⪡ 1اَلآنَ تَتَجَيَّشِينَ يَا بِنْتَ الْجُيُوشِ. قَدْ أَقَامَ عَلَيْنَا مِتْرَسَةً. يَضْرِبُونَ قَاضِيَ إِسْرَائِيلَ بِقَضِيبٍ عَلَى خَدِّهِ. - التلات اصحاحات الأولي: اتكلم ميخا النبي عن الانحرافات اللي كانت داخل شعب الله. وكان كلام شديد عن الانحرافات ديه.
- الاصحاح الرابع: اتكلم عن عصر المسيا.
- الاصحاح الخامس هنا: برده هيتكلم عن عصر المسيا، بأكثر وضوح.. اصحاح جميل جدا ومُعزي. وفيه نبوات عن المسيح يسوع له المجد.
"اَلآنَ تَتَجَيَّشِينَ يَا بِنْتَ الْجُيُوشِ." ... تَتَجَيَّشِينَ: يعني البلد كلها تبقي جيش.
بعض الآباء فسر الآية ديه: علي أن الكنيسة تتسلح ضد الشيطان.
وبعض الآباء فسروها بالعكس، وقالوا: أن ده تهكم – تريقة علي أعداء الكنيسة اللي بيتجيشوا ضدها.فكأنه بيقولهم: زي المثل بتاع، أعلي ما في خيلك أركبه. اتجيشي، ورينا شطارتك.
علي أية الأحوال:
لو الكنيسة هي التي تتجيش، هتبقي نعمة ربنا هي اللي سنداها.. ولو أن الأعداء هما اللي بيتجمعوا حواليها، هنقول: احنا مش بنخاف.
"قَدْ أَقَامَ عَلَيْنَا مِتْرَسَةً." ... المترسة: عبارة عن حواجز بيحطوها في الطريق، علشان يمنعوا أن حد يعدي.
معناها: أن في حالة حرب. أقاموا علينا حرب.
"يَضْرِبُونَ قَاضِيَ إِسْرَائِيلَ بِقَضِيبٍ عَلَى خَدِّهِ." ... الضرب علي الخد، ده نوع من الاهانة. واللي هيُهان هنا، هو قاضي اسرائيل. فهنا نبوة علي ربنا والهنا ومخلصنا يسوع المسيح له المجد. لأن المسيح له المجد اتضرب علي خده. فديه نبوة عن المسيح له المجد المتألم، من أجل خلاص البشر.
"اَلآنَ تَتَجَيَّشِينَ يَا بِنْتَ الْجُيُوشِ." ... يعني ورونا، هتقدروا علي قاضي اسرائيل، المسيح يسوع له المجد وهتضربوه؟
كل ده تدبير إلهي. لأن بعدها علطول، ربنا يسوع المسيح له المجد، هيعكس الوضع ويخلي الكنيسة هي التي تنتصر.
وأوقات بنعيش الجو ده، شكلنا وكأننا مهزومين ومغلوبين ومضروبين ومُهانين. وفجأة ربنا يُمجد الكنيسة. وأعدائها يتساقطوا حواليها.
2«أَمَّا أَنْتِ يَا بَيْتَ لَحْمَِ أَفْرَاتَةَ، وَأَنْتِ صَغِيرَةٌ أَنْ تَكُونِي بَيْنَ أُلُوفِ يَهُوذَا، فَمِنْكِ يَخْرُجُ لِي الَّذِي يَكُونُ مُتَسَلِّطًا عَلَى إِسْرَائِيلَ، وَمَخَارِجُهُ مُنْذُ الْقَدِيمِ، مُنْذُ أَيَّامِ الأَزَلِ». الآية ديه أكثر وضوح في النبوة عن المسيح يسوع له المجد.
"أَمَّا أَنْتِ يَا بَيْتَ لَحْمِ" ... بيت لحم هي في اللغة العبرية. لكن في اللغة العربية هي: بيت الخبز.
ففيها نبوة عن المسيح يسوع له المجد، اللي هو خبز الحياة. اللي احنا بنأكله في صورة خبر. لكن حقيقته، لحم.
المدينة اللي اتولد فيها السيد المسيح له المجد، هي بيت لحم. بيت الخبز.
