⏭ 1تَجَمَّعِي وَاجْتَمِعِي يَا أَيَّتُهَا الأُمَّةُ غَيْرُ الْمُسْتَحِيَةِ. - ابتدي يرسم في الاصحاح التاني، طريق للنجاة. في رجاء إننا ممكن ننجو من تلك الدينونة.
- الآيات من 1 لـ 3: اللي عاوز يختبئ في الله، ملهوش غير طريق واحد. هو طريق التوبة. مش التوبة الشكلية. لكن التوبة الحقيقية: من القلب بجد. علاقة حقيقية مع الله. مش مجرد ممارسات شكلية.
هنا صفنيا النبي حط خطوات للتوبة:
"يَا أَيَّتُهَا الأُمَّةُ غَيْرُ الْمُسْتَحِيَةِ." ... غَيْرُ الْمُسْتَحِيَةِ: يعني اللي مش بتتكسف من حاجة. أمة غير مؤدبة. علشان كده بقت أمة غير مرغوب فيها من ناحية ربنا. الكلام عن أورشليم.
الإنسان بقي بيعمل الخطية والشر، ومش بيتكسف. بالعكس بيفتخر بالخطية. وطبعا هنلاقي دلوقتي بتوع الإلحاد والمثلية، بنفس الأسلوب ده، مفتخرين باللي هما بيعملوه. وفرحانين. وبيطالبوا أن يبقي ليهم حقوق.
بداية النجاة: "تَجَمَّعِي وَاجْتَمِعِي" ... معناها ببساطة: لمي نفسك. راجعي نفسك.. لم أفكارك ومشاعرك وحواسك. جمع حياتك المتبهدلة ديه. كلمة بتوديك وكلمة بتجيبك. شهوة بتوديك وشهوة بتجيبك.
فالمفروض الواحد يقعد مع نفسه يحاسب نفسه. يمكن يفتكر أو يوصل للخطية اللي جواه. فربنا بيقول لكل واحد فينا: أجلس مع نفسك وجمّع نفسك. وبلاش عدم الحياء اللي عايش فيه ده يا انسان. ومفتخر بالخطية. راجع حياتك وكل حاجة فيك. وافحص كل حاجة جوالك: مشاعرك – أفكارك – احاسيسك...
2قَبْلَ وِلاَدَةِ الْقَضَاءِ. كَالْعُصَافَةِ عَبَرَ الْيَوْمُ. قَبْلَ أَنْ يَأْتِيَ عَلَيْكُمْ حُمُوُّ غَضَبِ الرَّبِّ، قَبْلَ أَنْ يَأْتِيَ عَلَيْكُمْ يَوْمُ سَخَطِ الرَّبِّ. ربنا بيقول: ألحقي تجمعي واجتمعي. "قَبْلَ وِلاَدَةِ الْقَضَاءِ." ... قبل ما الوقت يفوت. لأن لو الوقت والقضاء صدر، وأُغلق الباب. فمهما تقعد تخبط علي الباب، الباب مش هيفتح. ألحق نفسك قبل ما تضيع الفرصة.
توبي يا نفسي ما دُمتي في الأرض ساكنة. ... طول ما احنا عايشين، لسنا قدامنا فرصة للتوبة.
"كَالْعُصَافَةِ عَبَرَ الْيَوْمُ." ... الْعُصَافَةِ: هو القش. الريح بتطيره، لأنه خفيف. لأن اليوم ده هيعبر بسرعة جدا. زي ما الريح بتعدي سريعة. و مين هيقدر يثبت قدام ربنا له المجد؟
"قَبْلَ أَنْ يَأْتِيَ عَلَيْكُمْ حُمُوُّ غَضَبِ الرَّبِّ، قَبْلَ أَنْ يَأْتِيَ عَلَيْكُمْ يَوْمُ سَخَطِ الرَّبِّ." ... ألحق نفسك. فهنا عاوز يقولهم: الفرصة قدامكم، استغلوها قبل ما يجي عليكم غضب ربنا له المجد.3أُطْلُبُوا الرَّبَّ، يَا جَمِيعَ بَائِسِي الأَرْضِ الَّذِينَ فَعَلُوا حُكْمَهُ. اطْلُبُوا الْبِرَّ. اطْلُبُوا التَّوَاضُعَ. لَعَلَّكُمْ تُسْتَرُونَ فِي يَوْمِ سَخَطِ الرَّبِّ. آية جميلة.
