⪡ 1فِي السَّنَةِ الْعَاشِرَةِ، فِي الثَّانِي عَشَرَ مِنَ الشَّهْرِ الْعَاشِرِ، كَانَ إِلَيَّ كَلاَمُ الرَّبِّ قَائِلاً: الكام اصحاح اللي فاتوا كانوا نبوات عن بعض الأمم المجاورة لشعب بني اسرائيل. كانت نبوات ضد: بني عمون – بني موآب - الآدوميين – الفلسطينيين – صُور (صُور لوحدها كانت 3 اصحاحات 26 و27 و28) – صيدا او صيدون.
وهنبتدي 4 اصحاحات الكلام موجه عن مصر، وممكن الكلام يبان تقيل... لدرجة ان بعض النقاد يقولوا: ده اليهود عملوها بالعِند أنها نبوات ضد مصر. (يعني كأنهم قاصدينها فينا) لكن اللي بيقولوا كده نظرتهم سطحية جدا، بالنسبة لقرايتهم للأربع اصحاحات دول.
اليهود وهما بيقروا النبوات ضد مصر، اصلا واقفة في زورهم. مش معدية عليهم عادي. لأن كل الامم المجاورة لشعب بني اسرائيل اللي شوفناهم في الاصحاحات اللي فاتت كان خرابهم نهائي والي الأبد. ماعدا مصر. وهي ديه الحاجة اللي اليهود مش فاهمينها. اشمعنا مصر بالذات في وسط السبع أمم دول لسه موجودة والباقي اتخرب تماما؟
مصر هتمر بتأديب وعقاب جامد، لكن هناك عودة وشفاء.
والغريب أن نفس التعبيرات اللي اتقالت علي عودة بني اسرائيل (نفس الكلمات والمصطلحات اللي شوفناها في حزقيال 11 وغيره، هي نفس الكلمات اللي استخدمها حزقيال في العودة والشفاء لمصر. وديه اليهود مش فاهمين اشمعنا يعني.)
لكن نلاحظ في الاصحاح هنا في آية 16 ... كانت مشكلة بني اسرائيل هي مصر، بني إسرائيل كانوا بيسيبوا ربنا وبيعتمدوا علي مصر. " فَلاَ تَكُونُ بَعْدُ مُعْتَمَدًا لِبَيْتِ إِسْرَائِيلَ،" ... الكلام علي مصر. وربنا مكانش عاجبه اعتمادهم علي مصر. فربنا أمر بالتأديب لمصر. علشان شعب الله ميعتمدش علي حد تاني، يكون اعتماده علي ربنا وبس.
" مُذَكِّرَةَ الإِثْمِ بِانْصِرَافِهِمْ وَرَاءَهُمْ،" ... يعني كل ماتكون مصر في حالة قوية ورخاء وانتعاش. كأن ربنا بيقول: كل ما كانت مصر قوية، ده بيذّكر اثم إسرائيل أمام الله. وانصرافهم عن الاله الحقيقي واعتمادهم علي الذراع البشري.
فربنا قال علي تأديب مصر: اجعلها خِربة ومقفرة وتكون أرض حقيرة.
وبالنسبة لليهود كل ما كانت مصر مخفوسة وضايعة، كل ما كان ده بالنسبة لهم أحسن. لأن انتعاشة مصر " مُذَكِّرَةَ الإِثْمِ"، يعني كل ما مصر تقوم وتنتعش، ده بيذكر ربنا بإثم إسرائيل. فمن مصحلتهم دايما ان مصر تكون أمة حقيرة. وده اللي في قلبهم ناحية مصر.
بس طبعا الحل أحسن من كده، انهم يؤمنوا بالمسيح يسوع ربنا له المجد. واثمهم يُمحي للأبد، وده طبعا المفروض هيحصل في أخر الأيام.
لكن بالرغم من أن في نبوات عن مصر في حزقيال هنا من تأديب وعقاب. وأن مصر تكون أمة حقيرة وأحقر الممالك، لكن هناك كتير من المفسرين تبعا لدانيال 11 ، أن مصر في أخر الأزمنة ستقوم وتنهض من جديد.
كلمة مصر في العهد القديم اتذكرت حوالي 680 مرة. ... وفي المقابل آشور اتذكرت 150 مرة.
مصر: تُنسب الي مصرايم ابن حام. (نوح أولاده سام وحام ويافث) حام جه منه مصرايم، واللي نُسبت إليه أرض مصر بعد كده. علشان كده أوقات مصر تُسمي في الكتاب المقدس: أرض حام.
مصر كانت مقسمة وحتى الآن لقسمين: مصر العليا (الجنوب أو الصعيد). ومصر السفلي (الشمال ونواحي الدلتا وكلما قربنا من البحر الابيض المتوسط).
