10 أَمَّا شِبْهُ وُجُوهِهَا فَوَجْهُ إِنْسَانٍ وَوَجْهُ أَسَدٍ لِلْيَمِينِ لأَرْبَعَتِهَا، وَوَجْهُ ثَوْرٍ مِنَ الشِّمَالِ لأَرْبَعَتِهَا، وَوَجْهُ نَسْرٍ لأَرْبَعَتِهَا. وكأنه عاوز يقول إن كل الكائنات ديه عبارة عن وجوه (وشوش)، ومرة تانية هيقولنا كلها أعين. يعني عاوز يقول: أن التطلع لله بلا أي عوائق، وباستمرار. مش بيزهقوا. وكمان شوية هيقولنا: اهم لما بيمشوا، بيرجعوا كالبرق... زي بالظبط كام مرة بنسيب الصلاة وبيبقي نفسنا نرجع نصلي تاني ... فهما مش قادرين يسيبوا الحضرة الالهية من جمال وحلاوة محبة ربنا.
كلهم اوجه وعيون: اشارة الي كمال قدرة ربنا، ووجوده في كل مكان. وهو رب الارباب واله الالهة. ومش قادرين يقعدوا ثانية ميبصوش لربنا له المجد.
الكائنات ديه ليها 4 اوجه:
الوجه الاول ... وجه إنسان.
الوجه التاني ... وجه اسد.
الوجه التالت ... وجه الثور.
الوجه الرابع... وجه نسر.
11 فَهذِهِ أَوْجُهُهَا. أَمَّا أَجْنِحَتُهَا فَمَبْسُوطَةٌ مِنْ فَوْقُ. لِكُلِّ وَاحِدٍ اثْنَانِ مُتَّصِلاَنِ أَحَدُهُمَا بِأَخِيهِ، وَاثْنَانِ يُغَطِّيَانِ أَجْسَامَهَا. بيأكد علي فكرة ان أجنحتهم متصلة ببعض.
" وَاثْنَانِ يُغَطِّيَانِ أَجْسَامَهَا" ... هنا موضوح الجناحين اللي بيغطوا أجسامهم بيهم.
"اجسامها" ... دول مخلوقات نورانية. طيب فين الجسد اللي بيغطوه؟ أصل هي ديه الرهبة بتاعة الجالس علي العرش.
علشان كده لما نيجي الكنيسة لازم يبقي عندنا مخافة ربنا في قلوبنا دايما، ونخلي بالنا من لبسنا، مش في الكنيسة بس لكن طبعا دايما . لازم احترام بيت ربنا.
12 وَكُلُّ وَاحِدٍ كَانَ يَسِيرُ إِلَى جِهَةِ وَجْهِهِ. إِلَى حَيْثُ تَكُونُ الرُّوحُ لِتَسِيرَ تَسِيرُ. لَمْ تَدُرْ عِنْدَ سَيْرِهَا. كل واحد فيهم عارف بيعمل إيه بالظبط. ربنا له المجد مش بيعمل حاجة بعشوائية ابدا.
"إِلَى حَيْثُ تَكُونُ الرُّوحُ لِتَسِيرَ تَسِيرُ. لَمْ تَدُرْ عِنْدَ سَيْرِهَا" ... عاوز يقول: المتحكم في كل ده هو روح الله. هو اللي بيخليها تمشي. يابختهم مسلمين كل مشيئتهم في ايد ربنا ... وده درس لينا. الغريب أن المخلوق العجيب الوحيد الغريب اللي يقدر يقول لربنا مش هاعمل كده، هو الإنسان. ربنا عاوز يمشينا في طريق الحياة، لكن احنا بنختار بإرادتنا طريق الموت والهلاك... أنا اختارت لنفسي قضية الموت.
اتفقنا انها مش بتلف.
"حيث تكون الروح لتسير تسير" ... يعني اللي بيحرك الاحداث والامور كلها هو الروح القدس. محدش بيتحرك من ذاته، هو ده عمل الله.