"أُطْلُبُوا الرَّبَّ،"... اطلب ربنا. كل واحد فينا يطلب ربنا. نقوله: أنا عاوزك يارب. وان كنت أنا ضيعت نفسي، وزعت مشاعري، وحواسي. لكن أنت يارب تجمع متفرقي إسرائيل. يارب أنت قادر تجمع التشتت اللي موجود جوايا.
"يَا جَمِيعَ بَائِسِي الأَرْضِ الَّذِينَ فَعَلُوا حُكْمَهُ." ... بَائِسِي الأَرْضِ: معناها المنسحقين – المتواضعين. يعني خلاص مبقاش ليهم رجاء في الأرض. بقي رجائهم في ربنا وفي السماء.
" الَّذِينَ فَعَلُوا حُكْمَهُ." ... يعني اللي بيعملوا وصايا وأحكام ربنا. وبيجاهدوا فيها.
طلب الرب: مش مجرد اني أقول: تعالي يارب. وبس علي كده. لكن كمان اني أعمل وصاياه.
"اطْلُبُوا الْبِرَّ." ... البر: يعني الصح.. اطلب الصح. الواحد يعيش صح. التصرفات – الأفكار - المشاعر - الكلمات، كله يكون صح. حياتك كلها تكون صح.
احنا محتاجين ضمير صح. صاحي. مش احنا نعمل الغلط، ونبرر الغلط لنفسنا.
"اطْلُبُوا التَّوَاضُعَ." ... ننحني تحت ايد ربنا. نقوله: يارب محتاجين ليك.
بلاش الواحد يكون متكبر، ويقول: "إِنِّي أَنَا غَنِيٌّ وَقَدِ اسْتَغْنَيْتُ، وَلاَ حَاجَةَ لِي إِلَى شَيْءٍ، وَلَسْتَ تَعْلَمُ أَنَّكَ أَنْتَ الشَّقِيُّ وَالْبَئِسُ وَفَقِيرٌ وَأَعْمَى وَعُرْيَانٌ."
"لَعَلَّكُمْ تُسْتَرُونَ فِي يَوْمِ سَخَطِ الرَّبِّ." ... اذا كانت التوبة هي ترك الشر. وده الجانب السلبي في حياة التوبة. لكن الأجمل هو الجانب الإيجابي، أن التوبة تتحول لطلب البر. الصح. التواضع. وهي ديه العلاقة والعِشرة الحقيقية مع ربنا.
لو كل واحد عاوز يبقي اسمه صفنيا، ياريت يروح ويستخبي في ربنا. الله يُريد أن يستر ويُخبئ.
فلازم نطلب من ربنا، البر والتواضع.
وشوفنا أن التوبة هي الطريق الوحيد اللي ممكن الواحد يتستر فيه في يوم الدينونة. وإذا كان مفيش إنسان بلا خطية، (كل واحد فينا بيغلط). أيضا لا توجد خطية بلا غفران. كل خطية قابلة للغفران. المهم نقدم توبة حقيقية. لأن لا يوجد غفران بلا توبة.
4لأَنَّ غَزَّةَ تَكُونُ مَتْرُوكَةً، وَأَشْقَلُونَ لِلْخَرَابِ. أَشْدُودُ عِنْدَ الظَّهِيرَةِ يَطْرُدُونَهَا، وَعَقْرُونُ تُسْتَأْصَلُ. ابتدي ربنا له المجد يُعلن لصفنيا النبي، عن الناس اللي حوالين شعبه. المُحطين بأورشليم، اللي هي عاصمة مملكة يهوذا. زي الفلسطينيين – بني عمون – بني موآب – والكوشيين. ودول شعوب ملهومش عهد بينهم وبين الله.
