⪡ 1لَمَّا تَكَلَّمَ أَفْرَايِمُ بِرَعْدَةٍ، تَرَفَّعَ فِي إِسْرَائِيلَ. وَلَمَّا أَثِمَ بِبَعْل مَاتَ. هنا بيتكلم عن افرايم باعتباره مُمثل عن المملكة الشمالية، اسرائيل.
"لَمَّا تَكَلَّمَ أَفْرَايِمُ بِرَعْدَةٍ،" ... يعني: ارتعاش وخوف شديد. يعني كانت الشعوب بترتعد منهم قديما، لما كانوا عايشين مع ربنا. زي ما حصل مع راحاب الزانية: لما قالت للجاسوسين: ذاب قلبنا، لما سمعنا أن ربنا يَبس قدامكم مياه بحر سوف.
"تَرَفَّعَ فِي إِسْرَائِيلَ." ... يعني بقي رفيع بين الأمم. يعني ارتفع شأنه.
"وَلَمَّا أَثِمَ بِبَعْل مَاتَ." ... أَثِمَ: يعني أخطأ. أخطأ بعبادته للبعل. مات. لأنه انفصل عن ربنا. للأسف بعد ما ترّفع وارتفع شأنه بين الأمم، بسبب عمل ربنا معاه. أخطأ بعبادته للأوثان (البعل). فانفصل عن ربنا ومات.
2وَالآنَ يَزْدَادُونَ خَطِيَّةً، وَيَصْنَعُونَ لأَنْفُسِهِمْ تَمَاثِيلَ مَسْبُوكَةً مِنْ فِضَّتِهِمْ، أَصْنَامًا بِحَذَاقَتِهِمْ، كُلُّهَا عَمَلُ الصُّنَّاعِ. عَنْهَا هُمْ يَقُولُونَ: «ذَابِحُو النَّاسِ يُقَبِّلُونَ الْعُجُولَ». هنا بيتكلم عن مدي انحرافهم في عبادة الأوثان. وازاي كانوا ماهرين في صناعة هذة التماثيل.
"وَالآنَ يَزْدَادُونَ خَطِيَّةً،" ... يعني كل يوم بيخطئوا عن اليوم اللي قبله. وكل خطية بتقود لخطية تانية. لو الانسان موّقفش طريقه في الشر، وسلسلة الشر اللي ماشي فيها. بيزداد في الخطية.
علشان كده الواحد بيحتاج أنه يراجع نفسه أول بأول. قبل ما يمشي أكتر في طريق الشر والخطية.
"وَيَصْنَعُونَ لأَنْفُسِهِمْ تَمَاثِيلَ مَسْبُوكَةً مِنْ فِضَّتِهِمْ،" ... تماثيل مسبوكة: اتعلموا من مصر اذابة المعادن واعادة تشكيلها. وهي ديه عملية السبك. والتماثيل مكانتش من الذهب فقط، لكن كمان من الفضة.
وده اللي عملوه في العِجل الذهبي، لما كانوا في برية سيناء، عند جبل حُوريب. وكمان ده اللي عملوه في عجول الذهب، اللي صنعها يربعام. وده لأنه كان هربان في مصر، فاتعلم عبادة العجول في مصر.
فلو أخدنا النموذج ده علي حياتنا، هنلاقي أن في تماثيل كتير في حياتنا عملناها لنفسنا زي تمثال: القوة – المركز – المال – الجمال - الذات – الشهوات .......
"أَصْنَامًا بِحَذَاقَتِهِمْ،" ... حَذَاقَتِهِمْ" يعني بمهارتهم. كان عندهم مهارة. وبدل ما كانت المهارة والثقافة والحضارة اللي كانت عندهم، يستخدموها في خدمة ربنا. استخدموها في صناعة الأوثان.
"كُلُّهَا عَمَلُ الصُّنَّاعِ." ... في فئة مخصصة بصناعة التماثيل ديه.
"عَنْهَا هُمْ يَقُولُونَ:" ... يعني كأنها مَثل شائع عندهم. يعني ربنا بيستخدم المثل اللي هما بيرددوه ويقولوه.
"ذَابِحُو النَّاسِ يُقَبِّلُونَ الْعُجُولَ." ... ذابحوا الناس: هنا اشارة للذبائح البشرية اللي كانوا بيقدموها للأوثان. وديه كانت عادة وثنية، اكتسبوها من الشعوب الكنعانية اللي كانت مُحيطة بيهم. وربنا غضب عليهم كتير بسبب الذبائح البشرية. وكانوا بيقدموا أولادهم كذبائح للأوثان.