13 أَمَّا شِبْهُ الْحَيَوَانَاتِ فَمَنْظَرُهَا كَجَمْرِ نَارٍ مُتَّقِدَةٍ، كَمَنْظَرِ مَصَابِيحَ هِيَ سَالِكَةٌ بَيْنَ الْحَيَوَانَاتِ. وَلِلنَّارِ لَمَعَانٌ، وَمِنَ النَّارِ كَانَ يَخْرُجُ بَرْقٌ. الكائنات الاربعة زي مصابيح نار، زي البرق. عاوز يقول ان المنظر ده فيه مجد... شبه مجد الرب.
في الرؤيا هنا حزقيال 1 وحزقيال 10: بالرغم ان ديه رؤيا للقضاء، وان ربنا له المجد يعلن الدينونة علي شعبه، لكن حتي لما ربنا بيعلن الدينونة والقضاء لكنه يظل اله رحيم. لا يستطيع ان ينكر نفسه.
البرق: بيفكرنا بقوس قزح اللي هنشوفه في المنظر ده ... وبيرمز لوعود الله اللي أداها لنوح وقاله "لن أعود أهلك الارض مرة اخري." ... ويفكرنا ب حبقوق 3: لما قال " في الغضب اذكر الرحمة" وياريت دايما نقولها لربنا زي حبقوق: يارب في الغضب اذكر الرحمة، يارب احنا نستاهل الغضب ، لكن في غضبك اذكر الرحمة أرجوك يارب.
"كمنظر مصابيح" ... منظرها كأن الواحد بيبص علي مصباح منور او جمر نار، أصلها مخلوقات نورانية. ومستمدة نورها من نور الله الجالس علي العرش.
"من النار كان يخرج برق" ... في سفر الرؤيا يوحنا الحبيب شاف علي العرش: انه كان في بروق ورعود. وده يوضح التناغم اللي بين سفر حزقيال وسفر الرؤيا.
14 الْحَيَوَانَاتُ رَاكِضَةٌ وَرَاجِعَةٌ كَمَنْظَرِ الْبَرْقِ. يعني الكائنات ديه: لما تأدي مهمة، بتأديها في لحظة وترجع. وكأنها مش طايقة إنها تبعد عن ربنا ثانية واحدة.
الكائنات ديه مش بتسيب العرش وقت طويل. مجرد ثواني، زي البرق في سرعته. تعمل المطلوب منها وترجع زي البرق ... " رَاكِضَةٌ وَرَاجِعَةٌ كَمَنْظَرِ الْبَرْقِ."
فاهمين ومستوعبين يعني ايه؟ يعني الوجود في الحضرة الالهية. فياريت احنا كمان ربنا يلهب قلوبنا ونفهم يعني ايه الوجود في الحضرة الالهية لما بنصلي ... وياريت يبقي مكانا الأساسي في الحضرة الالهية: في حضن المسيح، مستخبين في حضن ربنا دايما. ونحكي معاه ونقوله: علمنا ايه في يومنا ومشاويرنا وحياتنا.
وده كان أول جزء من الرؤيا بتاعة حزقيال واتكلم فيها عن الاربعة كائنات غير المتجسدين.
15 فَنَظَرْتُ الْحَيَوَانَاتِ وَإِذَا بَكَرَةٌ وَاحِدَةٌ عَلَى الأَرْضِ بِجَانِبِ الْحَيَوَانَاتِ بِأَوْجُهِهَا الأَرْبَعَةِ. هنا هيتكلم عن البكرات:
ربنا جميل اوي بيدي كل واحد علي أد فهمه.
اليهود في الوقت ده كانوا شايفين الشعوب اللي حواليهم. ان الملوك كان ليهم: العجلات والبكرات والحصنة اللي بيجروا العجلات ديه. وفاكرين إن ربنا اله ضعيف. ... فاكرين ان نبوخذنصر غلب يهوه، الله. وانتصر عليه.
