⪡ 1نَبُوخَذْنَصَّرُ الْمَلِكُ صَنَعَ تِمْثَالاً مِنْ ذَهَبٍ طُولُهُ سِتُّونَ ذِرَاعًا وَعَرْضُهُ سِتُّ أَذْرُعٍ، وَنَصَبَهُ فِي بُقْعَةِ دُورَا فِي وِلاَيَةِ بَابِلَ. الاصحاح اللي فات انتهي ان الملك سجد لدانيال وقاله إلهكم ده إله الالهة ورب الملوك وكاشف الاسرار. لكن هنا الملك عمل تمثال عملاق من ذهب.
وغالبا الوقت مابين الاصحاح التاني والتالت احتمال يكون عدي حوالي من 15 ل 20 سنة.
وزي ما عرفنا ان نبوخذنصر خرب اورشليم علي 3 مراحل:
المرحلة الأولي: ياخد سبايا ويرجع وكان بينهم دانيال والتلات فتيه وده كان حوالي سنة 605 ق م أو 607 ق م.
المرحلة التانية: برده دمر شوية في اورشليم واخد سبايا تاني وبينهم حزقيال النبي وده كان حوالي سنة 597 ق م.
والمرحلة التالتة: كانت بعد كده بحوالي عشر او 8 سنين حوالي سنة 500 حاجة وتمانين قبل الميلاد والمرة ديه دمر الهيكل تماما واخد باقي الكويسين وساب المرضي والكبار في السن في اورشليم.
وغالبا مع انتصاره وتدميره لاورشليم والهيكل حس بنفسه شوية وانه أعظم واحد في الوجود.
وكمان لما دانيال فسر له الحلم والملك اداهم مراكز كبيرة هما الاربعة والموضوع انتشر. فهو كملك عظيم قال انه هيوحد الشعوب ويعمل لهم دين واحد (للمملكة كلها). هيعمل تمثال وكل المملكة تعبد التمثال ده ومش عاوز ذبايح ولا طقوس للدين الواحد ده . كل اللي عاوزه إن الناس تسجد للتمثال وتعبده. كان بيحاول يعمل ده. واللي يعصي كلامي يلقي في اتون النار. وفعلا عمل تمثال عملاق طوله 60 ذراع (حوالي اكتر من 30 متر) وعرضه 6 أذرع (حوالي من 3 ل 4 متر). وعامل قاعدة ضخمة للتمثال بحيث كل الناس وهي واقفة تكون بداية التمثال اعلي من رؤوس الناس والتمثال من ذهب. (اختلفت الآراء حول موضوع الذهب: ناس قالوا ممن التمثال نفسه من خشب او معدن بس مطلي بالذهب لأنهم هيجيبوا ذهب منين لحجم التمثال ده كله؟)
"بقعة دورا" ... وديه كانت اهم حتة في بابل. مكان ماحط التمثال ولأنه من ذهب فلما بتشرق الشمس عليه بيبقي لمعانه حاجة رهيبة. وقال يبقي ده إله المملكة.
محدش عارف هو عمل التمثال لنفسه يعني إله نفسه ولا عمله لبعل الاله الرسمي للمملكة ولا عمل تمثال لإله جديد؟
بس في الغالب عمله لنفسه يعني يآله نفسه وزمان الحتة ديه كانت موجودة عند الاباطرة والملوك.
ابعاد التمثال فيها رقم 6: 60 ذراع و 6 ذراع:
في سفر الرؤيا رقم الوحش او اسم الوحش 666 والاباء قالوا ان رقم 6 يرمز للنقص. لان رقم 7 رقم كامل. وان رقم 8 هو بداية الأبدية علشان كده بنحتفل بعيد القيامة يوم الأحد اليوم التامن يعني بداية الحياة الجديدة.
علشان كده اسم الوحش 666 يعني ناقص ناقص ناقص. فالتمثال ده عبادة ناقصة يعني ملهاش اي لزمة.
هنا هنلاقي أسماء المسئولين في البلد بتتكرر للتأكيد. واسم الملك بيتكرر برده للتأكيد علي عمل التمثال. والموسيقي والآلات الموسيقية بتتكرر علشان يورينا الحفلة اللي عملها الملك.