"أَفْرَاتَةَ،" ... ده الاسم القديم لبيت لحم. ومعناها: الثمر.
- وجاي منها كلمة: افرايم. يم: معناها كثير. (يم: في العبرية يعني علامة الجمع) فمعني افرايم: كثير الثمر.
- بيت لحم: أخرجت الخبز ا لحقيقي. المسيح يسوع له المجد. فهي أيضا مدينة مُثمرة. افراتة. لأن المسيح يسوع له المجد خرج منها.
- نفس الآية استخدمها معلمنا متي البشير
- واليهود كانوا عارفين كويس جدا، أن المسيح له المجد سيُولد في بيت لحم.
"وَأَنْتِ صَغِيرَةٌ أَنْ تَكُونِي بَيْنَ أُلُوفِ يَهُوذَا،" ... بين ألوف يهوذا: يعني يهوذا له ألوف من القري والمدن. فأنتِ قرية صغيرة وسط آلاف القري ديه. قرية صغيرة ملهاش قيمة.
- وفي تفسير تاني قال: القرية اللي فيها ألف عيلة أو شخص، كانوا بيعملوا لها رئيس ألف.
فالقرية ديه مكملتش ألف. علشان كده مكانش ليها وجود بين ألوف يهوذا. لكن القرية الصغيرة ديه صارت مسقط رأس السيد المسيح له المجد. بقي ليها شرف وكرامة.
وديه اشارة للنفوس البسيطة الغلبانة اللي معندهاش امكانيات كتيرة. النفوس ديه متضايقش.
"فَمِنْكِ يَخْرُجُ لِي" ... يخرج لي: الآب يتكلم. المسيح له المجد جاء للأرض، لينا، من أجل الآب. علشان يصالح بين السمائيين والأرضيين. يصالح بينا وبين الآب.
" فَمِنْكِ" ... يعني من هذة المدينة. يخرج ليا (للآب).
" فَمِنْكِ يَخْرُجُ لِي الَّذِي يَكُونُ مُتَسَلِّطًا عَلَى إِسْرَائِيلَ،" ... الخارج من مدينة صغيرة، مش محسوبة من ضمن ألوف يهوذا. سيصير مُتسلط علي اسرائيل.
داود كان زمان مُتسلط علي اسرائيل كلها. وسُليمان ابنه كمان. ومن بعد ما انقسمت المملكة، من وقتها مكانش في شخص واحد أو ملك واحد مُتسلط علي كل المملكة.
وميخا النبي، بعد داود النبي بكتير. فهو مش بيتكلم عن داود الملك والنبي. لكن بيتكلم عن نسل داود. وهنا تسلط يسوع المسيح له المجد علي اسرائيل، هو تسلُط روحي.
"وَمَخَارِجُهُ مُنْذُ الْقَدِيمِ، مُنْذُ أَيَّامِ الأَزَلِ." ... طيب ازاي هيخرج من بيت لحم، وهو مخارجه من الأزل؟ هل بيت لحم منذ الأزل؟
طبعا خروجه من بيت لحم: ده بالناسوت. بالجسد. المسيح يسوع له المجد اتولد بالجسد من العذراء أم النور.
منذ الأزل: ده اللاهوت. الله ربنا ومخلصنا يسوع المسيح له المجد، هو أزلي. وعلشان كده الآية ديه متنطبقش الا علي المسيح يسوع له المجد.
" مُتَسَلِّطًا عَلَى إِسْرَائِيلَ،" ... اسرائيل: هي العالم كله. مفيش ملك قدر يخضِع العالم كله تحت مُلكه، بكل الحب ده إلا المسيح يسوع له المجد، لأنه بيحب الكل وعاوز خلاص الكل.
3لِذلِكَ يُسَلِّمُهُمْ إِلَى حِينَمَا تَكُونُ قَدْ وَلَدَتْ وَالِدَةٌ، ثُمَّ تَرْجعُ بَقِيَّةُ إِخْوَتِهِ إِلَى بَنِي إِسْرَائِيلَ. الوالدة: هي العذراء أم النور.