وربنا وراه بكرات مشفهاش قبل كده، علشان ربنا يوريه ... شبه مجد الرب. علشان يطمنه: اني أنا يهوه، الاله ضابط الكل. ... فربنا له المجد وراه بكرات بتمشي في كل الاتجاهات من غير ما تدور ولا تلف.
ومليانة عيون: اشارة للمعرفة.
والبكرات ديه لو في مركبة، وحد واقف قدامها، هتستحقه. فكأن ربنا بيقول: ان القضاء جاي نتيجة فحص دقيق وعادل 100% لان البكرات مليانة عيون في كل الاتجاهات. يعني ربنا منزلش عقوبة عشوائي.
" وَإِذَا بَكَرَةٌ وَاحِدَةٌ عَلَى الأَرْضِ بِجَانِبِ الْحَيَوَانَاتِ" ... بكرة واحدة جنب الكائنات. والروح في الكائنات موجودة في البكرة ... وهو الروح القدس. بكرة واحدة علي الارض: معناها خطة الله خطة واحدة لخدمة اولاده علي الارض، والكائنات هي التي تنفذ خطة ربنا له المجد.
البكرة... ترمز لعمل الكائنات وخدمتها علي الأرض، لانهم بيتشفعوا في البشر علي الارض.
16 مَنْظَرُ الْبَكَرَاتِ وَصَنْعَتُهَا كَمَنْظَرِ الزَّبَرْجَدِ. وَلِلأَرْبَعِ شَكْلٌ وَاحِدٌ، وَمَنْظَرُهَا وَصَنْعَتُهَا كَأَنَّهَا كَانَتْ بَكَرَةً وَسْطِ بَكَرَةٍ. "الزبرجد" ... ده حجر كريم، لونه اخضر. عاوز يقول: ان أحكام ربنا هي أحكام نقية وعادلة جدا.
" وَمَنْظَرُهَا وَصَنْعَتُهَا كَأَنَّهَا كَانَتْ بَكَرَةً وَسْطِ بَكَرَةٍ." ... متداخلين في بعض. (زي الصورة)
حزقيا النبي شاف مع كل واحد من الاربع كائنات: بكرة، وديه عبارة عن بكرتين متداخلتين ... والبكرة ديه كان او بتشبه الزبرجد: اللون الاخضر.
17 لَمَّا سَارَتْ، سَارَتْ عَلَى جَوَانِبِهَا الأَرْبَعَةِ. لَمْ تَدُرْ عِنْدَ سَيْرِهَا. هيوصف لينا البكرات: وعلي حسب الصورة: البكرتين متداخلين في بعض، فليها 4 اتجاهات. فبرده مش محتاجة تلف. هتفضل ماشية في اتجاه واحد.
وده لان خطة ربنا مفيهاش تغيير.الله ضابط الكل. كل عجلة التوقيت والزمان تحت سيطرة الله. ربنا معندهوش تغيير ولا ظل دوران.
18 أَمَّا أُطُرُهَا فَعَالِيَةٌ وَمُخِيفَةٌ. وَأُطُرُهَا مَلآنَةٌ عُيُونًا حَوَالَيْهَا لِلأَرْبَعِ. " أطُرُهَا" ... المحيط بتاعها. الإطار نفسه. عالية ومخيفة.
واللي يفكر في المنظر ده بكل دقة، يفهم ان ربنا عاوز فعلا يديله: شعاع من المجد، يتفرجوا عليه علشان يتطمنوا إن "أنا هو الأول والأخر. البداية والنهاية." ومفيش إله غيري. فيقول: الأطر بتاعتها عالية ومخيفة.
وديه كمعني: أن في السماء هيكون في قامات عالية جدا. (في وسط القامات ديه احنا بقي هنروح فين ياتري؟)
والإطارات بتاعتها مليانة عيون في كل حتة. والعيون بترمز للمعرفة بتاعة الكائنات ديه ... اذا في تناغم شديد بين الكائنات الاربعة والبكرات الاربعة. لان الروح الذي يقودهم هو واحد.