2ثُمَّ أَرْسَلَ نَبُوخَذْنَصَّرُ الْمَلِكُ لِيَجْمَعَ الْمَرَازِبَةَ وَالشِّحَنَ وَالْوُلاَةَ وَالْقُضَاةَ وَالْخَزَنَةَ وَالْفُقَهَاءَ وَالْمُفْتِينَ وَكُلَّ حُكَّامِ الْوِلاَيَاتِ، لِيَأْتُوا لِتَدْشِينِ التِّمْثَالِ الَّذِي نَصَبَهُ نَبُوخَذْنَصَّرُ الْمَلِكُ. "المرازبة"... زي الامراء او الحكام وليهم مركز كبير في المملكة. "الخزنة"... زي وزراء المالية.
"الشحن"... رؤساء الشرطة.
كل كبار البلد لازم يبقوا موجودين في حفلة تدشين التمثال الدهب لأنه قرار من الملك. والكتاب المقدس قال ذكرهم بالتفصيل.
والاباء قالوا إننا كتير بنعمل لنفسنا تمثال ونعبده. وكمان عاوزين الناس تحترم التمثال اللي عملناه ده ومحدش يقرب منه. الكلام والتعامل بحساب واياك حد يغلط في الذات ديه او التمثال ده . بنبقي عاوزين الناس تحترمنا اوووي بالرغم ان كلنا خطاة وتحت الضعف وكلنا " في الموازيين الي فوق"
3حِينَئِذٍ اجْتَمَعَ الْمَرَازِبَةُ وَالشِّحَنُ وَالْوُلاَةُ وَالْقُضَاةُ وَالْخَزَنَةُ وَالْفُقَهَاءُ وَالْمُفْتُونَ وَكُلُّ حُكَّامِ الْوِلاَيَاتِ لِتَدْشِينِ التِّمْثَالِ الَّذِي نَصَبَهُ نَبُوخَذْنَصَّرُ الْمَلِكُ، وَوَقَفُوا أَمَامَ التِّمْثَالِ الَّذِي نَصَبَهُ نَبُوخَذْنَصَّرُ. بيكررهم تاني كلهم. علشان التمثال اللي عمله الملك. خلاص كل الكبار دول موجودين ووقفوا قدام التمثال وعمل حاجة كده زي ساعة الصفر لان المملكة كانت كبيرة اوووي. فلما يضربوا بالموسيقي كل االناس هتسجد للتمثال.4وَنَادَى مُنَادٍ بِشِدَّةٍ: «قَدْ أُمِرْتُمْ أَيُّهَا الشُّعُوبُ وَالأُمَمُ وَالأَلْسِنَةُ، 5عِنْدَمَا تَسْمَعُونَ صَوْتَ الْقَرْنِ وَالنَّايِ وَالْعُودِ وَالرَّبَابِ وَالسِّنْطِيرِ وَالْمِزْمَارِ وَكُلِّ أَنْوَاعِ الْعَزْفِ، أَنْ تَخِرُّوا وَتَسْجُدُوا لِتِمْثَالِ الذَّهَبِ الَّذِي نَصَبَهُ نَبُوخَذْنَصَّرُ الْمَلِكُ. في منادي مسئوليته يدي اشارة البدا. وانهم لما يسمعوا الموسيقي هيسجدوا للتمثال. وقال أنواع كتيرة من الآلات الموسيقية وهتتكرر تاني في آية 7.
*حاجة مهمة: الموسيقي جميلة وفن جميلة بس أوقات عدو الخير بيستخدم الحاجات الحلوة الكويسة في حاجة وحشة. هناا الموسيقي علشان الناس تدخل في جو معين وميفكروش في حاجة تانية وكله يعمل زي بعض. الآلات الموسيقية ديه كانت ضخمة.