وكمان اشارة للكهنة: اللي كانوا بيذبحوا الناس روحيا. بأنهم كانوا بيقبلوا من الناس الذبائح الوثنية. والمقصود هنا كهنة الأوثان.
" يُقَبِّلُونَ الْعُجُولَ." ... تقبيل العجل أو البعل. ديه موجودة في سفر ملوك الأول 19: 18. وديه اشارة: أنه كنوع من أنواع التكريس والاكرام.
وبدل ما كانوا يقولوا مع نشيد الأنشاد "يُفبلني بقُبلات فمه" وديه الأيات اللي قالتها العروس، أن من شدة حبها للعريس: كانت تُقبله.
فهنا ربنا بيذكر لهم خطاياهم " يُقَبِّلُونَ الْعُجُولَ." بيقبّلوا الالهة الوثنية. لأن القُبلة علامة علي الحب بين الزوجين.
3لِذلِكَ يَكُونُونَ كَسَحَابِ الصُّبْحِ، وَكَالنَّدَى الْمَاضِي بَاكِرًا. كَعُصَافَةٍ تُخْطَفُ مِنَ الْبَيْدَرِ، وَكَدُخَانٍ مِنَ الْكُوَّةِ. سحاب الصبح: هو سحاب لا يُعطي مطر. وينقشع بظهور الشمس. (وشوفناها في هوشع6 :4).
"وَكَالنَّدَى الْمَاضِي بَاكِرًا." ... برده اشارة للزوال والاضمحلال.
فهنا ربنا بيقولهم: أنتم عاملين زي سحاب الصبح. وزي الندي الذي يمضي سريعا، من غير ما يروي الأرض. لأن المفروض الندي بينزل باكر، علشان ينعش الأرض والزرع. لكن هنا يمضي باكرا، بدون ما يروي الأرض.
"كَعُصَافَةٍ تُخْطَفُ مِنَ الْبَيْدَرِ،" ... البيدر: هو جرن الحبوب. اللي كانوا بيجمعوا فيه الحبوب لدرسها وتذريتها. والعُصافة: هو التبن الناعم.
" تُخْطَفُ مِنَ الْبَيْدَرِ،" ... يعني بتحملها الرياح بعيدا. برده اشارة للزوال والاضمحلال والضعف.
"وَكَدُخَانٍ مِنَ الْكُوَّةِ." ... الكوة: يعني الشُباك أو الطاقة. والدخان برده اشارة لسرعة الزوال.
فهنا ربنا قدم 4 تشبيهات تدل علي ضعفهم:
- سحاب الصبح. – الندي الماضي باكرا. – العُصافة التي تخطف من البيدر. – كدخان من الكوة.
فربنا قدم لهم تشبيهات من حياتهم اليومية، علشان يقولهم: أنتم بلا تأثير. وأنكم الي زوال واضمحلال.
4«وَأَنَا الرَّبُّ إِلهُكَ مِنْ أَرْضِ مِصْرَ، وَإِلهًا سُِوَايَ لَسْتَ تَعْرِفُ، وَلاَ مُخَلِّصَ غَيْرِي. ربنا بيفكرهم مرة تانية بأنه إلههم منذ عهد خروجهم من أرض مصر. لما دخل معاهم في عهد عند جبل حوريب.
"وَإِلهًا سِوَايَ لَسْتَ تَعْرِفُ،" ... اكتفي بربنا وحده. معبدوش وقتها حاجة تاني. كانوا ماشين مع ربنا وبس. علشان كده جدهم داود النبي قال "معك لا أريد شيئا علي الأرض.
"وَلاَ مُخَلِّصَ غَيْرِي." ... مفيش حد هيقدم لكم الخلاص غيري. وهنا ربنا بيأكد أن مفيش طريق تاني للخلاص، الا بالمسيح يسوع ربنا له المجد.
5أَنَا عَرَفْتُكَ فِي الْبَرِّيَّةِ فِي أَرْضِ الْعَطَشِ. البرية هنا: هي برية سيناء.
"فِي أَرْضِ الْعَطَشِ." ... لما ربنا سمح لهم بتجربة العطش. علشان يشعروا باحتياجاتهم لربنا. وربنا كان بيبعت لهم الماء من الصخرة.