مصر العليا: كان اسمها فتروس، هنا في الكتاب المقدس.
ومصر السفلي: اللي هي نواحي البحر الابيض المتوسط.
وشوفنا من أول الكتاب المقدس من أبونا إبراهيم، لما كانت بتحصل مجاعة كان ينحدر لمصر. ويوسف لما اتباع، اتباع لمصر. وبقي الراجل التاني في مصر. وبترتيب إلهي عجيب: يجي ليه كل اخواته ويعقوب ابوهم، وفرعون يأمر أنه يديهم أحسن الأراضي في مصر هي أرض جاسان، حاليا نواحي الشرقية.
وتنمو أمة بني اسرائيل في مصر، لغاية ما يجي فرعون جديد مكانش يعرف يوسف خالص. ويبتدي يتعِب الإسرائيليين ويذلهم ويضغط عليهم. لغاية ماربنا بعت لهم موسي يخلصهم من العبودية والذل والهوان. ويخرجهم من أرض مصر. وعندنا سفر الخروج: الخروج من أرض مصر. وعلشان كده مصر دائما كلمة الله تُشير الي أرض العبودية، وفرعون يُشير للشيطان. لأنه هو اللي كان مُستعبد شعب الله.
وبعدها بفترة نلاقي سُليمان الحكيم يأخد ابنة فرعون زوجة له. ويموت سُليمان وتنقسم المملكة من بعده. ويجي يربعام يهرب، ويتحامي في فرعون مصر. وبعدين يربعام أخد 10 أسباط من أسباط إسرائيل وكان الملك بتاعهم.
وبعده بفترة يجي فرعون، اسمه نخو: عاوز يسترد أمجاد مصر. وعاوز يأخد الحاجات اللي أخدوها الآشوريين والبابليين. فيعمل معركة كبيرة اسمها: معركة مجدو (وديه في بداية دراستنا للعهد القديم انه: اخد الملك يهوآحاز ملك يهوذا علي مصر، ومات هناك. وعين مكانه أخوه يهوياقيم كملك ليهوذا. لغاية ما جه صدقيا أخر ملوك مملكة يهوذا. وصدقيا اتعاهد مع ملك بابل أنه مش هيخونه و هيفضل خاضع ليه.
لكن بتشجيع من فرعون مصر، يجي صدقيا ملك يهوذا ويخون العهد مع ملك بابل. وكان عاوز يقوم بثورة ضد ملك بابل. ومن هنا تبتدي نهاية مملكة يهوذا. بأن يجي ملك بابل ويحاصر ويحارب أورشليم، ويحصل السبي الكبير. وتُهزم مصر من نبوخذنصر ملك بابل.
وديه كانت انحدار المملكة المصرية القديمة. ولغاية الوقت ده قديما، مصر كانت قوية وعظيمة اوي.
لكن من بعد نبوة حزقيال اللي هنشوفها دلوقتي، وهزيمة فرعون مصر علي يد نبوخذنصر، ويُقال ان بنوخذنصر دخل مصر وخّرب كتير فيها.
وابتديت تتم كلمة الله حرفيا: أن مصر تكون مملكة تابعة وحقيرة. وبعد بابل جت مملكة فارس، وكانت مسيطرة برده علي مصر. وبعدها الاسكندر الاكبر. وبعده البطالمة.
وسنة 30 قبل الميلاد، وقعت مصر تحت الحكم الروماني، ولما انقسمت الامبراطورية الرومانية لشرقية وغربية. مصر بقت تابعة للإمبراطورية الشرقية. فبعد ما كانت مصر سيدة العالم من أيام الفراعنة. بقت كل مملكة جديدة تيجي، وتبقي مصر خاضعة ليها. حسب كلمة الله في سفر حزقيال.
وبعد الامبراطورية الرومانية الشرقية، يجي العرب. ومصر تدخل تحت الحكم والفتح العربي. وبعدهم جه العثمانيين. وهكذا ... يعني من الفراعنة بقت مصر دولة تابعة، ومبقاش ليها شأن زي ما كان ليها زمان.
1 فِي السَّنَةِ الْعَاشِرَةِ، فِي الثَّانِي عَشَرَ مِنَ الشَّهْرِ الْعَاشِرِ، كَانَ إِلَيَّ كَلاَمُ الرَّبِّ قَائِلًا:
التاريخ ده قبل تاريخ النبوة عن مدينة صُور، اللي كان موجود في الاصحاح 26: كان في السنة الحادية عشر.
2«يَا ابْنَ آدَمَ، اجْعَلْ وَجْهَكَ نَحْوَ فِرْعَوْنَ مَلِكِ مِصْرَ وَتَنَبَّأْ عَلَيْهِ وَعَلَى مِصْرَ كُلِّهَا. "يَا ابْنَ آدَمَ،" ... التعبير المخصوص والمشهور بتاع سفر حزقيال.
