⏭ 1وَكَانَ إِلَيَّ كَلاَمُ الرَّبِّ قَائِلاً: كنا وصلنا في الاصحاح ال 11 لزوال مجد الرب من اورشليم، وخروج ربنا من اورشليم.
ومعني خروج ربنا من الهيكل واورشليم: يبقي ولا الهيكل ولا اورشليم ليهم فايدة ولا لزمة تاني. قيمتهم في حلول مجد الرب.
ولما مجد الرب يغادر اورشليم والهيكل، كأن ربنا قالهم " هوذا بيتكم يترك لكم خرابا." ، انتم ليكم قيمة علشان انا في وسطكم، بس خلاص ها سيبكم.
في سفر حزقيال: ربنا كان بيقول ان الشعب ده مش بيفهم، غليظ القلب. فكان لازم يتعمل لهم وسائل ايضاح، يمثل لهم الحاجة قدامهم جايز يفهموا ومع كده برده مفهموش. يعني ربنا عمل اللي عليه وزيادة.
ربنا بعد ما اختطف حزقيال في الرؤيا لاورشليم والهيكل، وفرجه علي اللي بيحصل هناك. ربنا رجعه تاني لبابل، ارض السبي. وربنا كلمه تاني:
2«يَا ابْنَ آدَمَ، أَنْتَ سَاكِنٌ فِي وَسْطِ بَيْتٍ مُتَمَرِّدٍ، الَّذِينَ لَهُمْ أَعْيُنٌ لِيَنْظُرُوا وَلاَ يَنْظُرُونَ. لَهُمْ آذَانٌ لِيَسْمَعُوا وَلاَ يَسْمَعُونَ، لأَنَّهُمْ بَيْتٌ مُتَمَرِّدٌ. "يَا ابْنَ آدَمَ،" ... اتكررت حوالي 100 مرة في سفر حزقيال. وعلشان ربنا دايما يفكر حزقيال: انه انسان ولسه ضعيف، بالرغم من كل الرؤي العظيمة اللي شافها.
"أَنْتَ سَاكِنٌ فِي وَسْطِ بَيْتٍ مُتَمَرِّدٍ" ... وموجودة في اصحاح 2، يعني شعب متمرد. "متمرد" هتتكرر في الاصحاح ده حوالي 5 مرات. لانها كانت صفتهم في الوقت ده. بعد ما فقدوا صفتهم الجميلة: انهم بيت اسرائيل.
" الَّذِينَ لَهُمْ أَعْيُنٌ لِيَنْظُرُوا وَلاَ يَنْظُرُونَ. لَهُمْ آذَانٌ لِيَسْمَعُوا وَلاَ يَسْمَعُونَ، لأَنَّهُمْ بَيْتٌ مُتَمَرِّدٌ." ... ايه الفايدة ان الواحد يكون ليه عيون وهو مش بيشوف بيهم؟ ايه الفايدة ان الواحد يكون ليه آذان ومش بيسمع بيهم؟ اكيد ديه مأساة.
النقطة ديه مهمة في سفر حزقيال: لان ربنا بيتعامل مع الانسان بالطريقة للي يفهمها. ولان ربنا عارف ان الشعب ده وصل لدرجة صعبة في عدم الفهم والقساوة، فابتدي يقول لحزقيال: أنا بعت لهم اشعياء وارميا ومفيش فايدة. فدلوقتي بقي مثل (تمثيل) لهم الحاجة لعلهم يفهمون.
في الكنيسة في أوشيه الانجيل تقولنا: أما أنتم فطوبي لأعينكم لأنها تبصر، ولأذانكم لأنها تسمع... لأننا كـأولاد ربنا، لينا ودان بتسمع كلام ربنا، ولينا عيون تبصر ربنا ... لكن صعب الانسان اللي لا بيشوف ولا بيسمع.
الاصحاح ده مقسم لتلات اقسام: احنا في القسم الاول.