6لَمَّا رَعَوْا شَبِعُوا. شَبِعُوا وَارْتَفَعَتْ قُلُوبُهُمْ، لِذلِكَ نَسُونِي. يعني لما أطعمتهم حتي الشِبع.
"شَبِعُوا وَارْتَفَعَتْ قُلُوبُهُمْ،" ... ارتفعت قلوبهم. يعني: أصابهم الكبرياء.
وده كان تحذير من ربنا سابق ليهم، في سفر التثنية 8 :11 – 14 "لئلا إذا أكلت وشبعت وبنيت بيوتا جيدة وسكنت .... يرتفع قلبك وتنسى الرب إلهك الذي أخرجك من أرض مصر من بيت العبودية."
فربنا حذرهم من الكبرياء قبل كده.
"لِذلِكَ نَسُونِي." ... فربنا كان بيقولهم في تثنية 8، أوعوا خيرات أرض كنعان وراحتكم المادية، تنسكيم ربنا.
الجسد حين يشبع. الروح تنسي ربنا. لكن الصوم فرصة لانطلاق الروح نحو ربنا. وده معني تاني للصوم: ان شِبع الجسد ده فيه خطورة علينا.
والمقصود: الشِبع بصورة مُفرطة. مش المقصود الاحتياج الطبيعي للجسم من الأكل والشرب. فالشِبع أوي ده، بيخلي الانسان ينسي ربنا. ساعات الغِني والثروة وشِبع الجسد.. يُعطوا كبرياء. زي العني الغبي. ويجي معاه نسيان ربنا، لما الواحد يركز علي احتياجاته الجسدية فقط.
7«فَأَكُونُ لَهُمْ كَأَسَدٍ. أَرْصُدُ عَلَى الطَّرِيقِ كَنَمِرٍ. وده رد فعل ربنا.
"فَأَكُونُ لَهُمْ كَأَسَدٍ." ... الله القدوس يقف أمام الخطية في حزم وفي مرارة نفس فكم يصعب علي ربنا أن يكون كأسد ضد أولاده. بس بيكون مضطر علشان يرجعوا ويتوبوا.
"أَرْصُدُ عَلَى الطَّرِيقِ كَنَمِرٍ." ... أرْصُد: بمعني الكمون (يكمُن) والمراقبة. استعداد للهجوم.
8أَصْدِمُهُمْ كَدُبَّةٍ مُثْكِل، وَأَشُقُّ شَغَافَ قَلْبِهِمْ، وَآكُلُهُمْ هُنَاكَ كَلَبْوَةٍ. يُمَزِّقُهُمْ وَحْشُ الْبَرِّيَّةِ. هنا تشبيهات شديدة وقاسية. تبين أد ايه التأديبات الالهية القادمة عليهم شديدة. أسد – نمر- دُب - لبوة – وحش البرية.. ربنا استخدم كذا نموذج علشان يبين لهم، مدي شدة التأديبات اللي جاية عليهم.
"أَصْدِمُهُمْ" ... يعني أنقض عليهم.
"كَدُبَّةٍ مُثْكِل،" ... الثكل: هو فقدان الأبناء. فقدان الذُرية والأولاد. يعني: في مرارة الدُبة اللي مات صغارها، بيكون حزنها شديد جدا. وغضبها بيكون شديد جدا لأنها فقدت أولادها. ممكن تفترس أي حد تصادفه.
وهنا بيكشف عن قلب ربنا اللي امتلئ بالمرارة، بسبب خطايا شعبه. بيبين أد ايه ربنا حزين عليهم وعلي اللي وصلوا ليه من انحرافات.
"أَصْدِمُهُمْ كَدُبَّةٍ مُثْكِل،" ... فهنا ربنا بيقول: قلبي مليان مرارة، زي الدُبة اللي فقدت أولادها.
وإذا كان ربنا هنا بيشبه نفسه بالدُبة اللي فقدت أولادها. فهو حاسس أن بخطيتهم قد ماتوا في نظره. وكأنه فقدهم بالخطية.
"وَأَشُقُّ شَغَافَ قَلْبِهِمْ،" ... شَغَافَ القلب: ده الغلاف الرقيق اللي بيُحيط بالقلب. الغلاف اللي بيحمي القلب.
