⪡ 1فِي السَّنَةِ الثَّالِثَةِ مِنْ مُلْكِ يَهُويَاقِيمَ مَلِكِ يَهُوذَا، ذَهَبَ نَبُوخَذْنَاصَّرُ مَلِكُ بَابِلَ إِلَى أُورُشَلِيمَ وَحَاصَرَهَا. الكتاب المقدس حدد لنا التاريخ بالظبط السنة التالتة من ملك الملك يهوياقيم . يهو: يعني يهوه / ياقيم : يعني يقيم وعلي حسب معني اسمه كان الملك ده يقيم شعبه من عثرتهم وضعفاتهم وسقوطهم. بس محصلش ده.للاسف هو والاتنين ملوك اللي بعديه المفروض كانوا يعملوا زي يوشيا الملك اللي قبليهم علطول . ويوشيا الملك كان ابو يهوياقيم . ويوشيا الملك كان ابتدي اصلاح. بس دول جم خربوا الدنيا. وكان في عادة جميلة انهم لما يسموا اسماء يسموا فيها معني زي معني اسم يهوياقيم : يهوه يقيم. وده درس لينا اننا لما نسمي اسماء منسميش اسماء وخلاص.
نبوخذناصر هو هو نفس اسم نبوخذراصر هو نفس الشخص ملك بابل.وجه في الحملة الاولي ديه وحاصر اورشليم. لان اورشليم مدينة حصينة .ومكانش سهل انها تتاخد. وعلشان يقدر حد ياخدها كانت لازم تتحاصر فترة طويلة .
2وَسَلَّمَ الرَّبُّ بِيَدِهِ يَهُويَاقِيمَ مَلِكَ يَهُوذَا مَعَ بَعْضِ آنِيَةِ بَيْتِ اللهِ، فَجَاءَ بِهَا إِلَى أَرْضِ شِنْعَارَ إِلَى بَيْتِ إِلهِهِ، وَأَدْخَلَ الآنِيَةَ إِلَى خِزَانَةِ بَيْتِ إِلهِهِ. سلم الرب بيده . طيب ليه يارب كده؟ اه ربنا له المجد في بعض الحالات بيسمح بالالم والضيقة والتعب. وكتير ساعات بنستغرب ليه كده يارب وليه بيحصل كده من مذابح وهدم ؟ لكن الكتاب المقدس بيقولنا " ليس لقوة نبوخذناصر ولكن من اجل ان الله سلم له" . يعني يمكن لما بعض اعداء الكنيسة يقوا عليها شوية . يتهكموا علي الهنا.لكن طبعا الوضع مش زي ماهما فاهمين .لكن الوضع ان الله هو الذي سلم او سمح لكن مش بقوتكم ولا بشطارتكم ولا باسلحتكم.
وربنا له المجد سلم يهوياقيم ملك يهوذا نفسه ويتقال انه غالبا اتاخد هناك ولما موتوه حدفوه بره المدينة ومات ميتة حمار.وكمان بعض انية بيت الله سلمها الله لنبوخذناصر. بس يارب ديه حاجة صعبة ديه الاواني المقدسة اللي بتستخدم في خدمتك يارب ؟ قال بعض الانية : جايز يتوب الشعب والملك بس محدش تاب.
ارض شنعار اللي هي بابل جنوب العراق المقصود بيها ارض بابل.
وللاسف حط اواني بيت الله في خزانة بيت الاله بتاعه ( بتاع نبوخذناصر الملك بابل) في المعبد يعني محدش يقدر يقربلهم خالص. ربنا له المجد صحيح سمح ان الاواني تتاخد بس كانت محفوظة. ولما جه بعد كده بلشاصر واستخدمها وقع عليه حكم الله ومات في نفس الليلة.