3وَأَنْتَ يَا ابْنَ آدَمَ، فَهَيِّئْ لِنَفْسِكَ أُهْبَةَ جَلاَءٍ، وَارْتَحِلْ قُدَّامَ عُيُونِهِمْ نَهَارًا، وَارْتَحِلْ مِنْ مَكَانِكَ إِلَى مَكَانٍ آخَرَ قُدَّامَ عُيُونِهِمْ، لَعَلَّهُمْ يَنْظُرُونَ أَنَّهُمْ بَيْتٌ مُتَمَرِّدٌ. " أُهْبَةَ جَلاَءٍ،" ... الحاجات اللي بياخدوها وهما رايحيين السبي، ربنا طلب من حزقيال أنه يجهز أهبة جلاء، وديه عبارة عن حاجات قليلة ومهمة وخفيفة علشان يقدروا يشيلوها وهما رايحين للسبي. يا حزقيال يالا حضر الحاجة اللي هتاخدها في السبي معاك.
" وَارْتَحِلْ مِنْ مَكَانِكَ إِلَى مَكَانٍ آخَرَ قُدَّامَ عُيُونِهِمْ،" ... يعني كأنك رايح للسبي.
ربنا هيقوله اعمل حاجتين:
- حاجة نهارا.
– حاجة ليلا.
والاتنين دول ليهم معني.
يالا حضر حاجتك واعمل نفسك كأنك بترحل من مكان لمكان ... وده بالنهار. ... وطبعا الشعب بيتفرج عليه وعارفين انه نبي.
"قدام عيونهم" ... اقعد غير مكانك قدامهم، علشان يشوفوك.
"، لَعَلَّهُمْ يَنْظُرُونَ أَنَّهُمْ بَيْتٌ مُتَمَرِّدٌ." ... "لعلهم" ... ربنا قال لعلهم يتوبوا، ووقتها اقدر ارحمهم واسامحهم. لان هدف ربنا في الاخر ان الناس ديه تتوب وترجع عن شرها. ووقتها ربنا مش هيكمل العقوبة والقضاء اللي جاي عليهم. لانهم لو تابوا، كان أكيد ربنا هيغير خطته معاهم، بس للأسف متابوش.
4فَتُخْرِجُ أُهْبَتَكَ كَأُهْبَةِ الْجَلاَءِ قُدَّامَ عُيُونِهِمْ نَهَارًا، وَأَنْتَ تَخْرُجُ مَسَاءً قُدَّامَ عُيُونِهِمْ كَالْخَارِجِينَ إِلَى الْجَلاَءِ. "فَتُخْرِجُ أُهْبَتَكَ كَأُهْبَةِ الْجَلاَءِ" ... الحاجات اللي بتتاخد وهما رايحين السبي.
"قُدَّامَ عُيُونِهِمْ نَهَارًا،" ... اتقالت حوالي 7 مرات. ربنا بيقوله خليهم يشوفوك. فجايز يفهموا لما يشوفوه بيجهز حاجات السبي. لانهم راحوا السبي ده مرة قبل كده، فجايز يفهموا. وعاوز يقولوهم: ان ده اللي هيحصل مع البقية اللي في اورشليم. لان اصلا حزقيال واللي معاه دول فعلا في السبي.
فعاوز يقولهم كمان: اوعي حد يضحك عليكم ويقولكم انكم هترجعوا من السبي لاورشليم بسرعة، لأ. ده السبي مطول في بابل. وارميا النبي قبل كده قالهم السبي 70 سنة.
- اول حاجة: صباحا، في النهار. حزقيال خرج صباحا وهو شايل حاجاته. والحاجات اللي شايلها بترمز للناس اللي لسه هيروحوا السبي.
- تاني حاجة: مساءا. الجلاء: يعني السبي
5وَانْقُبْ لِنَفْسِكَ فِي الْحَائِطِ قُدَّامَ عُيُونِهِمْ وَأَخْرِجْهَا مِنْهُ. هيعمل حاجة جديدة: هينقب في الحيطة. طيب ليه يارب؟ اصل في ناس وقت السبي هيعملوا كده، علي امل انهم يهربوا. بس مش هيعرفوا يهربوا.
" وَانْقُبْ لِنَفْسِكَ" ... لان المفروض اللي هيهرب، عاوز يعمل الثقب او الخرم في الحيطة بكل هدوء ومن غير شوشرة، علشان محدش يحس بيه. فلازم يعملها بنفسه.