ربنا هيسلم الشعب، للسبي. وأول ما المسيح يسوع له المجد يتولد بالجسد من أم النور. هيجي زمن التحرر من سبي ابليس.
"ثُمَّ تَرْجعُ بَقِيَّةُ إِخْوَتِهِ إِلَى بَنِي إِسْرَائِيلَ." ... بَقِيَّةُ إِخْوَتِهِ: هي الأمم. هيرجعوا مع بني اسرائيل.
زي ما قال السيد المسيح له المجد "وَلِي خِرَافٌ أُخَرُ لَيْسَتْ مِنْ هذِهِ الْحَظِيرَةِ (المقصود: هما الأمم)، يَنْبَغِي أَنْ آتِيَ بِتِلْكَ أَيْضًا فَتَسْمَعُ صَوْتِي، وَتَكُونُ رَعِيَّةٌ وَاحِدَةٌ وَرَاعٍ وَاحِدٌ."
" إِلَى حِينَمَا" ... يعني الكلام ده هيفضل لغاية امتي؟ السبي ده هيفضل لغاية امتي؟
لما يتولد السيد المسيح له المجد ويخلص العالم علي الصليب، فيسوع المسيح له المجد هيرجع السبي من ايد الشيطان. وكمان الأمم هيعرفوا ربنا يسوع المسيح ويأمنوا بيه.
4وَيَقِفُ وَيَرْعَى بِقُدْرَةِ الرَّبِّ، بِعَظَمَةِ اسْمِ الرَّبِّ إِلهِهِ، وَيَثْبُتُونَ. لأَنَّهُ الآنَ يَتَعَظَّمُ إِلَى أَقَاصِي الأَرْضِ. ده المسيح يسوع له المجد، الراعي.
"وَيَقِفُ" ... هنا علامة القوة. يقف: في اللغة هي يقوم. فالمسيح يسوع له المجد قائم. حتي وهو ميت بالناسوت (الجسد) كان قائم. الموتة الوحيدة اللي تخلي الميت واقف علي رجليه، هي الصليب. لكن كل الميتات التانية ، بتخلي الواحد علي الأرض.
علشان كده ربنا يسوع له المجد اختار لنفسه الصليب. علشان يكون قائم وهو ميت.
" بِقُدْرَةِ الرَّبِّ،" ... معناها: بقوة الآب. بقوة لاهوته.
"بِعَظَمَةِ اسْمِ الرَّبِّ إِلهِهِ،" ... طيب هو الآب يُعتبر إله للابن؟ ... آه طبعا. لأن السيد المسيح له المجد قال "إلهي إلهي" ... وقال " إني ذاهب الي أبي وأبيكم. والهي وإلهكم." طيب إلهه ازاي؟ الله الآب إله ربنا يسوع المسيح له المجد، لما كان يسوع له المجد في الناسوت. في الجسد.
"وَيَقِفُ وَيَرْعَى بِقُدْرَةِ الرَّبِّ،" ... وكأنه انسان عادي، بيأخد قدرة من الآب.
"بِعَظَمَةِ اسْمِ الرَّبِّ إِلهِهِ،" ... ده الله الآب.
"وَيَثْبُتُونَ." ... نتيجة رعايته، يثبّت الناس فيه. يبقوا ثابتين في ربنا.
"لأَنَّهُ الآنَ يَتَعَظَّمُ إِلَى أَقَاصِي الأَرْضِ." ... الكلام عن المسيح يسوع له المجد. وصلت عظمة ربنا يسوع المسيح له المجد لأقاصي الأرض. لكل الأرض.
5وَيَكُونُ هذَا سَلاَمًا. إِذَا دَخَلَ أَشُّورُ فِي أَرْضِنَا، وَإِذَا دَاسَ فِي قُصُورِنَا، نُقِيمُ عَلَيْهِ سَبْعَةَ رُعَاةٍ وَثَمَانِيَةً مِنْ أُمَرَاءِ النَّاسِ، "وَيَكُونُ هذَا سَلاَمًا."... هذا: اللي هو المسيح يسوع له المجد. يصير سلام.
