⪡ 1وَكَانَ فِي السَّنَةِ الْحَادِيَةِ عَشَرَةَ، فِي أَوَّلِ الشَّهْرِ، أَنَّ كَلاَمَ الرَّبِّ كَانَ إِلَيَّ قَائِلاً: اصحاحات 26 و 27 و 28. نبوات ضد مدينة اسمها صُور، دينونة مدينة صُور. وديه مدينة كانت مشهورة جدا في العالم القديم، وكانت مدينة بحرية ومشهورة بالتجارة.
شوفنا المرة اللي فاتت ان حزقيال أتنبأ علي 7 أمم حوالين إسرائيل. كانوا:
4 أمم مجاورة: بني عمون – الموآبين – آدوم – الفلسطينيين. ... و 3 بُعاد: ومنهم كانت صور.
الحقيقة المخزي من أن يبقي في نبوات ضد أمم خارج شعب الله، ان الكتاب المقدس يقولنا: ان مفيش حد خارج سيطرة ربنا، كله تحت إطار عمل الله. مفيش حد بعيد عن ايد ربنا، مهما كان جبروته وقوته وحصانته. علشان كده في نبوات ضد صور، وديه كانت من المدن المهمة في العالم زمان زي مصر وبابل.
" وَكَانَ فِي السَّنَةِ الْحَادِيَةِ عَشَرَةَ، فِي أَوَّلِ الشَّهْرِ،" ... السنة ال 11، يعني ديه بعد سنتين من الاصحاح الـ24، لان الاصحاح 24 كان في السنة التاسعة. يعني غالبا التوقيت هنا: في سقوط اورشليم. ومكانتش لسه اتنفذت النبوات ديه ضد صُور. يعني مكانتش لسه حصلت النبوات ديه ضد صور.
النبوات ديه اتحققت تماما ضد صُور علي يد نبوخذنصر، وبيقولوا اكتمل العمل تمام علي يد الاسكندر الاكبر بعد 300 سنة من نبوخذنصر. وبيقولوا تقريبا التوقيت ده : بداية من سنة 587 قبل الميلاد لبداية 586 قبل الميلاد، كان تقريبا مارس او ابريل .
ربنا كلم حزقيال:
2«يَا ابْنَ آدَمَ، مِنْ أَجْلِ أَنَّ صُورَ قَالَتْ عَلَى أُورُشَلِيمَ: هَهْ! قَدِ انْكَسَرَتْ مَصَارِيعُ الشُّعُوبِ. قَدْ تَحَوَّلَتْ إِلَيَّ. أَمْتَلِئُ إِذْ خَرِبَتْ. نفس الخطية اللي شوفناها مع بني عمون (اصحاح 25: 3) غالبا الشعوب ديه بينهم خطايا مشتركة: الكبرياء – الفرح في مصايب الأخرين – الشماتة – عندهم حسد وغيرة جوة قلوبهم وكراهية.
"قَدِ انْكَسَرَتْ مَصَارِيعُ الشُّعُوبِ. قَدْ تَحَوَّلَتْ إِلَيَّ. أَمْتَلِئُ إِذْ خَرِبَتْ" ... في العالم القديم أورشليم كانت مركز تجاري. وكان في منافسة بينها وبين صور. زي بالظبط اتنين تجار مشهورين فاتحين محلاتهم قريب من بعض، ولما واحد يحصل له حاجة ويقفل محله، التاني هيفرح. ويقول كل التجارة هترجع ليا أنا. والذباين والعملاء بتوع اللي قفل هيتعاملوا معاي انا.
" أَمْتَلِئُ إِذْ خَرِبَتْ" ... في ناس بتفكر بالطريقة ديه ، ان لما تحصل مصيبة لحد يبقي: مصايب قوم عند قوم منفعة. يبقي ان المستفيد.
وهنشوف بعدين ان العقاب من نفس نوع الخطية. وديه حاجة نحذر منها، منفرحش في مصايب او متاعب حد. لأنها هتعود علينا.