والتعبير ده متذكرش في أي حتة تاني في الكتاب المقدس. وده كان رد ربنا علي كبريائهم. لأن في آية 6: قال ارتفعت قلوبهم. اتكبروا.
"وَآكُلُهُمْ هُنَاكَ كَلَبْوَةٍ." ... اللبوة: هي أنثي الأسد.
"يُمَزِّقُهُمْ وَحْشُ الْبَرِّيَّةِ." ... اللي هي الحيوانات المفترسة. فهنا توبيخ وانذار شديد اللهجة، لعلهم يتوبوا.
9«هَلاَكُكَ يَا إِسْرَائِيلُ أَنَّكَ عَلَيَّ، عَلَى عَوْنِكَ. هلاكك: يعني سبب دمارك وهلاكك.
" أَنَّكَ عَلَيَّ،" ... يعني اتحديت مشيئة ربنا في حياتك. قاومت ربنا.
"عَلَى عَوْنِكَ."... يعني يا اسرائيل أنت هاجمت ربنا، اللي بيساعدك ويُعينك. وانك انقلبت علي من يُعينك ويحميك.
يعني: هلاكك يا اسرائيل إنك واقف ضدي (ضد ربنا)، انقلبت عليا. ده أنا عَونك ومُعينك. ده أنا العون والمساعدة والحماية ليكم. ليه تروح وتلجأوا لآشور ومصر.
10فَأَيْنَ هُوَ مَلِكُكَ حَتَّى يُخَلِّصَكَ فِي جَمِيعِ مُدُنِكَ؟ وَقُضَاتُكَ حَيْثُ قُلْتَ: أَعْطِنِي مَلِكًا وَرُؤَسَاءَ؟ الملك: هو اشارة لملوك اسرائيل. المملكة الشمالية.
ده سؤال بيدل علي انكار قوة هؤلاء الملوك. ومش هيقدروا يخلصوهم. لا من آشور ولا من تأديبات ربنا ليهم.
"وَقُضَاتُكَ حَيْثُ قُلْتَ: أَعْطِنِي مَلِكًا وَرُؤَسَاءَ؟" ... فين ملوكك وقُضاتك اللي أنت طلبتهم يا اسرائيل؟ فهنا ربنا بيذكرهم : انهم طلبوا من صموئيل النبي اقامة ملك عليهم، زي باقي الشعوب اللي حواليهم. ورفضوا مُلك ربنا عليهم.
فكأن ربنا بيقولهم: فاكرين لما رفضتوني كملك عليكم؟ طيب هيعملولكم ايه الملوك اللي أنتم طلبتوهم؟ ده الملوك اللي أنتم طلبتوهم انحرفوا بيكم بعيد عني. بعدوا وخلوكم تبعدوا عني.
11أَنَا أَعْطَيْتُكَ مَلِكًا بِغَضَبِي وَأَخَذْتُهُ بِسَخَطِي. ربنا كان رافض طلبهم، أن يكون ليهم ملك. لأن ربنا حابب أنه يكون الملك عليهم.
"وَأَخَذْتُهُ بِسَخَطِي." ... سخطي: يعني غضبي. يعني: سحبت منكم المُلك، عن طريق السبي. لأن السبي هو اللي دمر النظام الملكي في اسرائيل، علي مستوي السبي الشمالي أو السبي الجنوبي. ومبقاش ليهم ملوك بعد عودتهم من السبي.
بمعني: أن ربنا أعطاهم شهوتهم للمُلك. ولما فشلوا، ربنا رفضهم هما كشعب. وكمان الملك بتاعهم.
وده يبين أن الانسان لما يحب ينفصل عن ربنا، وربنا يسيبه لحرية رأيه، هيلاقي نفسه في الأخر أنه فشل. وبقي مرفوض من ربنا. لو مقدمش توبة حقيقية.
12«إِثْمُ أَفْرَايِمَ مَصْرُورٌ. خَطِيَّتُهُ مَكْنُوزَةٌ. إثم: يعني خطية.
" مَصْرُورٌ." ... يعني محفوظ في صُرة.
"خَطِيَّتُهُ مَكْنُوزَةٌ." ... يعني مُخبئة مثل الكنز. اشارة أن ربنا جمع خطاياهم، علشان يعاقبهم عليها.
الخطايا بتاعهم مُصرورة ومُخبئة. بيحاولوا يخبوها. لأحسن تظهر قدام ربنا. لكن ربنا بيُظهرها. وبيعاقبهم علي خطاياهم.
