⏭ 1فَقَالَ لِي: «يَا ابْنَ آدَمَ، قُمْ عَلَى قَدَمَيْكَ فَأَتَكَلَّمَ مَعَكَ». الاصحاح الاول لما حزقيال النبي شاف شبه مجد الرب. واخر آية في الاصحاح الاول " ....... هذا منظر شبه مجد الرب. ولما رايته خررت علي وجهي وسمعت صوت يتكلم."
والآباء كتير قالوا انه مشفش مجد الرب في حقيقته لكن شاف شبه مجد الرب علشان يقدر يستحمل. لكن حتي لما شاف شبه مجد الرب الكتاب يقول "ولما رايته خررت علي وجهي." أول ماشاف المنظر اللي حكاه في الاصحاح الأول مستحملش ووقع علي وجهه.
هنا هيبتدي يسمع (بعد ما نظر في الاصحاح الاول.)
نقدر نقسم الاصحاح ده ... من اصحاح 1 :28 الي اصحاح 3 : 14
مقدمة: اصحاح 1و2و3 ... ديه دعوة حزقيال النبي وانه شاف رؤيتين:
1)رؤية الاصحاح الاول: شبه مجد الرب.
2)رؤية الاصحاح التاني: هنشوفها دلوقتي.
هنا سمع الصوت "يا ابن ادم" --- وديه جملة متكررة كتير هنا. في مقدمة كل قطعة. (متكررة في السفر حوالي 100 مرة علشان يبين الفرق الكبير بين مجد الرب وبين ضعف الانسان.). احنا لما بنتكلم مع ربنا له المجد ربنا بيقومنا. فهنا ربنا له المجد هيقوم حزقيال النبي علشان يتكلم معاه (وده رد لبعض الناس اللي بيقولوا : حل عليهم الروح القدس ووقعوا.) واحنا بنصلي الكنيسة في القداس: ايها الجلوس قفوا.
2فَدَخَلَ فِيَّ رُوحٌ لَمَّا تَكَلَّمَ مَعِي، وَأَقَامَنِي عَلَى قَدَمَيَّ فَسَمِعْتُ الْمُتَكَلِّمَ مَعِي. ولان معندهوش قوة علشان يقوم "فدخل فيا روح " ... كلمة روح شوفناها كتير المرة اللي فاتت. وديه كناية عن قوة شديدة خدها حزقيال من روح الله. لان روح الله روح قيامة مش روح موت. (وهنشوف في حز37 : ان عظام الأموات الكتيرة جدا دبت فيها روح قيامة.) وديه كانت المقدمة.3وَقَالَ لِي: «يَا ابْنَ آدَمَ، أَنَا مُرْسِلُكَ إِلَى بَنِي إِسْرَائِيلَ، إِلَى أُمَّةٍ مُتَمَرِّدَةٍ قَدْ تَمَرَّدَتْ عَلَيَّ. هُمْ وَآبَاؤُهُمْ عَصَوْا عَلَيَّ إِلَى ذَاتِ هذَا الْيَوْمِ. الجزء الأول: ربنا هيحمله برسالة: تاني "يا ابن ادم" ربنا له المجد بيقوله : قوم يا حزقيال. أنا هارسلك.
"انا مرسلك" ... تستخدم كمان في الامور السياسة. يعني مثلا شخص سفير البلد الفلانية. جملة تحمل قوة. فهنا معناها: أنت هتتكلم باسمي (حزقيال هيتكلم باسم ربنا له المجد). طيب يارب أنا معرفش ومعنديش اي قوة. فربنا له المجد هيجهزه.
+صفات بني اسرائيل: امة متمردة (وديه اتكررت كتير عن الشعب اليهودي.) متمردة وتمردت: لما يكون في عهد بين اتنين. واللي داخلين في عهد معاه (وليكن بلد مثلا): بيحمينا. ولو الشعب ده اتمرد علي الحاكم وكسر العهد ده.
مش هيبقوا خلاص في حماية الحاكم ده تاني. وده اللي عمله شعب الله انهم كانوا داخلين في عهد مع ربنا. وربنا قالهم طول ما انتم بتسمعوا كلامي وشعبي لان اسمهم شعب الله. هافضل احميكم. لكن لو اتمردوا وكسرتوا العهد يبقي مفيش حماية ليكم.
