⪡ 1وَيَكُونُ فِي آخِرِ الأَيَّامِ أَنَّ جَبَلَ بَيْتِ الرَّبِّ يَكُونُ ثَابِتًا فِي رَأْسِ الْجِبَالِ، وَيَرْتَفِعُ فَوْقَ التِّلاَلِ، وَتَجْرِي إِلَيْهِ شُعُوبٌ. - في الاصحاح التالت كان في توبيخ شديد.
- لكن في الاصحاح الرابع، في رجاء جميل. لأن الله بعد ما بيوبخ النفس البشرية، يُعطيها رجاء.
- بيتكلم عن أزمنة المسيا. لما يأتي المسيح له المجد.
"وَيَكُونُ فِي آخِرِ الأَيَّامِ" ... الجملة ديه في النبوات، يُقصد بيها: لما يجي المسيح يسوع له المجد.
وفي بعض النبوات كمان، يُقصد بيها: أخر الأيام. المجئ التاني. لكن هنا المقصود: أخر أيام اليهود في العهد القديم. وبداية العهد الجديد بمجيء السيد المسيح له المجد.. المجئ الأول. هيحصل ايه في مجئ السيد المسيح له المجد علي الأرض؟
"أَنَّ جَبَلَ بَيْتِ الرَّبِّ يَكُونُ ثَابِتًا فِي رَأْسِ الْجِبَالِ،" ... جبل بيت الرب، بيتكلم هنا علي كنيسة العهد الجديد، اللي أسسها السيد المسيح يسوع له المجد.
طيب ايه العلاقة بين الجبل والكنيسة؟ الجبل لا يهتز. وكمان الكنيسة ثابتة وقوية، لا تهتز.
" وَيَكُونُ فِي آخِرِ الأَيَّامِ أَنَّ جَبَلَ بَيْتِ الرَّبِّ يَكُونُ ثَابِتًا فِي رَأْسِ الْجِبَالِ،" ... يعني يكون أكثر استقرارا من كل الجبال اللي حواليه.
ممكن الجبال الموجودة في العالم، متمثلة في: الدول – الحكومات – الأنظمة – المؤسسات – وهكذا.... لكن الكنيسة دايما ثابتة في رأس الجبال.
"وَيَرْتَفِعُ فَوْقَ التِّلاَلِ،" ... التلال هي القامات العالية. لكنها مش في مستوي ارتفاع الجبل.
"وَتَجْرِي إِلَيْهِ شُعُوبٌ." ... كل الشعوب هتيجي للجبل، لربنا يسوع المسيح له المجد. لأن كنيسة العهد الجديد ضمت من كل القبائل والشعوب والأمم. ضمت من كل مكان في العالم. مش اليهود بس. فديه نبوة عن قبول الأمم للإيمان في عصر المسيا.
شعوب: مش مُعرفة بالألف واللام. يعني شعوب كتير.
وطبعا النبوة ديه اتحققت في العهد الجديد: يوم حلول الروح القدس علي التلاميذ في العنصرة. كان وقتها كل الأمم حاضرين. وكلهم راحوا علشان يشوفوا الكنيسة الناشئة.
وكانت وقتها الكنيسة، لسه ملهاش كيان واضح. كانت لسه في لحظة ميلادها. وكان لسه التلاميذ مش معروفين، وكانوا صيادين بسطاء. لكن صروا في رأس الجبال، وارتفعوا فوق كل التلال. ووقتها التلال: كان ممكن يكون نيقوديموس المُعلم – أو غمالائيل المٌعلم - أو شاول الطرسوسي، اللي عنده سطان أنه يقتل الناس.
فدول كانوا زي التل. طيب هيروح فين التل، جنب الجبل؟ فالكنيسة ارتفعت جدا. وجريت ليها كل الشعوب.
2وَتَسِيرُ أُمَمٌ كَثِيرَةٌ وَيَقُولُونَ: «هَلُمَّ نَصْعَدْ إِلَى جَبَلِ الرَّبِّ، وَإِلَى بَيْتِ إِلهِ يَعْقُوبَ، فَيُعَلِّمَنَا مِنْ طُرُقِهِ، وَنَسْلُكَ فِي سُبُلِهِ». لأَنَّهُ مِنْ صِهْيَوْنَ تَخْرُجُ الشَّرِيعَةُ، وَمِنْ أُورُشَلِيمَ كَلِمَةُ الرَّبِّ. "وَتَسِيرُ أُمَمٌ كَثِيرَةٌ"... برده الكلام علي الأمم.
