⪡ 1اِضْرِبُوا بِالْبُوقِ فِي صِهْيَوْنَ. صَوِّتُوا فِي جَبَلِ قُدْسِي! لِيَرْتَعِدْ جَمِيعُ سُكَّانِ الأَرْضِ لأَنَّ يَوْمَ الرَّبِّ قَادِمٌ، لأَنَّهُ قَرِيبٌ: الاصحاح التاني أطول اصحاحات السفر. وبيكمل فيه يوئيل النبي حديثه عن ضربة الجراد.
الآيات من 1 لـ 11 ... بيكمل كلامه عن ضربة الجراد وتأثيرها. وبينقل الحديث ضمنيا، الي غزو جيش الأعداء. وبيتكلم باستفاضة عن قوة الجيش وشجاعة جنوده.
وبيحصل نوع من التداخل: بين وصف الجراد. وبين جيش الأعداء.
وكأنه بيقول: أن ضربة الجراد، ضربة مُمهدة لجيش الأعداء القادم. وده في حالة أنهم لو متابوش، جيش الأعداء هيجي.
بمعني: هتيجي ضربة الجراد وأثارها المُدمرة، زي ماشوفنا في الاصحاح الأول. ولو ربنا ملقاش منهم تقديم التوبة. هيجي بعدها جيش الأعداء ويدمر كل حاجة. وهتتحول الأرض بالفعل لخراب. وترتعد النفوس.
" اِضْرِبُوا بِالْبُوقِ" ... البوق: لانذار الناس أن في حرب جاية عليهم.
" فِي صِهْيَوْنَ." ... استُخدمت كتير في العهد القديم. كان ممكن تُطلق علي الهيكل. أو علي مدينة أورشليم. أو علي الأمة اليهودية كلها.
"اِضْرِبُوا بِالْبُوقِ فِي صِهْيَوْنَ." ... يعني: ارسلوا صوت تنبيه، أن في حرب جاية.
"صَوِّتُوا فِي جَبَلِ قُدْسِي!" ... جبل قدسي: جبلي المقدس. والمقصود بيه: جبل صهيون. أحد جبال مدينة أورشليم. والجبل ده اللي اتبنيت عليه هذة المدينة المقدسة.
"لِيَرْتَعِدْ جَمِيعُ سُكَّانِ الأَرْضِ" ... علشان لازم يخافوا.
"لأَنَّ يَوْمَ الرَّبِّ قَادِمٌ، لأَنَّهُ قَرِيبٌ." ... يوم الرب: هنا هو يوم التأديب الالهي. يوم جاي. لا مفر منه. وهو قريب. في حالة أن الشعب مقدمش توبة.
2يَوْمُ ظَلاَمٍ وَقَتَامٍ، يَوْمُ غَيْمٍ وَضَبَابٍ، مِثْلَ الْفَجْرِ مُمْتَدًّا عَلَى الْجِبَالِ. شَعْبٌ كَثِيرٌ وَقَوِيٌّ لَمْ يَكُنْ نَظِيرُهُ مُنْذُ الأَزَلِ، وَلاَ يَكُونُ أَيْضًا بَعْدَهُ إِلَى سِنِي دَوْرٍ فَدَوْرٍ. هيبتدي يوصف في اليوم ده:
"يَوْمُ ظَلاَمٍ وَقَتَامٍ، يَوْمُ غَيْمٍ وَضَبَابٍ،"... هنا بيوضح أنه يوم مليان بظلمة التأديب، وظلمة الانفصال عن ربنا.
"قَتَامٍ" ... يعني: ظلمة شديدة تُصيبهم.
" غَيْمٍ وَضَبَابٍ،" ... بيدي روح كئيبة لليوم. بعكس اليوم اللي فيه شمس.
"مِثْلَ الْفَجْرِ مُمْتَدًّا عَلَى الْجِبَالِ." ... زي ما الفجر بيبدأ يبان علي الجبال، برده الجيش ده هيظهر علي رؤوس الجبال. وجاي بأعداد رهيبة.
"شَعْبٌ كَثِيرٌ وَقَوِيٌّ لَمْ يَكُنْ نَظِيرُهُ مُنْذُ الأَزَلِ،" ... هنا بيقدم وصف لجيش الجراد. وفي نفس الوقت هو وصف لجيش الأعداء. جيش بابل اللي جاي عليهم.
" لَمْ يَكُنْ نَظِيرُهُ مُنْذُ الأَزَلِ،" ... نظيره يعني : مثله. منذ بداية تاريخ البشرية.
"وَلاَ يَكُونُ أَيْضًا بَعْدَهُ إِلَى سِنِي دَوْرٍ فَدَوْرٍ." ... يعني مش هيحصل حاجة زيه بعد كده.
3قُدَّامَهُ نَارٌ تَأْكُلُ، وَخَلْفَهُ لَهِيبٌ يَحْرِقُ. الأَرْضُ قُدَّامَهُ كَجَنَّةِ عَدْنٍ وَخَلْفَهُ قَفْرٌ خَرِبٌ، وَلاَ تَكُونُ مِنْهُ نَجَاةٌ. بيوضح تأثير الجيش ده. أن زي ماتكون نار بتأكل كل حاجة قدامها. هتأكل المحصولات والمباني والناس. كل حاجة.
"الأَرْضُ قُدَّامَهُ كَجَنَّةِ عَدْنٍ" ... يعني قبل دخوله للأرض. الأرض كانت خصبة وخضراء وجميلة كجنة عدن.