المسيح هو سلامنا. رئيس السلام. وديه معناها: متخافش. المسيح هو سلامك. لأن المسيح يسوع له المجد جاء، يصنع السلام بصليبه. ويصالح السمائيين مع الأرضيين. ويوحد اليهود والأمم.
"إِذَا دَخَلَ أَشُّورُ فِي أَرْضِنَا،" ... آشور: اللي هما الأعداء. أو اشارة للأعداء. فاذا دخلوا الأعداء عندنا في الكنيسة، منخافش. عندنا سلام.
"وَإِذَا دَاسَ فِي قُصُورِنَا،" ... لو العدو دخل، وداس علي القصور بتاعتنا.
وده حصل حرفيا: لما جيش سنحاريب ملك آشور، حاصر أورشليم في أيام الملك حزقيا. وكان مُعاصر ليه، اشعياء النبي. وحزقيا الملك جري علي الهيكل ، ونشر رسايل سنحاريب قدام ربنا في الهيكل. وقال لاشعياء النبي: صلي لإلهك. وربنا طمن حزقيا الملك. وأرسل ملاكه وقتل 185000 جندي من جنود جيش أشور. من غير ما حد حارب خالص.
سنحاريب ملك آشور اللي هو: الشيطان. عاوز يدوس في قصورنا. يعني يدخل جسدنا، يستولي علي حواسنا. لكن اللي ماسك في ربنا له المجد ميخافش.
في سر المعمودية والميرون: كل جسدنا تقدس لربنا له المجد. فاللي يسمك في ربنا، ويحافظ علي قداسة جسده. الشيطان المُتمثل في آشور ميقدرش يدخل أرضنا.
فلازم دايما نصلي. وتكون علاقتنا حلوة وقوية بربنا يسوع المسيح له المجد. زي ما عمل حزقيا الملك، صلي لربنا وحط رسالة الشيطان علي المذبح قدام ربنا، في الهيكل.
"نُقِيمُ عَلَيْهِ سَبْعَةَ رُعَاةٍ وَثَمَانِيَةً مِنْ أُمَرَاءِ النَّاسِ،" ... رقم 7: يُشير للكمال. فهنا كمال الرعاية. سبعة من الرعاة.
وإذا عندنا 7 رؤساء ملايكة ... يبقي الملايكة بيحاوطوا بالكنيسة ويرعوها. زي في سفر الرؤيا: 7 كنايس ليها 7 رعاة. ورقم 8: يرمز للأبدية.
" أُمَرَاءِ النَّاسِ،" ... الأمراء، دول ملوك.
يبقي في رعاية في الكنيسة، علي الأرض. وده كمال الرعاية. وفي حياة أبدية، نُملك فيها للأبد. وهنبقي أمراء.
بمعني: قدام جيش آشور (الأعداء – الشيطان) الانسان اللي هيسلك بالكمال. يقدر أنه ينجو منه، ويوصل للحياة الأبدية. متخافش من آشور. أنت ابن الملك. آشور ملهوش سلطان علينا. لأن ربنا له المجد حررنا من ايده وسلطانه.
6فَيَرْعَوْنَ أَرْضَ أَشُّورَ بِالسَّيْفِ، وَأَرْضَ نِمْرُودَ فِي أَبْوَابِهَا، فَيَنْفُذُ مِنْ أَشُّورَ إِذَا دَخَلَ أَرْضَنَا وَإِذَا دَاسَ تُخُومَنَا. السبعة رعاة والثمانية أمراء:
"فَيَرْعَوْنَ أَرْضَ أَشُّورَ بِالسَّيْفِ،"... أرض آشور: معناها أرض الشيطان. والناس المسبيين عند الشيطان.
الكنيسة هترعاهم: يعني هتجيبهم من ايد الشيطان.
" بِالسَّيْفِ،" ... ايه هو سيف الكنيسة؟ السيف هو كلمة ربنا. الكتاب المقدس قال كده. "كلمة الله حية وفعالة وأمضي من كل سيف ذو حدين." الكنيسة بترعي الشعوب بكلمة الله.
طيب ليه كلمة ربنا اتسمت سيف؟ لما يقولوا فلان كلمته زي السيف. يعني كلمته واحدة. مفيهاش التواء. فكلام ربنا زي السيف.