6وَمَنْ لاَ يَخِرُّ وَيَسْجُدُ، فَفِي تِلْكَ السَّاعَةِ يُلْقَى فِي وَسَطِ أَتُّونِ نَارٍ مُتَّقِدَةٍ». واللي مش هيسجد للتمثال هيتحط في اتون النا. وده زي اوضة ويقال انه ليها فوهة (فتحة) من فوق وفيها باب من الجنب علشان الملك والناس يتفرجوا علي اللي جوة وهو بيتشوي. وهما بيموتوا. فبيرموهم من الفتحة اللي فوق.7لأَجْلِ ذلِكَ وَقْتَمَا سَمِعَ كُلُّ الشُّعُوبِ صَوْتَ الْقَرْنِ وَالنَّايِ وَالْعُودِ وَالرَّبَابِ وَالسِّنْطِيرِ وَكُلِّ أَنْوَاعِ الْعَزْفِ، خَرَّ كُلُّ الشُّعُوبِ وَالأُمَمِ وَالأَلْسِنَةِ وَسَجَدُوا لِتِمْثَالِ الذَّهَبِ الَّذِي نَصَبَهُ نَبُوخَذْنَصَّرُ الْمَلِكُ. وعلشان كده أول ما سمعوا الآلات كله سجد. وطبعا اللي هيرفض أو يقدر يقف قدام قرار الملك إلا حد ايمانه قوي بإلهه وانه مش هيعبد إله تاني. وهنا الفتية التلاتة ودانيال عندهم حوالي من 30 لـ 35 سنة. لأنهم راحوا بابل كان عندهم حوالي 13 او 14 سنة وده بعد فترة حوالي 20 سنة.8لأَجْلِ ذلِكَ تَقَدَّمَ حِينَئِذٍ رِجَالٌ كَلْدَانِيُّونَ وَاشْتَكَوْا عَلَى الْيَهُودِ، غالبا اللي اشتكوا اليهود هما الحكماء وكبار البلد. مع ان دانيال قبل كده أنقذهم هو والتلات فتية من القتل والابادة. وده الفرق بين اولاد ربنا واهل العالم. تعمل فيهم خير يعملوا شر. وده الفرق بين المسيح اللي جوانا وبين " الذين فيهم إله هذا الدهر قد اعمي اذهان غير المؤمنين"
عنيهم وقلبهم وفكرهم معميين كل اللي يهمهم مراكزهم. ومش عاوزين اليهود الأغراب يشاركوهم في مراكزهم واشغالهم. فغالبا كانوا مستنين أي فرصة واشتكوهم للملك. وعملوا تشويه سمعة وكلموا الملك بكلام سيء علي دانيال وأصحابه.
9أَجَابُوا وَقَالُوا لِلْمَلِكِ نَبُوخَذْنَصَّرَ: «أَيُّهَا الْمَلِكُ، عِشْ إِلَى الأَبَدِ! ديه كانت تحية الملك.10أَنْتَ أَيُّهَا الْمَلِكُ قَدْ أَصْدَرْتَ أَمْرًا بِأَنَّ كُلَّ إِنْسَانٍ يَسْمَعُ صَوْتَ الْقَرْنِ وَالنَّايِ وَالْعُودِ وَالرَّبَابِ وَالسِّنْطِيرِ وَالْمِزْمَارِ وَكُلِّ أَنْوَاعِ الْعَزْفِ، يَخِرُّ وَيَسْجُدُ لِتِمْثَالِ الذَّهَبِ. هنا بيحكوا القصة بخبث ومكر: أنت يا جلالة الملك أصدرت قرار وامر ومجهز كل الآلات ديه علشان الحفلة وان الكل يسجد لما يسمع صوت الآلات.11وَمَنْ لاَ يَخِرُّ وَيَسْجُدُ فَإِنَّهُ يُلْقَى فِي وَسَطِ أَتُّونِ نَارٍ مُتَّقِدَةٍ. 12يُوجَدُ رِجَالٌ يَهُودٌ، الَّذِينَ وَكَّلْتَهُمْ عَلَى أَعْمَالِ وِلاَيَةِ بَابِلَ: شَدْرَخُ وَمِيشَخُ وَعَبْدَنَغُوَ. هؤُلاَءِ الرِّجَالُ لَمْ يَجْعَلُوا لَكَ أَيُّهَا الْمَلِكُ اعْتِبَارًا. آلِهَتُكَ لاَ يَعْبُدُونَ، وَلِتِمْثَالِ الذَّهَبِ الَّذِي نَصَبْتَ لاَ يَسْجُدُونَ». "رجال يهود"...جملة جميلة جدا. لانهم أول ما راحوا بابل سبايا كان بيتعمل لهم طمس هوية ( زي تغيير الاكل وشرب الخمر وتغيير اساميهم والعلوم الكلدانية ....) وبعد مرور حوالي اكتر من 20 سنة لسه بيتقال عليها رجال يهود. فدول اصحاب مبدأ حتي لو قعدوا في الغربة مئات السنين لكن هيفضلوا زي ما استلموا في آبائهم. في اي مكان المفروض والصح اننا نعمل كلام الكتاب المقدس. مش نعمل ونقلد اصحاب البلد اللي روحناها. مينفعش نمشي في الخطية زي اهل العالم.
