⏭ 1وَكَانَ إِلَيَّ كَلاَمُ الرَّبِّ قَائِلاً: الاصحاح كله نبوة ضد آدوم. واحنا بندرس الاصحاح نفكر في 3 حاجات:
- هل الآية ديه عقوبة؟ أم الآية ديه سبب؟ أم الآية ديه هدف؟
بمعني: الآية قد تكون عقوبة واضحة وصريحة. او سبب لخطية عملوها، فسببت العقوبة. او قد يكون هدف من العقوبة.
فالاصحاح: نبوة ضد آدوم. وكان ربنا خلاص ابتدي يتكلم بالبركة، طيب ليه يارب التأديب تاني؟
فيقول: علشان الحياة الروحية محتاجة العمل الايجابي، فمحتاجة نشيل العمل السلبي. فكأن في وسط البركات اللي هتبتدي تيجي، ربنا يقول: شيلوا السلبي منكم الاول. علشان كده جت النبوة ضد آدوم.
1 وَكَانَ إِلَيَّ كَلاَمُ الرَّبِّ قَائِلًا
ربنا كلم حزقيال وقاله:
2«يَا ابْنَ آدَمَ، اجْعَلْ وَجْهَكَ نَحْوَ جَبَلِ سَعِيرَ وَتَنَبَّأْ عَلَيْهِ، اتنبأ علي جبل سعير، اللي هي آدوم (لان عندهم سلسلة جبال اسمها سعير.).3وَقُلْ لَهُ: هكَذَا قَالَ السَّيِّدُ الرَّبُّ: هأَنَذَا عَلَيْكَ يَا جَبَلَ سَعِيرَ، وَأَمُدُّ يَدِي عَلَيْكَ وَأَجْعَلُكَ خَرَابًا مُقْفِرًا. مين يقدر يستحمل ان ربنا يقوله: انا عليك؟ حاجة مش سهلة ان ربنا يقول لحد انا ضدك.
ربنا يقول " يُقَاوِمُ اللهُ الْمُسْتَكْبِرِينَ، وَأَمَّا الْمُتَوَاضِعُونَ فَيُعْطِيهِمْ نِعْمَةً"... من خطايا آدوم الكبيرة: الاستكبار. وخطية الكبرياء هي اللي وقعت الشيطان. وكتير في الكتاب المقدس أن آدوم يرمز للشيطان. لأن في حلقة وصل ما بينهم، هي الكبرياء. وكمان لسه هنشوف مجموعة خطايا لآدوم.
4أَجْعَلُ مُدُنَكَ خَرِبَةً، وَتَكُونُ أَنْتَ مُقْفِرًا، وَتَعْلَمُ أَنِّي أَنَا الرَّبُّ. المدن بتاعتك اللي كنت بتفتخر بيها، هتبقي خرابة.
"وَتَكُونُ أَنْتَ مُقْفِرًا، وَتَعْلَمُ أَنِّي أَنَا الرَّبُّ" ... اذا في عقوبة، بس في الأخر هتعرف اني أنا الرب. وهو ده هدف العقوبة. لأن هدف ربنا من العقوبة والتأديب: ان الناس تعرفه، لأجل خيرهم وخلاصهم وأبديتهم.
5لأَنَّهُ كَانَتْ لَكَ بُغْضَةٌ أَبَدِيَّةٌ، وَدَفَعْتَ بَنِي إِسْرَائِيلَ إِلَى يَدِ السَّيْفِ فِي وَقْتِ مُصِيبَتِهِمْ، وَقْتِ إِثْمِ النِّهَايَةِ. هنشوف هنا خطايا آدوم اللي مكوناش عارفينها اوي.
"لأَنَّهُ كَانَتْ لَكَ بُغْضَةٌ أَبَدِيَّةٌ، " ... ربنا يقول لآدوم: انا زعلان منك جدا علشان كان جواك بُغْضَةٌ أبدية.
(اللي جواه كراهية مش عارف يتخلص منها، يقول لربنا: استر يارب عليا وخلّصني. اكشف نفسك قدام ربنا بضعفاتك. اللي زعل ربنا من آدوم ان جواهم بُغضة ابدية. في ناس كده، مش بتعرف تسامح وتغفر. فخسارة يتشبهوا بآدوم).
" فِي وَقْتِ مُصِيبَتِهِمْ،" ... المفروض في وقت المحن والصعوبات بتاعة الناس، تظهر معادن الناس التانية: انهم بيساعدوا بعض. يسندوا بعض. يصلوا لبعض.
لكن آدوم كانوا فرحانين في مصيبة وشدة أورشليم. وكمان واقفين لليهود علشان اللي يهرب منهم يأما يقتلوه او يبيعوه عبد للبابليين، ويكسبوا فيه.