وهنا صورة توضيحية للبكرة وفيها عيون.
19 فَإِذَا سَارَتِ الْحَيَوَانَاتُ، سَارَتِ الْبَكَرَاتُ بِجَانِبِهَا، وَإِذَا ارْتَفَعَتِ الْحَيَوَانَاتُ عَنِ الأَرْضِ ارْتَفَعَتِ الْبَكَرَاتُ. البكرات متصلة بالكائنات الحية، فلو اتحركت الكائنات برده البكرات بتتحرك.
تحرك الكائنات ناحية ربنا ... معاها بتتحرك البكرات. وعملها هو خدمة البشر.
واذا ارتفعت الكائنات ... ترتفع معاها البكرات. ومعناها: ترتفع للسماء تاني لتسبح وتمجد ربنا له المجد.
20 إِلَى حَيْثُ تَكُونُ الرُّوحُ لِتَسِيرَ يَسِيرُونَ، إِلَى حَيْثُ الرُّوحُ لِتَسِيرَ وَالْبَكَرَاتُ تَرْتَفِعُ مَعَهَا، لأَنَّ رُوحَ الْحَيَوَانَاتِ كَانَتْ فِي الْبَكَرَاتِ. نفس الروح اللي بتقود الكائنات، هي برده بتقود البكرات.21 فَإِذَا سَارَتْ تِلْكَ سَارَتْ هذِهِ، وَإِذَا وَقَفَتْ تِلْكَ وَقَفَتْ. وَإِذَا ارْتَفَعَتْ تِلْكَ عَنِ الأَرْضِ ارْتَفَعَتِ الْبَكَرَاتُ مَعَهَا، لأَنَّ رُوحَ الْحَيَوَانَاتِ كَانَتْ فِي الْبَكَرَاتِ. الروح القدس اللي بيقود الكائنات الأربعة، كان بيقود البكرات زي ما اتفقنا.
فكرة البكرات... تدينا فكرة العمل في انسجام. زي فريق العمل: لان الروح القدس هو اللي بيقود الكل. والكل مسلم ارادته لمشيئة الروح القدس.
يقال ان بكرة جوة بكرة: اشارة (رمز) الي ان العهد القديم والعهد الجديد مرتبطين ببعض. وزي ما بيقولوا الآباء: ان العهد الجديد مخبئ (مستخبي) في العهد القديم. والعهد القديم مشروح في العهد الجديد.
منقدرش نفصل خطة ربنا للخلاص عن الكتاب المقدس. اذا وقت لما بتتحرك الكائنات السماوية لازم معاها تتحرك البكرتين دول.
"لان روح الحيوانات كانت في البكرات" ... لان الكتاب المقدس اللي كتبه هو الروح القدس. "كل الكتاب هو موحي بيه من الله." مهما كان اللي كتبوه 40 كاتب، لكن الكاتب واحد هو الروح القدس اللي بيحرك كل شئ. الروح القدس هو اللي بيدبر الأحداث وبيحركها. ... في الكنيسة اللي بيحرك كل الامور: هو الروح القدس. حتي سفر الاعمال بنسميه: سفر الروح القدس.
ملخص للجزء للآيات من ا - 21:
- حزقيال وصفلنا المركبة الإلهية. مركبة الشاروبيم الحاملين العرش الإلهي.
- شوفنا كان في ريح، وسحابة ونار ولمعان. ... وده يفكرنا بحضور الله، زي ماحصل مع موسي النبي وقت استلام الشريعة.
- شوفنا وصف الاربعة الكائنات الغير متجسدين.
- شوفنا المركبات المصاحبة للأربعة كائنات. والجميل في الاربعة كائنات ان " ليها ارجل قائمة" ... وده يدينا فكرة عن الوجود في الحضرة الالهية. علشان كده في القداس: الشماس يقول: ايها الجلوس قفوا.