وكل ده لسه هنشوفه في اية 12، وكان رمز للي هيحصل مش بس مع الشعب لكن كمان مع الملك بتاعهم، رئيسهم.
فربنا بيقوله اعمل نفسك هربان بالحاجات اللي هتاخدها معاك للسبي.
6وَاحْمِلْ عَلَى كَتِفِكَ قُدَّامَ عُيُونِهِمْ. فِي الْعَتَمَةِ تُخْرِجُهَا. تُغَطِّي وَجْهَكَ فَلاَ تَرَى الأَرْضَ. لأَنِّي جَعَلْتُكَ آيَةً لِبَيْتِ إِسْرَائِيلَ». " تُغَطِّي وَجْهَكَ" ... نتخيل ناس هتهرب علشان ميتقتلوش، طيب هل هيقعدوا يبصوا علي جمال البلد بتاعتهم وأراضيها؟ مفيش وقت اصلا لكده. لان البابليين محاصرين اورشليم من بره، فلازم يهربوا بسرعة، مفيش وقت يقعدوا يبصوا علي بيوتهم وممتلكاتهم واراضيهم. فالموضوع حياة او موت، ياتهرب دلوقتي يا أما هيموتوك.
وتغطية الوجه: إشارة للخزي، أصلهم متاخدين في السبي. وكان تشير لسرية الرحيل، الناس اللي بتهرب مش عاوزين حد يشوفهم ... وكمان فيها اشارة للعقوبة: ما هو خارج من بلده بعار. هربان من بلده.
اذا شوفنا حزقيال النبي: عمال يطلع الحاجات نهارا، وكمان بليل. بيشيل حاجاته كأنه ماشي.
" تُغَطِّي وَجْهَكَ فَلاَ تَرَى الأَرْضَ." ... هتتكرر تاني في آية 12.
" لأَنِّي جَعَلْتُكَ آيَةً لِبَيْتِ إِسْرَائِيلَ." ... متكررة تاني في حزقيال 24.
يعني كأن ربنا بيقوله: اللي انت بتعمله بالظبط ده يا حزقيال، ده هيحصل فيهم.
7فَفَعَلْتُ هكَذَا كَمَا أُمِرْتُ، فَأَخْرَجْتُ أُهْبَتِي كَأُهْبَةِ الْجَلاَءِ نَهَارًا، وَفِي الْمَسَاءِ نَقَبْتُ لِنَفْسِي فِي الْحَائِطِ بِيَدِي، وَأَخْرَجْتُ فِي الْعَتَمَةِ، وَحَمَلْتُ عَلَى كَتِفِي قُدَّامَ عُيُونِهِمْ. نفذ كلام ربنا له المجد بالحرف، بأنه قعد يخرج حاجته نهارا.
" بِيَدِي" ... بيأكد انه حفر في الحيطة بايده.
الشعب شايفه بيعمل كده، بيطلع حاجاته في النهار وبيعلم الثقب بايده في الحيطة بليل ، وبيخرج من الثقب ده. وخرج معاه حاجته بليل علي كتفه.
8وَفِي الصَّبَاحِ كَانَتْ إِلَيَّ كَلِمَةُ الرَّبِّ قَائِلَةً: ربنا له المجد كلمه تاني في الصبح.9«يَا ابْنَ آدَمَ، أَلَمْ يَقُلْ لَكَ بَيْتُ إِسْرَائِيلَ، الْبَيْتُ الْمُتَمَرِّدُ: مَاذَا تَصْنَعُ؟ ربنا سال حزقيال هما مسألوش: أنت بتعمل ايه؟10قُلْ لَهُمْ: هكَذَا قَالَ السَّيِّدُ الرَّبُّ. هذَا الْوَحْيُ هُوَ الرَّئِيسُ فِي أُورُشَلِيمَ وَكُلِّ بَيْتِ إِسْرَائِيلَ وَالَّذِينَ هُمْ فِي وَسْطِهِمْ. ربنا هنا هيقوله تفسير الجزء اللي فات، علشان يجاوب حزقيال لما يساله الشعب عن اللي بيعمله او معناه ايه.