هنا في الآية ديه الكلام علي أورشليم الجديدة وصهيون، اللي هي الكنيسة.
"وَيَقُولُونَ: هَلُمَّ نَصْعَدْ إِلَى جَبَلِ الرَّبِّ، وَإِلَى بَيْتِ إِلهِ يَعْقُوبَ، " ... الأمم بيقولوا يالا نصعد لجبل ربنا. اللي هو الكنيسة المرتفعة عن العالم. واللي جاي الكنيسة، يجب أن يرتفع أو يصعد. ومش ممكن تكون الكنيسة، في مستوي العالم في مبادئها وأخلاقها.
الكنيسة المفروض أنها تكون ضمير للمجتمع. لما نلاقي حاجات غلط منوافقش علي الغلط ده.
" فَيُعَلِّمَنَا مِنْ طُرُقِهِ،" ... طرق الرب في العهد القديم: كانت علي أد اليهود. حاجة تناسبهم. لأنهم كانوا مبتدئين.
لكن في العهد الجديد: طرق الرب صارت لكل الشعوب. فجايين يتعملوا الطرق ديه.
طرق ربنا هتخلي الناس تعيش في سلام. وهنشوفها في آية 3.. الناس هتعيش في المحبة – الايجابية، بدل ما الواحد يعيش في السلبيات ويضيع وقته في السلبيات، يستثمر وقته في الايجابات.
"وَنَسْلُكَ فِي سُبُلِهِ. لأَنَّهُ مِنْ صِهْيَوْنَ تَخْرُجُ الشَّرِيعَةُ، وَمِنْ أُورُشَلِيمَ كَلِمَةُ الرَّبِّ." ... زي ما قال معلمنا بولس الرسول: أن الكنيسة هي عمود الحق وقاعدته. والكنيسة منها بتخرج الشريعة، وكلمة ربنا.
" وَإِلَى بَيْتِ إِلهِ يَعْقُوبَ، فَيُعَلِّمَنَا مِنْ طُرُقِهِ، وَنَسْلُكَ فِي سُبُلِهِ. لأَنَّهُ مِنْ صِهْيَوْنَ تَخْرُجُ الشَّرِيعَةُ، وَمِنْ أُورُشَلِيمَ كَلِمَةُ الرَّبِّ." ... واللي بيأكد أن الكلام مش علي العهد القديم، أنه بيقول من صهيون تخرج الشريعة. لأن شريعة العهد القديم خرجت من جبل سيناء، مش من صهيون. فالكلام علي كنيسة العهد الجديد. واحنا بنروح الكنيسة علشان " فَيُعَلِّمَنَا مِنْ طُرُقِهِ،" ... لأن في جزء كبير من ليتورجيا الكنيسة (صلوات الكنيسة) هو جزء تعليمي. وكله طبعا مبني علي الكتاب المقدس
3فَيَقْضِي بَيْنَ شُعُوبٍ كَثِيرِينَ. يُنْصِفُ لأُمَمٍ قَوِيَّةٍ بَعِيدَةٍ، فَيَطْبَعُونَ سُيُوفَهُمْ سِكَكًا، وَرِمَاحَهُمْ مَنَاجِلَ. لاَ تَرْفَعُ أُمَّةٌ عَلَى أُمَّةٍ سَيْفًا، وَلاَ يَتَعَلَّمُونَ الْحَرْبَ فِي مَا بَعْدُ. نتيجة أن الناس هتيجي للكنيسة، وأنها هتسمع كلمة ربنا. هيحصل ايه؟
"فَيَقْضِي بَيْنَ شُعُوبٍ كَثِيرِينَ."... المسيح له المجد في كنيسته ديان وحاكم. بس طول ما احنا علي الأرض ولسه عايشين، ربنا الديان وهو مُربي. بيربي ويأدب أولاده.