"اجْعَلْ وَجْهَكَ نَحْوَ فِرْعَوْنَ مَلِكِ مِصْرَ وَتَنَبَّأْ عَلَيْهِ وَعَلَى مِصْرَ كُلِّهَا." ... يا حزقيال بص ناحية مصر، واتنبأ علي فرعون وعلي مصر. (4 اصحاحات تخص مصر.)
3تَكَلَّمْ وَقُلْ: هكَذَا قَالَ السَّيِّدُ الرَّبُّ: هأَنَذَا عَلَيْكَ يَا فِرْعَوْنُ مَلِكُ مِصْرَ، التِّمْسَاحُ الْكَبِيرُ الرَّابِضُ فِي وَسْطِ أَنْهَارِهِ، الَّذِي قَالَ: نَهْرِي لِي، وَأَنَا عَمِلْتُهُ لِنَفْسِي. ربنا بيقول لفرعون: أنا عليك. ضدك يا فرعون. فرعون يُمثل الشيطان الذي استعبد شعب الله.
"التِّمْسَاحُ الْكَبِيرُ" ... فرعون مصر اتشبه بالتمساح الكبير.
وعلي فكرة في أيام الفراعنة: كان من الالهة اللي عبدوها الفراعنة، حد في صورة تمساح. وأحد الفراعنة لما كانوا بيرسموه، كانوا بيرسموه في شكل او صورة تمساح. لأن نهر النيل زمان كان مشهور بالتماسيح، كان فيه تماسيح كتير. والمصريين كانوا بيصطادوا التماسيح. وهنشوف دلوقتي ازاي.
فربنا قال علي فرعون انه التمساح الكبير.
" الرَّابِضُ فِي وَسْطِ أَنْهَارِهِ،" ... يارب ده مفيش غير نهر واحد بس، لكن كانت كل فروع نهر النيل تُسمي نهر. مثلا: فرع دمياط ورشيد، برده بيتقال عليه نهر النيل. أو أفرع النيل اللي في السودان. فكل الفروع بتتسمي النيل.
"الَّذِي قَالَ: نَهْرِي لِي، وَأَنَا عَمِلْتُهُ لِنَفْسِي." ... الخطية المشتركة بين كل الشعوب ديه هي الكبرياء. وشوفناها في مدينة صُور. لدرجة أن ربنا لما حب يوصف ملك صُور، بقي الكلام شوية عنه وشوية عن الشيطان وسقوطه.
والفراعنة هنا برده عندهم حتة العظمة ديه، فكانوا بيعملوا نفسهم آلهة، والناس تعبدهم. فكان فاكر أن نهر النيل بتاعه، وعمله لنفسه. عاوز يقول: عملته لمجدي ولنفسي.
ونهر النيل هو سبب رخاء مصر، ولو مفيش نهر النيل كانت هتبقي مشكلة لأننا مش بنعتمد علي المطر. ومعندناش امطار كتير. مفيش مطر في مصر كفاية.
الفراعنة في مصرعلشان شايفين أن نهر النيل ده موجود، ففاكرين أنها حاجة للأبد. ومحدش يقدر يغير فيها. فكان مديهم احساس بالعظمة والامان. وده بيأكد ان " قبل الكسر الكبرياء، وقبل السقوط تشامخ الروح."
4فَأَجْعَلُ خَزَائِمَ فِي فَكَّيْكَ وَأُلْزِقُ سَمَكَ أَنْهَارِكَ بِحَرْشَفِكَ، وَأُطْلِعُكَ مِنْ وَسْطِ أَنْهَارِكَ وَكُلُّ سَمَكِ أَنْهَارِكَ مُلْزَقٌ بِحَرْشَفِكَ. الخزائم: يعني السلاسل المقصود بيها الحاجة اللي بيصطادوا بيها التماسيح.
"وَأُلْزِقُ سَمَكَ أَنْهَارِكَ بِحَرْشَفِكَ،" ... جسم التمساح متغطي بحاجة خشنة اسمها الحراشيف. فربنا بيقوله: انا هأخليهم يصطادوك، زي مابيصطادوا التماسيح في مصر.
والسمك المقصود بيه: جنود فرعون والتابعين ليه، هيلزقوا في حراشيفك.
هيرودت المؤرخ، قالنا طريقة صيدهم للتماسيح: ... بسنارة ضخمة جدا، كانوا بيحطوا في نهايتها قطعة لحم خنزير. والصياد قاعد علي الشط، ورامي السنارة الضخمة في المية. وجنبه خنزير بيضرب فيه علشان يطلع صوت، فالتمساح لما يقرب، هو شايف اللحمة اللي في السنارة وسامع صوت الخنزير. فيقرب شوية شوية ، لغاية ما يمسك اللحمة والسنارة تغرس في فكه ومتطلعش منه. ويشدوا في التمساح لغاية ما يطلعوه. وديه كانت طريقة صيد المصريين للتماسيح.