من بداية السفر ربنا بيوضح ان هما وابائهم اللي عصوا. يعني مش الاباء بس. علشان بعد كده لما يتكلموا ويقولوا: احنا ليه نشيل اخطاء ابائنا؟ فربنا له المجد يقولهم : من الاول وانا قايلكم "هم وابائهم عصوا عليا الي هذا اليوم."
4وَالْبَنُونَ الْقُسَاةُ الْوُجُوهِ وَالصِّلاَبُ الْقُلُوبِ، أَنَا مُرْسِلُكَ إِلَيْهِمْ. فَتَقُولُ لَهُمْ: هكَذَا قَالَ السَّيِّدُ الرَّبُّ. الآباء والأبناء قساة القلوب.
سر قوة اي نبي او مرسل من الله انه يتكلم بكلام الله. يعني مينفعش يكلم الشعب يقولهم أنا باقولكم كذا. اللي بيعمل كده دول الأنبياء الكذبة. ربنا له المجد قاله روح قولهم "هكذا قال السيد الرب."
اذا سر نجاح اي خادم انه يتكلم بأقوال الله. مش كلام من عنده وخلاص.
5وَهُمْ إِنْ سَمِعُوا وَإِنِ امْتَنَعُوا، لأَنَّهُمْ بَيْتٌ مُتَمَرِّدٌ، فَإِنَّهُمْ يَعْلَمُونَ أَنَّ نَبِيًّا كَانَ بَيْنَهُمْ. هتقولهم كلامي. لو سمعوا سمعوا. ولو مسمعوش مسمعوش ديه حاجة بتاعتهم.
اذا نجاح الخدمة ان الواحد يقول كلام ربنا. "وكلمة الله لا ترجع فارغة." اشعياء 55: 11
"وان سمعوا وان امتنعوا" ... ديه معناها ان ربنا مش بيتدخل في حرية إرادة الشخص. كل واحد حر. كله محسوب علي الشخص. واوقات كمان ربنا له المجد بيبعت لنا رسايل. فكل شخص علي حسب استجابته.
"لانهم بيت متمرد" ... دلوقتي بدل ماربنا له المجد يقول شعبي. قال عليهم بيت متمرد. مبقتش صفاتهم: شعب الله. شعبي.
"فانهم يعلمون ان نبيا كان بينهم" ... ربنا جميل اوي وفي عز ماهو زعلان منهم يبعت لهم حزقيال النبي علشان يعرفوا ان ربنا لسه مسابهومش للنهاية. معني ان لسه في نبي في وسطهم: ان ربنا لسه واخد باله منهم ومديهم فرص لسه. ومتكررة كمان في حز 33: 33 .
وكمان ربنا له المجد عاوز يقولهم رسالة جميلة: اوعوا تفتكروا اني لما سلمت مجدي اللي هو الهيكل واورشليم للأعداء إن آلهة الأمم اقوي مني. بالعكس انا سلمتكم بارادتي. بسماح مني.
ربنا عاوز يقولهم اني بعد ما سلمتكم للسبي وسلمت اورشليم والهيكل لكن برده هافضل أنا هو الله وهابعت لكم نبي حتي وانتم موجودين في السبي. انا ضابط الكل كل حاجة في ايدي.
ربنا بيبعته وبيقول انه شعب متمرد وقاسي وانهم ممكن ميسمعوش. طيب ماده يجيب احباط. لكن ربنا مش هيسيبه للإحباط.
6أَمَّا أَنْتَ يَا ابْنَ آدَمَ فَلاَ تَخَفْ مِنْهُمْ، وَمِنْ كَلاَمِهِمْ لاَ تَخَفْ، لأَنَّهُمْ قَرِيسٌ وَسُلاَّءٌ لَدَيْكَ، وَأَنْتَ سَاكِنٌ بَيْنَ الْعَقَارِبِ. مِنْ كَلاَمِهِمْ لاَ تَخَفْ وَمِنْ وُجُوهِهِمْ لاَ تَرْتَعِبْ، لأَنَّهُمْ بَيْتٌ مُتَمَرِّدٌ. الجزء التاني: ربنا هيشجعه: ... اوعي تخاف منهم.