زي مثلا اخوات اتخانقوا، وراحوا لأبوهم علشان يحكم ما بينهم. أكيد الأب مش هيحط واحد في السجن ويطلّع التاني براءة. لكن الأب هيعلمهم وهيربيهم وهيفهمهم. ويخلي الغلطان يعتذر للتاني.
طيب ربنا هيعمل ايه في القضاء ده؟
"يُنْصِفُ لأُمَمٍ قَوِيَّةٍ بَعِيدَةٍ،" ... الأمم القوية البعيدة، اللي مكانش ليهم علاقة بالله.
واليهود كانوا بينظروا للأمم، علي أساس انهم مهلومش نصيب في ربنا. وانهم كلاب (زي قصة المرأة الكنعانية.)
في العهد الجديد، ربنا هينصفهم.
"فَيَطْبَعُونَ سُيُوفَهُمْ سِكَكًا،" ... السِكك: هي آلة للزراعة.
"وَرِمَاحَهُمْ مَنَاجِلَ." ... برده آلة للزراعة والحصاد.
المعني: الواحد اللي كان عنده سيف، كان بيستخدمه علشان يقتل الناس. فدلوقتي مش هيستخدموه في القتل.
فالواحد يروح للحداد، ويقوله: سيح السيف، وخليه يبقي سِكة ومنجل للزراعة. معناها: بدل ما كنت بأضيع الوقت في قتل الناس. هأستثمر وقتي في البناء. دايما الشر ماشي ناحية الهدم. والخير ماشي ناحية البناء.
فلما يجي المسيح يسوع ربنا له المجد في المجئ الأول، الكل هيعيش في سلام ... " فَيَطْبَعُونَ سُيُوفَهُمْ سِكَكًا، وَرِمَاحَهُمْ مَنَاجِلَ. لاَ تَرْفَعُ أُمَّةٌ عَلَى أُمَّةٍ سَيْفًا، وَلاَ يَتَعَلَّمُونَ الْحَرْبَ فِي مَا بَعْدُ." ... وديه علامة السلام اللي بيحل بخلاص المسيح يسوع له المجد. وبالفداء المُقدم لينا علي عود الصليب. دعوة السيد المسيح له المجد، لأنه ملك السلام.
4بَلْ يَجْلِسُونَ كُلُّ وَاحِدٍ تَحْتَ كَرْمَتِهِ وَتَحْتَ تِينَتِهِ، وَلاَ يَكُونُ مَنْ يُرْعِبُ، لأَنَّ فَمَ رَبِّ الْجُنُودِ تَكَلَّمَ. طالما مفيش حروب، فالناس قاعدة مرتاحة زي الفلاحين لما بيروحوا أراضيهم، ويهتموا بأرضهم ويسقوها. ويريحوا تحت الشجرة. بتكون حياة هادية.
الجلوس تحت الكرمة والتينة: هي علامة السلام.
لكن الكرمة والتينة ليهم معني مسياني:
- الكرمة: هي شجرة العنب. والعنب بيرمز لدم المسيح. عصير العنب هو دم المسيح له المجد.
"فتجلس تحت كرمتك" ... معناه: تتظلل بظل دم المسيح له المجد.
- التينة: تأمل فيها الآباء تأمل جميل: لو مسكنا ثمرة التين البرشومي، عبارة عن قشرة جلد من بره، وجواها بذور كتيرة جدا ماسكة في بعضها بمادة لزجة طعمها حلو.
ولو أخدت بذرة واحدة من مجموعة البذور ديه، والواحد حطها علي لسانه، مش هيبقي ليها أي طعم. لكن الثمرة كلها علي بعض لما تتأكل طعمها بيكون حلو.
فالآباء قالوا: التينة ترمز للكنيسة. كل واحد فينا لوحده ملهوش قيمة. زي البذرة بتاعة ثمرة التينة، ملهاش طعم لوحدها.
لكن كلنا مع بعض، لينا طعم في عين الآب السماوي.
الجلدة الخارجية للتينة اللي بتضم كل البذور، ترمز لوحدانية الكنيسة، حواليها سور بيحاوطها.. والمادة اللزجة اللي طعمها حلو، اللي مجمعة البذور: ترمز للروح القدس اللي بيجمعنا في الكنيسة.