3وَأَمَرَ الْمَلِكُ أَشْفَنَزَ رَئِيسَ خِصْيَانِهِ بِأَنْ يُحْضِرَ مِنْ بَنِي إِسْرَائِيلَ وَمِنْ نَسْلِ الْمُلْكِ وَمِنَ الشُّرَفَاءِ، نبوخدناصر كان ذكي لانه مش بس بيحاصر مدينة اورشليم وبيهزمهم ويدمر البلد لكن قال ان المدينة ديه عندهم ناس كويسين وناس بتفهم ولها في العلم. هاتولي احسن الشباب ناخدهم ونربيهم في بابل ونعلمهم وبعد كده يبقوا في خدمتنا وفي خدمة المملكة.
"رئيس خصيانه" في بعض الاوقات اللي كان بيخدم في قصر الملك لازم يبقي مخصي. فديه كانت عادة عند الملوك. وبقي اسمهم كده بعدين بس مكانش لازم كلهم يبقوا مخصيين.
4فِتْيَانًا لاَ عَيْبَ فِيهِمْ، حِسَانَ الْمَنْظَرِ، حَاذِقِينَ فِي كُلِّ حِكْمَةٍ وَعَارِفِينَ مَعْرِفَةً وَذَوِي فَهْمٍ بِالْعِلْمِ، وَالَّذِينَ فِيهِمْ قُوَّةٌ عَلَى الْوُقُوفِ فِي قَصْرِ الْمَلِكِ، فَيُعَلِّمُوهُمْ كِتَابَةَ الْكَلْدَانِيِّينَ وَلِسَانَهُمْ. فتيانا : علشان يقدر يشكلهم زي ماهو عاوز. وده بعكس ناس لما تملك علي حاجة يجيبوا قرايبهم ومعارفهم حتي لو مش مؤهلين خالص للعمل ده ويحطوهم في اي مركز.
اول صفة : لا عيب فيهم. مش عاوز فيهم اي عيب جسدي مثلا محدش تبقي ايده او رجله مقطوعين او فيهم عامة خالص.
تاني صفة : حسان المنظر. شكلهم حلو. مقبول. ولما يقفوا قدام الملك يبقي مبسوط.
تالت صفة: حاذقين في كل حكمة. غالنا اتعمل لهم انترفيو مبدئي علشان يشوف عندهم حكمة ولا لا.
رابع صفة: عارفين معرفة. وكمان عندهم معلومات عامة .
خامس صفة: وذوي فهم بالعلم. متعلمين مش جهلة.
سادس صفة: والذين فيهم قوة علي الوقوف في قصر الملك. علشان هيقفوا قدام الملك ويخدموه.
وبعد مايختاروا الشباب دول " هيعلموهم كتابة الكلدانين ولسانهم" زي ما اي حد بيسافر بلد جديدة بياخد كورس علشان يقدر يتعامل ويندمج في البلد الجديدة ديه ويخدموها بجد. وده كان تفكير جميل من نبوخذناصر في زمنه.
5وَعَيَّنَ لَهُمُ الْمَلِكُ وَظِيفَةً كُلَّ يَوْمٍ بِيَوْمِهِ مِنْ أَطَايِبِ الْمَلِكِ وَمِنْ خَمْرِ مَشْرُوبِهِ لِتَرْبِيَتِهِمْ ثَلاَثَ سِنِينَ، وَعِنْدَ نِهَايَتِهَا يَقِفُونَ أَمَامَ الْمَلِكِ. يعني نصيب كل واحد فيهم من الاكل يوم بيوم. الملك بنفسه كان هو اللي بيحدد لهم نصيبهم. وزي مايكونوا في معهد عسكري او دراسي وكانت مدته 3 سنين. هيدرسوا في كل علوم الكلدانين وكل المطلوب منهم. وفي نفس الوقت الملك مهتم باكلهم وشربهم. وكان ليهم اكل وشرب معينيين والخمر هو اللي بيعينه كان مهتم بكل تفاصيلهم. وتلات سنين دراسة واكيد طبعا المواد الدراسية ديه فيها سحر وخزعبلات وحاجات مخالفة لايمانهم وليهوه يعني الله ولعقيدتهم. ومع كل ده كانوا الشباب دول واقفين صامدين قدام التحديات ديه.