وفرعون بما أنه فاهم وعارف الطريقة ديه، فربنا قاله شايفين بتصطادوا التماسيح ازاي؟ هتنطبق عليك ديه يا فرعون. علشان كده ربنا قاله " فَأَجْعَلُ خَزَائِمَ فِي فَكَّيْكَ".
"وَأُطْلِعُكَ مِنْ وَسْطِ أَنْهَارِكَ وَكُلُّ سَمَكِ أَنْهَارِكَ مُلْزَقٌ بِحَرْشَفِكَ." ... السمك لما بيطلع من المية بيموت.
نأخد الصورة علي بعضها: التماسيح برمائيات، تعيش شوية علي البر وشوية في المية. لكن الصورة الكاملة، عاوز يقول: أن كل الاسماك بره المية تموت. فربنا يقوله: هأخرجكم كلكم بره المية بتاعتكم. وبيقولوا أن فرعون مصر وجيشه هلكوا بالطريقة ديه. راحوا يدافعوا عن ملك صاحبه في القيروان في ليبيا، ومرجعوش. قامت عليهم ثورة في مصر وحصل قلق كتير، وماتوا في الصحراء.
5وَأَتْرُكُكَ فِي الْبَرِّيَّةِ أَنْتَ وَجَمِيعَ سَمَكِ أَنْهَارِكَ. عَلَى وَجْهِ الْحَقْلِ تَسْقُطُ فَلاَ تُجْمَعُ وَلاَ تُلَمُّ. بَذَلْتُكَ طَعَامًا لِوُحُوشِ الْبَرِّ وَلِطُيُورِ السَّمَاءِ. زي ما مات فرعون وجيشه في الصحراء الغربية، وهما رايحين يدافعوا عن ملك في القيراون.
"عَلَى وَجْهِ الْحَقْلِ تَسْقُطُ فَلاَ تُجْمَعُ وَلاَ تُلَمُّ. بَذَلْتُكَ طَعَامًا لِوُحُوشِ الْبَرِّ وَلِطُيُورِ السَّمَاءِ." ... من أسوء الميتات عند المصريين، انهم يموتوا الموتة ديه. يموتوا في الصحراء وميتدفنوش. (لأن المصريين وخاصة الفراعنة كانوا بيؤمنوا بالخلود والحياة الأخرى. وعملوا لنا الأهرامات وكانوا بيحنطوا الجثة وتبقي مومياء. ويحطوا المستلزمات الشخصية معاهم علشان يستخدموها تاني لما يعودوا للحياة مرة تانية.)
فكون فرعون مصر بجلالة قدره اللي قال ان النهر بتاعه وعمله لنفسه. ربنا يقوله: هتموت في الصحراء ومش هتتدفن. فده كان عار وخزي وعقوبة صعبة جدا.
6وَيَعْلَمُ كُلُّ سُكَّانِ مِصْرَ أَنِّي أَنَا الرَّبُّ، مِنْ أَجْلِ كَوْنِهِمْ عُكَّازَ قَصَبٍ لِبَيْتِ إِسْرَائِيلَ. وقتها كل مصر هيعرفوا اني أنا ربنا.
"مِنْ أَجْلِ كَوْنِهِمْ عُكَّازَ قَصَبٍ لِبَيْتِ إِسْرَائِيلَ." ... زي خشبة البوصة. خشبة تعبانة ملهاش قوة. فربنا بيقولهم: خطيتكم يا بني اسرائيل، انكم اعتمدتم علي فرعون مصر. ومعتمدتوش عليا. فخلي فرعون مصر ينفعكم بقي.
"الاتكال علي الرب خير من الاتكال علي البشر." ... فرعون مصر هيبقي عامل زي عكاز القصب ليكم. مش هينفعكم. بالعكس ده هيأذيكم.
7عِنْدَ مَسْكِهِمْ بِكَ بِالْكَفِّ، انْكَسَرْتَ وَمَزَّقْتَ لَهُمْ كُلَّ كَتِفٍ، وَلَمَّا تَوَكَّأُوا عَلَيْكَ انْكَسَرْتَ وَقَلْقَلْتَ كُلَّ مُتُونِهِمْ. تقريبا نفس التعبير ده قاله اشعياء النبي في اشعياء 36: 6. وحزقيال النبي اخده وقاله بصورة أكبر، قال: لما يمسكوها بالكف، ويتسندوا عليها بكل جسمهم، هيقعوا. لأنها مش هتقدر تحتملهم وتسندهم. فهيقعوا وكتفهم هيتمزق لأنهم وقعوا علي ايدهم.