زينا احنا: عبارة عن جسد وليه أعضاء. لو عضو انفصل عن الجسد، العضو ده ميبقاش ليه قيمة.
علشان كده قال: أن الكرمة ترمز للسيد المسيح له المجد.. والتينة ترمز للكنيسة. فلازم نجلس تحت الكرمة. يعني: نتظلل بظل دم المسيح يسوع له المجد. ومنخرجش بره التينة. متتمردش علي التينة، والا هتبقي غريب عنها.
"وَلاَ يَكُونُ مَنْ يُرْعِبُ،" ... محدش هيقدر علينا طول ما احنا تحت الكرمة والتينة.
"لأَنَّ فَمَ رَبِّ الْجُنُودِ تَكَلَّمَ." ... ده كلام ربنا. ربنا هو اللي اتكلم وقال.
5لأَنَّ جَمِيعَ الشُّعُوبِ يَسْلُكُونَ كُلُّ وَاحِدٍ بِاسْمِ إِلهِهِ، وَنَحْنُ نَسْلُكُ بِاسْمِ الرَّبِّ إِلهِنَا إِلَى الدَّهْرِ وَالأَبَدِ. كل شعب عنده الاله بتاعه. كل شعب بيعبد إلهه.
عاوز يقول: إذا كان الناس الوثنيين، غير المؤمنين، ملتزمين بآلهتهم. فكم بالأحرى احنا. لازم نبقي مخلصين ومتمسكين بالهنا ومخلصنا يسوع المسيح له المجد.
"وَنَحْنُ نَسْلُكُ بِاسْمِ الرَّبِّ إِلهِنَا إِلَى الدَّهْرِ وَالأَبَدِ." ... لكن احنا شعب الله، الهنا هو ربنا الي الأبد.
وديه معناها: إني مخطلتش بالشعوب أو الناس. بطريقة تفسدني وتفسد ايماني. ولا تخليني أغير ايماني. وأنادي باسم إله غريب.
6«فِي ذلِكَ الْيَوْمِ، يَقُولُ الرَّبُّ، أَجْمَعُ الظَّالِعَةَ، وَأَضُمُّ الْمَطْرُودَةَ، وَالَّتِي أَضْرَرْتُ بِهَا الظَّالِعَةَ: يعني العرجاء. اللي بتعرج. ومعناها: كنيسة ماشية بين البينين. مش ماشية باستقامة.
فربنا قال: حتي دول هأجمعهم. مش هأسيبهم.
"وَأَضُمُّ الْمَطْرُودَةَ، وَالَّتِي أَضْرَرْتُ بِهَا." ... ربنا بيقول: واللي أنا ضريتها، طيب ضريتها ليه يارب؟ لأنها كانت ماشية غلط، فعاقبتها. حصل لها ضرر. لكن بعد كده رجعت. فبأضمها من تاني. فتأديب ربنا مش دايما للمنتهي.
لازم يبقي عندنا وضوح في الايمان. حتى متي تعرجون بين الفرقتين. إن كان الرب هو الله فاعبدوه. وان كان البعل، اعبدوه. ده كلام ايليا النبي.
فده وعد جميل من ربنا، أن ربنا هيجمع الظالعة. بعد ما كانت بتعرج، هتبقي كويسة. وربنا هيضم المطرودة.
المسيح يسوع له المجد، لما جه. كان من ضمن الحاجات اللي بتميز اللي بيعمله، أنه اهتم بالفئات المُهمشة. زي المرأة السامرية. وربنا قعد معاها في اصحاح كامل، لأنها كانت ظالعة، بتُعرج بين الفرقتين ومطرودة. حاسة أنها مش مقبولة من اليهود. فربنا جمعها. وبعدين المرأة السامرية، قادته الي أهل السامرة كلهم.
وكمان ربنا تقابل مع ا لعشارين والخطاة. واتكلم عن مثل: الابن الضال - الخروف الضال - الدرهم المفقود.
وكمان المسيح له المجد دخل بيت زكا العشار، لدرجة انهم انتقدوه. وقبِل المرأة الخاطئة في بيت سمعان الفريسي.
فربنا يسوع له المجد جه علشان يجمع الغلابة دول.