"قَدِ انْكَسَرَتْ مَصَارِيعُ الشُّعُوبِ." ... يعني أبواب أورشليم المفتوحة علي الشعوب اللي بيتعاملوا معاها: اتكسرت.
"قَدْ تَحَوَّلَتْ إِلَيَّ." ... وكل اللي كانوا اللي بيتعاملوا مع أورشليم، هيجوا لينا. ده كان تفكير صُور. كل تجارة أورشليم هتيجي علي صُور.
"أَمْتَلِئُ إِذْ خَرِبَتْ" ... أية من تلات كلمات بس فيها معاني كتيرة، حد فرحان في بلايا الاخرين. واحد قلبه غير نقي وأسود. وفاكر أنه هياخد ياما هنا ياما هناك بعد خراب التاني.
3لِذلِكَ هكَذَا قَالَ السَّيِّدُ الرَّبُّ: هأَنَذَا عَلَيْكِ يَا صُورُ فَأُصْعِدُ عَلَيْكِ أُمَمًا كَثِيرَةً كَمَا يُعَلِّي الْبَحْرُ أَمْوَاجَهُ. هي ديه النتيجة. انتي فرحانة ببلايا الأخرين؟ فربنا له المجد يقولها: أبدا مش هيحصل.
علشان كده لما نشوف مصايب ناس، ندخل مخادعنا ونصلي ليهم بكل قلوبنا. لأننا كلنا في الموازيين الي فوق. محدش فينا كويس أصلا. محدش يفرح ان فلان وقع النهاردة، ما هو ممكن يقوم ويتوب وربنا يقبل توبته. لكن مين عارف انا لما اقع، هألحق أقوم ولا لأ.
"فَأُصْعِدُ عَلَيْكِ أُمَمًا كَثِيرَةً" ... المقصود بيها: نبوخذنصر وكل جنوده اللي ملهومش عدد. ويدينا صورة بلاغية "كَمَا يُعَلِّي الْبَحْرُ أَمْوَاجَهُ" ... صُور اصلا كل عيشتهم وحياتهم علي البحر. البحر هو شغلانتهم وأكل عيشهم، وكل حياتهم. فاللي بيكونوا مفتخرين بالحصانة الطبيعية بتاعة البحر، ربنا يقولهم: البحر اللي أنتم فرحانين بيه، هو نفسه اللي هتغرقوا فيه.
ولما نكمل الاصحاح هنشوف نفس العقوبة اللي قالها ربنا له المجد لبابل الزانية في سفر الرؤيا اللي أسقطت كثيرين: الآية بما معناه: هأنذا أطرحك أيضا في فراش. وتأكلي وتشربي من نفس الل أكلّتي منه الناس وشربتيهم.
4فَيَخْرِبُونَ أَسْوَارَ صُورَ وَيَهْدِمُونَ أَبْرَاجَهَا. وَأَسْحِي تُرَابَهَا عَنْهَا وَأُصَيِّرُهَا ضِحَّ الصَّخْرِ، مدينة ليها أسوار، وبين كل جزء في السور فيه أبراج مراقبة لتأمين بلدهم.
" وَأَسْحِي تُرَابَهَا عَنْهَا" ... كل التراب بتاعها نتيجة الإنقاض بعد دخول بابل عليها، هينزاح عنها. وهيروح التراب ده أصلا للبحر بتاعها. علشان ميبقاش في فرصة تاني انها تقوم لها قومة.
"وَأُصَيِّرُهَا ضِحَّ الصَّخْر" ... ضِحَّ الصَّخْر: ده تعبير خاص بسفر حزقيال، مش موجود في أي سفر تاني في الكتاب المقدس. (واتذكر في اصحاح 24 :7 . وهنا كمان. وفي اصحاح 26 : آية 4 واية 14.). معناها: صخرة ملساء خالص. ناعمة جدا. فهتبقي المدينة مفيهاش اي حاجة. هتبقي عبارة عن صخرة وبس، حتي التراب مش موجود. ربنا مسمحش انه يتبقي ليهم حتي التراب. وده علشان ميفكروش يبنوها تاني.