* بالظبط زي لما كنا بنتعلم حاجات مش المفروض نتعلمها. حاجات في الدين ملهاش علاقة بالعلم. ومع كده المسيحين كانوا بيتعلموها وبيتفوقوا فيها ومحدش بسبب المواد ديه غير ديانته.* وده نفس اللي حصل مع دانيال واصحابه التلاتة. وفي نهاية التلات سنين يقفوا قدام الملك ويعمل لهم انترفيو بنفسه علشان يحدد منين اللي هيكمل معاه .6وَكَانَ بَيْنَهُمْ مِنْ بَنِي يَهُوذَا: دَانِيآلُ وَحَنَنْيَا وَمِيشَائِيلُ وَعَزَرْيَا. 7فَجَعَلَ لَهُمْ رَئِيسُ الْخِصْيَانِ أَسْمَاءً، فَسَمَّى دَانِيآلَ «بَلْطَشَاصَّرَ»، وَحَنَنْيَا «شَدْرَخَ»، وَمِيشَائِيلَ «مِيشَخَ»، وَعَزَرْيَا «عَبْدَنَغُوَ». وكان من بني يهوذا دانيال واصحابه التلاتة وجايز يكون طبعا من اماكن او بلاد تانية في شباب تاني.
هنلاقي ان ايه 6 ديه اساميهم العبرية اللي اتولدوا بيها. * وفي التسبحة ليهم اسامي قبطية او يوناينة موجودة عندنا في الكنيسة * وكمان بقي ليهم اسامي كلدانية لما راحوا بابل.
والجميل ان اسمائهم العبرية كل واحد فيهم اسمه ليه صلة ب يهوه يعني الله
دانيال : دان جاية من دينونة / ايل (ئيل) يعني الله . فالمعني : الله ديان او الله قاضي.
واتغير اسمه لـ بلطشاصر.هما مش عاوزين اسم يهوه في اساميهم وادوهم اسامي فيها اسم الاله بتاعهم . اله اسمه بيل او بعل.
حننيا : الله حنان او يتحنن. ويغيروا اسمه ل شدرخ. وبرده فيه اسم الاله بتاعهم وده اسم اله الشمس.
ميشائيل: مي يعني من. شاء يعني زي . ائيل يعني الله. من مثل الله. ومنها اسم ميخائيل. ويغيروا اسمه لـ ميشخ. وده اله الجمال عندهم.
عزريا: عازر يعني يعين او يؤازر. الله يعين او الله يؤازر. وغيروا اسمه لـ عبدنغو.
اهالي الشباب دول اهاليهم ادوهم اسامي عبرية جميلة . وده يخلينا اننا نسمي اولادنا باسامي ليها معني جميل مش نختار اي اسم وخلاص. وغالبا الاسم ده بيبقي ليه تاثير علي صاحبه . فنختار اسامي فيها روحانية وتدين. * وعلشان كده لما حد بيترسم كاهن او يبقي اسقف بتتغير اساميهم.*
+ وفي التسبحة اساميهم : دانيل وانانياس ( حنانيا) وميصائيل وازارياس+
فهما غيروا لهم اساميهم علشان ينسوهم الهوية بتاعتهم تماما. والتعليم الكلداني علشان ينسوهم شريعة الههم والناموس. واللسان علشان ينسوهم لغتهم العبرية ويدوهم لسان كلداني .عملية طمس الهاوية بتاعتهم حتي الاكل هيدوهم اكل مخصوص وينسوهم اكلهم اليهودي . وغالبا ده اللي العالم بيعمله فينا ومعانا ومع اولادنا. ده اوقات ربنا يسترها علينا ناس بتسيب المسيح علشان قالولهم هنسدد ديونكم واحتياجاتكم. وبالنسبة للالهة بتاعتهم زي ماناس تقول تعالوا هنديكم مراكز حلوة ومرموقة وانسي ربنا بتاعك وهكذا.