"وَخَلْفَهُ قَفْرٌ خَرِبٌ،" ... هتسيب وراءه صحراء. مفيهاش أي حاجة. وده حصل في تأثير ضربة الجراد عليهم. وكمان في تأثير جيش بابل لما جه عليهم.
"وَلاَ تَكُونُ مِنْهُ نَجَاةٌ." ... لا مفر من التأديب الالهي.
4كَمَنْظَرِ الْخَيْلِ مَنْظَرُهُ، وَمِثْلَ الأَفْرَاسِ يَرْكُضُونَ. هنا بيربط ما بين شكل الخيل اللي بيركبها جيش الأعداء. وما بين الجراد. لأن بيقولوا: أن رأس الجرادة تُشبه لحد كبير شكل رأس الخيل.
والتشبيه ده استخدمه القديس يوحنا الحبيب في سفر الرؤيا.
"وَمِثْلَ الأَفْرَاسِ يَرْكُضُونَ." ... الأَفْرَاسِ: جمع فرس. اللي هو الخيل. ويركضون: يعني بيجروا بسرعة جدا.
5كَصَرِيفِ الْمَرْكَبَاتِ عَلَى رُؤُوسِ الْجِبَالِ يَثِبُونَ. كَزَفِيرِ لَهِيبِ نَارٍ تَأْكُلُ قَشًّا. كَقَوْمٍ أَقْوِيَاءَ مُصْطَفِّينَ لِلْقِتَالِ. هيبتدي يوصف جيش الأعداء، وهيبقي عامل ازاي.
"كَصَرِيفِ الْمَرْكَبَاتِ"... صريف المركبات: ده الصوت اللي بتعمله المركبات الحربية بتاعة الأعداء.
"عَلَى رُؤُوسِ الْجِبَالِ" ... كانت الجبال، بتبقي مُعوق قدام الجيوش اللي جاية بتهجم علي البلاد. لكن هنا:
"يَثِبُونَ." ... يعني: يقفزون. يعني هتبقي حركات المركبات سريعة، والجبال مش هتبقي سبب اعاقة ليهم في الحركة.
"كَزَفِيرِ لَهِيبِ نَارٍ تَأْكُلُ قَشًّا." ... الزفير: هو صوت اشتعال النار في الأشياء.
فبيقول: زي مالنار بيبقي ليها زفير، وهي بتأكل القش. ده نفس الموضوع قدام جيش الأعداء وهو بيحصد قدامه كل حاجة. بيخرّب كل حاجة قدامه.
"كَقَوْمٍ أَقْوِيَاءَ مُصْطَفِّينَ لِلْقِتَالِ." ... مُصْطَفِّينَ: يعني يكونوا واقفين صفوف. ومستعدين للقتال.
6مِنْهُ تَرْتَعِدُ الشُّعُوبِ. كُلُّ الْوُجُوهِ تَجْمَعُ حُمْرَةً. "مِنْهُ تَرْتَعِدُ الشُّعُوبِ."... بيخافوا منه.
"كُلُّ الْوُجُوهِ تَجْمَعُ حُمْرَةً ... المقصود الخوف الشديد، لدرجة أن الوجوه بقت شاحبة وفيها اصفرار، من كتر الخوف.
7يَجْرُونَ كَأَبْطَال. يَصْعَدُونَ السُّورَ كَرِجَالِ الْحَرْبِ، وَيَمْشُونَ كُلُّ وَاحِدٍ فِي طَرِيقِهِ، وَلاَ يُغَيِّرُونَ سُبُلَهُمْ. مفيش حاجة بتقف قدامهم.
"وَيَمْشُونَ كُلُّ وَاحِدٍ فِي طَرِيقِهِ،" ... اشارة للتنظيم الشديد لجيش الأعداء.
"وَلاَ يُغَيِّرُونَ سُبُلَهُمْ." ... مش بينحرفوا عن طريقهم. السبيل: هو الطريق.
8وَلاَ يُزَاحِمُ بَعْضُهُمْ بَعْضًا. يَمْشُونَ كُلُّ وَاحِدٍ فِي سَبِيلِهِ، وَبَيْنَ الأَسْلِحَةِ يَقَعُونَ وَلاَ يَنْكَسِرُونَ. هنا بيوضح أن الجيش ده، جيش منظم. والكلام ده بينطبق علي الجراد، وكمان علي جيش الأعداء اللي هو جيش بابل.
مكانوش بيخبطوا في بعض. وكل واحد عارف هيعمل ايه بالظبط. وعارفين المهمة المطلوبة من كل واحد فيهم.
"وَبَيْنَ الأَسْلِحَةِ يَقَعُونَ وَلاَ يَنْكَسِرُونَ." ... يعني مش بينهزموا.
9يَتَرَاكَضُونَ فِي الْمَدِينَةِ. يَجْرُونَ عَلَى السُّورِ. يَصْعَدُونَ إِلَى الْبُيُوتِ. يَدْخُلُونَ مِنَ الْكُوَى كَاللِّصِّ. هنا بيوضح تأثيرهم:
"يَتَرَاكَضُونَ فِي الْمَدِينَةِ."... بيجروا بسرعة شديدة جدا في المدينة.
"يَجْرُونَ عَلَى السُّورِ." ... هيقدروا يعبروا أسوار أورشليم، و أسوار المدن. يعني مش هيبقي في أي حواجز قدامهم، تمنعهم عن اقتحام أورشليم.
"يَصْعَدُونَ إِلَى الْبُيُوتِ." ... هيدخلوا بيوت اسرائيل.
"يَدْخُلُونَ مِنَ الْكُوَى كَاللِّصِّ." ... الْكُوَى: مفردها كوة. يعني الشُباك. نافذة البيت.