7وَأَجْعَلُ الظَّالِعَةَ بَقِيَّةً، وَالْمُقْصَاةَ أُمَّةً قَوِيَّةً، وَيَمْلِكُ الرَّبُّ عَلَيْهِمْ فِي جَبَلِ صِهْيَوْنَ مِنَ الآنَ إِلَى الأَبَدِ. "وَأَجْعَلُ الظَّالِعَةَ بَقِيَّةً،"... بَقِيَّةً: معناها أن لسه ليها جذر، ليها وجود. الأمة اللي بتعرج، هأخلي ليها بقية. وجود.
"وَالْمُقْصَاةَ أُمَّةً قَوِيَّةً،" ... الْمُقْصَاةَ: جاية من أقصيت فلان، يعني أبعدته. يعني خليته بعيد. (مثلا حد يقول لواحد تاني، أنت ملكش نصيب معانا.)
وده برده، ربنا هيخليه أُمة قوية.
"وَيَمْلِكُ الرَّبُّ عَلَيْهِمْ فِي جَبَلِ صِهْيَوْنَ مِنَ الآنَ إِلَى الأَبَدِ." ... يصير الله هو الملك.
النبوة الخاصة بتجميع الناس البعيدة، بتتكرر كتير في العهد القديم. واتحققت في المسيح يسوع له المجد.
كلمة بقية: مهمة. فلو حد فينا مجهوده اتشتت، وروحياته ضاعت. ربنا هيخلي ليك باقية في داخلك.
مثلا: أبقي حاسس اني وحش وضايع. بس في حتة جوايا، ان مينفعش الصيام يجي ومصومش. مينفعش أفوت الصيام. حتي لو في الصيام مفيش تقدم روحي. بس الجزء ده هو الفتيلة المُدخنة. وكويس انها متطفيش.
أو مثلا: واحد حاسس أنه بعيد أوي عن ربنا. وهو متعود من صغره يحضر القداس ويتناول. فبيحضر القداس، لأنه ميقدرش يفوت القداس. بس هو لا حاسس بالقداس ولا متعزي. وحاسس أن التناول دينونة عليه. ومكانش مركز في القداس. بس دخل يتناول لأنه ميقدرش يفوت التناول. فديه هي البقية. في حتة باقية حلوة جواك. الفتيلة المُدخنة.
فديه البقية اللي ربنا هينفخ فيها، و تشتعل من تاني. أوعي تطفي البقية الحلوة اللي جواك. حتي لو كانت حاجة صغيرة.
"وَيَمْلِكُ الرَّبُّ عَلَيْهِمْ فِي جَبَلِ صِهْيَوْنَ مِنَ الآنَ إِلَى الأَبَدِ." ... صهيون: هي كنيسة العهد الجديد. المسيح يسوع له المجد، هيملك في كنيسته. ومُلك ربنا والهنا ومخلصنا، هو مُلك أبدي.
8وَأَنْتَ يَا بُرْجَ الْقَطِيعِ، أَكَمَةَ بِنْتِ صِهْيَوْنَ إِلَيْكِ يَأْتِي. وَيَجِيءُ الْحُكْمُ الأَوَّلُ مُلْكُ بِنْتِ أُورُشَلِيمَ». لما بيكون في قطيع غنم في الحظيرة، بيعملوا برج للمراقبة. فواحد يراقب في البرج، لأحسن الأعداء يهجموا.
فالبرج: يرمز للحراسة. والكنيسة هي: برج القطيع. فنلاقي الكنيسة مثلا، تحذرنا أن في أفكار غريبة من شخص. وتقولنا خلوا بالكم من الأفكار ديه، متسمعوش ليه. واللي مش بيسمع للكنيسة، بيجي العدو ينهش ويخطف من قطيع الكنيسة.
" وَأَنْتَ يَا بُرْجَ الْقَطِيعِ، أَكَمَةَ بِنْتِ صِهْيَوْنَ إِلَيْكِ يَأْتِي". ... فهنا ربنا بيقول أن محدش هيجي ناحية القطيع بتاعي. الأكمة: يعني الحصن، بيبقي مكان عالي. أنتِ واقفة علي مكان عالي. علشان تشوفي مين بيعمل ايه. أنتِ واقفة تحرسي.
