⪡ 1«وَأَنْتَ يَا ابْنَ آدَمَ، فَخُذْ لِنَفْسِكَ لِبْنَةً وَضَعْهَا أَمَامَكَ، وَارْسُمْ عَلَيْهَا مَدِينَةَ أُورُشَلِيمَ. "لبنة" ... الطوب اللبن اللي كان بيتعمل بيه البيوت زمان.
ربنا له المجد بيقول لحزقيال: خد الطوبة ديه وارسم عليها مدينة اورشليم.
يا خسارة بعد ما ربنا قالهم: نفشتكم علي كفي، دلوقتي بقوا منقوشين علي الطين. وطبعا اللي وصلهم للمرحلة ديه هي الخطية.... وبعد ما كان الأسباط محطوطين علي صدرة رئيس الكهنة ويدخل بيهم الي قدس الاقداس. بقوا مرسومين علي الطين. وهو ده حال الانسان اللي عايش في الخطية.
2وَاجْعَلْ عَلَيْهَا حِصَارًا، وَابْنِ عَلَيْهَا بُرْجًا، وَأَقِمْ عَلَيْهَا مِتْرَسَةً، وَاجْعَلْ عَلَيْهَا جُيُوشًا، وَأَقِمْ عَلَيْهَا مَجَانِقَ حَوْلَهَا. واعمل حواليها حصار.
"مجانق" ... الآلات اللي بيهدموا بيها الاسوار بتاعة المدن.
المعني: هيعمل ماكيت لاورشليم وحواليها جيوش والآلات. وده رمز للي هيحصلهم.
ربنا عمال يقولهم: اسمعوا كلامي وبلاش تسمعوا للأنبياء الكذبة. ومع كده برده بيعندوا وماشين مع الأنبياء الكذبة لما بيقولوا: ربنا مش ممكن يسيب اورشليم ولا الهيكل.
بس طبيعي ان ربنا يسيبه لانهم نجسوا الهيكل بالأصنام بتاعتهم جوة الهيكل. فكان لازم ربنا يغيره خالص.
3وَخُذْ أَنْتَ لِنَفْسِكَ صَاجًا مِنْ حَدِيدٍ وَانْصِبْهُ سُورًا مِنْ حَدِيدٍ بَيْنَكَ وَبَيْنَ الْمَدِينَةِ، وَثَبِّتْ وَجْهَكَ عَلَيْهَا، فَتَكُونَ فِي حِصَارٍ وَتُحَاصِرَهَا. تِلْكَ آيَةٌ لِبَيْتِ إِسْرَائِيلَ. نتخيل الناس بتشوف حزقيال جايب طوبة من اللبن وبيرسم عليها اورشليم وكأن في جيش محاصرها.
وبعدين يجيب حتة حديدة ويحطها بينه وبين اورشليم ... "بينك وبين المدينة."، وكمان قال ان محدش هيفلت ، كله هيبقي محبوس جوة الحديد.
"وثبت وجهك عليها" ... انت جميل اوي يارب. ربنا له المجد عمال يقول شعب متمرد وامة متمردة. بس من وقت للتاني مش هاين عليه ويرجع يقول:" بيت اسرائيل."
ثبت وجهك وكأن ربنا بيقول انا لسه مهتم بيها. قلب ربنا جميل اوووي. وكل ده علشان يفهموا من الماكيت ده ان كل ده هيحصل فيهم، بس برده مش هيفهموا.
4«وَاتَّكِئْ أَنْتَ عَلَى جَنْبِكَ الْيَسَارِ، وَضَعْ عَلَيْهِ إِثْمَ بَيْتِ إِسْرَائِيلَ. عَلَى عَدَدِ الأَيَّامِ الَّتِي فِيهَا تَتَّكِئُ عَلَيْهِ تَحْمِلُ إِثْمَهُمْ. 5وَأَنَا قَدْ جَعَلْتُ لَكَ سِنِي إِثْمِهِمْ حَسَبَ عَدَدِ الأَيَّامِ، ثَلاَثَ مِئَةِ يَوْمٍ وَتِسْعِينَ يَوْمًا، فَتَحْمِلُ إِثْمَ بَيْتِ إِسْرَائِيلَ. حتة غريبة شوية: ربنا قاله تقعد 390 يوم تتكأ علي جنبك اليسار. طبعا بيقضي اعماله والحاجات اللي وراه. بس لما يتكأ يبقي علي جنبه الشمال بس لمدة 390 يوم. نحط خط تحت المرتين اللي قال فيهم "وضع عليه اثم بيت اسرائيل" و "تحمل اثم بيت اسرائيل." ... طبعا مع الفارق: بس كأن حزقيال هنا اشارة للمسيح الذي وضع عليه اثم جميعنا.6فَإِذَا أَتْمَمْتَهَا، فَاتَّكِئْ عَلَى جَنْبِكَ الْيَمِينِ أَيْضًا، فَتَحْمِلَ إِثْمَ بَيْتِ يَهُوذَا أَرْبَعِينَ يَوْمًا. فَقَدْ جَعَلْتُ لَكَ كُلَّ يَوْمٍ عِوَضًا عَنْ سَنَةٍ. لما يخصلوا ال 390 يوم بتوع الجنب الشمال، اتكأ بقي علي جنبك اليمين لمدة 40 يوم.