هيكون كاللص، لأنه داخل من الشُباك.
10قُدَّامَهُ تَرْتَعِدُ الأَرْضُ وَتَرْجُفُ السَّمَاءُ. اَلشَّمْسُ وَالْقَمَرُ يُظْلِمَانِ، وَالنُّجُومُ تَحْجُزُ لَمَعَانَهَا. يعني: التأثير واضح أوي، اللي هيعمله جيش الجراد. ومن بعده جيش الأعداء. وأن مفيش أي حاجة هتمنعهم عن تحقيق أهدافهم، من الاستيلاء علي الأرض وتدمير كل حاجة.
" اَلشَّمْسُ وَالْقَمَرُ يُظْلِمَانِ، وَالنُّجُومُ تَحْجُزُ لَمَعَانَهَا." ... هنا بيدي صورة من عناصر الطبيعة المحيطة بيهم. و أن ازاي هيحصل تأثير بما يُحيط بيهم.
الآية تُشير أكتر للمجئ التاني لربنا يسوع المسيح له المجد علي السحاب. والتغييرات اللي هتحصل في الطبيعة المحيطة بينا.
لكن هنا بيقدمها بصورة شِعرية. أن تأثير الجيش ده هيكون شامل لكل حاجة.
11وَالرَّبُّ يُعْطِي صَوْتَهُ أَمَامَ جَيْشِهِ. إِنَّ عَسْكَرَهُ كَثِيرٌ جِدًّا. فَإِنَّ صَانِعَ قَوْلِهِ قَوِيٌّ، لأَنَّ يَوْمَ الرَّبِّ عَظِيمٌ وَمَخُوفٌ جِدًّا، فَمَنْ يُطِيقُهُ؟ هنا بيوضح أن ربنا هو اللي بيحرك جيش الأعداء. سواء كان جيش الجراد، أو الأعداء.
"إِنَّ عَسْكَرَهُ كَثِيرٌ جِدًّا." ... لأن أسراب الجراد ملهوش عدد. أعداده رهيبة جدا. وكمان جيش الأعداء أعداده رهيبة.
"فَإِنَّ صَانِعَ قَوْلِهِ قَوِيٌّ،" ... يعني هينفذوا أوامر ربنا وكل كلامه.
"لأَنَّ يَوْمَ الرَّبِّ عَظِيمٌ وَمَخُوفٌ جِدًّا، فَمَنْ يُطِيقُهُ؟" ... يعني: مين اللي هيقدر يتحمل يوم ربنا. ومين اللي هيقدر يقف قدام ما سيحدث؟
هنلاقي الأيات اللي بدأ بيها الاصحاح، كانت عبارة عن تحذيرات شديدة اللهجة عن التأديب الالهي، اللي جاي عليهم. وجيش بابل هيشيل ويكتسح أي حاجة قدامه.
ومازال يوئيل النبي عنده أمل في علاج الشعب. فبعد ما بيدي انذار بالتأديب. هيوصف ليهم العلاج. زي بعد ما الدكتور يشخّص المرض، يكتب العلاج.
فهيجي في الآيات من 12 لـ 17: هيتكلم عن دعوة أخري للتوبة. هو قدم دعوة في الاصحاح الأول.
12 وَلكِنِ الآنَ، يَقُولُ الرَّبُّ، ارْجِعُوا إِلَيَّ بِكُلِّ قُلُوبِكُمْ، وَبِالصَّوْمِ وَالْبُكَاءِ وَالنَّوْحِ.
12« وَلكِنِ الآنَ، يَقُولُ الرَّبُّ، ارْجِعُوا إِلَيَّ بِكُلِّ قُلُوبِكُمْ، وَبِالصَّوْمِ وَالْبُكَاءِ وَالنَّوْحِ. لازم تبقي في وقفة. بعد ما كان في انذارات الهية.
"يَقُولُ الرَّبُّ، ارْجِعُوا إِلَيَّ بِكُلِّ قُلُوبِكُمْ،" ... لازم التوبة تكون من القلب. مش مجرد بس الامتناع الخارجي عن الخطية، وتكون لسه الخطية محبتها، موجودة في القلب.
"وَبِالصَّوْمِ وَالْبُكَاءِ وَالنَّوْحِ." ...في الاصحاح الأول: قدم الاعتكاف. هنا بيقدم الصوم والبكاء والنوح. البكاء والنوح، لازم يكونوا ملازمين للصوم.
أن الانسان يسكب دموعه من أجل خطيته اللي عملها. والندم والتذلل قدام ربنا.
13وَمَزِّقُوا قُلُوبَكُمْ لاَ ثِيَابَكُمْ». وَارْجِعُوا إِلَى الرَّبِّ إِلهِكُمْ لأَنَّهُ رَؤُوفٌ رَحِيمٌ، بَطِيءُ الْغَضَبِ وَكَثِيرُ الرَّأْفَةِ وَيَنْدَمُ عَلَى الشَّرِّ. كان تمزيق الثياب: علامة علي الحزن الشديد في العهد القديم. لكن هنا ربنا مش عاوز تمزيق الثياب. يعني: ربنا مش عاوز العلامات الظاهرية أو المظهرية الخارجية. لكن تمزيق القلب من جوة. التذلل قدام ربنا. الصراع مع ربنا في الصلاة، من أجل التوبة. والامتناع عن الخطية.
فرصة الصوم رائعة. اننا نقدم فيها توبة. مع الصوم بيكون البكاء والتذلل.
"وَارْجِعُوا إِلَى الرَّبِّ إِلهِكُمْ " ...دعوة للرجوع لربنا. ومش مجرد رجوع ظاهري. لكن رجوع من القلب بجد.