" وَقْتِ إِثْمِ النِّهَايَةِ" ... يعني لما إثمهم اكتمل. واقتربت نهايتهم علي الأخر.
6لِذلِكَ حَيٌّ أَنَا، يَقُولُ السَّيِّدُ الرَّبُّ، إِنِّي أُهَيِّئُكَ لِلدَّمِ، وَالدَّمُ يَتْبَعُكَ. إِذْ لَمْ تَكْرَهِ الدَّمَ فَالدَّمُ يَتْبَعُكَ. الآية ديه قاعدة لكل العصور.
"إِذْ لَمْ تَكْرَهِ الدَّمَ فَالدَّمُ يَتْبَعُكَ"... نأخدها قاعدة في كل حاجة:
- لو مش هتكره إنك تتكلم علي الناس، الناس هتتكلم عليك.
- لو مش هتكره إنك تدين الناس، الناس هتدينك.
زي ما فعلت يُفعل بيك. عملك يرتد علي رأسك. ديه خلاصة النبوات اللي ضد آدوم.
7فَأَجْعَلُ جَبَلَ سَعِيرَ خَرَابًا وَمُقْفِرًا، وَأَسْتَأْصِلُ مِنْهُ الذَّاهِبَ وَالآئِبَ. هما كانوا فرحانين بخراب أورشليم. وقالوا نأخد أورشليم، ونكّبر المدينة بتاعتنا. فربنا بيقولهم: مش هيحصل. مدنكم تصير خراب. ومش هيبقي لا في حد رايح ولا حد جاي ...
" وَالآئِبَ" ... الراجع.
ولغاية النهاردة مدنهم تُقر بصحة كلمة ربنا التي خرجت من فمه.
8وَأَمْلأُ جِبَالَهُ مِنْ قَتْلاَهُ. تِلاَلُكَ وَأَوْدِيَتُكَ وَجَمِيعُ أَنْهَارِكَ يَسْقُطُونَ فِيهَا قَتْلَى بِالسَّيْفِ. نفس التعبيرات ديه اتقالت نبوة في اصحاح 6 ضد جبال اسرائيل. واللي هيعمل فيهم كل الخراب ده هما البابليين. اللي هما نفسهم عملوا كده في شعبي اسرائيل. البابليين برده هيعملوا فيكم كده بالظبط.
لازم نحذر ونخلي بالنا، لأن في ناس شايفة نفسها بعيدة عن اللي بيحصل لباقي الناس اللي حواليهم. مثلا فلان حصل فيه حاجة، أخلي بالي وأفوق لنفسي. لازم أتعظ.
9وَأُصَيِّرُكَ خِرَبًا أَبَدِيَّةً، وَمُدُنُكَ لَنْ تَعُودَ، فَتَعْلَمُونَ أَنِّي أَنَا الرَّبُّ. وهو ده اللي حصل. فعلا مش موجودة دلوقتي. طيب ايه الهدف؟ ... "وفَتَعْلَمُونَ أَنِّي أَنَا الرَّبّ".10لأَنَّكَ قُلْتَ: إِنَّ هَاتَيْنِ الأُمَّتَيْنِ، وَهَاتَيْنِ الأَرْضَيْنِ تَكُونَانِ لِي فَنَمْتَلِكُهُمَا وَالرَّبُّ كَانَ هُنَاكَ، خطية تانية. في ناس بتفرح في مصايب غيرها. علشان تأخد اللي عندهم.
مثلا: امتي فلان يموت ونورثه؟ آدوم فكر بالطريقة ديه.
" وَهَاتَيْنِ الأَرْضَيْنِ تَكُونَانِ لِي فَنَمْتَلِكُهُمَا وَالرَّبُّ كَانَ هُنَاكَ" ... الأرضين: بيتكلم علي يهوذا وإسرائيل. (كان الآدوميين بيكرهوا إسرائيل، لأن يعقوب أبو بني اسرائيل اللي هما الاسباط ال 12، أخد البركة من عيسو أبوهم. فكان جواهم كراهية لأسباط إسرائيل)
" وَالرَّبُّ كَانَ هُنَاكَ" ... يا آدوم مش واخد بالك اني انا هنا؟
11فَلِذلِكَ حَيٌّ أَنَا، يَقُولُ السَّيِّدُ الرَّبُّ، لأَفْعَلَنَّ كَغَضَبِكَ وَكَحَسَدِكَ اللَّذَيْنِ عَامَلْتَ بِهِمَا مِنْ بُغْضَتِكَ لَهُمْ، وَأُعَرِّفُ بِنَفْسِي بَيْنَهُمْ عِنْدَمَا أَحْكُمُ عَلَيْكَ، نفس الغضب اللي غضبت بيه، هيترد علي رأسك.