5فَتَصِيرُ مَبْسَطًا لِلشِّبَاكِ فِي وَسْطِ الْبَحْرِ، لأَنِّي أَنَا تَكَلَّمْتُ، يَقُولُ السَّيِّدُ الرَّبُّ. وَتَكُونُ غَنِيمَةً لِلأُمَمِ. لما تكون زي جزيرة وكلها صخرة ملساء ناعمة، الصيادين هيفردوا عليها الشِباك بتاعتهم علشان ينشفوها بعد ما يخلصوا الصيد.
"لأَنِّي أَنَا تَكَلَّمْتُ، يَقُولُ السَّيِّدُ الرَّبُّ." ... لازم نثق في كل كلمة من كلام ربنا. ومواعيد ربنا. " هو يبقي امينا. لا يمكن أن يُنكر نفسه."
لما نتحارب بأي حرب، والشيطان يحاول يشكك في مواعيد وكلام ربنا وفي أمانته. نقول لنفسنا " هو يبقي أمينا. لا يقدر ان يُنكر نفسه." 2 تيموثاوس 2: 13 . حتي لو احنا مش أمناء، ده لا يبطل أمانة ربنا . الله يبقي امينا.
"وَتَكُونُ غَنِيمَةً لِلأُمَم" ... اللي فاكرة إنها " أَمْتَلِئُ إِذْ خَرِبَتْ" (أية 2) ، هي نفسها هتبقي غنيمة. هيدخلها البابليين، وبعدهم اليونانيين وهيخربوها علي الآخر.
6وَبَنَاتُهَا اللَّوَاتِي فِي الْحَقْلِ تُقْتَلُ بِالسَّيْفِ، فَيَعْلَمُونَ أَنِّي أَنَا الرَّبُّ. "وَبَنَاتُهَا" ... يُقال عنهم: هما المدن المتعلقة بصُور، المدن الاصغر منها شوية. او التجار اللي بيتعاملوا معاها. او تجارتهم هما. يعني كل متعلقاتها.
للعِلم: الجزء ده قالوا عنه، هل ينطبق تمام الانطباق علي نبوخذنصر؟ يعني هل كل ده هيتحقق في عهده؟ ولا حزقيال مكانش واخد باله ولا ايه؟
لكن هناك اكتشافات كتيرة في بابل وعلي ألواح في بابل، تقول أن ملك صُور وقف أمام نبوخذنصر. يعني بتثبت أن نبوخذنصر قد يكون هو اللي عمل الحاجات ديه في صُور.
وبعض الآراء التانية تقول: ان مفيش مانع ان حزقيال دمج مستقبل صُور كله، كأنه شايفه علي بعض. ان التخريب الأول علي يد نبوخذنصر.
ولما صُور عرفوا كده، بنوا مدينة علي جزيرة عندهم في البحر، ولما البابليين مقدروش يوصلوا لهم. بعد كده جه الاسكندر الاكبر، ولأنه اساسا كان بتاع بحر. فخرب صُور خالص.
والرأيين يمشوا صح، لان في شواهد كتير تقول أن نبوخذنصر قدر يوصل لملك صُور، وقدر أنه يحقق كل اللي اتكلم عنه حزقيال. ... أو حتى إذا مكانش نبوخذنصر هو اللي عمل كل ده، فهيكون اتحقق في عهد الاسكندر الاكبر.
"اللَّوَاتِي فِي الْحَقْلِ تُقْتَلُ بِالسَّيْفِ، فَيَعْلَمُونَ أَنِّي أَنَا الرَّبُّ" ... ولما يحصل كل ده، وقتها هيعرفوا اني انا ربنا.