" إِلَيْكِ يَأْتِي". ... يأتي المخلص المسيح يسوع له المجد. طيب هيجي هيعمل ايه؟
" وَيَجِيءُ الْحُكْمُ الأَوَّلُ مُلْكُ بِنْتِ أُورُشَلِيمَ." ... يعني ايه الحُكم الأول:
عاوز يقول: أن هتيجي أيام داود، اللي هما كانوا بيشتاقوا ليها. وطبعا محصلش في مملكة اليهودية أن جت أيام، مثل أيام داود وسُليمان. لأن من بعد سُليمان المملكة انقسمت، وحصل فيها حروب. وبعدها جه السبي علي المملكتين. وجه بعدها أيام المكابيين والرومان. وسنة 70 ميلادي، اتحطموا تماما والهيكل اتدمر. ودلوقتي هما مُشتتين في العالم كله.
فعليا حصل اعادة نسبية للهيكل: لما زربابل هيرجع من السبي. بس طبعا الكلام هيتحقق كامل: لما يجي السيد المسيح له المجد ويتجسد. ويأسس أورشليم الجديدة.
الحُكم الأول: الكلام عن المسيح يسوع له المجد. يعني يعُم الخير والسلام. وطبعا ده كلام روحي. لأن السلام والخير كان بسبب ربنا يسوع المسيح له المجد.
9اَلآنَ لِمَاذَا تَصْرُخِينَ صُرَاخًا؟ أَلَيْسَ فِيكِ مَلِكٌ، أَمْ هَلَكَ مُشِيرُكِ حَتَّى أَخَذَكِ وَجَعٌ كَالْوَالِدَةِ؟ أنتِ زعلانة ليه؟ قلفانة ليه يا كنيسة المسيح؟
" أَلَيْسَ فِيكِ مَلِكٌ، أَمْ هَلَكَ مُشِيرُكِ حَتَّى أَخَذَكِ وَجَعٌ كَالْوَالِدَةِ؟" ... احنا في القداس بنصلي ونقول: ارحمنا يالله ضابط الكل. وبنقولها من قلبنا، بصراخ.
فيجي لينا صوت من السماء ويقولنا: قلقانين ليه؟ وبتصرخوا ليه؟ نقول: بنصرخ ليك يارب.
يقولنا: طيب قلقانين ليه؟ هو أنتم معندكومش ملك؟ فربنا بيطمنا أنه معانا ومش سايبنا.
"أَلَيْسَ فِيكِ مَلِكٌ،" ... أنتم مش واخدين بالكم أن المسيح له المجد، موجود معاكم؟
"أَمْ هَلَكَ مُشِيرُكِ" ... المُشير: هو الله.
"حَتَّى أَخَذَكِ وَجَعٌ كَالْوَالِدَةِ؟" ... لدرجة أنه يأخدك وجع وألم زي المرأة التي تلد.
الكتاب المقدس كتير بيشبه الخوف، بألآم الولادة. لأنهم بيقولوا أن ده أصعب ألم.
لهنا ميخا كان بيتكلم عن أورشليم الجديدة. لكنه بص علي حال أورشليم الحالية في زمنه. وأن جيوش الأعداء ابتدوا يستعدوا للهجوم عليها. وبقت أورشليم تئن وتصرخ من اللي هيحصل فيها.
"اَلآنَ لِمَاذَا تَصْرُخِينَ صُرَاخًا؟"... فميخا النبي بيقولها : بتصرخي ليه، عاملة في نفسك كده ليه؟
" أَلَيْسَ فِيكِ مَلِكٌ، أَمْ هَلَكَ مُشِيرُكِ؟" ... لأن اللي ضيّع أورشليم، هما الموشرين والرؤساء.
" حَتَّى أَخَذَكِ وَجَعٌ كَالْوَالِدَةِ؟" ... الجملة ديه علي أد ما فيها ألم. علي أد ما فيها رجاء.
الألم: لأن ألم الولادة شديد. والرجاء: لأن بعد الألم ده والولادة، فيه طفل بيتولد. فيه فرح.
وكأن ميخا شايف أن السبي ده عبارة عن آلام الولادة. بداية اصلاح، بداية حياة جديدة.