"الذين وكلتهم علي اعمال ولاية بابل"... عاوزين يقولوا اللي انت كبرتهم. قالوا عن التلات فتية تهم تضيع. تلات تهم كل واحدة أصعب من التانية: مستهيفينك. مش عاملين لك اي اعتبار مش بيحترموك.
حتي الاله اللي عملته علشان توحد الديانة في المملكة مش بيعبدوه . ومش بيسجدوا للتمثال.
13حِينَئِذٍ أَمَرَ نَبُوخَذْنَصَّرُ بِغَضَبٍ وَغَيْظٍ بِإِحْضَارِ شَدْرَخَ وَمِيشَخَ وَعَبْدَنَغُوَ. فَأَتَوْا بِهؤُلاَءِ الرِّجَالِ قُدَّامَ الْمَلِكِ. طبعا الكلام ده غاظ الملك جدا وطلب انهم يجيبوا التلات فتية قدامه. علي فكرة نبوخذنصر كان متسرع جدا في حكمه وده شفناه قبل كده مع الحكماء وانه أصدر قرار بإبادتهم.
فكان ممكن يبيد التلات فتيه في لحظة. بس هنا طلب انهم يجوا قدامه فده في حد ذاته تصرف بكل هدوء منه وكل ده علشان ربنا له المجد يظهر: مجدا.
"بغضب وغيظ" ... حس انهم مش بيحترموه.
14فَأَجَابَ نَبُوخَذْنَصَّرُ وَقَالَ لَهُمْ: «تَعَمُّدًا يَا شَدْرَخُ وَمِيشَخُ وَعَبْدَنَغُوَ لاَ تَعْبُدُونَ آلِهَتِي وَلاَ تَسْجُدُونَ لِتِمْثَالِ الذَّهَبِ الَّذِي نَصَبْتُ! بتعندوا معايا ومش بتعبدوا ولا بتسجدوا لتمثالي؟15فَإِنْ كُنْتُمُ الآنَ مُسْتَعِدِّينَ عِنْدَمَا تَسْمَعُونَ صَوْتَ الْقَرْنِ وَالنَّايِ وَالْعُودِ وَالرَّبَابِ وَالسِّنْطِيرِ وَالْمِزْمَارِ وَكُلَّ أَنْوَاعِ الْعَزْفِ إِلَى أَنْ تَخِرُّوا وَتَسْجُدُوا لِلتِّمْثَالِ الَّذِي عَمِلْتُهُ. وَإِنْ لَمْ تَسْجُدُوا فَفِي تِلْكَ السَّاعَةِ تُلْقَوْنَ فِي وَسَطِ أَتُّونِ النَّارِ الْمُتَّقِدَةِ. وَمَنْ هُوَ الإِلهُ الَّذِي يُنْقِذُكُمْ مِنْ يَدَيَّ؟». واضح جدا انه كان معتمد اعتماد كامل علي الموسيقي لدرجة ان دانيال النبي يذكر موضوع الآلات ده 3 مرات
"ومن هو الاله الذي ينقذكم من يدي؟".... اول طبعا ما قال الجملة ديه نتخيل إن التلات فيته عرفوا إن الموضوع بقي بتاع ربنا له المجد لأنه غلط غلطة كبيرة وقالهم وروني بقي اللي هينقذكم من ايدي. وجايز يكونوا اتطمنوا وقتها لما عرفوا ان الموضوع ده بتاع ربنا.