8أَمَّا دَانِيآلُ فَجَعَلَ فِي قَلْبِهِ أَنَّهُ لاَ يَتَنَجَّسُ بِأَطَايِبِ الْمَلِكِ وَلاَ بِخَمْرِ مَشْرُوبِهِ، فَطَلَبَ مِنْ رَئِيسِ الْخِصْيَانِ أَنْ لاَ يَتَنَجَّسَ. وديه تعتبر احلي آية في الاصحاح. بتورينا ان دانيال واصحابه عاملين ازاي. كان عندهم مبدأ " ان لا يتنجس " . مثلا الآباء الكهنة يقولوا لأولادهم الروحيين انت رايح حفلة معينة وهيبقي فيها حاجات مش اد كده . انت هتعمل ايه قدام كل ده؟ فلو حد حط جواه انه مش هيتنجس هيقدر يقاوم كل التيارات. ولو رايح مع اصحابك خروجة وانت عارف ان فيها حاجات غلط . هل حطيت في قلبك ان لا تتنجس؟
علي فكرة دانيال واصحابه التلاتة كانوا حوالي في سن مابين 13 سنة و17 سنة . واكيد طبعا الشيطان كان بيحاربهم ويقولوهم طيب ماهو ربنا اللي سمح لكم انك تيجوا بابل يبقي خلاص طيعوا الملك وكده كإنكم بتطيعوا ربنا .ولو اخدتم مراكز في قصر الملك تقدروا تساعدوا اهاليكم ولو نشفتم دماغكم من الاول هتقفدوا كل حاجة وانتم مش في اورشليم علشان تتطبق عليكم الشريعة لو مسمعتوش كلام ربنا. لكن انتم هنا مأسورين في حالة اسر.
لكن دانيال طلب من رئيس الخصيان ان لا يتنجس . وهنا هنشوف صفة جميلة في دانيال انه بالرغم انه فتي صغير لكن عنده حكمة جميلة. واكيد طبعا مقالش لرئيس الخصيان كلام فيه تهور وكلام ناشف والا كان قلب عليه وموته هو والفتية التلاتة. لكن في الحقيقة دانيال كان عنده حكمة ونعمة وذكاء. وقاله مش هينفع ناكل من الاكل ده بتاع الملك.
9وَأَعْطَى اللهُ دَانِيآلَ نِعْمَةً وَرَحْمَةً عِنْدَ رَئِيسِ الْخِصْيَانِ. ياريت نطلب من ربنا في صلواتنا ونقوله يارب ارجوك ادينا نعمة ورحمة زي اللي اديهم لدانيال. نطلب الطلبة ديه واحنا رايحين مقابلة شغل مثلا او واحنا بنطلب طلب من اي حد.
الشباب دول كان عليهم نعمة، ورئيس الخصيان اول ما شافهم : حبهم جدا. هي ديه النعمة.
10فَقَالَ رَئِيسُ الْخِصْيَانِ لِدَانِيآلَ: «إِنِّي أَخَافُ سَيِّدِي الْمَلِكَ الَّذِي عَيَّنَ طَعَامَكُمْ وَشَرَابَكُمْ. فَلِمَاذَا يَرَى وُجُوهَكُمْ أَهْزَلَ مِنَ الْفِتْيَانِ الَّذِينَ مِنْ جِيلِكُمْ، فَتُدَيِّنُونَ رَأْسِي لِلْمَلِكِ؟». وكان ممكن رئيس الخصيان ميتكلمش او يتفاهم مع دانيال ويرفض. علي فكرة رئيس الخصيان زي وزير الداخلية. وبكل مركزه ده قال لدانيال مقدرش اعمل كده لأحسن الملك يقطع راسي. بس كل الموضوع اه حب دانيال واصحابه.11فَقَالَ دَانِيآلُ لِرَئِيسِ السُّقَاةِ الَّذِي وَلاَّهُ رَئِيسُ الْخِصْيَانِ عَلَى دَانِيآلَ وَحَنَنْيَا وَمِيشَائِيلَ وَعَزَرْيَا: وعين ليهم رئيس سقاة. وبرده دانيال طلب نفس الطلب منه. وكان ممكن لما دانيال طلب اول مرة ومحصلش استجابة كان ممكن يقول خلاص جربت مرة ومحدش وافق بس ده كان مبدا عند دانيال واصحابه وكان جواه حتي لو هنموت مش هنكسر وصية ربنا ولا الناموس والشريعة وفضلوا يحاولوا وواثقين ان ربنا هيديهم نعمة.12«جَرِّبْ عَبِيدَكَ عَشَرَةَ أَيَّامٍ. فَلْيُعْطُونَا الْقَطَانِيَّ لِنَأْكُلَ وَمَاءً لِنَشْرَبَ. دانيال اقترح علي رئيس السقاة وقاله انا عارف ان الوضع صعب بس ادينا 10 ايام وجربنا فيهم وطبعا بالعقل كده ان العشر ايام دول ميوضحوش تأثير الاكل اللي طالبيه عليهم هيكون ازاي .