13مَخَاضُ الْوَالِدَةِ يَأْتِي عَلَيْهِ. هُوَ ابْنٌ غَيْرُ حَكِيمٍ، إِذْ لَمْ يَقِفْ فِي الْوَقْتِ فِي مَوْلِدِ الْبَنِينَ. ربنا هنا بيقدم تشبيه تاني.
" مَخَاضُ" ... يعني آلام الولادة. وتُشير لأحكام ربنا وتأديباته. وبمعني: أن الألم ده جه عليهم بسبب خطاياهم.
"مَخَاضُ الْوَالِدَةِ يَأْتِي عَلَيْهِ." ... الوالدة هنا: اشارة لأنهم حَبالي بالخطية. بدل ما يكونوا حَبالي بثمار روحية.
فالمعني: تنقلب عليهم آلام خطاياهم.
"هُوَ ابْنٌ غَيْرُ حَكِيمٍ،" ... جاهل. فاقد الحكمة الالهية. وفقد فِهم ارادة ربنا في حياته.
"إِذْ لَمْ يَقِفْ فِي الْوَقْتِ فِي مَوْلِدِ الْبَنِينَ." ... هنا بيشبه شعب اسرائيل، بأنه جنين بيرفض أنه يقترب لرحم أمه، عند وقت الولادة.
بمعني: أنه مش فاهم. لأن ربنا المفروض بحكمته، قد أعطي الجنين فِهم، أنه يقترب من الرحِم عند وقت الولادة. ولما ميقتربش للرحِم، فهم بيعرض حياته وحياة أمه للخطر والموت.
فهنا هما بيعرّضوا حياتهم وحياة أمتهم اسرائيل (أُمة اسرائيل) للخطر. ويبقوا زي الوالدة اللي جاي عليها المُخاض بدون إنجاب.
وفي وسط الجو ده، اللي بيسوده التأديب. وانذار شديد اللهجة. تيجي آية مُطمئنة وتحمل نبوات جميلة عن المستقبل. آية 14.
14«مِنْ يَدِ الْهَاوِيَةِ أَفْدِيهِمْ. مِنَ الْمَوْتِ أُخَلِّصُهُمْ. أَيْنَ أَوْبَاؤُكَ يَا مَوْتُ؟ أَيْنَ شَوْكَتُكِ يَا هَاوِيَةُ؟ تَخْتَفِي النَّدَامَةُ عَنْ عَيْنَيَّ». الهاوية: هنا كلمة عبرية معناها: القبر أو الجحيم أو الموت أو مكان الأرواح الشريرة بعد الموت. بتُشير كمان: للانحدار والسقوط.
"مِنَ الْمَوْتِ أُخَلِّصُهُمْ." ... هنا مش هيخلصهم بس من السبي. لكن كمان من الموت نفسه. وهنا اشارة لخلاص ربنا يسوع المسيح له المجد.
"أَيْنَ أَوْبَاؤُكَ يَا مَوْتُ؟" ... أَوْبَاؤُكَ: مفردها وباء. يعني: ألمرض الخطير السريع الانتشار. أمراض وأوبئة تُبيد أعداد ضخمة من البشر. زي ما حصل في كرونا. معناها: أن الموت انتشر مثل الوباء.
"أَيْنَ شَوْكَتُكِ يَا هَاوِيَةُ؟" ... الأمر ده اتحقق، بدخول المخلص إلى الموت ليحطم سلطانه. اتحطم سلطاه الموت، بعد الصليب. في يوم الصليب، ربنا يشمت في الموت.
" شَوْكَتُكِ" ... بمعني: هلاك. ولعلها حاجة زي الشوكة العقرب. وبالصليب فقد السم بتاعه.
صحيح لسه في موت. لكنه مجرد عبور من الحياة الأرضية للحياة الأبدية، السمائية. معدش الموت بمعناه القديم قبل الصليب. ربنا بينطق الكلمات ديه: في يوم الصليب. ويوم القيامة.
من الآية ديه: القديس بولس الرسول اقتبس الأية لأهل كورنثوس الأولي 15، لما كان بيتكلم عن القيامة وانتصار المسيح له المجد علي الموت.
"تَخْتَفِي النَّدَامَةُ عَنْ عَيْنَيَّ." ... عَيْنَيَّ: بمعني محبتي واحساني ليكم. الندامة: بمعني الحزن والأسف. هنا المعني: بعد موت المسيح يسوع له المجد علي الصليب، وقيامته وانتصاره علي الموت.