"وَكَحَسَدِكَ اللَّذَيْنِ عَامَلْتَ بِهِمَا مِنْ بُغْضَتِكَ لَهُمْ،" ... هتشرب من نفسك خطاياك.
بُغضة هتاخد بُغضة. حسد هتاخد حسد. قتل هتاخد قتل. كل اللي عملته هيترد لك. هيتعمل فيك.
"وَأُعَرِّفُ بِنَفْسِي بَيْنَهُمْ عِنْدَمَا أَحْكُمُ عَلَيْكَ،" ... الهدف الرئيسي من كل ده: ان كل الناس تعرف ربنا له المجد.
والحقيقة ان لما الناس فشلت تعرف ربنا، المسيح يسوع له المجد جه بنفسه. ونقول عنه: "أظهرت لنا نور الآب." ربنا جالنا بنفسه علشان يورينا نفسه.
12فَتَعْلَمُ أَنِّي أَنَا الرَّبُّ، قَدْ سَمِعْتُ كُلَّ إِهَانَتِكَ الَّتِي تَكَلَّمْتَ بِهَا عَلَى جِبَالِ إِسْرَائِيلَ قَائِلاً: قَدْ خَرِبَتْ. قَدْ أُعْطِينَاهَا مَأْكَلاً. ربنا بيقول: سمعت. وقالها مرتين. يعني تأكيد لخطيتهم. وتأكيد ان خطيتهم وصلت للآذان الالهية.
آدوم في حالة ندالة، في وسط خراب الناس وألمهم ومشاكلهم وضيقتهم، يهتفوا ويفرحوا ويقولوا ..."كُلَّ إِهَانَتِكَ الَّتِي تَكَلَّمْتَ بِهَا عَلَى جِبَالِ إِسْرَائِيلَ قَائِلًا: قَدْ خَرِبَتْ. قَدْ أُعْطِينَاهَا مَأْكَلًا." في وسط كل ده فرحوا وقالوا ان اسرائيل خربت. شمتوا فيهم. معندهوش أي إحساس حتي بالقرابة.
13قَدْ تَعَظَّمْتُمْ عَلَيَّ بِأَفْوَاهِكُمْ وَكَثَّرْتُمْ كَلاَمَكُمْ عَلَيَّ. أَنَا سَمِعْتُ. ياريتهم اتعظموا علي بني اسرائيل وبس. دول كمان اتعظموا علي ربنا له المجد بنفسه
" أَنَا سَمِعْتُ" ... ربنا بيقولهم انا سمعت كل اللي قولتوه.
14هكَذَا قَالَ السَّيِّدُ الرَّبُّ: عِنْدَ فَرَحِ كُلِّ الأَرْضِ أَجْعَلُكَ مُقْفِرًا. " عِنْدَ فَرَحِ كُلِّ الأَرْضِ"... اليهود هيبقوا فرحانين وهما راجعين لأرضهم أورشليم
"أَجْعَلُكَ مُقْفِرًا"... في وقت ما الكل فرحان لرجعوهم لأرضهم. هما بقي بتوع بني آدوم: كما فعلت يُفعل بك
15كَمَا فَرِحْتَ عَلَى مِيرَاثِ بَيْتِ إِسْرَائِيلَ لأَنَّهُ خَرِبَ، كَذلِكَ أَفْعَلُ بِكَ. تَكُونُ خَرَابًا يَا جَبَلَ سَعِيرَ أَنْتَ وَكُلُّ أَدُومَ بِأَجْمَعِهَا، فَيَعْلَمُونَ أَنِّي أَنَا الرَّبُّ. كأن ربنا هنا بيفكر آدوم باللي حصل مابين يعقوب وعيسو. لان يعقوب أخد من عيسو البكورية، اللي هي الميراث. وهي ديه سبب كراهيتهم لبني اسرائيل.
فكأنهم قالوا خلي الميراث اللي خده يعقوب ابوهم، ينفعهم. لان ارض اسرائيل خربت. وقالوا: أهو ارضهم خربت.
"كَذلِكَ أَفْعَلُ بِكَ." ... برده أنت مش مش هتأخد الميراث يا بني آدوم.
"تَكُونُ خَرَابًا يَا جَبَلَ سَعِيرَ أَنْتَ وَكُلُّ أَدُومَ بِأَجْمَعِهَا،" ... كل آدوم هتخرب.
"فَيَعْلَمُونَ أَنِّي أَنَا الرَّبُّ." ... علشان النتيجة انهم يعرفوا اني انا الرب.
وديه كانت النبوة اللي ضد أدوم.
⏮