7« لأَنَّهُ هكَذَا قَالَ السَّيِّدُ الرَّبُّ: هأَنَذَا أَجْلِبُ عَلَى صُورَ نَبُوخَذْرَاصَّرَ مَلِكَ بَابِلَ مِنَ الشِّمَالِ، مَلِكَ الْمُلُوكِ، بِخَيْل وَبِمَرْكَبَاتٍ وَبِفُرْسَانٍ وَجَمَاعَةٍ وَشَعْبٍ كَثِيرٍ، الشمال دايما عند اليهود وفي اعتقادهم أنها الجهة اللي بيأتي منها الشر دايما. لان البابليين كمان جايين عليهم من العراق. جايين من الشمال علي اورشليم.
"مَلِكَ الْمُلُوكِ،" ... في ناس بتقول ان تعبير ملك الملوك، اتقال علي نبوخذنصر، (وكمان في سفر دانيال 2 :37 دانيال قال علي نبوخذنصر ملك الملوك.). وعلي فكرة دانيال وحزقيال الاتنين كانوا موجودين في السبي في نفس الوقت، دانيال كان في قصر الملك في بابل. وحزقيال كان مع المسبيين. والاتنين قالوا نفس التعبير: ملك الملوك.
"بِخَيْل وَبِمَرْكَبَاتٍ وَبِفُرْسَانٍ وَجَمَاعَةٍ وَشَعْبٍ كَثِيرٍ،" ... نبوخذنصر جاي بكل جيوشه والمركبات وفرسانه.
8فَيَقْتُلُ بَنَاتِكِ فِي الْحَقْلِ بِالسَّيْفِ، وَيَبْنِي عَلَيْكِ مَعَاقِلَ، وَيَبْنِي عَلَيْكِ بُرْجًا، وَيُقِيمُ عَلَيْكِ مِتْرَسَةً، وَيَرْفَعُ عَلَيْكِ تُرْسًا، هيكسر كل أسوارك، ويُقيم منكِ، زي قاعدة حربية ليه. نبوخذنصر هيخلص علي كل صُور والمدن المجاورة والمتعلقة بصُور ومعتمدة عليها تجاريا. وهي ديه المقصود ب " فَيَقْتُلُ بَنَاتِكِ فِي الْحَقْلِ بِالسَّيْفِ" بالإضافة طبعا للشعب اللي هيتقتل.
" مَعَاقِلَ ... يعني حصون.
"وَيَرْفَعُ عَلَيْكِ تُرْسًا،" ... علشان يهد أسوارك ياصُور.
9وَيَجْعَلُ مَجَانِقَ عَلَى أَسْوَارِكِ، وَيَهْدِمُ أَبْرَاجَكِ بِأَدَوَاتِ حَرْبِهِ. " وَيَجْعَلُ مَجَانِقَ عَلَى أَسْوَارِكِ،" ... أدوات علشان يهد أسوار مدينة صُور.
"وَيَهْدِمُ أَبْرَاجَكِ بِأَدَوَاتِ حَرْبِهِ" ... صُور كانوا محصنيين، مدينة حصينة. الشعوب اللي حواليها بيخافوا منها. لكنها هتقع في ايد نبوخذنصر.
"قبل الكسر الكبرياء، وقبل السقوط تشامخ الروح."
ياريت قبل ما ندين حد بأي شكل من الاشكال، ننظر لأنفسنا. ونقول "مَنْ أَنْتَ الَّذِي تَدِينُ عَبْدَ غَيْرِكَ؟ هُوَ لِمَوْلاَهُ يَثْبُتُ أَوْ يَسْقُطُ. وَلكِنَّهُ سَيُثَبَّتُ، لأَنَّ اللهَ قَادِرٌ أَنْ يُثَبِّتهُ." . الدور والباقي عليا أنا.
مدينة صُور اتكبرت وانتفخت. وفرحت في مصايب الاخرين. فجالها العقاب.