في سفر حزقيال غالبا لما يذكر كلمة "الرئيس" مقصود بيها الملك. وهنا المقصود: صدقيا الملك، الملك ال 20. وربنا له المجد اتنبأ عن صدقيا الملك اكتر من مرة (مرتين في سفر حزقيال، ومرتين في سفر ارميا، واصلا قصته موجودة في سفر ملوك التاني 25.) ... طيب ليه؟ لأن لما يكون انسان في كرامة ولا يفهم فهو يشبه البهائم اللي تباد. أصله شاف اللي قبله اتأخدوا واتجرجروا في السبي، وبرده مش عاوز يتوب، وبيسمع لكلام الانبياء الكذبة اللي كانوا بيطمنوا الشعب بالكذب ويضحكوا عليهم: بأن ربنا مش هيتخلي عن أورشليم ولا الهيكل.
وصدقيا الملك هو واللي معاه: عمل ثقب في الحيطة.
هو كان عامل عهد مع نبوذخنصر وبابل وكسر العهد ده، وراح لجأ لمصر وفرعون مصر علشان يحتمي بيهم. وربنا قاله: انت خونت العهد حتي لو كان ده ملك أممي، وكما انت سمحت بعبادة الاوثان ولخبطت كتير.
فصدقيا الملك ده حاول يهرب في الظلام (بالليل) بس معرفش يهرب، والبابليين مسكوه والجيش اللي حوالين صدقيا هربوا وسابوه لوحده. وقتلوا اولاد صدقيا قدام عنيه، دبحوهم. وفقعوله عنينه الاتنين، وربطوه بسلاسل كالحيوانات، واخدوه علي بابل. وفضل هناك في بابل لغاية ما اتفك أسره بالموت. مات هناك في بابل. فربنا بعت له انذارات كتيرة بس متابش ولاسمع كلام ربنا.
" هذَا الْوَحْيُ هُوَ الرَّئِيسُ فِي أُورُشَلِيمَ" ... هو صدقيا الملك.
وَكُلِّ بَيْتِ إِسْرَائِيلَ وَالَّذِينَ هُمْ فِي وَسْطِهِمْ." ... يعني كل بيت اسرائيل والملك، كله هيبقي مصيره واحد ، مصيرهم السبي والقتل.
11قُلْ: أَنَا آيَةٌ لَكُمْ. كَمَا صَنَعْتُ هكَذَا يُصْنَعُ بِهِمْ. إِلَى الْجَلاَءِ إِلَى السَّبْيِ يَذْهَبُونَ. "قُلْ: أَنَا آيَةٌ لَكُمْ." ... تاني مرة تتذكر، وهتتذكر تاني في حزقيال 24. شايفني وانا عمال أخد حاجتي وأنقلها من مكان لمكان، ربنا بيقوله: قولهم ان هما نفسهم هيحصل معاهم كده، وهيتاخدوا للسبي. بلا رحمة وكمان هيكون بعنف. 12وَالرَّئِيسُ الَّذِي فِي وَسْطِهِمْ يَحْمِلُ عَلَى الْكَتِفِ فِي الْعَتَمَةِ وَيَخْرُجُ. يَنْقُبُونَ فِي الْحَائِطِ لِيُخْرِجُوا مِنْهُ. يُغَطِّي وَجْهَهُ لِكَيْلاَ يَنْظُرَ الأَرْضَ بِعَيْنَيْهِ. الملك زيه زي الشعب، زيه زي اي حد. شايل حاجته المهمة وبيهرب.
"يَنْقُبُونَ فِي الْحَائِطِ لِيُخْرِجُوا مِنْهُ." ... بينقبوا، بيخرموا الحيطة علشان يخلوا الملك يهرب. ويقال انه فعلا طلع من الثقب اللي في الحيطة وطلع من ابواب المدينة، واتقبض برده عليه في الاخر.