طيب ايه اللي يخليني أرجع لربنا؟
"لأَنَّهُ رَؤُوفٌ رَحِيمٌ، بَطِيءُ الْغَضَبِ وَكَثِيرُ الرَّأْفَةِ وَيَنْدَمُ عَلَى الشَّرِّ." ... الصفات ديه، تحزفنا علي التوبة. وأكيد ربنا هيبقبل التوبة اللي من القلب بجد. لأن الشيطان لما يلاقي الواحد ابتدي يقرب من ربنا وابتدي يتوب. ممكن الشيطان يدخّل اليأس جوة الانسان. ويقوله: ربنا مش هيقبلك. ازاي هيقبلك بعد كل اللي عملته ده؟
لكن صفات ربنا الجميلة، تحفزنا علي التوبة. وتشجعنا علي الرجوع لربنا.
14لَعَلَّهُ يَرْجعُ وَيَنْدَمُ، فَيُبْقِيَ وَرَاءَهُ بَرَكَةَ، تَقْدِمَةٍ وَسَكِيبًا لِلرَّبِّ إِلهِكُمْ. احنا بنتوب علشان نحنن قلب ربنا علينا.
"فَيُبْقِيَ وَرَاءَهُ بَرَكَةَ،" ... بعد التلف والخساير الكتيرة اللي مروا بيها.
"تَقْدِمَةٍ وَسَكِيبًا لِلرَّبِّ إِلهِكُمْ." ... التقدمة والسكيب: اللي وقفوا فترة، وامتنعوا عن تقديمهم كذبيحة لربنا، بسبب كل الدمار اللي كانوا فيه. سواء من ضربة ا لجراد. أو بسبب السبي.
15اِضْرِبُوا بِالْبُوقِ فِي صِهْيَوْنَ. قَدِّسُوا صَوْمًا. نَادُوا بِاعْتِكَافٍ. بيكمل دعوته:
"اِضْرِبُوا بِالْبُوقِ فِي صِهْيَوْنَ."... دعوة للتوبة.
لكن في الآية 1 ... كان بيقول: اضربوا بالبوق علشان في حرب. التوبة هي تنبيه لكل النفوس.
"قَدِّسُوا صَوْمًا. نَادُوا بِاعْتِكَافٍ." ... بيكرر نفس الآية اللي اتذكرت في الاصحاح الأول.
16اِجْمَعُوا الشَّعْبَ. قَدِّسُوا الْجَمَاعَةَ. احْشُدُوا الشُّيُوخَ. اجْمَعُوا الأَطْفَالَ وَرَاضِعِي الثُّدِيِّ. لِيَخْرُجِ الْعَرِيسُ مِنْ مِخْدَعِهِ وَالْعَرُوسُ مِنْ حَجَلَتِهَا. ربنا بيطلب منهم التوبة الجماعية. من كل فئات الشعب. وانهم يتقدسوا.
"احْشُدُوا الشُّيُوخَ." ... احشدوا: يعني جمعّوا الشيوخ. أنهم يتجمعوا.
"اجْمَعُوا الأَطْفَالَ وَرَاضِعِي الثُّدِيِّ." ... حتي الأطفال والرُضع.
"لِيَخْرُجِ الْعَرِيسُ مِنْ مِخْدَعِهِ" ... المخدع: يعني الحجرة الخاصة بيه.
"وَالْعَرُوسُ مِنْ حَجَلَتِهَا." ... الحجلة: غرفة العروس الخاصة. وكانت عبارة عن بيت زي القبة. بيُزين بالثياب والستاير.
فهنا اشارة أن لابد أن تكون التوبة جماعية. فتكون التوبة علي المستوي الشخصي. وكمان علي مستوي الشعب كله.
العبادة الجماعية والتوبة الجماعية، مطلوبة.
فابتدي بالشعب كله كاجمال. وبعدين بيدي التفاصيل: الشيوخ – الأطفال - الرضعان - العريس والعروس. ... ويخرجوا من انشغالهم بزواجهم. يعني حتي العلاقة ديه، تتوقف الآن من أجل التوبة.
الكل مدعو للتوبة، صغير وكبير. وده اللي حصل في مدينة نينوي. والملك أمر أن الكل يصوم، حتي الأطفال.
17لِيَبْكِ الْكَهَنَةُ خُدَّامُ الرَّبِّ بَيْنَ الرِّواقِ وَالْمَذْبَحِ، وَيَقُولُوا: «اشْفِقْ يَا رَبُّ عَلَى شَعْبِكَ، وَلاَ تُسَلِّمْ مِيرَاثَكَ لِلْعَارِ حَتَّى تَجْعَلَهُمُ الأُمَمُ مَثَلاً. لِمَاذَا يَقُولُونَ بَيْنَ الشُّعُوبِ: أَيْنَ إِلهُهُمْ؟». وده دور الكهنة. انهم يشجعوا الناس ويقودوهم للتوبة.
" وَالْمَذْبَحِ،" ... المقصود هنا: هو مذبح المحرقة.
" الرِّواقِ" ... عبارة عن جزء مسقوف. يعني ليه سقف مُقام عليه مجموعة من الأعمدة.
والرواق: ده ما بين القدس و بين مذبح المحرقة في الخارج.
" اشْفِقْ يَا رَبُّ عَلَى شَعْبِكَ، وَلاَ تُسَلِّمْ مِيرَاثَكَ لِلْعَارِ حَتَّى تَجْعَلَهُمُ الأُمَمُ مَثَلًا." ... ميراثك: كناية عن شعبك.