"وَلَمَّا تَوَكَّأُوا عَلَيْكَ انْكَسَرْتَ وَقَلْقَلْتَ كُلَّ مُتُونِهِم." ... بيدينا صورة وهو بيقع كأنه سكران ودايخ. وهو ده الاعتماد علي مصر. مصر مش هتنفعك في حاجة.
8« لِذلِكَ هكَذَا قَالَ السَّيِّدُ الرَّبُّ: هأَنَذَا أَجْلِبُ عَلَيْكَ سَيْفًا، وَأَسْتَأْصِلُ مِنْكَ الإِنْسَانَ وَالْحَيَوَانَ. زي ما اتفقنا لما ربنا بيأدب ويعاقب، بيبقي غرض ربنا اننا نتوب. فعقوبة فرعون مصر لانه شجع ملك يهوذا انه يخون العهد مع ملك بابل. وديه حاجة غلط ربنا مرضيش عليها.
ربنا قاله: أنت شجعت ملك يهوذا أنه يخون عهد عمله. وتاني حاجة: ايه التكبر بتاعك ده؟ فالعقوبة بتاعتك هي ...
9وَتَكُونُ أَرْضُ مِصْرَ مُقْفِرَةً وَخَرِبَةً، فَيَعْلَمُونَ أَنِّي أَنَا الرَّبُّ، لأَنَّهُ قَالَ: النَّهْرُ لِي وَأَنَا عَمِلْتُهُ. وباقي العقوبة: ان ارض مصر هتكون خَربة.
"فَيَعْلَمُونَ أَنِّي أَنَا الرَّبُّ،" ... والحقيقة نشكر ربنا انه بيأدب، وليس الي الفناء.
فربنا ساعات بيسمح لنا بالتأديب، وبيبقي لخيرنا.
ونشكر ربنا أنه مع التأديب لمصر، طلع لنا منها: القديس البابا اثناسيوس الرسولي. والبابا كيرلس عمود الدين. والانبا انطونيوس، وغيرهم كتير اوووي. وطلعت لنا منها كنيسة جميلة بقالها اكتر من 2000 سنة. كنيستنا القبطية الجميلة.
"لأَنَّهُ قَالَ: النَّهْرُ لِي وَأَنَا عَمِلْتُه." ... رنبا مكانش حابب الحتة ديه. لأن فرعون مصر عامل نفسه كخالق. انا اللي عملت نهر النيل ليا ولمجدي.
10لِذلِكَ هأَنَذَا عَلَيْكَ وَعَلَى أَنْهَارِكَ، وَأَجْعَلُ أَرْضَ مِصْرَ خِرَبًا خَرِبَةً مُقْفِرَةً، مِنْ مَجْدَلَ إِلَى أَسْوَانَ، إِلَى تُخْمِ كُوشَ. في الاربع اصحاحات دول هيبان أد ايه حزقيال كان عارف جغرافية مصر كويس أوي.
حزقيال من أصل كهنوتي. يُقال: أن في فترة لتعليم أولاد الكهنة علشان، هيبقوا كهنة بعد كده. فلازم يبقي عندهم بعض المعلومات العامة اللي زي كده. علشان كده حزقيال عارف المعلومات ديه من صغره.
" لِذلِكَ هأَنَذَا عَلَيْكَ وَعَلَى أَنْهَارِكَ، وَأَجْعَلُ أَرْضَ مِصْرَ خِرَبًا خَرِبَةً مُقْفِرَةً،" ... ربنا بيقولهم: هتتعاقبوا.
"مِنْ مَجْدَلَ" ... وديه في مصر، شمال مصر شرق. بين مصر وفلسطين. عند شبه جزيرة سيناء.
"إِلَى تُخْمِ كُوشَ." ... كوش اللي هي اثيوبيا. بس هنا المقصود بيها ارض النوبة.
يعني من أقصي الشمال لأقصي الجنوب ... " مِنْ مَجْدَلَ إِلَى أَسْوَانَ، إِلَى تُخْمِ كُوشَ."
11لاَ تَمُرُّ فِيهَا رِجْلُ إِنْسَانٍ، وَلاَ تَمُرُّ فِيهَا رِجْلُ بَهِيمَةٍ، وَلاَ تُسْكَنُ أَرْبَعِينَ سَنَةً. يُقال أن نبوخذنصر دخل فعلا، وفضل وراء فرعون. وكان كل مكان يدخله نبوخذنصر في مصر يخرب فيه جامد. لأن الناس اتفرقت وهربت، وكان وقت صعب.
" وَلاَ تُسْكَنُ أَرْبَعِينَ سَنَةً." ... وده التعبير والحاجة اللي بيستغربوا عليها اليهود. لأن كان في باقي الشعوب، كان الخراب أبدي. لكن في مصر العقوبة كانت محددة 40 سنة فقط. (40 سنة شوفناها كتير في الكتاب المقدس. زي مثلا كانت فترة توهان شعب الله في البرية 40 سنة. وبيقولوا أن مدة المُلك للقاضي كانت 40 سنة.) فعاوز يقول انها فترة مُكتملة للعقوبة، لعقاب مصر.