10تَلَوَّيِ، ادْفَعِي يَا بِنْتَ صِهْيَوْنَ كَالْوَالِدَةِ، لأَنَّكِ الآنَ تَخْرُجِينَ مِنَ الْمَدِينَةِ، وَتَسْكُنِينَ فِي الْبَرِّيَّةِ، وَتَأْتِينَ إِلَى بَابِلَ. هُنَاكَ تُنْقَذِينَ. هُنَاكَ يَفْدِيكِ الرَّبُّ مِنْ يَدِ أَعْدَائِكِ. ميخا النبي أتنبأ قبل حدوث السبي.
تَلَوَّيِ: هتتألمي. لأنك هتخرجي من المدينة. وهتروحي السبي، في بابل. بس متخافيش.
"هُنَاكَ تُنْقَذِينَ. هُنَاكَ يَفْدِيكِ الرَّبُّ مِنْ يَدِ أَعْدَائِكِ." ... ربنا هيخلصك من يد أعدائك.
لما بنتعدي علي حقوق ربنا: ربنا بيسمح بالسبي. بس وقتها مش بيسيبنا. بيبقي معانا هناك. وينقذنا ويرجعنا تاني. وديه عبارة عن قرصة ودن. علشان نفوق من مشينا الغلط.
" لأَنَّكِ الآنَ تَخْرُجِينَ مِنَ الْمَدِينَةِ، وَتَسْكُنِينَ فِي الْبَرِّيَّةِ، وَتَأْتِينَ إِلَى بَابِلَ." ... ده كلام صريح من ميخا النبي عن السبي. وانهم هيروحوا لبابل.
"هُنَاكَ تُنْقَذِينَ. هُنَاكَ يَفْدِيكِ الرَّبُّ مِنْ يَدِ أَعْدَائِكِ." ... بعد ما تمت فترة العقاب، بعد ما ال 70 سنة بتاعة السبي هتخلص، هيجي كورش الملك، وهينادي بعودة المسبيين اليهود لبلادهم من تاني. ويبدأ زربابل ، رحلة العودة لأورشليم، ورحلة إعادة إعمار الهيكل. وهيرجعوا علي أفواج. وبعد زربابل، هيجي نحميا ويعيد بناء أسوار أورشليم. وعَزرا النبي وهيعمل نهضة روحية.
" لأَنَّكِ الآنَ تَخْرُجِينَ مِنَ الْمَدِينَةِ، وَتَسْكُنِينَ فِي الْبَرِّيَّةِ،" ... ده يفكرنا بسفر الرؤيا. لما يوحنا الحبيب شاف "المرأة المتسربلة بالشمس والقمر تحت رجليها. واثني عشر كوكب يُحيطون بيها."
فكانت المرأة المُتسربلة: هي رمز للكنيسة. ولما جه التنين يهجم عليها قال: "فأُعطيت المرأة جناحين النسر العظيم." وراحت الي البرية " حيث يعولها زمان وزمانين ونصف الزمان."
البرية هي العالم. والكنيسة في العالم. لكن الكنيسة بالرغم أنها تحيا في العالم، لكن هي جزء من السماء.
هي مش بتنتمي للعالم. لكن اللي يعيش فترة غربته علي الأرض مع ربنا يسوع له المجد، هتبقي فترة خلاص وفداء. علشان الواحد يروح لأورشليم السمائية. ... "هُنَاكَ تُنْقَذِينَ. هُنَاكَ يَفْدِيكِ الرَّبُّ مِنْ يَدِ أَعْدَائِكِ."
11وَالآنَ قَدِ اجْتَمَعَتْ عَلَيْكِ أُمَمٌ كَثِيرَةٌ، الَّذِينَ يَقُولُونَ: «لِتَتَدَنَّسْ وَلْتَتَفَرَّسْ عُيُونُنَا فِي صِهْيَوْنَ». وقت ما كانوا في عز أزمتهم، الناس شمتوا فيهم.
"الَّذِينَ يَقُولُونَ: لِتَتَدَنَّسْ وَلْتَتَفَرَّسْ عُيُونُنَا فِي صِهْيَوْنَ." ... الأعداء اللي شمتوا في أورشليم، عاوزين صهيون تتدنس.
تتدنس: وده حال أولاد ربنا. الشياطين مستنيين الواحد فينا يدنس فكره وحواسه. يدنس جسد ربنا، فيشمتوا فينا.