10وَلِكَثْرَةِ خَيْلِهِ يُغَطِّيكِ غُبَارُهَا. مِنْ صَوْتِ الْفُرْسَانِ وَالْعَجَلاَتِ وَالْمَرْكَبَاتِ تَتَزَلْزَلُ أَسْوَارُكِ عِنْدَ دُخُولِهِ أَبْوَابَكِ، كَمَا تُدْخَلُ مَدِينَةٌ مَثْغُورَةٌ. "كَمَا تُدْخَلُ مَدِينَةٌ مَثْغُورَةٌ." ... يعني فيها ثغور. خروم في الحيطة او في السور.. بمعني ان صُور بقت مليانة ثغور وثقوب في أسوارها. فبقي سهل هجومها. بعد ما كانت مدينة حصينة، وفاكرة انها مش ممكن تقع. فبقي سهل أوي دخولها وتحطيمها. والاستيلاء عليها.
الكبرياء وحش ووقع الشيطان.. وهنشوف دلوقتي في النبوات ضد صُور: انها ترمز للشيطان. وملك صُور رمز للشيطان.
نبوخذنصر لما يدخل هيبهدل صُور خالص بالأدوات الحربية بتاعته، وبجيشه الكتير. فهيدمروا المدينة خالص.
11بِحَوَافِرِ خَيْلِهِ يَدُوسُ كُلَّ شَوَارِعِكِ. يَقْتُلُ شَعْبَكِ بِالسَّيْفِ فَتَسْقُطُ إِلَى الأَرْضِ أَنْصَابُ عِزِّكِ. نبوخذنصر هيدخل بجنوده في كل الشوارع، وهتبقي مذبحة. وشعبك هيتقتل.
" أَنْصَابُ عِزِّكِ" ... كانوا يُقيموا زي نصب تذكاري للآلهة بتاعتهم. وتبقي فخرهم وعزهم. فربنا بيقول: البابليين هيهدموا أنصاب عزهم. هيدمروا كل حاجة.
" بِحَوَافِرِ خَيْلِهِ يَدُوسُ كُلَّ شَوَارِعِكِ. يَقْتُلُ شَعْبَكِ بِالسَّيْفِ فَتَسْقُطُ إِلَى الأَرْضِ أَنْصَابُ عِزِّكِ" ... الخيول والمركبات هتدخل المدينة وهيدوسوا اي حاجة او اي حد هيجي قدامهم. وهيهدوا اي حاجة هتيجي قدامهم وخصوصا أنصاب الآلهة؛ ليشعر السكان بتحطيم قوتهم وسندهم، فيستسلمون.
12وَيَنْهَبُونَ ثَرْوَتَكِ، وَيَغْنَمُونَ تِجَارَتَكِ، وَيَهُدُّونَ أَسْوَارَكِ، وَيَهْدِمُونَ بُيُوتَكِ الْبَهِيجَةَ، وَيَضَعُونَ حِجَارَتَكِ وَخَشَبَكِ وَتُرَابَكِ فِي وَسْطِ الْمِيَاهِ. "وَيَنْهَبُونَ ثَرْوَتَكِ،" ... كانت مدينة غنية جدا.
"وَيَغْنَمُونَ تِجَارَتَكِ، وَيَهُدُّونَ أَسْوَارَكِ، وَيَهْدِمُونَ بُيُوتَكِ الْبَهِيجَةَ،" ... صُور كانت مدينة بتتميز بالبيوت من كذا طابق. والبيوت متعددة الطوابق ديه مكانتش مشهورة اوي في العالم القديم. صُور مدينة ساحلية فكانوا بيتباهوا ببيوتهم.
فربنا بيقولهم: حتي بيوتكم ديه اللي بتفتخروا بيها، البابليين هيهدوها.
"وَيَضَعُونَ حِجَارَتَكِ وَخَشَبَكِ وَتُرَابَكِ فِي وَسْطِ الْمِيَاهِ." ... بيقولوا ان ده اللي حصل فعلا، سواء علي يد نبوخذنصر او الإسكندر الأكبر. لكن بيقولوا ان اللي عمل ده فعلا وبهدل ودمر المدينة هو الاسكندر الاكبر.