"يُغَطِّي وَجْهَهُ لِكَيْلاَ يَنْظُرَ الأَرْضَ بِعَيْنَيْهِ." ... واتقالت في حزقيال 17 :20 (انه هرب من الحيطة واتقبض عليه) واتقال " ولكن لا يراها وهناك يموت." ... الناس اللي بينقدوا الكتاب المقدس: قالوا ان هنا في غلطو، ان ازاي صدقيا الملك اتاخد لبابل ومشافش بابل؟ فالرد عليهم: ان ديه مش غلطة ولا حاجة، كل الموضوع: ان عنيه اتفقعت قبل مايروح بابل، فكان طبيعي انه ميشوفش بابل . هو اتاخد فعلا لبابل ومشفهاش، وفضل هناك لغاية ما مات. فلازم نحط النبوات جنب بعض علشان الصورة تبيقي كاملة
13وَأَبْسُطُ شَبَكَتِي عَلَيْهِ فَيُؤْخَذُ فِي شَرَكِي، وَآتِي بِهِ إِلَى بَابِلَ إِلَى أَرْضِ الْكَلْدَانِيِّينَ، وَلكِنْ لاَ يَرَاهَا وَهُنَاكَ يَمُوتُ. " وَأَبْسُطُ شَبَكَتِي عَلَيْهِ" ... التعبير ده اللي ربنا استخدمه، كأن في صياد بيصطاد وبعد ما كان ملك، بقي عامل زي العصفور الي وقع في فخ الصياد. الكتاب المقدس يقول" البر يرفع شأن الأمة. وعار الشعوب الخطية" ... انهم فضلوا مستمتعين بالخطية وديه كانت النتيجة الطبيعية للخطية: ان صدقيا الملك هيموت في بابل بعد ما اتاخد للسبي.
صدقيا الملك هيموت في بابل.
14وَأُذَرِّي فِي كُلِّ رِيحٍ جَمِيعَ الَّذِينَ حَوْلَهُ لِنَصْرِهِ، وَكُلَّ جُيُوشِهِ، وَأَسْتَلُّ السَّيْفَ وَرَاءَهُمْ. وده فعلا اللي حصل: كل اللي حواليه هربوا. مذكورة في سفر الملوك التاني 25.
" وَكُلَّ جُيُوشِهِ " ... زمان كان الملك يمشي وكان حواليه حراسة من الشمال واليمين، فكل دول هربوا وسابوه لوحده.
" وَأَسْتَلُّ السَّيْفَ وَرَاءَهُمْ" ... في سفر عوبديا: انهم لما كانوا بيهربوا من اورشليم علشان يهربوا من البابليين، كان الآدوميين واقفين لهم بالسيف علي الحدود، علشان يمسكوهم ويسلموهم للبابليين.
فكل كلام ربنا اللي قاله، اتحقق فعلا.
15فَيَعْلَمُونَ أَنِّي أَنَا الرَّبُّ حِينَ أُبَدِّدُهُمْ بَيْنَ الأُمَمِ وَأُذَرِّيهِمْ فِي الأَرَاضِي. ولما تتحقق كل نبوات انبيائي يمكن يفهموا ان كل ده حصل بسبب شرهم.16وَأُبْقِي مِنْهُمْ رِجَالاً مَعْدُودِينَ مِنَ السَّيْفِ وَمِنَ الْجُوعِ وَمِنَ الْوَبَإِ، لِكَيْْ يُحَدِّثُوا بِكُلِّ رَجَاسَاتِهِمْ بَيْنَ الأُمَمِ الَّتِي يَأْتُونَ إِلَيْهَا، فَيَعْلَمُونَ أَنِّي أَنَا الرَّبُّ». " وَأُبْقِي مِنْهُمْ " ... البقية هنا غير البقية اللي اتذكرت في حزقيال 9 (البقية في حزقيال 9: دول كانوا البقية الحلويين، الكويسين، ومعملوش خطايا زي باقي الناس.)
لكن البقية هنا: " رِجَالًا مَعْدُودِينَ مِنَ السَّيْفِ وَمِنَ الْجُوعِ وَمِنَ الْوَبَإِ" ... طيب ليه يارب هتبقيهم؟ علشان يعلموا اني انا الرب. لان الناس ديه لما هيروحوا للأمم، الأمم هيفتخروا عليهم ويقولوا: ان الهتنا انتصرت علي يهوه وان الهتنا اقوي من يهوه. فالمفروض ان شعب ربنا اللي رايحين للسبي يقولوا للي في بابل: احنا هنا بسبب خطايانا وشرورنا. لكن الهنا اله بار وقدوس وعادل. وحكم علينا حسب طرقنا وخطايانا. واحنا نستاهل اللي حصل لنا، لكن مش ضعف من الهنا ... وده ذل وعار لما الواحد يقعد يقول ان خطاياه كذا وكذا وانا السبب في اللي بيحصلي ده بسبب خطاياي. في منتهي المذلة والعار.