"وَأَرْضَ نِمْرُودَ فِي أَبْوَابِهَا،" ... أبواب المدن: ترمز للرئاسات.
لأن كان القاضي يجلس في باب المدينة، علشان يُحكم للناس. والأبواب: ترمز للسلطان.
المدينة ليها سور، وليها أبواب وعليها حراسة. فالواحد مش هيعرف يدخلها. يوم لما الواحد يُملك الباب، معناها أنه مَلك المدينة كلها.
المعني: هنتسلط علي آشور (الشيطان) بالسيف، اللي هو كلمة الله.
نمرود: اتذكر في سفر التكوين ص ١٠ وهو رمز لبابل. وبابل: ترمز للكبرياء. وكانوا عاوزين يبنوا برج رأسه، برأس السماء. وفاكرين ان محدش هيقدر عليهم. فيرمز للكبرياء والشر.
ولأن شعب الله سُبيّ لبابل. فبقت بابل رمز للشيطان الذي يسبي بالكبرياء. فبيقول: اذا كان آشور هيجيلنا، فالكنيسة هتتسلط عليه (علي الشيطان)، بكلمة الله.
"فَيَنْفُذُ مِنْ أَشُّورَ إِذَا دَخَلَ أَرْضَنَا وَإِذَا دَاسَ تُخُومَنَا." ... مش هيقدر علينا.
كل اللي قاموا علي الكنيسة، ولا ليهم وزن ولا قيمة. ومهما كانوا عالين ومتكبرين وهددوا وقالوا، ومع أننا بنخاف ونقول يارب استر علي الكنيسة. لكن في لحظة بنلاقي الكل بيقع. والكنيسة دايما رافعة راسها.
الكنيسة دايما بقوة ربنا، واقفة علي ارض صلبة. مسنودة بنعمة الهية.
7وَتَكُونُ بَقِيَّةُ يَعْقُوبَ فِي وَسَطِ شُعُوبٍ كَثِيرِينَ كَالنَّدَى مِنْ عِنْدِ الرَّبِّ، كَالْوَابِلِ عَلَى الْعُشْبِ الَّذِي لاَ يَنْتَظِرُ إِنْسَانًا وَلاَ يَصْبِرُ لِبَنِي الْبَشَرِ. يعني: المسيحين هيكونوا زي الندي.
" بَقِيَّةُ يَعْقُوبَ" ... كانت موجودة في الاصحاح اللي فات. "ترجع بقية اخواته الي بني اسرائيل."
يعني مهما حصل من ضلال، لازم في الأخر بقية قاعدة، أمينة لربنا.
زي التلاميذ والرسل. اللي انتشروا في كل العالم، علشان يكرزوا بخلاص المسيح يسوع له المجد.
" كَالنَّدَى" ... الندي بينزل هادي و بيروي الزرع.
" مِنْ عِنْدِ الرَّبِّ،" ... معناها: الخدمة والنعمة والتعليم، كله بتاع ربنا. مش بمجهودنا.
"كَالْوَابِلِ عَلَى الْعُشْبِ " ... الوابل: يعني الأمطار الغزيرة.
"الَّذِي لاَ يَنْتَظِرُ إِنْسَانًا" ... هل المطر قاعد مستني لما الانسان يقوله انزل يا مطر؟ المطر لا بيستأذن ولا بيستني.
"وَلاَ يَصْبِرُ لِبَنِي الْبَشَرِ." ... يعني: هل المطر جاهز وعاوز ينزل، والناس نايمة. فهو مستني لما حد يقوله: تعالي وانزل يا مطر؟ فالمطر يقول: انا صابر؟
فهنا بيوضح: أن المطر بينزل من غير ما يستأذن.
تعليم الكنيسة: هينزل زي الوابل. ويغرق الأرض ويرويها ويشبعها. ومش باذن الانسان. لكن بنعمة من عند الله.
يعني: زي ما ربنا بيدي المطر والندي من غير ايد بشر. الله هيدي القوة للكرازة بدون القدرة الانسانية. احنا مجرد أدوات في ايد ربنا.
الخادم: أداة في ايد ربنا. " ليس الغارس شئ. ولا الساقي شئ. بل الله الذي يُنمي."