++ طيب ليه 390 يوم علي الجنب الشمال و40 يوم علي الجنب اليمين؟
في كذا رأي، بس الراي الاسهل:
ال 390 يوم ... ان اليوم بيساوي سنة، وده إشارة للفترة مابين ما بعد سليمان الحكيم وسقوط اورشليم. فترة اثم وخطية اسرائيل كلها. وكانت حوالي 390 سنة وديه كل خطايا الشعب كل الفترة ديه.
وال 40 يوم ... قالوا : قد تكون 40 سنة من اوحش السنين في مملكة يهوذا.
والبعض قال: ممكن تكون ال 40 سنة بتوع فترة ملك سليمان علي الشعب. لان من وقتها ابتدت الأوثان تدخل مملكة يهوذا.
والبعض قال: علشان ربنا يفكرهم بال 40 سنة توهان في البرية في الصحراء. علشان يقولهم: ان الفترة ديه برده هي فترة توهان في السبي.
* وموضوع النوم علي الجنب اليسار والجنب اليمين: الآباء فسروها بطريقة رمزية:
وقالوا اشارة للخطايا / الضربات اليسارية: زي الزنا والقتل وغيره من الخطايا الواضحة.
واشارة للخطايا / الضربات اليمينية: اللي هي الخطايا المخفية اللي مش باينة زي الكبرياء ومجد الذات .... وغيره.
7فَثَبِّتْ وَجْهَكَ عَلَى حِصَارِ أُورُشَلِيمَ وَذِرَاعُكَ مَكْشُوفَةٌ، وَتَنَبَّأْ عَلَيْهَا. تاني مرة ربنا يقوله: ثبت وجهك.
"وذراعك مكشوفة" ... ده تعبير في العهد القديم اشارة لتجسد الابن الوحيد. ذراع الرب: اشارة الي الابن الوحيد. واصبع الله: اشارة للروح القدس، لما المسيح قالهم " أما أنا فبأصبع الله اخرج الشياطين." .
"ذراعك مكشوفة" ... عاوز يقولنا ان في امل للخلاص. بس لما يجي المسيح ويتجسد.
"ثبت وجهك" ... يعني لسه ربنا مهتم بيهم، ومسابهومش خالص.
8وَهأَنَذَا أَجْعَلُ عَلَيْكَ رُبُطًا فَلاَ تَقْلِبُ مِنْ جَنْبٍ إِلَى جَنْبٍ حَتَّى تُتَمِّمَ أَيَّامَ حِصَارِكَ. ربنا بيقوله: وانا هأقويك متخفش. هتقدر تقعد الأيام ديه كلها علي جنبك الشمال واليمين.9«وَخُذْ أَنْتَ لِنَفْسِكَ قَمْحًا وَشَعِيرًا وَفُولاً وَعَدَسًا وَدُخْنًا وَكَرْسَنَّةَ وَضَعْهَا فِي وِعَاءٍ وَاحِدٍ، وَاصْنَعْهَا لِنَفْسِكَ خُبْزًا كَعَدَدِ الأَيَّامِ الَّتِي تَتَّكِئُ فِيهَا عَلَى جَنْبِكَ. ثَلاَثَ مِئَةِ يَوْمٍ وَتِسْعِينَ يَوْمًا تَأْكُلُهُ. الجزء الأخير ده هنختم بيها التلات دروس التوضيحية.
بعض الناس اللي بيهاجموا الكتاب المقدس: اخدوها وحرفوها. وقالوا: ربنا ازاي يطلب من حزقيال ياكل خبر معمول بإخراج الانسان (البراز)، بس علي فكرة أصلا ربنا مقالش كده خالص.
"دُخْنًا وَكَرْسَنَّةَ" ... زي الذرة اللي كانوا بيعلفوا بيها الفراخ زمان.
ويحط كل دول في وعاء واحد، بمعني ان هيبقي في مجاعة. لأن لما الواحد يعمل خبز هيجيب القمح، لكن القمح والشعير مش مكفي. هات يا حزقيال كل ده وحطهم في طبق واحد.
تعمل خبر لل 390 يوم، وتأكله طول الفترة ديه.
10وَطَعَامُكَ الَّذِي تَأْكُلُهُ يَكُونُ بِالْوَزْنِ. كُلَّ يَوْمٍ عِشْرِينَ شَاقِلاً. مِنْ وَقْتٍ إِلَى وَقْتٍ تَأْكُلُهُ. والاكل بالوزن، لان وقت حصار اورشليم هيبقي في مجاعة ومش هيلاقوا يأكلوا.