"لِكَيْ يُحَدِّثُوا بِكُلِّ رَجَاسَاتِهِمْ بَيْنَ الأُمَمِ الَّتِي يَأْتُونَ إِلَيْهَا، فَيَعْلَمُونَ أَنِّي أَنَا الرَّبُّ."
والجزء ده يدينا فكرة عن اللي هيحصل في نهاية الايام، مجئ المسيح له المجد: لان وقتها كل المستخبي هيبان قدام العالم. الخطايا اللي كنا بنعملها في الخفاء ومش معروفة هتبقي قدام الكل.
فالحل الوحيد هو التوبة، التوبة بتخلي الزناة بتوليين، في كل وقت لازم نقدم توبة. لاننا مش عارفين هنمشي امتي. وعلشان منبقاش في خزي وعار، لازم التوبة دايما. ونقول: يارب توبني فأتوب.
الجزء ده كان اول جزء من التلاتة.
17وَكَانَتْ إِلَيَّ كَلِمَةُ الرَّبِّ قَائِلَةً: ربنا له المجد كلم حزقيال تاني.18«يَا ابْنَ آدَمَ، كُلْ خُبْزَكَ بِارْتِعَاشٍ، وَاشْرَبْ مَاءَكَ بِارْتِعَادٍ وَغَمٍّ. شوفناها في حزقيال 4 و5.
"، كُلْ خُبْزَكَ بِارْتِعَاشٍ،" ... كل أكلك وأنت بتترعش، لان هيبقي في رعدة وخوف، وده هيبقي حال الناس قبل الاسر الاخير.
" وَاشْرَبْ مَاءَكَ بِارْتِعَادٍ وَغَمّ" ... ارتعاد من الخوف اللي هيبقوا فيه.
19وَقُلْ لِشَعْبِ الأَرْضِ: هكَذَا قَالَ السَّيِّدُ الرَّبُّ عَلَى سُكَّانِ أُورُشَلِيمَ فِي أَرْضِ إِسْرَائِيلَ: يَأْكُلُونَ خُبْزَهُمْ بِالْغَمِّ، وَيَشْرَبُونَ مَاءَهُمْ بِحَيْرَةٍ، لِكَيْ تَخْرَبَ أَرْضُهَا عَنْ مِلْئِهَا مِنْ ظُلْمِ كُلِّ السَّاكِنِينَ فِيهَا. " وَقُلْ لِشَعْبِ الأَرْضِ:" ... لان ده اللي هيحصل لهم.
الناس دول شايفين البابليين حواليهم، ومتوقعين دخولهم في أي وقت. لان البابليين كانوا محاصرين اورشليم. فطبيعي وهما بيأكلوا: كله هيبقي بحساب، الأكل والشرب بحساب، وهيبقوا في حالة غم ولان في مجاعة نتيجة الحصار، فكل حاجة هتبقي في حالة رعب وغم.
" لِكَيْ تَخْرَبَ أَرْضُهَا عَنْ مِلْئِهَا" ... كلها هتخرب، وخصوصا لأنهم خربوا الأرض بتاعتهم بفسادهم. فكل الأرض اللي أفسدوها، هتخرب.
"مِنْ ظُلْمِ كُلِّ السَّاكِنِينَ فِيهَا." ... ربنا بيأكد أن الخراب ده بسبب اسلوبكم وظلمكم وخطاياكم وشروركم، بسبب فسادكم ونجاستكم.
20وَالْمُدُنُ الْمَسْكُونَةُ تَخْرَبُ، وَالأَرْضُ تُقْفِرُ، فَتَعْلَمُونَ أَنِّي أَنَا الرَّبُّ». كل اورشليم هتبقي خراب. ولما يحصل ده هتعرفوا اني ربنا إلهكم. بس طبعا الوقت هيكون متأخر.
وده كان الجزء التاني من الاصحاح.