هذه المخلوقات اللي بنسميهم في التسبحة: الخدام الملتهبون نار.
وحزقيال النبي لما وصفهم: قال انها "كالجمر" ملتهبة. وكانت "قائمة" لأنه ده الوضع الطبيعي في حضرة ربنا له المجد.
- شوفنا البكرات: بكرتين متداخلين في بعض، زي الصورة.
22 وَعَلَى رُؤُوسِ الْحَيَوَانَاتِ شِبْهُ مُقَبَّبٍ كَمَنْظَرِ الْبِلَّوْرِ الْهَائِلِ مُنْتَشِرًا عَلَى رُؤُوسِهَا مِنْ فَوْقُ. وبعد منظر العاصفة والريح واللمعان والاربعة كائنات والاربع بكرات. هنشوف هنا باقي المنظر:
فوق الكائنات منظر جميل اوووي زي البلور.
" وَعَلَى رُؤُوسِ الْحَيَوَانَات" ... المقصود بيها: الكائنات الحية.
"شِبْهُ مُقَبَّبٍ كَمَنْظَرِ الْبِلَّوْرِ" ... فوق المقبب، اللي هو جلد السماء. زي منظر البلور. فكأنهم شايلين حاجة زي السماء (اللي هو المقبب) ، وفوق المقبب فيه عرش ... " كمنظر البلور."
زي اللي شافه يوحنا الحبيب (في رؤيا 4: 6 "وبحر زجاج شبه البلور ..... " ).
وكتير من الاباء قالوا: انها اشارة للمعمودية ... دخولنا الي الاقداس السماوية عن طريق الخلاص بربنا يسوع المسيح له المجد اللي ننوله في المعمودية.
البلور: ميزته انه يعكس صورة اللي واقف قدامه. وكأن صورة الله منطبعة علي كل المخلوقات السمائية امامه. واحنا البشر المفروض صورة ربنا مرسومة فينا. فهل كل واحد فينا فعلا عامل زي البلور؟ هل بيعكس فعلا صورة المسيح له المجد؟ بحلاوته وجماله – عطفه – محبته – طول اناته – رحمته – غفرانه .......؟ المفروض فعلا نراجع نفسنا.
المفروض الموجودين في الحضرة الالهية يبقوا زي البلور، يعكسوا صورة المسيح له المجد. زي مايبقي في خادم ناجح، المفروض ينسب نجاحه ده لربنا له المجد. يقول كل المجد ليك يارب، مياخدش المجد لنفسه.
23 وَتَحْتَ الْمُقَبَّبِ أَجْنِحَتُهَا مُسْتَقِيمَةٌ الْوَاحِدُ نَحْوَ أَخِيهِ. لِكُلِّ وَاحِدٍ اثْنَانِ يُغَطِّيَانِ مِنْ هُنَا، وَلِكُلِّ وَاحِدٍ اثْنَانِ يُغَطِّيَانِ مِنْ هُنَاكَ أَجْسَامَهَا. كل واحد فارد جناحيه الاتنين. وواحد من جناحه ملتصق بجناحه اخوه من الناحية التانية، وجناحه التاني ملتصق بجناح الكائن من الناحية التانية.
وهي ديه الكائنات السماوية مفيش بينهم خناقة. ولا اي خلافات. لكن كل واحد مع اخيه.
قولنا ان حزقيا النبي شاف 4 أجنحة، لأنه شافهم من تحت العرش. هو كان تحت العرش فشاف اربعة بس، طايرين باتنين وكل جناح لازق في جناح الكائن التاني اللي جنبه. والاتنين التانين بيغطوا أجسامهم.
لكن اشعياء النبي ويوحنا الحبيب: شافوا الكائنات الغير متجسدة، ان كل واحد منهم ليه 6 أجنحة. وده لان اشعياء النبي ويوحنا الحبيب كانوا واقفين حوالين العرش فشافوا ال 6 أجنحة.