" مَثَلًا." ... هنا بمعني: مثل أو هُزء أو شماتة. يعني الأمم تبقي شمتانة في شعب اسرائيل. نتيجة تسلطهم علي شعب اسرائيل.
"لِمَاذَا يَقُولُونَ بَيْنَ الشُّعُوبِ: أَيْنَ إِلهُهُمْ؟" ... ده سؤال من الأمم، بيُفيد: أن ربنا غير قادر علي حمايتهم. وانه اتخلي علي شعبه. فالسؤال هنا اشارة للشماتة فيهم.
فبيقولوا لربنا: يارب أشفق علي شعبك. ومتسلمناش للعار والخزس. فنصير ضحكة بين الشعوب. طيب ليه يشمتوا فينا، ويقولوا: أين إلههم؟
اذاً الآيات من 12 لـ 17: هي دعوة جديدة للتوبة علي لسان يوئيل النبي. ودعوة لتمزيق القلب والتوبة الحقيقية وصادقة. نابعة من داخل الانسان بحزن وندم حقيقي.
ويكون الحافز: هو صفات ربنا المشجعة لينا، أنه: رؤوف ورحيم. فتكون من وراء التوبة الحقيقية اللي من القلب، بركة حلوة من ايد ربنا.
الآيات من 18 لـ 27: تُعبر عن استجابة ربنا لتوبة شعبه.
بيُفترض وجود فترة زمنية بين الآيات 17 و 18. وأن الشعب بيقدم توبة في الفترة الزمنية ديه. وهنشوف ايه رد فعل ربنا.
18فَيَغَارُ الرَّبُّ لأَرْضِهِ وَيَرِقُّ لِشَعْبِهِ. يَغَارُ: غيرة ربنا علي خلاص شعبه.
"وَيَرِقُّ لِشَعْبِهِ." ... يَرِقُّ: يتحنن ويشفق عليهم.
19وَيُجِيبُ الرَّبُّ وَيَقُولُ لِشَعْبِهِ: «هأَنَذَا مُرْسِلٌ لَكُمْ قَمْحًا وَمِسْطَارًا وَزَيْتًا لِتَشْبَعُوا مِنْهَا، وَلاَ أَجْعَلُكُمْ أَيْضًا عَارًا بَيْنَ الأُمَمِ. يعني: ربنا بيتجاوب مع التوبة. محدش يفتكر أنه هيقدم توبة وتذلل وصراخ. وربنا هيقف يتفرج. ربنا هيفرح ويتجاوب مع توبتنا.
"هأَنَذَا مُرْسِلٌ لَكُمْ قَمْحًا وَمِسْطَارًا وَزَيْتًا" ... البركات الزمنية اللي انتُزعت منك عن طريق التأديب، هترجع من تاني.
"لِتَشْبَعُوا مِنْهَا،" ... كمان هيبقي في حالة من الشِبع. علي مستوي جسدي وروحي.
"وَلاَ أَجْعَلُكُمْ أَيْضًا عَارًا بَيْنَ الأُمَمِ." ... أنا هأخليكم فخر بين الأمم.
20وَالشِّمَالِيُّ أُبْعِدُهُ عَنْكُمْ، وَأَطْرُدُهُ إِلَى أَرْضٍ نَاشِفَةٍ وَمُقْفِرَةٍ. مُقَدَّمَتُهُ إِلَى الْبَحْرِ الشَّرْقِيِّ، وَسَاقَتُهُ إِلَى الْبَحْرِ الْغَرْبِيِّ، فَيَصْعَدُ نَتَنُهُ، وَتَطْلُعُ زُهْمَتُهُ، لأَنَّهُ قَدْ تَصَلَّفَ فِي عَمَلِهِ». الشِّمَالِيُّ: اشارة لجيش جاي من جهة الشمال. ممكن يكون المقصود بيه: جيش آشور. أو جيش بابل. بس الأرجح أنه جيش بابل، لأنه جاي من الشمال، علي المملكة الجنوبية.
"وَأَطْرُدُهُ إِلَى أَرْضٍ نَاشِفَةٍ وَمُقْفِرَةٍ." ... يعني: أرض صحراوية خَربة.
"مُقَدَّمَتُهُ إِلَى الْبَحْرِ الشَّرْقِيِّ،" ... مقدمة الجيش. ودول أقوياء الجيش اللي بيبقوا في المقدمة.
والبحر الشرقي: هو البحر الميت. وبيقع في شرق أرض كنعان. علشان كده أُطلق عليه الاسم ده.
"وَسَاقَتُهُ إِلَى الْبَحْرِ الْغَرْبِيِّ،" ... سَاقَتُهُ: الساقة هو الجزء الخلفي للجيش. مؤخرة الجيش.
والبحر الغربي: هو البحر المتوسط. وبيقع غرب أرض كنعان.
"فَيَصْعَدُ نَتَنُهُ،" ... يعني: رائحته الكريهة.
"وَتَطْلُعُ زُهْمَتُهُ،" ... الزُهمة: يعني رائحة نتنة كريهة.
"لأَنَّهُ قَدْ تَصَلَّفَ فِي عَمَلِهِ." ... تَصَلَّفَ: يعني تعظم. الصَلف: هو الكبرياء والانتفاخ.
فهنا ربنا بيقول: أنه هيبعد عنهم جيش الأعداء، في حالة أنهم يقدموا توبتهم. بس هما أصلا مقدموش توبة صادقة. فجه جيش الأعداء ودمرهم وسباهم. اذاً البركات ديه كانت مشروطة، بالتوبة.
وبعد كده ربنا أدب جيش بابل، بواسطة مملكة فارس. لأنهم اتكبروا علي ربنا.