21وَكَانَ إِلَيَّ كَلاَمُ الرَّبِّ قَائِلاً: هنا هنبتدي الجزء التالت من الاصحاح.
ربنا له المجد كلم حزقيال:
الجزء الاخير ده مع الاصحاح 13 وجزء من الاصحاح ال 14... كلهم وحدة واحدة: بيتكلموا عن الانبياء الكذبة.
الكلام هنا عن: أن النا دول كانوا عندهم مشكلتين:
- المشكلة الاولي: أن الانبياء الكذبة يقولوا للشعب: ان كلام حزقيال النبي وارميا النبي ده كلام غلط. لا اورشليم هتقع ولا ربنا هيسلم الهيكل.
- المشكلة التانية: ان في أنبياء كذبة قالولهم: ان ده هيحصل بس بعدين. اورشليم والهيكل هيخربوا بس مش في الوقت الحالي بتاعنا.
وده في وقتنا الحالي بنسميه: تسويف العمر، يعني هما عاوزين يخدروا ضمايرهم ، ناس مشيوا وراء اللي بيقولوا ان ده مش هيحصل أصلا. والمجموعة التانية: برده خدروا ضمايرهم وقالوا ان كلام ربنا هيحصل بس بعدين. مش في وقتنا ده اللي عايشينه. ومع كده برده متابوش.
22«يَا ابْنَ آدَمَ، مَا هذَا الْمَثَلُ الَّذِي لَكُمْ عَلَى أَرْضِ إِسْرَائِيلَ، الْقَائِلُ: قَدْ طَالَتِ الأَيَّامُ وَخَابَتْ كُلُّ رُؤْيَا. غالبا ناس قاعدة فاضية بتطلع امثال. زي ما قالوا قبل كده: الاباء يغلطوا والابناء هما اللي يشيلوا غلط ابائهم. والامثلة ديه بتضايق ربنا، لأنها امثلة غلط.
فهما طلعوا مثل ثاني " قَدْ طَالَتِ الأَيَّامُ وَخَابَتْ كُلُّ رُؤْيَا." ... ما احنا بقالنا سنين كتير أهو، ومحصلش حاجة من كلام الانبياء.
وحاليا ناس كتير بيقولوا بقالنا 2000 سنة والمسيح لسه مجاش. علي فكرة اليوم عند ربنا بالف سنة، والف سنة عند ربنا بيوم. فربنا هيجي هيجي.
23لِذلِكَ قُلْ لَهُمْ: هكَذَا قَالَ السَّيِّدُ الرَّبُّ: أُبَطِّلُ هذَا الْمَثَلَ فَلاَ يُمَثِّلُونَ بِهِ بَعْدُ فِي إِسْرَائِيلَ. بَلْ قُلْ لَهُمْ: قَدِ اقْتَرَبَتِ الأَيَّامُ وَكَلاَمُ كُلِّ رُؤْيَا. قولهم يا حزقيال: اني هاخليهم يبطلوا يقولوا المثل ده خالص. ولما يحصل اللي انا قولته، هيعرفوا ازاي محدش يقول المثل ده تاني.
"بَلْ قُلْ لَهُمْ: قَدِ اقْتَرَبَتِ الأَيَّامُ وَكَلاَمُ كُلِّ رُؤْيَا." ... نحفظ الاية ديه. جايز يكون المقصود بالآية ديه: الرؤي اللي بتتكلم عن العقوبات والسبي والخراب.
24لأَنَّهُ لاَ تَكُونُ بَعْدُ رُؤْيَا بَاطِلَةٌ وَلاَ عِرَافَةٌ مَلِقَةٌ فِي وَسْطِ بَيْتِ إِسْرَائِيلَ. ربنا بيأكد لهم وبيوضح لهم ان هيجي وقت وهأنهي فيه علي كل الانبياء الكذبة. اللي ضيعوا الشعب بكلامهم الكذب.
"عرافة" ... معرفة المستقبل، يدعيها العرافون الكذابون.
"ملقة " ... تقول كلام تملق، أي ما يرضى الناس وهو غير الحقيقة.