16فَأَجَابَ شَدْرَخُ وَمِيشَخُ وَعَبْدَنَغُوَ وَقَالُوا لِلمَلِكِ: «يَا نَبُوخَذْنَصَّرُ، لاَ يَلْزَمُنَا أَنْ نُجِيبَكَ عَنْ هذَا الأَمْرِ. وديه اول عبارة قالوها في سفر دانيال: احنا مش محتاجين نجاوبك علي سؤالك وأكيد أنت هتعرف لوحدك مين الهنا. كانوا رجالة حلوين اووووي . وجايز الملك يكون وصل انه اعظم واحسن حتي من الآلهة واكيد فكر اني روحت اورشليم وانتصرت علي الههم وهديت لهم الهيكل بتاعهم وكسبت بلاد كتير بالآلهة بتاعتهم ومفيش ولا اله قدر يدافع عن بلده . في ناس كتير مش بتقدر تتحمل العظمة وبيتجننوا. حتي نلاقيهم انهم قالوله اسمه علطول من غير جلالة الملك.17هُوَذَا يُوجَدُ إِلهُنَا الَّذِي نَعْبُدُهُ يَسْتَطِيعُ أَنْ يُنَجِّيَنَا مِنْ أَتُّونِ النَّارِ الْمُتَّقِدَةِ، وَأَنْ يُنْقِذَنَا مِنْ يَدِكَ أَيُّهَا الْمَلِكُ. هما قالوا حاجتين يوضحوا اد ايه ايمانهم قوي في قلوبهم:
-الهنا ممكن ينجينا وحتي لو سمح ومنجناش (وده شوفناه في سير قديسين وشهداء كتير ومنهم مثلا سيرة الشهيد سيدهم بشاي ربنا سمح واتنيح وكمان القديس بوليكاربوس اترمي في النار وربنا برده سمح انه اتنيح.)
-وتاني حاجة ان ربنا ممكن كمان ينقذنا من ايدك.
عاوزين يقولوله لو أنقذنا ونجانا او حتي سمح اننا نموت برده مش هنسجد لتمثالك. فربنا كان واضح اوووي في قلوبهم. "ان عشنا للرب نعيش وان موتنا فللرب نموت". وزي ما قال حد كإنهم سمعوا اللي قاله السيد المسيح بعد 600 سنة "لا تخافوا من اللذين يقتلون الجسد وبعد ذلك ليس لهم ما يفعلون اكثر".
علي فكرة الكلام اللي بنحكيه ده سهل بس لما الواحد يبقي عارف ان في أتون نار مستنياه. الموضوع هيبقي مختلف معانا لان الواقع مر وصعب. فقالوله : ربنا بتاعنا موجود وهينقذنا من أيدك وينجينا من الاتون.
18وَإِلاَّ فَلِْيَكُنْ مَعْلُومًا لَكَ أَيُّهَا الْمَلِكُ، أَنَّنَا لاَ نَعْبُدُ آلِهَتَكَ وَلاَ نَسْجُدُ لِتِمْثَالِ الذَّهَبِ الَّذِي نَصَبْتَهُ». "وإلا"...يعني لو ربنا معملش كده وسمح اننا نموت برده مش هنسجد لتمثالك ولا هنعبد آلهتك. التربية من الصغر بتفضل موجودة طول العمر. وشوفنا الكلام ده عملي مع موسي النبي: قعد مع مامته في الاول وصحيح انه اتهذب بكل أدب وحكمة المصريين بس فضل عبراني في تربيته وجواه فضل عبراني. وكمان شوفنا ده مع صموئيل النبي مامته وديته الهيكل وهو عنده حوالي 3 سنين والكتاب المقدس يقول "فسجد صموئيل" وبعدين دخل الهيكل.19حِينَئِذٍ امْتَلأَ نَبُوخَذْنَصَّرُ غَيْظًا وَتَغَيَّرَ مَنْظَرُ وَجْهِهِ عَلَى شَدْرَخَ وَمِيشَخَ وَعَبْدَنَغُوَ، فَأَجَابَ وَأَمَرَ بِأَنْ يَحْمُوا الأَتُونَ سَبْعَةَ أَضْعَافٍ أَكْثَرَ مِمَّا كَانَ مُعْتَادًا أَنْ يُحْمَى. ده أنا هارميكم مش في الأتون العادي لا ده اقوي 7 مرات من العادي واشد.20وَأَمَرَ جَبَابِرَةَ الْقُوَّةِ فِي جَيْشِهِ بِأَنْ يُوثِقُوا شَدْرَخَ وَمِيشَخَ وَعَبْدَنَغُوَ وَيُلْقُوهُمْ فِي أَتُّونِ النَّارِ الْمُتَّقِدَةِ. وأمر انهم يتربطوا ويلقوهم في الأتون. لازم نحذر من الملوك الأول كان بيحبهم جدا ودلوقتي أمر بإلقائهم في الأتون علشان مش عاوزين يتنازلوا عن الههم ومبادئهم. ومش مجرد امر الجيش العادي .