21لاَ تَخَافِي أَيَّتُهَا الأَرْضُ. ابْتَهِجِي وَافْرَحِي لأَنَّ الرَّبَّ يُعَظِّمُ عَمَلَهُ. متخافيش من حروب الخطية، اللي هتيجي عليكِ متخافش من الشيطان، لما تبقي ماشي في طريق التوبة.
"ابْتَهِجِي وَافْرَحِي" ... افرح بعمل ربنا في حياتك. وابتهج بثمار التوبة.
"لأَنَّ الرَّبَّ يُعَظِّمُ عَمَلَهُ." ... لسه ربنا هيعمل أعمال عظيمة معاك. مع الشخص التايب. واللي ماشي في طريق ربنا.
22لاَ تَخَافِي يَا بَهَائِمَ الصَّحْرَاءِ، فَإِنَّ مَرَاعِيَ الْبَرِّيَّةِ تَنْبُتُ، لأَنَّ الأَشْجَارَ تَحْمِلُ ثَمَرَهَا، التِّينَةُ وَالْكَرْمَةُ تُعْطِيَانِ قُوَّتَهُمَا. لما الانسان بيتوب، هتبقي بركة وثمار التوبة في كل حاجة حواليه.
"التِّينَةُ وَالْكَرْمَةُ تُعْطِيَانِ قُوَّتَهُمَا." ... اللي هي شجرة العنب.
" تُعْطِيَانِ قُوَّتَهُمَا" ... اشارة الي أن التوبة هتقدس طاقات الانسان. وتُثمر كتير. وده اشارة لثمار التوبة. زي ما قال القديس يوحنا المعمدان "اصنعوا أثمارا تليق بالتوبة."
23وَيَا بَنِي صِهْيَوْنَ، ابْتَهِجُوا وَافْرَحُوا بِالرَّبِّ إِلهِكُمْ، لأَنَّهُ يُعْطِيكُمُ الْمَطَرَ الْمُبَكِّرَ عَلَى حَقِّهِ، وَيُنْزِلُ عَلَيْكُمْ مَطَرًا مُبَكِّرًا وَمُتَأَخِّرًا فِي أَوَّلِ الْوَقْتِ، "وَيَا بَنِي صِهْيَوْنَ،"... اشارة الي الأمة اليهودية. (الاسرائيلية).
"ابْتَهِجُوا وَافْرَحُوا بِالرَّبِّ إِلهِكُمْ،" ... الانسان يفرح بربنا، مش بيفرح بالخطية.
"لأَنَّهُ يُعْطِيكُمُ الْمَطَرَ الْمُبَكِّرَ" ... هو المطر اللي بيجي في أول موسم الزراعة. في شهور أكتوبر ونوفمبر. وده بيساعد علي انبات البذور.
" عَلَى حَقِّهِ،" ... يعني: بحسب عدله وصلاحه.
عطية ربنا بحسب عدل وصلاح ربنا، واستقامته. مش بحسب استقامتنا احنا.
"وَيُنْزِلُ عَلَيْكُمْ مَطَرًا مُبَكِّرًا وَمُتَأَخِّرًا فِي أَوَّلِ الْوَقْتِ،" ... مُتَأَخِّرًا: المطر المتأخر، ده اللي بيجي في نهاية الموسم. في شهري مارس وأبريل. وبيساعد علي نضوج المحصول.
ولما ربنا بيبعت المطر المبكر والمتأخر، ده دليل علي بركته الكبيرة لشعب اسرائيل.
"لأَنَّهُ يُعْطِيكُمُ الْمَطَرَ الْمُبَكِّر عَلَى حَقِّهِ،" ... المطر المبكر: اشارة لافتقاد النعمة. في بداية حياة الانسان.
"وَيُنْزِلُ عَلَيْكُمْ مَطَرًا مُبَكِّرًا وَمُتَأَخِّرًا فِي أَوَّلِ الْوَقْتِ،" ... المطر المتأخر: لإدراك النعمة.
" فِي أَوَّلِ الْوَقْتِ،" ... معناها: زي ما كان بيحصل قبل كده. زي ما كانوا متعودين أنه يحصل ويجي عليهم المطر المُبكر والمتأخر.
24فَتُمْلأُ الْبَيَادِرُ حِنْطَةً، وَتَفِيضُ حِيَاضُ الْمَعَاصِرِ خَمْرًا وَزَيْتًا. البيادر: جمع بيدر. هو الجرن اللي كان بيجمعوا فيه الحبوب، لدراستها وتذريتها.
" حِنْطَةً،" ... هي سنابل القمح.
"وَتَفِيضُ حِيَاضُ الْمَعَاصِرِ خَمْرًا وَزَيْتًا." ... الْمَعَاصِر كان نوعين: معاصر كانت لكروم العنب وديه اللي بتُخرج خمر.
ومعاصر الزيتون وبتُخرج زيت الزيتون. المعصرة: كانت عبارة عن حوض حجري ضخم. بيوضع في العنب أو الزيتون. وبيعصروها.
العنب: كان ممكن يعصوره، بالدوس بالأقدام. الزيتون: كانوا بيعصروها، عن طريق الضغظ بأحجار تقيلة.
" حِيَاضُ" ... جمع كلمة حوض.
كان جنب حوض المعصرة، موجود أحواض لجمع العصير أو الزيت المستخرج. وده اشارة للبركات الزمنية لشعب اسرائيل. البركات أو الخيرات الزمنية في صورة: الأجران مليانة بالحبوب. وعندهم خمر وزيت.