اذا ربنا هيبطل كلام الأنبياء الكذبة، الذين يقولون سلام سلام للشعب ولن يحدث سبى، أو خراب لأورشليم. كل هذا سيبطل، عندما يسمح الله بهجوم بابل على أورشليم.
25لأَنِّي أَنَا الرَّبُّ أَتَكَلَّمُ، وَالْكَلِمَةُ الَّتِي أَتَكَلَّمُ بِهَا تَكُونُ. لاَ تَطُولُ بَعْدُ. لأَنِّي فِي أَيَّامِكُمْ أَيُّهَا الْبَيْتُ الْمُتَمَرِّدُ أَقُولُ الْكَلِمَةَ وَأُجْرِيهَا، يَقُولُ السَّيِّدُ الرَّبُّ». ربنا بيأكد لهم ان كلامه حق وهيتنفذ.
"لأَنِّي فِي أَيَّامِكُمْ أَيُّهَا الْبَيْتُ الْمُتَمَرِّدُ أَقُولُ الْكَلِمَةَ وَأُجْرِيهَا، يَقُولُ السَّيِّدُ الرَّبُّ." ... ديه خامس مرة في الاصحاح تتقال: البيت المتمرد؟
كل اللي انا قولته هيحصل وهيتنفذ في أيامكم انتم ايها البيت المتمرد.
26وَكَانَ إِلَيَّ كَلاَمُ الرَّبِّ قَائِلاً: ربنا كلم حزقيال النبي تاني. وده الجزء اللي بيقول: ان كلام ربنا والأنبياء هيحصل، بس مش في وقتنا خالص.27«يَا ابْنَ آدَمَ، هُوَذَا بَيْتُ إِسْرَائِيلَ قَائِلُونَ: الرُّؤْيَا الَّتِي هُوَ رَائِيهَا هِيَ إِلَى أَيَّامٍ كَثِيرَةٍ، وَهُوَ مُتَنَبِّئٌ لأَزْمِنَةٍ بَعِيدَةٍ. قالوا: ان الرؤيا فعلا هتحصل بس بعدين مش دلوقتي. ديه متخصناش احنا.
وكل ده شغل الشيطان علشان يبعد الناس عن التوبة وينشغلوا بشهواتهم الردية.، ده فعلا اللي بيحصل معانا لو مكناش متمسكين وماسكين في ربنا. بنبعد عن ربنا وبننشغل بالعالم ونتوه. فلازم نبقي صاحين لحرب الشيطان اللي عاوز يضيع أولاد ربنا، وعلشان هو عارف مصيره فعاوز الكل معاه. ربنا يرحمنا ويدينا اننا نتوب دايما ونكون مصحصحين وماسكين في ربنا له المجد.
28لِذلِكَ قُلْ لَهُمْ: هكَذَا قَالَ السَّيِّدُ الرَّبُّ: لاَ يَطُولُ بَعْدُ شَيْءٌ مِنْ كَلاَمِي. اَلْكَلِمَةُ الَّتِي تَكَلَّمْتُ بِهَا تَكُونُ، يَقُولُ السَّيِّدُ الرَّبُّ». قولهم يا حزقيال ان النبوات ديه هتحصل وكلامي كل هيحصل معاكم.
الجزء الاخير ده: يدينا فكرة عن وعود ربنا لينا، وانه صادق وامين في وعوده ... وكل ما تلاقي نفسك أن الشيطان بيحاربك بالشك، افتكر الآيات ديه ": قَدِ اقْتَرَبَتِ الأَيَّامُ وَكَلاَمُ كُلِّ رُؤْيَا." ... " لأَنِّي فِي أَيَّامِكُمْ أَيُّهَا الْبَيْتُ الْمُتَمَرِّدُ أَقُولُ الْكَلِمَةَ وَأُجْرِيهَا، يَقُولُ السَّيِّدُ الرَّبُّ."
لازم نبقي واثقين في وعود ومواعيد ربنا له المجد، منبقاش زي شعب اسرائيل. وبلاش نقول ان ربنا بيتكلم ومش بيعمل. لأنه في الحقيقة بيتكلم ويوعد وبينفذ وعوده.
اذا كان خير للأبرار.
واذا كان عقوبة للأشرار.
ربنا دايما امين في وعوده وكلامه.
⏮