12وَهُمْ لاَ يَعْرِفُونَ أَفْكَارَ الرَّبِّ وَلاَ يَفْهَمُونَ قَصْدَهُ، إِنَّهُ قَدْ جَمَعَهُمْ كَحُزَمٍ إِلَى الْبَيْدَرِ. ربنا عمل كل ده، علشان الناس ديه تتجمع. زي الحِزم في البيدر. ويحطها في النار. يعني: زي ما يكون ربنا عامل ليهم كمين.
"وَهُمْ لاَ يَعْرِفُونَ أَفْكَارَ الرَّبِّ وَلاَ يَفْهَمُونَ قَصْدَهُ،" ... فهما مش فاهمين أفكار ربنا.
ربنا بيقول "لأن أفكاري ليست أفكاركم، ولا طرقكم طرقي. يقول الرب."
"يَا لَعُمْقِ غِنَى اللهِ وَحِكْمَتِهِ وَعِلْمِهِ! مَا أَبْعَدَ أَحْكَامَهُ عَنِ الْفَحْصِ وَطُرُقَهُ عَنِ الاسْتِقْصَاءِ."
عقاب ربنا لأورشليم، عقاب محبة. محبة أب لأولاده. والعقاب، زي ألام الولادة. لكن بعد كده في حياة جديدة. لكن الأعداء الأشرار، وكأنهم قش للحريق. هلاك أبدي.
13«قُومِي وَدُوسِي يَا بِنْتَ صِهْيَوْنَ، لأَنِّي أَجْعَلُ قَرْنَكِ حَدِيدًا، وَأَظْلاَفَكِ أَجْعَلُهَا نُحَاسًا، فَتَسْحَقِينَ شُعُوبًا كَثِيرِينَ، وَأُحَرِّمُ غَنِيمَتَهُمْ لِلرَّبِّ، وَثَرْوَتَهُمْ لِسَيِّدِ كُلِّ الأَرْضِ» قومي بقي. أنا جبتهوملك، علشان تدوسيهم.
وهما كانوا فاكرين اني كنت غضبان عليكِ يا صهيون.. الكنيسة تقوم بمجدها وتدوس علي الأعداء بقوة ربنا.
"لأَنِّي أَجْعَلُ قَرْنَكِ حَدِيدًا،" ... القرن: هو أكتر حاجة قوية في الحيوانات، زي الخروف والثور. ولما يحارب، بينطح بقرونه.
"وَأَظْلاَفَكِ أَجْعَلُهَا نُحَاسًا،" ... الأظلاف: يعني الأظافر.. الكنيسة بتبقي قوية بإلهها.
""قُومِي وَدُوسِي" ... هو ده وعد الله للكنيسة. ووعده للنفس البشرية الأمنية له. متخافيش لو الناس اتجمعت حواليكِ. قومي دوسي بقوة ربنا.
"فَتَسْحَقِينَ شُعُوبًا كَثِيرِينَ، وَأُحَرِّمُ غَنِيمَتَهُمْ لِلرَّبِّ، وَثَرْوَتَهُمْ لِسَيِّدِ كُلِّ الأَرْضِ." ... الآية ديه نبوة عن خلاص أولاد ربنا له المجد من ايد الشيطان.
الشيطان اللي كان واخد أولاد ربنا، كغنيمة عنده. لكن بعد الصليب، أولاد ربنا بقوا من غنم الحظيرة ... " وَأُحَرِّمُ غَنِيمَتَهُمْ لِلرَّبِّ،" ... ربنا يأخد أولاده من ايد الشيطان. وَأُحَرِّمُ غَنِيمَتَهُمْ: يعني أكرس أو أقدس.
" قُومِي وَدُوسِي يَا بِنْتَ صِهْيَوْنَ،".... وكمان يدينا سُلطان " أعطيكم سلطان أن تدوسوا الحيات والعقارب وكل قوات العدو"
هي ديه قوة ربنا، اللي بتخلينا نقاوم الشيطان بكل أعماله (أعمال الخطية والشر). ونسحق كل الأعمال الشريرة تحت أقدامنا. طبعا بقوة الصليب والفداء ووسائط الخلاص.
⪢