علي مستوي العهد الجديد: البركات الروحية، هي اللي هتملي حياة الانسان. وده عن طريق التوبة.
25«وَأُعَوِّضُ لَكُمْ عَنِ السِّنِينَ الَّتِي أَكَلَهَا الْجَرَادُ، الْغَوْغَاءُ وَالطَّيَّارُ وَالْقَمَصُ، جَيْشِي الْعَظِيمُ الَّذِي أَرْسَلْتُهُ عَلَيْكُمْ. آية معزية جدا.
"وَأُعَوِّضُ لَكُمْ عَنِ السِّنِينَ الَّتِي أَكَلَهَا الْجَرَادُ،" ... ربنا هنا بيوعد، ويقول: هأعوضكم عن السنين اللي ضاعت منكم.
"الْغَوْغَاء" ... الطور التالت من نمو الجراد.
" وَالطَّيَّارُ" ... الطور الرابع.
"وَالْقَمَصُ،" ... الطور الأول لحشرة الجراد. (موجودين في الاصحاح الأول، مراحل نمو حشرة الجراد)
"جَيْشِي الْعَظِيمُ الَّذِي أَرْسَلْتُهُ عَلَيْكُمْ." ... المقصود بالجيش هنا: هو جيش الجراد. ربنا بيستخدم كل المخلوقات، لتأديبنا. وكمان الكوارث الطبيعية، علشان يقودنا بالتوبة.
"وَأُعَوِّضُ لَكُمْ عَنِ السِّنِينَ الَّتِي أَكَلَهَا الْجَرَادُ،" ... بالتوبة الواحد يقدر يرجع مرة تانية لقوته الروحية. والنعمة تشتغل فينا. في أيام التوبة، الانسان يقدر يجدد طاقته الروحية. وربنا يعوضنا علي كل اللي ضاع مننا.
محدش يقول لنفسه: أن الخطية ضعيت مني السنين. و أن مفيش وقت. لكن الواحد يقدر يتوب في أي وقت. طالما لسه عايش.
26فَتَأْكُلُونَ أَكْلاً وَتَشْبَعُونَ وَتُسَبِّحُونَ اسْمَ الرَّبِّ إِلهِكُمُ الَّذِي صَنَعَ مَعَكُمْ عَجَبًا، وَلاَ يَخْزَى شَعْبِي إِلَى الأَبَدِ. عَجَبًا: يعني ربنا صنع معاكم عجائب ومعجزات.
ربنا بيقولهم: لما تعيشوا معايا، وتتلامسوا معايا بالتوبة، هتسبحوا (تسبيح) اسم ربنا.
"وَلاَ يَخْزَى شَعْبِي إِلَى الأَبَدِ." ... ومش هيبقي في خزي تاني. وهتحسوا أن ربنا موجود في حياتكم.
الآيات من 18 لـ 27: آيات معزية ومُشجعة ومُحفزة علي التوبة. و أن من خلال التوبة، يجني الانسان ثمار كثيرة.
علشان كده سفر يوئيل هو: سفر التوبة. وهو نبي التوبة. وده علشان نرجع لربنا، بالتوبة.
27وَتَعْلَمُونَ أَنِّي أَنَا فِي وَسْطِ إِسْرَائِيلَ، وَأَنِّي أَنَا الرَّبُّ إِلهُكُمْ وَلَيْسَ غَيْرِي. وَلاَ يَخْزَى شَعْبِي إِلَى الأَبَدِ. تَعْلَمُونَ: عن طريق الروح القدس.
"وَلاَ يَخْزَى شَعْبِي إِلَى الأَبَدِ." ... مفيش خزي تاني، لأن ربنا هيكون موجود في وسط شعبه.
الآيات من 28 لـ 32: أخر جزء في الاصحاح.
قمة العطايا الالهية للنفوس التائبة. وعمل ربنا مع شعبه. وهي انسكاب الروح القدس علي شعب ربنا.
وازاي هيحصل ده في أيام العهد الجديد.
ويتمتع الشعب بالمواهب الروحية، كتكليل للتوبة الصادقة. ويثمروا ثمار روحية من خلال عمل ربنا فيهم.
28« وَيَكُونُ بَعْدَ ذلِكَ أَنِّي أَسْكُبُ رُوحِي عَلَى كُلِّ بَشَرٍ، فَيَتَنَبَّأُ بَنُوكُمْ وَبَنَاتُكُمْ، وَيَحْلَمُ شُيُوخُكُمْ أَحْلاَمًا، وَيَرَى شَبَابُكُمْ رُؤًى. يعني: بعد تقديم التوبة. وكمان بعد مرور زمن العهد القديم، ومجئ زمن العهد الجديد.
"أَنِّي أَسْكُبُ رُوحِي" ... هو الروح القدس.
"عَلَى كُلِّ بَشَرٍ،" ... لأن في العهد القديم: اللي كان بيحل عليه الروح القدس، هو الكاهن والنبي والملك. (وشوفنا شاول النبي، بعد فارقه روح الرب. بغته روح شرير.)
في العهد الجديد: الميزة أن كل أولاد ربنا يسوع المسيح له المجد، بيأخدوا الروح القدس.
"فَيَتَنَبَّأُ بَنُوكُمْ وَبَنَاتُكُمْ،" ... عادة النبوة: كانت مرتبطة بحلول الروح القدس. وشوفنا نماذج في سفر أعمال الرسل.
النبوة هنا: أن النبي هو من يُخبر الشعب، بارادة ربنا.
ولما يحل الروح القدس جوانا، نَعلم ارادة ربنا. هي ديه روح النبوة. أن الانسان يُدرك مشيئة ربنا في حياته.