12وَأَجْعَلُ أَرْضَ مِصْرَ مُقْفِرَةً فِي وَسْطِ الأَرَاضِي الْمُقْفِرَةِ، وَمُدُنَهَا فِي وَسْطِ الْمُدُنِ الْخَرِبَةِ تَكُونُ مُقْفِرَةً أَرْبَعِينَ سَنَةً. وَأُشَتِّتُ الْمِصْرِيِّينَ بَيْنَ الأُمَمِ، وَأُبَدِّدُهُمْ فِي الأَرَاضِي. حصل تشتت للمصريين في الوقت ده، بسبب فرعون مصر وغلطته هو واللي حواليه.
زي بالظبط أب في أسرة بسبب خطيته أو غلطته، الأسرة كلها تعاني معاه ومنه. فرد واحد يغلط غلطة، كل اللي حواليه يعاني. فلازم نأخد بالنا من قراراتنا او أخطائنا لأننا مش المسئولين الوحيدين عليها، لكن كمان اللي معانا ممكن يعانوا ويتأذوا. ربنا يدينا حكمة دايما.
13لأَنَّهُ هكَذَا قَالَ السَّيِّدُ الرَّبُّ: عِنْدَ نَهَايَةِ أَرْبَعِينَ سَنَةً أَجْمَعُ الْمِصْرِيِّينَ مِنَ الشُّعُوبِ الَّذِينَ تَشَتَّتُوا بَيْنَهُمْ، جمال وحب ربنا لمصر ... " عِنْدَ نَهَايَةِ أَرْبَعِينَ سَنَةً أَجْمَعُ الْمِصْرِيِّينَ مِنَ الشُّعُوبِ الَّذِينَ تَشَتَّتُوا بَيْنَهُمْ "
ربنا جمع الشعب المصري تاني بعد انتهاء ال 40 سنة.
ربنا بيحب مصر، وده واضح هنا وكمان في اشعياء "مبارك شعبي مصر."
14وَأَرُدُّ سَبْيَ مِصْرَ، وَأُرْجِعُهُمْ إِلَى أَرْضِ فَتْرُوسَ، إِلَى أَرْضِ مِيلاَدِهِمْ، وَيَكُونُونَ هُنَاكَ مَمْلَكَةً حَقِيرَةً. فتروس: مصر في الجنوب، اللي هي الصعيد.
"إِلَى أَرْضِ مِيلاَدِهِمْ،" ... وكأن هنا حزقيال بيقول: أن أصل المصريين صعيدي. وديه معلومة معروفة منذ القدم.. وبعدين ابتدوا يسكنوا ويتوزعوا علي أرض مصر كلها.
كان الاول أصل مصر ومكان السكن والاستقرار في الصعيد. لأن قبل كده نهر النيل كان بيغرّق أراضي كتيرة. بس كان الجنوب، اللي هو الصعيد كانت أرض عالية، فمكانتش بتغرق من النيل. لكن مع الوقت ابتدي النهر ينحصر. وبقت في أرض فوق في الشمال، الناس تقدر تسكنها. بس الأساس والاستقرار كان الأول في الصعيد. أصل مصر كان الصعيد. ووجه بحري جه مؤخرا.
"وَيَكُونُونَ هُنَاكَ مَمْلَكَةً حَقِيرَة." ... يعني مصر مش هترجع تاني زي أيام الفراعنة، بداية من فرعون اللي كان موجود وقتها. (هترجع مصر دولة ضعيفة، علشان تكون متضعة وتعيش مع ربنا. وكمان علشان تمهيد لمصر بعدين انها هتقبل الايمان بالمسيح يسوع له المجد. وهو ده الشفاء لأن ربنا بيسكن وسط المنسحقين والمتضعين. وكمان علشان يبارك مصر بعدين. ولما تكون مصر مملكة حقيرة مش هتتكبر تاني. لان خطية الكبرياء وحشة وهي ديه الخطية اللي أسقطت الشيطان وجنوده.).
15تَكُونُ أَحْقَرَ الْمَمَالِكِ فَلاَ تَرْتَفِعُ بَعْدُ عَلَى الأُمَمِ، وَأُقَلِّلُهُمْ لِكَيْلاَ يَتَسَلَّطُوا عَلَى الأُمَمِ. مصر كانت عظيمة جدا، وواخدة مساحات عظيمة وكبيرة جدا. لدرجة أن فرعون مصر في أيام نبوخذنصر، كان عاوز يروح يأخد الحتت اللي أخدها منه نبوخذنصر في الشام. لأن كل ده كان تابع لمصر قبل كده.