8وَتَكُونُ بَقِيَّةُ يَعْقُوبَ بَيْنَ الأُمَمِ فِي وَسَطِ شُعُوبٍ كَثِيرِينَ كَالأَسَدِ بَيْنَ وُحُوشِ الْوَعْرِ، كَشِبْلِ الأَسَدِ بَيْنَ قُطْعَانِ الْغَنَمِ، الَّذِي إِذَا عَبَرَ يَدُوسُ وَيَفْتَرِسُ وَلَيْسَ مَنْ يُنْقِذُ. صحيح هما وحوش. بس الكنيسة أسد.
في الغابة وحوش كتير. بس ميقدروش علي الأسد.
الكنيسة في أية 7: زي الندي. وهنا زي الأسد. طيب ازاي؟ زي المسيح يسوع له المجد بالظبط. علي أد ماهو طيب وجميل. لكن أسد خارج من سبط يهوذا.
وكل واحد فينا المفروض يكون كده. طيب ولذيذ وهادي ولين ووديع. بس الموضوع لما يجي عند المسيح له المجد والشهادة للمسيح والايمان، الواحد المفروض يبقي أسد.
زي ما شوفنا شبابنا في ليبيا، كانوا أسود.
"كَشِبْلِ الأَسَدِ بَيْنَ قُطْعَانِ الْغَنَمِ،" ... اللي عاملين نفسهم وحوش. هيبقوا زي الغنم، قدام شِبل الكنيسة.
"الَّذِي إِذَا عَبَرَ يَدُوسُ وَيَفْتَرِسُ وَلَيْسَ مَنْ يُنْقِذُ." ... قوة الكنيسة تُحطم قوة الشيطان. كان نفسه أسد، اتحطم قدام الكنيسة وقوة ربنا له المجد.
معني الآية: لما يقول لنا ان الكرازة والتلاميذ عاملين زي الندي علي ورق الشجر. ده مش معناه أنهم ضعفاء. لكن هنا عندهم قوة، مصدرها ربنا يسوع المسيح له المجد.
والقديس بولس قال "لأن أسلحتنا قادرة بالله علي هدم حصون." ... المقصود: الأسلحة الروحية.
لأننا أولاد الأسد الخارج من سبط يهوذا ... " كَالأَسَدِ بَيْنَ وُحُوشِ الْوَعْرِ،" ... مش فريسة سهلة في ايد الشيطان. لكن بقوة ربنا، نقدر ندوس عدونا الشيطان.
9لِتَرْتَفِعْ يَدُكَ عَلَى مُبْغِضِيكَ وَيَنْقَرِضْ كُلُّ أَعْدَائِكَ. الاعداء: هما أعداء المسيح يسوع له المجد.
احنا كمسيحين: ملناش أعداء غير الشيطان وأعوانه.
في القداس بنقول: قم أيها الرب الاله. وليتبدد جميع أعدائك. وليهرب من أمام وجهك كل مبغضي اسمك القدوس. ليرتفع يدك علي مبغضيك. وينقرض كل أعدائك.
10«وَيَكُونُ فِي ذلِكَ الْيَوْمِ، يَقُولُ الرَّبُّ، أَنِّي أَقْطَعُ خَيْلَكَ مِنْ وَسَطِكَ، وَأُبِيدُ مَرْكَبَاتِكَ. ربنا شايف أن كل واحد عنده حاجات غريبة بيعتمد عليها. وبتكون الحاجات ديه بعيدة عن ربنا تماما.
"أَنِّي أَقْطَعُ خَيْلَكَ مِنْ وَسَطِكَ، وَأُبِيدُ مَرْكَبَاتِك." ... فربنا بيقطع كل حاجة بنتكل عليها. علشان نتكل علي ربنا وبس. ويكون نظرنا مركز علي ربنا وبس. علشان كده أحيانا ربنا يصنفرنا. علشان عنينا تكون علي ربنا وبس.
وممكن كمان الكلام ده للعدو:
ربنا يقول للعدو، كل القوة اللي أنت متكل عليها. هأشيلها في لحظة. زي ما حصل مع جيش آشور. وملاك الرب خلص علي 185000 من جيش سنحاريب.