" القطاني" يعني البقوليات. وماء علشان يشربوا وبلاش موضوع الخمر ده. وقاله ان في العشر ايام دول محدش هيحس باي حاجة. جربنا وشوفنا.
13وَلْيَنْظُرُوا إِلَى مَنَاظِرِنَا أَمَامَكَ وَإِلَى مَنَاظِرِ الْفِتْيَانِ الَّذِينَ يَأْكُلُونَ مِنْ أَطَايِبِ الْمَلِكِ. ثُمَّ اصْنَعْ بِعَبِيدِكَ كَمَا تَرَى». وفي اخر العشر ايام دول قارن بينا وبين باقي الشباب التانين اللي بياكلوا من اكل الملك ويشربوا من الخمر بتاعه.وبعد كده اعمل معانا اللي انت عاوزه. وده يوضح ان دانيال ده راجل ايمان وسد افواه الاسود بإيمانه، واصلا كون ان شكله هو واصحابه احسن من الشباب التانين ديه لوحدها معجزة .14فَسَمِعَ لَهُمْ هذَا الْكَلاَمَ وَجَرَّبَهُمْ عَشَرَةَ أَيَّامٍ. وافق وسمح لهم انهم ياكلوا اللي طلبوه.15وَعِنْدَ نِهَايَةِ الْعَشَرَةِ الأَيَّامِ ظَهَرَتْ مَنَاظِرُهُمْ أَحْسَنَ وَأَسْمَنَ لَحْمًا مِنْ كُلِّ الْفِتْيَانِ الآكِلِينَ مِنْ أَطَايِبِ الْمَلِكِ. هي ديه النعمة. والمعجزة لان العشر ايام مكانوش كفاية بس ربنا له المجد ادهم نعمة ورحمة.16فَكَانَ رَئِيسُ السُّقَاةِ يَرْفَعُ أَطَايِبَهُمْ وَخَمْرَ مَشْرُوبِهِمْ وَيُعْطِيهِمْ قَطَانِيَّ. ورئيس السقاة اقتنع لما شاف انهم أسمن لحما ومناظرهم احسن من الباقي. وفعلا كان بيدهم الاكل بتاعهم وبس.
في ناس بتسأل هو ينفع اشرب حتي لو بق واحد من الخمرة يعني شفطة كده ؟ فالمضوع مبدا زي الآية 8 : ان دانيال جعل في نفسه ان لا يتنجس.
وكمان بسبب طهارة قلب دانيال بقي ليه الضمير الصالح اللي يقف بيه قدام ربنا له المجد واداله استنارة ونعمة وفهم وكمان بقي مفسر احلام ورؤي.
الاستنارة محتاجة نقاوة كاملة من جوانا ومش من المفروض تكون في خطية جوانا او حتة خميرة صغيرة يعني ميبقاش جوانا اي بواقي خطايا او خطايا وحشة.