"تَخْتَفِي النَّدَامَةُ عَنْ عَيْنَيَّ." ... يعني: خلاص كل حُزني وأسفي عليكم هينتهي.
15وَإِنْ كَانَ مُثْمِرًا بَيْنَ إِخْوَةٍ، تَأْتِي رِيحٌ شَرْقِيَّةٌ، رِيحُ الرَّبِّ طَالِعَةً مِنَ الْقَفْرِ فَتَجِفُّ عَيْنُهُ وَيَيْبَسُ يَنْبُوعُهُ. هِيَ تَنْهَبُ كَنْزَ كُلِّ مَتَاعٍ شَهِيٍّ. بيرجع تاني لنغمة الانذار.
"وَإِنْ كَانَ مُثْمِرًا بَيْنَ إِخْوَةٍ، تَأْتِي رِيحٌ شَرْقِيَّةٌ،" ... مُثْمِرًا: اشارة لافرايم. لأن كلمة افرايم معناها: مُثمر.
الريح الشرقية كانت موجودة في الإصحاح 1. وقولنا: أنها ريح جافة ومُدمرة. وهنا اشارة للسبي الآشوري. اللي جه من جهة الشرق.
وزي تأثير الريح، هيجي السبي يشيل كل حاجة قدامه.
"رِيحُ الرَّبِّ طَالِعَةً مِنَ الْقَفْر" ... الْقَفْر: هنا هو الصحراء الواقفة بين آشور واسرائيل.
طيب ليه اتقال ريح الرب؟ لأنها كانت بتوجيه من ربنا. بسماح من ربنا، علشان يأدبهم.
" فَتَجِفُّ عَيْنُهُ وَيَيْبَسُ يَنْبُوعُهُ." ... العين: هو عين المية. الينبوع: هي منابع المياة.
فاذا كانت الريح الشرقية بتُجفف المياه من شدتها. وخصوصا انها كانت ريح حارة (حر). فهيجي جيش آشور، ويجفف كل مصادر الخيرات اللي في حياتهم.
"هِيَ تَنْهَبُ كَنْزَ كُلِّ مَتَاعٍ شَهِيٍّ." ... بمعني أنها هتأخد كل الكنوز بتاعتهم. شَهِيٍّ بمعني: ثمين. مَتَاعٍ بمعني: أثاث. فكل أثاث ثمين اكتنزوه وكل بيمثل ثروتهم، هتيجي آشور و تنهب كل حاجة.
16تُجَازَى السَّامِرَةُ لأَنَّهَا قَدْ تَمَرَّدَتْ عَلَى إِلهِهَا. بِالسَّيْفِ يَسْقُطُونَ. تُحَطَّمُ أَطْفَالُهُمْ، وَالْحَوَامِلُ تُشَقُّ. " السَّامِرَةُ" ... عاصمة المملكة الشمالية. وتستخدم كإشارة عن المملكة الشمالية كلها.
"تُجَازَى السَّامِرَةُ لأَنَّهَا قَدْ تَمَرَّدَتْ عَلَى إِلهِهَا." ... اتمردوا علي ربنا.
"بِالسَّيْفِ يَسْقُطُونَ. تُحَطَّمُ أَطْفَالُهُمْ، وَالْحَوَامِلُ تُشَقُّ." ... تُحَطَّمُ يعني: تُقتل أطفالهم.
" وَالْحَوَامِلُ تُشَقُّ." ... وديه كناية عن قسوة معاملة الأعداء لهم. (كان من ضمن معاهدات الحروب، انهم يحافظوا علي النساء والأطفال. ويأخذهم كعبيد. ويكتفوا بقتل الرجال)
لكن هنا بيبين مدي قسوة معاملة جيش آشور ليهم. فكانوا بيشوا بطون الحوامل. تصرف في منتهي الوحشية.
ربنا في هذا الاصحاح:
مازال يفتقدهم. ويوجههم للتوبة. ويُنذرهم.
ويجي في الآية 14 ... ربنا بيدي نبوة جميلة عن انتصاره علي الموت، بالصليب والقيامة.
وربنا كان بيرفع عيونهم، أن خلاصهم مش بس من السبي. ولكن كمان من الموت والهلاك الأبدي اللي كان بيهدد الجنس البشري كله.
⪢