11وَأَقْطَعُ مُدُنَ أَرْضِكَ، وَأَهْدِمُ كُلَّ حُصُونِكَ. معناها: أن ربنا عاوزنا نتكل عليه هو وبس.
"وَأَقْطَعُ مُدُنَ أَرْضِكَ،" ... يعني ميبقاش كل همنا هو الأرض. هنبني ايه؟ هنحوش ايه؟
ربنا عاوز تفكيرنا في السماء وبس. مش يبقي كل همنا الأرضيات. مش غلط اننا نفكر أو نتبسط علي الأرض. بس ميبقاش هو ده كل تركيزنا وننسي ربنا. والحياة الأبدية.
"وَأَهْدِمُ كُلَّ حُصُونِكَ." ... لأن الحصن الوحيد لينا، هو ربنا يسوع المسيح له المجد.
منتكلش لا قوتنا الجسدية ولا علي نفسنا ولا علي أي حاجة أو حد. لكن ربنا يكون هو الوحيد سندنا وبس.
وممكن الكلام برده للأعداء:
أنت فرحان بعدد المدن اللي بتحكمها؟ والأسوار اللي حواليك؟
أنا هأهد لك كل ده. مفيش حاجة تقدر تقف قدام ربنا له المجد.
12وَأَقْطَعُ السِّحْرَ مِنْ يَدِكَ، وَلاَ يَكُونُ لَكَ عَائِفُونَ. في سفر أعمال الرسل: لما بدأت الكرازة تنتشر. كل السحرة، جمعوا كتبهم وحرقوها.
"وَلاَ يَكُونُ لَكَ عَائِفُونَ." ... العائفون: العيافة، يعني اللي بيدّعي النبوة بأمور مستقبلية بقوة الشيطان.
وممكن الكلام علي الأعداء:
لأن الأمم كانوا بيعتمدوا علي السحرة والمُنجمين، في كل تحركاتهم.
13وَأَقْطَعُ تَمَاثِيلَكَ الْمَنْحُوتَةَ وَأَنْصَابَكَ مِنْ وَسَطِكَ، فَلاَ تَسْجُدُ لِعَمَلِ يَدَيْكَ فِي مَا بَعْدُ. ربنا هينقينا من الأوثان اللي بنعتمد عليها. واللي جوة قلب كل واحد فينا.
في ألهة الانسان بيعتمد عليها. سواء مال - مركز – شهرة – شهوات وهكذا.....
"وَأَنْصَابَكَ مِنْ وَسَطِكَ،" ... الأنصاب: زي السارية. بيحطوا عليها الالهة بتاعتهم ويسجدوا لهم.
"فَلاَ تَسْجُدُ لِعَمَلِ يَدَيْكَ فِي مَا بَعْدُ." ... هأشيل منك كل ده.
14وَأَقْلَعُ سَوَارِيَكَ مِنْ وَسَطِكَ وَأُبِيدُ مُدُنَكَ. المدن: اللي كانت مُخصصة لعبادة الأوثان. ربنا هيمحيها
خالص. والسواري اللي كانوا بيحطوا عليها الأصنام علشان يعبدوها. ربنا هيشيل وينضف كل ده.
15وَبِغَضَبٍ وَغَيْظٍ أَنْتَقِمُ مِنَ الأُمَمِ الَّذِينَ لَمْ يَسْمَعُوا». في ناس تسمع وتتعلم وتخاف خوف مقدس.
ويسلموا نفسهم لربنا. ويقولوا لربنا: كل حاجة فيا مش عجباك شيلها ونقيني دايما يارب.
وفي حد تاني: يعنِد مع ربنا. ودول هما ... " الأُمَمِ الَّذِينَ لَمْ يَسْمَعُوا."
فربنا يعاقبهم ويغضب عليهم. لأنهم مش عاوزين يتوبوا.
واللي يرفض خلاص ربنا. ده يستحق الدينونة والغضب الالهي.
ربنا له المجد بيدينا اننا نكون أعضاء حية في كنيسته. مثمرين. نحيا تحت التينة والكرمة بفرح. لنأتي بثمر كتير.
⪢