17أَمَّا هؤُلاَءِ الْفِتْيَانُ الأَرْبَعَةُ فَأَعْطَاهُمُ اللهُ مَعْرِفَةً وَعَقْلاً فِي كُلِّ كِتَابَةٍ وَحِكْمَةٍ، وَكَانَ دَانِيآلُ فَهِيمًا بِكُلِّ الرُّؤَى وَالأَحْلاَمِ. لما ربنا له المجد يلاقي انسان امين. ربنا اداهم معرفة وعقل في كل كتابة وحكمة يعني حتي في التعليم بتاعهم خلال التلات سنين وكانوا اشطر ناس. وهي ديه النعمة .
وكانت في حتة زيادة عند دانيال النبي: انه كان فهيما في كل الرؤي والاحلام فكان يشابه يوسف الصديق . بس في حالة يوسف كان الملك بيقوله علي الحلو وهو يفسر. مع دانيال النبي الملك كان يقوله قولي الحلم اللي حلمته وتفسيره كمان.
18وَعِنْدَ نِهَايَةِ الأَيَّامِ الَّتِي قَالَ الْمَلِكُ أَنْ يُدْخِلُوهُمْ بَعْدَهَا، أَتَى بِهِمْ رَئِيسُ الْخِصْيَانِ إِلَى أَمَامِ نَبُوخَذْنَاصَّرَ، وعند نهاية التلات سنين (احنا اقصي مده صوم عندنا 55 يوم) دانيال كان صايم هو واصحابه 3 سنين كاملين كانوا بياكلوا بقوليات ويشربوا مية وبس .
(قصة: مرة جه الصوم الكبير علي الاباء الرهبان. فطلع راهب صغير ينادي في البرية ويقول: ان الصوم الكبير ابتدي يا اباء. وعمال يلف في البرية يقول كده. فطلع له اب شيخ راهب وقاله: يا ابني بتعمل ايه ؟ قاله : اخطيت يا ابي : الصوم الكبير بدا. فقاله الاب الشيخ: الصوم الكبير ابتدي ايه ؟ احنا من ساعة ماطلعنا للبرية واحنا صايمين علطول.) لكن واحد زي دانيال.. (الصوم والصلاة هما اللذان خلصا دانيال من جب الأسود)
بعد كده دخلوهم عند نبوخذناصر حاجة كده زي حفلة التخرج والملك بنفسه هيعمل الانترفيو النهائي. وده دليل علي ان نبوخذناصر عنده حكمة ومعرفة كتيرة.
19وَكَلَّمَهُمُ الْمَلِكُ فَلَمْ يُوجَدْ بَيْنَهُمْ كُلِّهِمْ مِثْلُ دَانِيآلَ وَحَنَنْيَا وَمِيشَائِيلَ وَعَزَرْيَا. فَوَقَفُوا أَمَامَ الْمَلِكِ. وابتدي يتكلم مع الكل واللي عجبوه هما دانيال واصحابه التلاتة لانهم مليانين نعمة ورحمة والحكمة والمعرفة والعقل اللي ربنا اداهولهم.20وَفِي كُلِّ أَمْرِ حِكْمَةِ فَهْمٍ الَّذِي سَأَلَهُمْ عَنْهُ الْمَلِكُ وَجَدَهُمْ عَشَرَةَ أَضْعَافٍ فَوْقَ كُلِّ الْمَجُوسِ وَالسَّحَرَةِ الَّذِينَ فِي كُلِّ مَمْلَكَتِهِ. في الاكل جربوهم 10 ايام ولما وقفوا قدام الملك كانوا مليانين حكمة وفهم. وكانوا 10 اضعاف احسن من المجوس والسحرة.
المجوس هما علماء الفلك. والسحرة دول اصلا معاملاتهم مع الشياطين وعلشان كده مليانين خبث. ومحدش من المجوس او السحرة قدروا يقفوا قدام النعمة اللي كانت في دانيال واصدقائه.
21وَكَانَ دَانِيآلُ إِلَى السَّنَةِ الأُولَى لِكُورَشَ الْمَلِكِ. مش معني كده انه مات في السنة الاولي. لكن المقصود انه عاصر انتهاء السبي. ⪢