20 شاقل ... مش مكملة 250 جرام في اليوم الواحد.
11وَتَشْرَبُ الْمَاءَ بِالْكَيْلِ، سُدْسَ الْهِينِ، مِنْ وَقْتٍ إِلَى وَقْتٍ تَشْرَبُهُ. " سدس الهين" ... مش مكملة لتر مية في اليوم. ومتشربش الكمية كلها مرة واحدة، وزع الكمية ديه خلال اليوم. ولان ده هيحصل وقت الحصار.12وَتَأْكُلُ كَعْكًا مِنَ الشَّعِيرِ. عَلَى الْخُرْءِ الَّذِي يَخْرُجُ مِنَ الإِنْسَانِ تَخْبِزُهُ أَمَامَ عُيُونِهِمْ». في الارياف: روث الحيوانات كان بيستخدم للوقود في الأفران البلدي.
فهنا ربنا قال لحزقيال: تخبر الكعك ... " علي الخرء الذي يخرج من الانسان. يعني يخبر الكعك ده علي اخراج الانسان. وده بالنسبة لهم منتهي النجاسة، ومش متعودين علي كده اصلا.
13وَقَالَ الرَّبُّ: «هكَذَا يَأْكُلُ بَنُو إِسْرَائِيلَ خُبْزَهُمُ النَّجِسَ بَيْنَ الأُمَمِ الَّذِينَ أَطْرُدُهُمْ إِلَيْهِمْ». ربنا عاوز يوصل للشعب ده: إن اللي بيعملوه في المقدسات ديه حاجة في منتهي النجاسة. فعاوز يقولهم. انا مش طايق ابص للي بتعملوه ده.
فلما ربنا له المجد يقوله: اخبز الكعكة بتاعتك اللي هتاكلها علي خرء الانسان، يعني عاوز يقوله: أو أنت مش هتقدر، عرفهم ان اللي بيعملوه ده انا مش قادر استحمله. مش قادر ابص انهم حاطين في الهيكل تماثيل وبيعبدوها وبيبخرولها.
14فَقُلْتُ: «آهِ، يَا سَيِّدُ الرَّبُّ، هَا نَفْسِي لَمْ تَتَنَجَّسْ. وَمِنْ صِبَايَ إِلَى الآنَ لَمْ آكُلْ مِيتَةً أَوْ فَرِيسَةً، وَلاَ دَخَلَ فَمِي لَحْمٌ نَجِسٌ». الآية ديه تفكرنا ببطرس الرسول.
من التعليقات الجميلة علي الآية ديه: الله الذي لم يشفق علي ابنه الوحيد، بل بذله لأجلنا اجمعين، اشفق علي حزقيال.
لان حزقيال قال: يارب مش قادر اعمل الحتة ديه. يارب شوف حاجة تانيية . فربنا له المجد حن علي حزقيال.
15فَقَالَ لِي: «اُنْظُرْ. قَدْ جَعَلْتُ لَكَ خِثْيَ الْبَقَرِ بَدَلَ خُرْءِ الإِنْسَانِ، فَتَصْنَعُ خُبْزَكَ عَلَيْهِ». فربنا اداله اختيار تاني اللي هو: روث البقر. "فتصنع خبزك عليه" ... هنا الآية واضحة: عليه، مش معجون بيه زي ما الناس اللي بيعترضوا علي الكتاب المقدس وبيفهموا حسب مزاجهم قالوا.16وَقَالَ لِي: «يَا ابْنَ آدَمَ، هأَنَذَا أُكَسِّرُ قِوَامَ الْخُبْزِ فِي أُورُشَلِيمَ، فَيَأْكُلُونَ الْخُبْزَ بِالْوَزْنِ وَبِالْغَمِّ، وَيَشْرَبُونَ الْمَاءَ بِالْكَيْلِ وَبِالْحَيْرَةِ، طيب ليه ربنا اداله المثل ده؟
" أكسر قوام الخبز في اورشليم" ... مش هيلاقوا عيش يأكلوا.
"فيأكلون الخبز بالوزن والغم" ... ما هو لما يأكلوا قطمة عيش وعارف ان الرغيف مكمل معاه مثلا يومين، فده غم. لأنه عارف انه مش هيلاقي تاني عيش... ونفس الكلام بالنسبة للمية.
غم وحيرة: وده حال اللي بيبعد عن ربنا له المجد.
17لِكَيْ يُعْوِزَهُمُ الْخُبْزُ وَالْمَاءُ، وَيَتَحَيَّرُوا الرَّجُلُ وَأَخُوهُ وَيَفْنَوْا بِإِثْمِهِمْ». وديه نتيجة طبيعية لأثمهم وخطياهم. ⪢