علشان يوصل للجزيرة اللي مدينة صُور بنوها في البحر، الاسكندر عمل جسر بكل الطوب والحجارة والخشب والحطام اللي طلع من المدينة. وفعلا قدر يوصلها.
13وَأُبَطِّلُ قَوْلَ أَغَانِيكِ، وَصَوْتُ أَعْوَادِكِ لَنْ يُسْمَعَ بَعْدُ. "وَأُبَطِّلُ قَوْلَ أَغَانِيكِ،" ... المدن الساحلية عندهم بهجة. وليهم أغانيهم. وبيغنوا بالعود والآلات الموسيقية. فربنا قالهم: خلاص بقي مفيش الكلام ده تاني بعد كده.
"وَصَوْتُ أَعْوَادِكِ لَنْ يُسْمَعَ بَعْد" ... مفيش اي آلات موسيقية تاني خالص.
خلاص بابل هتيجي عليكم وتُبطل كل فرح فيكم. وكمان علشان شمتوا في أورشليم.
14وَأُصَيِّرُكِ كَضِحِّ الصَّخْرِ، فَتَكُونِينَ مَبْسَطًا لِلشِّبَاكِ. لاَ تُبْنَيْنَ بَعْدُ، لأَنِّي أَنَا الرَّبُّ تَكَلَّمْتُ، يَقُولُ السَّيِّدُ الرَّبُّ. " وَأُصَيِّرُكِ كَضِحِّ الصَّخْرِ،" ... صخرة ملساء ناعمة تماما. وده تاني مرة تتقال: ضِحِّ الصَّخْرِ، في الاصحاح هنا.
"فَتَكُونِينَ مَبْسَطًا لِلشِّبَاكِ. لاَ تُبْنَيْنَ بَعْدُ، لأَنِّي أَنَا الرَّبُّ تَكَلَّمْتُ، يَقُولُ السَّيِّدُ الرَّبُّ." ... وده اتحقق فعلا. والمدينة لم يُعاد بنائها تاني خالص.
هنا ختام الاصحاح:
15« هكَذَا قَالَ السَّيِّدُ الرَّبُّ لِصُورَ: أَمَا تَتَزَلْزَلُ الْجَزَائِرُ عِنْدَ صَوْتِ سُقُوطِكِ، عِنْدَ صُرَاخِ الْجَرْحَى، عِنْدَ وُقُوعِ الْقَتْلِ فِي وَسْطِكِ؟ "الْجَزَائِر" مش المقصود بيها جزيرة فعلا وسط المية، متحاوطة بالمية من كل ناحية. لكن حتي المدن الساحلية اللي ليها علاقة بصُور، ربنا بيقولهم انه هيتزلزلوا. فكله هيخاف ويترعب.
اذا كانت صُور وقعت، أمال احنا هيحصل فينا ايه؟ فكله بعد كده هيستسلم.
"عِنْدَ صُرَاخِ الْجَرْحَى، عِنْدَ وُقُوعِ الْقَتْلِ فِي وَسْطِكِ؟" ... تشبيه مع الفارق: اذا كان فلان او القديس الفلاني او داود النبي اتحارب في مرة واتهزم وسقط، امال انا أروح فين بقي؟ فالواحد يقول: استر يارب عليا. ولما نشوف حاجات زي كده نقول استرها يارب عليا وعليه.
16فَتَنْزِلُ جَمِيعُ رُؤَسَاءِ الْبَحْرِ عَنْ كَرَاسِيِّهِمْ، وَيَخْلَعُونَ جُبَبَهُمْ، وَيَنْزِعُونَ ثِيَابَهُمُ الْمُطَرَّزَةَ. يَلْبِسُونَ رَعْدَاتٍ، وَيَجْلِسُونَ عَلَى الأَرْضِ، وَيَرْتَعِدُونَ كُلَّ لَحْظَةٍ، وَيَتَحَيَّرُونَ مِنْكِ. رؤساء البحر: هما التجار- العظماء اللي ماسكين بزمام تجارة البحر.
