معني الحياة. فربنا أشفق عليهم.
وديه كانت أخر فرصة ليهم.
ربنا له المجد، فضل يتعامل معاهم بالمراحم الإلهية. بالرغم من شرورهم. وربنا قبل شفاعة يونان النبي عنهم. لكن لما هيصروا علي خطاياهم وعبادة الأوثان، وهيستمروا فيها.
هنشوف في الاصحاح ال17، نهاية مملكة إسرائيل. وكانت نهاية صعبة. كانت بالسبي. لأنهم مستفادوش من مراحم ربنا عليهم.
ربنا عاوز يرحم. يسامح. يُفك الضيقة. لكن الإنسان في غباوته، يصر علي سلوكه الخاطئ.
27وَلَمْ يَتَكَلَّمِ الرَّبُّ بِمَحْوِ اسْمِ إِسْرَائِيلَ مِنْ تَحْتِ السَّمَاءِ، فَخَلَّصَهُمْ بِيَدِ يَرُبْعَامَ ابْنِ يُوآشَ. ربنا طوّل باله عليهم كتير. ولسه مديهم فرصة لغاية دلوقتي.
"فَخَلَّصَهُمْ بِيَدِ يَرُبْعَامَ ابْنِ يُوآشَ." ... ربنا خلصهم عن طريق يربعام التاني. مع أنه مكانش كويس. وكان بيعمل الشر في عين ربنا.
ربنا من كتر شر الناس، ولغاية أيام يربعام التاني ملك إسرائيل. كان ممكن يبعت السبي دلوقتي.
لكن ربنا له المجد، أجل السبي شوية. وأدِي فرصة للازدهار. وأن الأنبياء يوصلوا رسالة ربنا للشعب والملك. زي ما حصل في تضرعات يونان النبي لربنا له المجد، عن شعبه. بسبب صلوات القديسين.
واحنا عايشين بصلوات القديسين عننا.
في سنكسار قصة الأنبا بولا: بيقول، أن ربنا ظهر للأنبا انطونيوس. وقاله: روح هتلاقي واحد اسمه بولا. والأرض لم تستحق أنه يمشي عليها.
وربنا له المجد قال للأنبا انطونيوس: انا بسببه مبارك في مصر. ومش بأحيب فيضانات، تغرق مصر. وبسببه مصر مش بتحصل فيها مجاعات. مع أن البلاد اللي حواليها بيكون فيها مجاعات.
فصلوات يونان النبي، مدت في العمر الافتراضي لمملكة إسرائيل.
28وَبَقِيَّةُ أُمُورِ يَرُبْعَامَ وَكُلُّ مَا عَمِلَ وَجَبَرُوتُهُ، كَيْفَ حَارَبَ وَكَيْفَ اسْتَرْجَعَ إِلَى إِسْرَائِيلَ دِمَشْقَ وَحَمَاةَ الَّتِي لِيَهُوذَا، أَمَاهِيَ مَكْتُوبَةٌ فِي سِفْرِ أَخْبَارِ الأَيَّامِ لِمُلُوكِ إِسْرَائِيلَ؟ " دِمَشْقَ" ... اللي هي آرام. أيام بنهدد وحزائيل ملوك آرام.
يربعام التاني: أخد دمشق من مملكة آرام. استرد دمشق.. لأن دمشق، أصلا كانت تبع مملكة داود النبي والملك.
وكل أمور يربعام التاني ملك إسرائيل، مكتوبة في سفر خاص بملوك إسرائيل.
29ثُمَّ اضْطَجَعَ يَرُبْعَامُ مَعَ آبَائِهِ، مَعَ مُلُوكِ إِسْرَائِيلَ، وَمَلَكَ زَكَرِيَّا ابْنُهُ عِوَضًا عَنْهُ. مات يربعام ملك إسرائيل واتدفن مع آبائه. وجه ابنه زكريا، ومَلك علي إسرائيل.
وكانت فترة حُكم زكريا الملك: 6 شهور فقط.
دلوقتي الاتنين الملوك الجداد: عزريا أو عُزيا ملك يهوذا.
وزكريا بن يربعام ملك إسرائيل.
⪢