برجوع مصر كدولة حقيرة ضعيفة تحدث نتيجتان هامتان:
- اتضاع مصر.
- درس لشعب الله حتى يتذكر خطيته في اعتماده على مصر، فعندما يراها ضعيفة يتأكد أن الاتكال هو على الله فقط، وليس على البشر.
16فَلاَ تَكُونُ بَعْدُ مُعْتَمَدًا لِبَيْتِ إِسْرَائِيلَ، مُذَكِّرَةَ الإِثْمِ بِانْصِرَافِهِمْ وَرَاءَهُمْ، وَيَعْلَمُونَ أَنِّي أَنَا السَّيِّدُ الرَّبُّ». مصر مش هتكون تاني سند لشعب اسرائيل.
وكـأن ربنا بيفكرهم باللي اتقال في مزمور40: 4 "طوبي للرجل الذي جعل الذي جعل الرب مُتكله." ياريت قبل مانفكر نعتمد علي بشر، لازم نلجأ لإلهنا.
"مُذَكِّرَةَ الإِثْمِ" ... كل ماتكون مصر عظيمة، كل ما ده يفكر ربنا: أن شعبه زمان سابه علشان مصر العظيمة ديه، سابوا ربنا وراحوا يحتموا في مصر.
فربنا قالهم خلاص، مصر مش هتبقي قوية وعظيمة تاني.
وده درس لينا كلنا أن "الاتكال علي الرب خير من ا لاتكال علي بشر." دايما يبقي اعتمادنا واتكالنا علي ربنا والهنا ومخلصنا يسوع ا لمسيح له المجد. لأن الهنا حيّ.
"بِانْصِرَافِهِمْ وَرَاءَهُمْ، وَيَعْلَمُونَ أَنِّي أَنَا السَّيِّدُ الرَّبُّ." ... وراءهم: يعني المصريين. وراء المصريين. وسواء المصريين او شعب بني اسرائيل فالكل يعملون اني أنا الرب.
17وَكَانَ فِي السَّنَةِ السَّابِعَةِ وَالْعِشْرِينَ، فِي الشَّهْرِ الأَوَّلِ، فِي أَوَّلِ الشَّهْرِ، أَنَّ كَلاَمَ الرَّبِّ كَانَ إِلَيَّ قَائِلاً: يعني بعد 17 سنة من التاريخ اللي جه في أول الاصحاح.
يعني نبوة حزقيال ضد مصر والمصريين، كانت قبل ماتتم وتحصل ب 17 سنة. يعني النبوة اتقالت وبعدها ب 17 سنة تمت النبوة ديه. حزقيال قال النبوة في السنة ال 17، والنبوة اتحققت في السنة 27. فربنا كلم حزقيال في 1/1/27 .
طيب ليه النبوة بتاعة مصر جت بعد نبوة مدينة صُور، بالرغم أنها كانت المفروض تيجي الأول؟
في أول اصحاح 29 هنا قال: في السنة العاشرة. وفي اصحاح 26 النبوة كانت عن مدينة صُور في السنة ال 11.
يعني كترتيب: المفروض كانت نبوة مصر الاول في السنة العاشرة. وبعديها نبوة صُور في السنة ال 11.
طيب ليه النبوات اتعكست؟ ده لأن ليهم علاقة ببعض. ربنا هيقول وهيشرح ليه عمل كده في الجزء اللي جاي.
18«يَا ابْنَ آدَمَ، إِنَّ نَبُوخَذْرَاصَّرَ مَلِكَ بَابِلَ اسْتَخْدَمَ جَيْشَهُ خِدْمَةً شَدِيدَةً عَلَى صُورَ. كُلُّ رَأْسٍ قَرِعَ، وَكُلُّ كَتِفٍ تَجَرَّدَتْ، وَلَمْ تَكُنْ لَهُ وَلاَ لِجَيْشِهِ أُجْرَةٌ مِنْ صُورَ لأَجْلِ خِدْمَتِهِ الَّتِي خَدَمَ بِهَا عَلَيْهَا. نبوخذراصر: هو نفسه نبوخذنصر. اسمين لنفس الشخص. نبوخذنصر فضل محاصر صُور حوالي 12 ل 13 سنة. وبتوع صُور تعبوه. لآنها كانت مدينة محصنة. حصينة جدا. وفي الأخر لما هجم علي المدينة واخدها، كان أهل صُور أخدوا كل الخيرات بتاعتهم وراحوا في الجزيرة اللي عملوها و احتموا فيها هناك. فنبوخذنصر معرفش يأخد منها حاجات عليها القيمة.