"وَيَخْلَعُونَ جُبَبَهُمْ، وَيَنْزِعُونَ ثِيَابَهُمُ الْمُطَرَّزَةَ." ... كل ملابس الافتخار والمجد. كله هيتخلع.
"يَلْبِسُونَ رَعْدَاتٍ،" "وَيَجْلِسُونَ عَلَى الأَرْضِ، وَيَرْتَعِدُونَ كُلَّ لَحْظَةٍ،" ... يلبسون رعدات: بيوضح الرعب والخوف اللي هيقع عليهم. ولأننا مش متعودين علي اننا نجمع كلمة رعد، بس ده للتوضيح أد ايه كمية الرعب اللي هيبقوا فيها.
" وَيَرْتَعِدُونَ كُلَّ لَحْظَةٍ،" ... مفيش لحظة هتمر عليهم من غير رعب. حياة رعب وخوف هيعيشوا فيها.
"وَيَتَحَيَّرُونَ مِنْكِ." ... هيقولوا ازاي صُور وقعت؟ ايه اللي حصل؟ مش معقول يحصل كده، ديه مكانتش ممكن تسقط ابدا.
17وَيَرْفَعُونَ عَلَيْكِ مَرْثَاةً وَيَقُولُونَ لَكِ: كَيْفَ بِدْتِ يَا مَعْمُورَةُ مِنَ الْبِحَارِ، الْمَدِينَةُ الشَّهِيرَةُ الَّتِي كَانَتْ قَوِيَّةً فِي الْبَحْرِ هِيَ وَسُكَّانُهَا الَّذِينَ أَوْقَعُوا رُعْبَهُمْ عَلَى جَمِيعِ جِيرَانِهَا؟ هيرفعوا عليكِ مرثاة، يعني في حد ميت. هيرفعوا مرثاة علي مدينة صُور وهما بيستعجبوا ... " كَيْفَ بِدْتِ يَا مَعْمُورَةُ مِنَ الْبِحَارِ،". وديه تتفهم علي معنايين:
- المعني الاول: معمورة من البحار، كأن مثلا بيقولوا نجمة البحار. يعني مدينة عظيمة جدا. شهرتها في البحر بتاعها وبتفتخر بيه.( زي مثلا الاسكندرية عروس البحر الابيض المتوسط.) . لانه مصدر قوتها وحصانتها، كل فخرها وعزها.
- المعني التاني: اللي تتفهم بيه " كَيْفَ بِدْتِ يَا مَعْمُورَةُ مِنَ الْبِحَارِ،" ، ان سبب فخرك هو سبب هلاكك. البحار اللي بتفتخري بيها، هي سبب هلاكك. (وديه واضحة في آية 19 ).
"الْمَدِينَةُ الشَّهِيرَةُ الَّتِي كَانَتْ قَوِيَّةً فِي الْبَحْرِ هِيَ وَسُكَّانُهَا الَّذِينَ أَوْقَعُوا رُعْبَهُمْ عَلَى جَمِيعِ جِيرَانِهَا؟" ... يعني مدينة مشهورة جدا في العالم القديم. وشهرتها يمكن قبل مدينة الإسكندرية بتاعتنا، وبيقولوا احتمال ان الاسكندر الاكبر بعد ما دمر مدينة صُور، راح بني الاسكندرية.
وكل الشعوب كانت بتخاف من صُور وبتعملها ألف حساب. فارفعوا عليها مرثاة.