24 فَلَمَّا سَارَتْ سَمِعْتُ صَوْتَ أَجْنِحَتِهَا كَخَرِيرِ مِيَاهٍ كَثِيرَةٍ، كَصَوْتِ الْقَدِيرِ. صَوْتَ ضَجَّةٍ، كَصَوْتِ جَيْشٍ. وَلَمَّا وَقَفَتْ أَرْخَتْ أَجْنِحَتَهَا. عاوز يقول هنا، وكمان هنلاقيها في أخر حزقيال: صوت أجنحتها كصوت مياة كثيرة. صوت حركة اجنحتها كأنها: صوت شلالات مية نازلة.
"خرير" ... صوت المياه.
وكمان في سفر الرؤيا في وصف السيد المسيح له المجد: يقول صوته كصوت مياه كثيرة.
" وَلَمَّا وَقَفَتْ أَرْخَتْ أَجْنِحَتَهَا" ... بطلت تحرك اجنحتها، علشان حزقيال يسمع صوت ربنا.
25 فَكَانَ صَوْتٌ مِنْ فَوْقِ الْمُقَبَّبِ الَّذِي عَلَى رُؤُوسِهَا. إِذَا وَقَفَتْ أَرْخَتْ أَجْنِحَتَهَا. فأول ما ربنا له المجد الجالس علي العرش فوق المقبب هيتكلم: الأربع كائنات او الاربع مخلوقات، وقفت حركة اجنحتها علشان صوت ربنا يتسمع.26 وَفَوْقَ الْمُقَبَّبِ الَّذِي عَلَى رُؤُوسِهَا شِبْهُ عَرْشٍ كَمَنْظَرِ حَجَرِ الْعَقِيقِ الأَزْرَقِ، وَعَلَى شِبْهِ الْعَرْشِ شِبْهٌ كَمَنْظَرِ إِنْسَانٍ عَلَيْهِ مِنْ فَوْقُ. هيشرح عرش الله: اللي موجود فوق المقبب (زي القبة السماوية.) وده برضه موجود فوق الكائنات الحية الغير متجسدة ... لأنهم حاملين عرش الله.
ونفس المنظر ده قالهولنا: موسي النبي في خروج 24، ويوحنا الحبيب في رؤيا 4. ولما يتذكر نفس المنظر من كذا حد وبنفس التفاصيل، يبقي المنظر ده حقيقة. منظر حقيقي ..."كَمَنْظَرِ حَجَرِ الْعَقِيقِ الأَزْرَقِ،"
"وَعَلَى شِبْهِ الْعَرْشِ شِبْهٌ كَمَنْظَرِ إِنْسَانٍ عَلَيْهِ مِنْ فَوْقُ" ..."شبه" ... لأنه مش عارف يوصف بالظبط المنظر. وده ظهور لربنا يسوع المسيح له المجد قبل التجسد.
" حَجَرِ الْعَقِيقِ الأَزْرَقِ" ... اللون الازرق ده لون السماء.
27 وَرَأَيْتُ مِثْلَ مَنْظَرِ النُّحَاسِ اللاَّمِعِ كَمَنْظَرِ نَارٍ دَاخِلَهُ مِنْ حَوْلِهِ، مِنْ مَنْظَرِ حَقْوَيْهِ إِلَى فَوْقُ، وَمِنْ مَنْظَرِ حَقْوَيْهِ إِلَى تَحْتُ، رَأَيْتُ مِثْلَ مَنْظَرِ نَارٍ وَلَهَا لَمَعَانٌ مِنْ حَوْلِهَا. هنا بيوصف الجالس علي العرش، زي اصحاح 9.
"وَرَأَيْتُ مِثْلَ مَنْظَرِ النُّحَاسِ اللاَّمِعِ كَمَنْظَرِ نَارٍ دَاخِلَهُ مِنْ حَوْلِهِ، مِنْ مَنْظَرِ حَقْوَيْهِ إِلَى فَوْقُ،" ... كأنه نحاس لامع ونار.