"وَيَحْلَمُ شُيُوخُكُمْ أَحْلاَمًا، وَيَرَى شَبَابُكُمْ رُؤًى." ... الأحلام: ما يراه الانسان في نومه.
أما الرؤي: ما يراه الانسان في يقظته.
المفروض الشباب هما اللي بيحلموا. لأن الشباب في بداية حياتهم، بيحلموا. والشيوخ اللي وصلوا لنضوج روحي، هما اللي يمشي معاهم الرؤيا.
لكن بيقول "وَيَحْلَمُ شُيُوخُكُمْ أَحْلاَمًا،" ... يعني الشيوخ هيبقي ليهم قوة الشباب وطموح ورجاء الشباب.
" وَيَرَى شَبَابُكُمْ رُؤًى." ... يعني الشباب هيبقي عندهم نضوج وحكمة الشيوخ.
الروح القدس يُعطي الشباب، حكمة. وكمان شيخوخة. بس مش جسدية. لكن شيخوخة روحية. ونضج روحي.
ويُعطي الشيوخ رجاء و أمل في الحياة.
29وَعَلَى الْعَبِيدِ أَيْضًا وَعَلَى الإِمَاءِ أَسْكُبُ رُوحِي فِي تِلْكَ الأَيَّامِ، هنا مفيش فرق بين سيد وعبد، في الايمان بالمسيح يسوع ربنا له المجد.
"وَعَلَى الْعَبِيدِ أَيْضًا وَعَلَى الإِمَاءِ" ... الإِمَاءِ: جمة أَمة. وهي الجارية أو العبدة. مفيش تمييز في المركز الاجتماعي، بين شعب ربنا في العهد الجديد.
"أَسْكُبُ رُوحِي فِي تِلْكَ الأَيَّامِ،" ... الروح القدس هيحل علي كل البشر بدون تمييز.
30وَأُعْطِي عَجَائِبَ فِي السَّمَاءِ وَالأَرْضِ، دَمًا وَنَارًا وَأَعْمِدَةَ دُخَانٍ. الآية ديه بتوضح العجائب التي صاحبت حلول الروح القدس علي الكنيسة يوم الخمسين.
صاحب حلول الروح القدس: هبوب ريح عاصفة وألسنة نار.
"دَمًا وَنَارًا وَأَعْمِدَةَ دُخَانٍ." ... نوع من التداخل مابين يوم حلول الروح القدس. والمجئ التاني.
31تَتَحَوَّلُ الشَّمْسُ إِلَى ظُلْمَةٍ، وَالْقَمَرُ إِلَى دَمٍ قَبْلَ أَنْ يَجِيءَ يَوْمُ الرَّبِّ الْعَظِيمُ الْمَخُوفُ. يوئيل النبي بينتقل بسرعة من وصف يوم حلول الروح القدس علي الكنيسة وميلادها، في يوم الخمسين. (وده واضح في سفر أعمال الرسل اصحاح 2. وازاي أن القديس بطرس الرسول: اقتبس هذة الأيات، علشان يثبت للجموع أن التلاميذ ليسوا سكاري. و أن ده اللي قاله يوئيل النبي في العهد القديم.)
وفي نفس الوقت بينتقل بسرعة لمجئ المسيح يسوع له المجد علي السحاب. المجئ التاني.
وربنا قال عن الاشارات ديه في عظته، اللي اتكلم فيها عن نهاية العالم. وكمان ذكرها القديس يوحنا الحبيب في سفر الرؤيا.
... علامات نهاية الايام. "تَتَحَوَّلُ الشَّمْسُ إِلَى ظُلْمَةٍ، وَالْقَمَرُ إِلَى دَمٍ "
"قَبْلَ أَنْ يَجِيءَ يَوْمُ الرَّبِّ الْعَظِيمُ الْمَخُوفُ." ... يوم المجئ التاني.
32وَيَكُونُ أَنَّ كُلَّ مَنْ يَدْعُو بِاسْمِ الرَّبِّ يَنْجُو. لأَنَّهُ فِي جَبَلِ صِهْيَوْنَ وَفِي أُورُشَلِيمَ تَكُونُ نَجَاةٌ، كَمَا قَالَ الرَّبُّ. وَبَيْنَ الْبَاقِينَ مَنْ يَدْعُوهُ الرَّبُّ. كل اللي هيصلي لربنا، هينال النجاة والخلاص.
"لأَنَّهُ فِي جَبَلِ صِهْيَوْنَ وَفِي أُورُشَلِيمَ تَكُونُ نَجَاةٌ،" ... جبل صهيون وأورشليم: اشارة الي أن الخلاص هيخرج من أورشليم. من الجلجثة. حيث الصلب. ومن قبره وقيامته. لأن الخلاص هيخرج من مدينة أورشليم.
"كَمَا قَالَ الرَّبُّ. وَبَيْنَ الْبَاقِينَ مَنْ يَدْعُوهُ الرَّبُّ." ... خلاص ربنا هيخرج من مدينة أورشليم.
" الْبَاقِينَ" ... هما البقية اللي هيؤمنوا بربنا يسوع المسيح له االمجد. وهيكونوا من اليهود.
في الاصحاح ده:
بيبدأ بانذار شديد اللهجة. وتأثيرات ضربة الجراد. وجيش الأعداء القادم عليهم. وبعدين ينتقل الي دعوة للتوبة. ويوضح ملامح هذة التوبة. وبعدين ثمار التوبة. واستجابة ربنا لتوبتنا. وازاي توصل الاستجابة ديه لقمتها، في حلول الروح القدس علي كل نفس بشرية.
⪢