18اَلآنَ تَرْتَعِدُ الْجَزَائِرُ يَوْمَ سُقُوطِكِ وَتَضْطَرِبُ الْجَزَائِرُ الَّتِي فِي الْبَحْرِ لِزَوَالِكِ. المعني هنا: ان الكل بيرتعد ويضطرب ويتحير من اللي حصل لصُور.19لأَنَّهُ هكَذَا قَالَ السَّيِّدُ الرَّبُّ: حِينَ أُصَيِّرُكِ مَدِينَةً خَرِبَةً كَالْمُدُنِ غَيْرِ الْمَسْكُونَةِ، حِينَ أُصْعِدُ عَلَيْكِ الْغَمْرَ فَتَغْشَاكِ الْمِيَاهُ الْكَثِيرَةُ، هتبقي زي الخرابة. زي كتير من المدن المُخربة. وغير مؤهلة بالسكن.
"حِينَ أُصْعِدُ عَلَيْكِ الْغَمْرَ فَتَغْشَاكِ الْمِيَاهُ الْكَثِيرَةُ" ... المية اللي كنتِ بتفتخري بيها، وسبب تجارتك. هي نفسها هتكون سبب هلاكك. وممكن يكون المقصود بيها هنا : جيش بابل اللي جه عليهم.
20أُهْبِطُكِ مَعَ الْهَابِطِينَ فِي الْجُبِّ، إِلَى شَعْبِ الْقِدَمِ، وَأُجْلِسُكِ فِي أَسَافِلِ الأَرْضِ فِي الْخِرَبِ الأَبَدِيَّةِ مَعَ الْهَابِطِينَ فِي الْجُبِّ، لِتَكُونِي غَيْرَ مَسْكُونَةٍ، وَأَجْعَلُ فَخْرًا فِي أَرْضِ الأَحْيَاءِ. في مراثي ارميا في الجمعة العظيمة قرينا (مراثي ارميا 3 : 6 " أسكنني في ظلمات كموتي القِدم.) " نفسها هنا قالها: "شَعْبِ الْقِدَمِ،". يعني كل اللي ماتوا، من الاول لغاية دلوقتي. هتهبطي مع كل اللي ماتوا منذ القِدم للجحيم.
"وَأُجْلِسُكِ فِي أَسَافِلِ الأَرْضِ فِي الْخِرَبِ الأَبَدِيَّةِ مَعَ الْهَابِطِينَ فِي الْجُبِّ، لِتَكُونِي غَيْرَ مَسْكُونَةٍ، " ... اسافل الارض في أصلها: الطبقات المتدنية خالص من الهاوية.
وديه تدينا فكرة ان الهاوية طبقات. زي ما في السماء منازل كثيرة " في بيت ابي منازل كثيرة." ، " نجم يمتاز عن نجم في المجد.". فده يوضح ان كل واحد هيأخد أجرته حسب تعبه. وهو ده العدل الالهي.
" وَأَجْعَلُ فَخْرًا فِي أَرْضِ الأَحْيَاءِ" ... مش هيكون ليكِ وجود تاني في أرض الاحياء.
21أُصَيِّرُكِ أَهْوَالاً، وَلاَ تَكُونِينَ، وَتُطْلَبِينَ فَلاَ تُوجَدِينَ بَعْدُ إِلَى الأَبَدِ، يَقُولُ السَّيِّدُ الرَّبُّ». وده كان مصير صُور، هتختفي للأبد. ومش هتقوم لها قومة من تاني خالص.
وديه كانت بداية النبوات ضد صُور.
" أُصَيِّرُكِ أَهْوَالًا،" ... اهوال يعني رعب وخوف شديد. هيبقي ليها الهلاك الابدي.
فمن العدل أن من ظلموا وأرعبوا غيرهم أن يكونوا في رعب.
"وَلاَ تَكُونِينَ، وَتُطْلَبِينَ فَلاَ تُوجَدِينَ بَعْدُ إِلَى الأَبَدِ، يَقُولُ السَّيِّدُ الرَّبُّ" ... خلاص مش هتبقي موجودة بعد كده. خلاص مفيش مجد ولا اي حاجة من اللي كنتِ فيه قبل كده. كله اتدمر بإيد بابل.
⪢