"كُلُّ رَأْسٍ قَرِعَ، وَكُلُّ كَتِفٍ تَجَرَّدَتْ،" ... من كتر فترة الحصار ال13 سنة حوالين مدينة صُور، وجيش بابل كانوا بيشتغلوا ويحفروا ويشيلوا حاجات فوق رؤوسهم: بقت الرؤوس قرعة. والاكتاف نفسها تعبت من كتر الحاجات اللي بيشيولها فوق دماغهم وأكتافهم.
"وَلَمْ تَكُنْ لَهُ وَلاَ لِجَيْشِهِ أُجْرَةٌ مِنْ صُورَ لأَجْلِ خِدْمَتِهِ الَّتِي خَدَمَ بِهَا عَلَيْهَا." ... بعد ما حاصروا صُور كل ده، وأخد صُور في الأخر، كانوا بتوع صُور اخدوا كل حاجتهم الثمينة وراحوا علي الجزيرة اللي علموها. ومعرفش يأخد منهم أي حاجة.
19لِذلِكَ هكَذَا قَالَ السَّيِّدُ الرَّبُّ: هأَنَذَا أَبْذُلُ أَرْضَ مِصْرَ لِنَبُوخَذْرَاصَّرَ مَلِكِ بَابِلَ، فَيَأْخُذُ ثَرْوَتَهَا، وَيَغْنَمُ غَنِيمَتَهَا، وَيَنْهَبُ نَهْبَهَا فَتَكُونُ أُجْرَةً لِجَيْشِهِ. ربنا بيقول: اني هأسمح لنبوخذنصر أنه يأخد أجرته باللي هيأخده من مصر، في مقابل أنه معرفش يأخد أي حاجة من مدينة صُور. وبرده ده كان تأديب لمصر.
"فَيَأْخُذُ ثَرْوَتَهَا، وَيَغْنَمُ غَنِيمَتَهَا، وَيَنْهَبُ نَهْبَهَا فَتَكُونُ أُجْرَةً لِجَيْشِهِ." ... علشان كده فهمنا ليه هتكون أرض مصر مقفرة وخِربة. لأن بنوخذنصر هيأخد من مصر: ثروتها والغنيمة بتاعتها. وهينهب كل ممتلكات أو حيوانات أو بشر.
" فَتَكُونُ أُجْرَةً لِجَيْشِهِ." ... علي تفكرة تحقيق الحاجات ديه كان متقارب، نفس جيش بابل اللي حاصر صُور ومأخدش منها حاجة، هو اللي أخد أجرته من دخوله لمصر.
20قَدْ أَعْطَيْتُهُ أَرْضَ مِصْرَ لأَجْلِ شُغْلِهِ الَّذِي خَدَمَ بِهِ، لأَنَّهُمْ عَمِلُوا لأَجْلِي، يَقُولُ السَّيِّدُ الرَّبُّ. وكأن ربنا بيقول: أن اللي عمله نبوخذنصر، هو تحقيق لمشيئة ربنا. وكل ده من أجل تأديب صور ومصر وكمان شعبه بني اسرائيل.21فِي ذلِكَ الْيَوْمِ أُنْبِتُ قَرْنًا لِبَيْتِ إِسْرَائِيلَ. وَأَجْعَلُ لَكَ فَتْحَ الْفَمِ فِي وَسْطِهِمْ، فَيَعْلَمُونَ أَنِّي أَنَا الرَّبُّ». متعودين من حزقيال النبي أن وسط الحاجات الصعبة، يطلعنا بحاجة جميلة تطمنا. والعكس صحيح. ساعات وسط النبوات الجميلة، يذكرنا بالخطية وعقوبتها.
" قَرْنًا" ... يعني: قوة. المعني: عودة بني اسرائيل مرة تانية.
"وَأَجْعَلُ لَكَ فَتْحَ الْفَمِ فِي وَسْطِهِمْ، فَيَعْلَمُونَ أَنِّي أَنَا الرَّبّ." ... ربنا بيقول لحزقيال، هتفتح فمك.
في دراستنا لاصحاح 24، حزقيال فضل فترة، حوالي من سنة لسنتين مش بيتكلم. بعد ما قالهم كل النبوات ديه. وحزقيال قالهم مش هأتكلم تاني لغاية ماتشوفوا تحقيق النبوات ديه.
وفعلا لما ابتديت أورشليم تسقط، وابتدي نبوخذنصر يدخل لأورشليم ويأخد السبايا. ويوديهم علي بابل، والكتاب المقدس يسميهم " المنفلت" يعني الناس اللي جاية من اورشليم سبايا لبابل.
وأول ما جه المنفلت لحزقيال وحكي له اللي حصل. عرفونا أن كل نبوات حزقيال اتحققت.
فهنا ربنا بيقول لحزقيال: هأرفع وجهك. وهيعرفوا انك مش كداب. وكنت بتقول كلام ربنا.
وبعد كده لما تنطق، هتنطق بنبوات شفاء ومجد وعودة مرة أخري.
⪢