لا ده طلب من "جبابرة القوة" اقوي ناس عنده في المملكة.21ثُمَّ أُوثِقَ هؤُلاَءِ الرِّجَالُ فِي سَرَاوِيلِهِمْ وَأَقْمِصَتِهِمْ وَأَرْدِيَتِهِمْ وَلِبَاسِهِمْ وَأُلْقُوا فِي وَسَطِ أَتُّونِ النَّارِ الْمُتَّقِدَةِ. 22وَمِنْ حَيْثُ إِنَّ كَلِمَةَ الْمَلِكِ شَدِيدَةٌ وَالأَتُونَ قَدْ حَمِيَ جِدًّا، قَتَلَ لَهِيبُ النَّارِ الرِّجَالَ الَّذِينَ رَفَعُوا شَدْرَخَ وَمِيشَخَ وَعَبْدَنَغُوَ. 23وَهؤُلاَءِ الثَّلاَثَةُ الرِّجَالِ، شَدْرَخُ وَمِيشَخُ وَعَبْدَنَغُوَ، سَقَطُوا مُوثَقِينَ فِي وَسَطِ أَتُّونِ النَّارِ الْمُتَّقِدَةِ. جايز يكونوا اتربطوا بحديد علشان ميعرفوش يتحركوا جوة الاتون. واصلا اللي ماتوا هما الناس للي رموا الفتية التلاتة جوة أتون النار. ماتوا من شدة اللهيب والسخونة. والكتاب المقدس يقول "سقطوا موثقين".. فده لو حبل عادي كان أتحرق وأتقطع لما اترموا.24حِينَئِذٍ تَحَيَّرَ نَبُوخَذْنَصَّرُ الْمَلِكُ وَقَامَ مُسْرِعًا فَأَجَابَ وَقَالَ لِمُشِيرِيهِ: «أَلَمْ نُلْقِ ثَلاَثَةَ رِجَال مُوثَقِينَ فِي وَسَطِ النَّارِ؟» فَأَجَابُوا وَقَالُوا لِلْمَلِكِ: «صَحِيحٌ أَيُّهَا الْمَلِكُ». والملك كان بيتفرج من الباب الجانبي وبقي محتار: هو احنا مش رمينا تلاتة؟ قالوله: صح.25أَجَابَ وَقَالَ: «هَا أَنَا نَاظِرٌ أَرْبَعَةَ رِجَال مَحْلُولِينَ يَتَمَشَّوْنَ فِي وَسَطِ النَّارِ وَمَا بِهِمْ ضَرَرٌ، وَمَنْظَرُ الرَّابعِ شَبِيهٌ بِابْنِ الآلِهَةِ». قالهم: أنا شايف 4 جوة الأتون ومش مربوطين.
"ومنظر الرابع شبيه بابن الآلهة" ... تعبير جميل قاله أصلا قبل التجسد ب 600 سنة وده طبعا ربنا يسوع المسيح يعني مش ملاك.
أقصى اللي تعمله التجربة والضيقات في حياة اولاد الله انها ترميهم في حضن المسيح. وأقصي اللي بيعمله أعدائنا بكل جبروتهم انهم يحطونا في حضن المسيح.
26ثُمَّ اقْتَرَبَ نَبُوخَذْنَصَّرُ إِلَى بَابِ أَتُّونِ النَّارِ الْمُتَّقِدَةِ وَأَجَابَ، فََقَالَ: «يَا شَدْرَخُ وَمِيشَخُ وَعَبْدَنَغُو، يَا عَبِيدَ اللهِ الْعَلِيِّ، اخْرُجُوا وَتَعَالَوْا». فَخَرَجَ شَدْرَخُ وَمِيشَخُ وَعَبْدَنَغُو مِنْ وَسَطِ النَّارِ. كانوا بيتمشوا مع ربنا يسوع له المجد جوة الأتون. علشان كده معلمنا بولس الرسول قال "وبالإيمان أطفئوا قوة النيران." وكان جوة قلبهم إيمان أقوى من الأتون المحمي سبعة اضعاف. وعلشان كده بإيمانهم ده جالهم ربنا يسوع له المجد ابن الله وأتمشى معاهم في الأتون.