"قريس وسلاء" ... نباتات شوكية. ولما بتتحط في النار تعمل طقطقة في النار. النباتات ديه بتشوك.
"وانت ساكن بين العقارب" ... ديه ضريبة الخدمة. من وقت للتاني : الخادم الأمين بيختبر الحتة ديه. ان في ناس بتشوك وناس لدغتها كالعقارب. ربنا يحمينا وينقذنا ومنكونش من النوعية ديه.
علشان كده لما نشوف الرؤية ديه : ربنا له المجد هيديله يأكل. وديه اشارة لكلمة الله. وبرده ربنا كرر له تاني أوعي تخاف منهم.
7وَتَتَكَلَّمُ مَعَهُمْ بِكَلاَمِي، إِنْ سَمِعُوا وَإِنِ امْتَنَعُوا، لأَنَّهُمْ مُتَمَرِّدُونَ. تقولهم كلامي انا (وهو ده الخادم الامين اللي يقول كلمة ربنا.) سمعوا سمعوا. مسمعوش براحتهم. 8«وَأَنْتَ يَا ابْنَ آدَمَ، فَاسْمَعْ مَا أَنَا مُكَلِّمُكَ بِهِ. لاَ تَكُنْ مُتَمَرِّدًا كَالْبَيْتِ الْمُتَمَرِّدِ. افْتَحْ فَمَكَ وَكُلْ مَا أَنَا مُعْطِيكَهُ». هندخل في وسط الرؤية: (كان في الاول المقدمة. وبعدين ربنا يقوله هابعتك. وبعدين يشجعه).
ارسالية حزقيال النبي:
اسمع الكلام اللي هاقلهولك: "لاتكن متمردا كالبيت المتمرد." ... طيب يارب مش حضرتك اللي مختاره؟ وعارف يارب انه كويس. ... الموضوع ان لأحسن من كتر معاشرته ليهم وعايش في وسطيهم ياثروا عليه. فهنا ربنا له المجد بيحذره او بينبهه. لانهم بيت متمرد. اوعي تتعدي منهم. تبقي زيهم. احنا ساعات كتيرة نتعدي من بعض. من كتر الغرور الواحد يبرد. ومن كتر الشر الواحد ممكن يمشي في نفس الاتجاه. ومن كتر الخطأ الواحد ميبقاش عارف الصح من الغلط. بس يبقي الله امين.
سابوا الاسم الحلو الي هو شعب الله. واخدوا لقب البيت المتمرد. لانهم نقضوا العهد بينهم وبين ربنا.
"افتح فمك وكل ما أنا معطيكه" ... ربنا أداله حاجة يأكلها.
9فَنَظَرْتُ وَإِذَا بِيَدٍ مَمْدُودَةٍ إِلَيَّ، وَإِذَا بِدَرْجِ سِفْرٍ فِيهَا. من المنظر الجميل اللي شافه: ايد ممدودة.
"درج سفر" ... زمان الأسفار كانت بتتكتب رول ويتفتح ويقروا منه. ربنا نزله ايد وفيها درج سفر اللي هو الرول كانت حاجة غريبة مش سفر عادي
10فَنَشَرَهُ أَمَامِي وَهُوَ مَكْتُوبٌ مِنْ دَاخِل وَمِنْ قَفَاهُ، وَكُتِبَ فِيهِ مَرَاثٍ وَنَحِيبٌ وَوَيْلٌ. "فنشره امامي" ... يعني فتحه. ومكتوب من قدام ومن وراء. وده إشارة ان رسالته مليانة. لأنها أصلا عبارة عن 48 اصحاح. ولكن بكل اسف " وكتب فيه مراث ونحيب وويل." ... مكتوب في حاجات صعبة. (زي مثلا اصحاح 19 عنوانه: رثاء رؤساء اسرائيل.) سفر حزقيال فيه مراثي كتير. وفي اصحاح 27 وغيره تاني. وكل ده هنشوفه لما حزقيال يوصلهم كلمة ربنا له المجد. وده اللي هيحصلهم فعلا لما تتدمر اورشليم والهيكل. ⏮