"وَمِنْ مَنْظَرِ حَقْوَيْهِ إِلَى تَحْتُ، رَأَيْتُ مِثْلَ مَنْظَرِ نَارٍ وَلَهَا لَمَعَانٌ مِنْ حَوْلِهَ" ... كله كأنه كتلة نار.
شبه منظر انسان ... له بريق، لمعان. ... الفهم والحكمة.
النحاس ... يشير الي الثبات والقوة ... وطالما في نحاس، يبقي في قضاء. فالله ظهر هنا للقضاء والدينونة. وهنشوفها تاني في اصحاح 10.
والنار ... يشير الي العقوبة اللي جاية عليهم.
وده راي تاني: "رأيت مثل منظر نار ولها لمعان من حولها" ... النحاس يشير للناسوت. والنار للاهوت.
اذا النحاس المتحد بالنار: هو اللاهوت المتحد بالناسوت.
28 كَمَنْظَرِ الْقَوْسِ الَّتِي فِي السَّحَابِ يَوْمَ مَطَرٍ، هكَذَا مَنْظَرُ اللَّمَعَانِ مِنْ حَوْلِهِ. هذَا مَنْظَرُ شِبْهِ مَجْدِ الرَّبِّ. وَلَمَّا رَأَيْتُهُ خَرَرْتُ عَلَى وَجْهِي، وَسَمِعْتُ صَوْتَ مُتَكَلِّمٍ. في منظر الدينونة والعقوبة: نلاقي في قوس اللي بيظهر في السماء بعد المطر، قوس قزح. وده يشير للعهد اللي قطعه ربنا معانا. قوس قزح ... يشير الي مراحم الله.
القديس يوحنا الحبيب شاف نفس الرؤيا:
شاف فوق العرش قوس قزح، علشان كده بنقول ان الرؤيا ديه صورة تانية من سفر الرؤيا بكل تفاصيلها.
عرش ربنا له المجد عليه قوس قزح ... لان قوس قزح في العهد القديم كان رمز لعهد الله مع الانسان. فزي الجالس علي العرش هو الديان، في نفس الوقت هو رحيم وصاحب عهد مع الانسان.
" هذَا مَنْظَرُ شِبْهِ مَجْدِ الرَّبِّ " ...لان مستحيل حد يقدر يشوف مجد الرب.
" وَلَمَّا رَأَيْتُهُ خَرَرْتُ عَلَى وَجْهِي، وَسَمِعْتُ صَوْتَ مُتَكَلِّمٍ" ... يوحنا الحبيب حصل معاها نفس الموقف، شاف المنظر ووقع علي وجهه من المفاجأة اللي شافها.
منظر رهيب، لكنه منظر مفرح ان واحد زي حزقيال النبي وهو في السبي ومحطم وبيعاني، يشوف السماء وهي بتتفتح ويعاين شبه مجد الرب.
الصورة بتوضح: الجالس علي العرش شبه النحاس، ونار حواليه في كل حتة، وقوس قزح حواليه.
طيب ليه البكرات لونهم اخضر؟ ... لان الاخضر رمز للثمر، ومفيش انسان ممكن يجيب ثمر الا من خلال كلمة ربنا
وليه في اختلاف بين القديس يوحنا في سفر الرؤيا لما اتكلم عن المخلوقات ديه؟ ... القديس يوحنا شاف 4 مخلوقات، وشاف كل وجه لوحده. يعني شاف:
الأول علي شكل أسد التاني علي شكل عجل
التالت علي شكل ثور
والرابع علي شكل نسر.
يعني شاف كل واحد بوش واحد بس، وحزقيال هنا قال: لكل واحد منهم ليه اربع اوجه.
الاختلاف ده جه من: ان القديس يوحنا الحبيب كان بينظر من اتجاه واحد بس اللي هو : اتجاه الجالس علي العرش. لكن رؤيا حزقيال: كانت المركبة في حالة حركة، دوران، فقدر يشوف المنظر من كل الاتجاهات. ⪢