وده اختبار لينا: لما نقع في الضيقة بنشكر ربنا ولا بنستسلم لليأس ونجدف على إله السماء؟ ويقولوا هو فين ربنا؟ ... لكن التلات فتيه دول مثال جميل. ربنا هينقذنا. تمام. مش هينقذنا هنموت ومفيش مشكلة. اهم حاجة مشكوش في إلههم. وفي الآخر مطلعوش غير لما الملك قالهم تعالوا. وخرجوا من وسط النار والاتون.
27فَاجْتَمَعَتِ الْمَرَازِبَةُ وَالشِّحَنُ وَالْوُلاَةُ وَمُشِيرُو الْمَلِكِ وَرَأَوْا هؤُلاَءِ الرِّجَالَ الَّذِينَ لَمْ تَكُنْ لِلنَّارِ قُوَّةٌ عَلَى أَجْسَامِهِمْ، وَشَعْرَةٌ مِنْ رُؤُوسِهِمْ لَمْ تَحْتَرِقْ، وَسَرَاوِيلُهُمْ لَمْ تَتَغَيَّرْ، وَرَائِحَةُ النَّارِ لَمْ تَأْتِ عَلَيْهِمْ. محصلش حاجة لجسمهم. ريحتهم حتي متاثرتش بالنار نهائي. حتي شعرة منهم متحرقتش وريحة النار مكانتش فيهم نهائي. (ده لما حد مثلا بيشرب سجاير ريحته كلها بتبقي سجاير. دول ريحة النار مكانتش فيهم خالص.)28فَأَجَابَ نَبُوخَذْنَصَّرُ وَقَالَ: «تَبَارَكَ إِلهُ شَدْرَخَ وَمِيشَخَ وَعَبْدَنَغُوَ، الَّذِي أَرْسَلَ مَلاَكَهُ وَأَنْقَذَ عَبِيدَهُ الَّذِينَ اتَّكَلُوا عَلَيْهِ وَغَيَّرُوا كَلِمَةَ الْمَلِكِ وَأَسْلَمُوا أَجْسَادَهُمْ لِكَيْلاَ يَعْبُدُوا أَوْ يَسْجُدُوا لإِلهٍ غَيْرِ إِلهِهِمْ. هنا نبوخذنصر عمل نفس اللي عمله مع دانيال النبي.
"ملاكه" ...هو طبعا مش عارف فقال: ملاك.
فهما كانوا شباب جميل كان عندهم استعداد يموتوا بس ميسبوش إلههم.
وهنا طبعا نسال نفسنا: هل عندنا استعداد نفضل ماسكين في كلمة ربنا حتي لو هنتألم ونتعب شوية ونتضايق شوية ؟ ولا مش هنتمسك بكلمة ربنا ؟
29فَمِنِّي قَدْ صَدَرَ أَمْرٌ بِأَنَّ كُلَّ شَعْبٍ وَأُمَّةٍ وَلِسَانٍ يَتَكَلَّمُونَ بِالسُّوءِ عَلَى إِلهِ شَدْرَخَ وَمِيشَخَ وَعَبْدَنَغُوَ، فَإِنَّهُمْ يُصَيَّرُونَ إِرْبًا إِرْبًا، وَتُجْعَلُ بُيُوتُهُمْ مَزْبَلَةً، إِذْ لَيْسَ إِلهٌ آخَرُ يَسْتَطِيعُ أَنْ يُنَجِّيَ هكَذَا». وأصدر قرار أي حد هيتكلم علي إله الفتية التلاتة بأي كلام وحش بيوتهم هتبقي مزبلة وهيقطعهم إربا إربا (قطع قطع).
نحفظ الآية ديه " إذ ليس إله اخر يستطيع ان ينجي هكذا"
30حِينَئِذٍ قَدَّمَ الْمَلِكُ شَدْرَخَ وَمِيشَخَ وَعَبْدَنَغُوَ فِي وِلاَيَةِ بَابِلَ. رفههم اكتر واكتر واداهم مراكز مهمة اكتر من الاول ⪢