وإذا كان شعب الله، اللي في عهد بين الله وبينهم، لا يسلموا من الدينونة. ولا يمكن أن يُقبلوا إلا من خلال التوبة.
فكم وكم الناس اللي ملهوش عهد مع الله. دول محتاجين توبة بالأكثر. علشان كده اتكلم عن منطقة الفلسطينيين، وكانت متقسمة لعدة مناطق.
"لأَنَّ غَزَّةَ تَكُونُ مَتْرُوكَةً،"... أول منطقة، هي غزة. وديه هتكون متروكة. يعني هيحصل هجوم عليها وشعبها هيهرب.
"وَأَشْقَلُونَ لِلْخَرَابِ." ... هتتدمر. وديه فعلا خرّبها الإسكندر الأكبر.
"أَشْدُودُ عِنْدَ الظَّهِيرَةِ يَطْرُدُونَهَا،" ... دايما الحرب بتبدي الصبح بدري. فمش هتلحق حتي تقاوم. يدوب هيبتدوا الحرب الصبح، وعلي الضهر الأعداء يستولوا عليها.
عِنْدَ الظَّهِيرَةِ: معناها أن في حر، تعب. ده الوقت اللي الانسان بيكون محتاج يستريح فيه. ففي الوقت ده، الإنسان يتطرد.. فديه فترة أن عدو الخير يهجم. علشان كده عروس النشيد تقول لربنا له المجد " خبرني يا من تُحبه نفسي. أين ترعي. أين تربض عند الظهيرة؟ "
"وَعَقْرُونُ تُسْتَأْصَلُ." ... كأنهم بيشلوها من مكانها.. ده اللي عاوز يعمله الشيطان فينا. ربنا له المجد مثبتنا في كنيسته، أغصان في الكرمة الحقيقية. والشيطان عاوز يشيلنا من مكاننا.. لأن الأعداء والممالك ديه بترمز في الأخر للشيطان.
5وَيْلٌ لِسُكَّانِ سَاحِلِ الْبَحْرِ أُمَّةِ الْكِرِيتِيِّينَ! كَلِمَةُ الرَّبِّ عَلَيْكُمْ: «يَا كَنْعَانُ أَرْضَ الْفِلِسْطِينِيِّينَ، إِنِّي أَخْرِبُكِ بِلاَ سَاكِنٍ». سَاحِلِ الْبَحْرِ: المقصود بيه، المواني والبلاد اللي علي ساحل البحر الأبيض المتوسط. فلسطين لغاية مصر.
" أُمَّةِ الْكِرِيتِيِّينَ!" ... اتقال عليهم كده، علشان ديه مناطق تجارية ومواني بحرية. فناس كتير من الغرب جم سكنوا في الأماكن ديه.
"يَا كَنْعَانُ أَرْضَ الْفِلِسْطِينِيِّينَ، إِنِّي أَخْرِبُكِ بِلاَ سَاكِنٍ." ... كله هيبقي خراب. الكل هيقع تحت الدينونة.
لأن مفيش فرق بين خطية بيعملها شعب الله. وبين خطية بيعملها إنسان غريب عن شعب الله.
الكل خطيته تستوجب الدينونة، لو مفيش توبة واعتراف.
6وَيَكُونُ سَاحِلُ الْبَحْرِ مَرْعًى بِآبَارٍ لِلرُّعَاةِ وَحَظَائِرَ لِلْغَنَمِ. "وَيَكُونُ سَاحِلُ الْبَحْرِ"... وبدل ما هتكون مدن تجارية وساحلية.
"مَرْعًى بِآبَارٍ لِلرُّعَاةِ وَحَظَائِرَ لِلْغَنَمِ." ... هتتقلب وتبقي مراعي للخرفان. وده معناه: أنها هتبقي بلاد مهجورة.
7وَيَكُونُ السَّاحِلُ لِبَقِيَّةِ بَيْتِ يَهُوذَا. عَلَيْهِ يَرْعَوْنَ. فِي بُيُوتِ أَشْقَلُونَ عِنْدَ الْمَسَاءِ يَرْبُضُونَ، لأَنَّ الرَّبَّ إِلهَهُمْ يَتَعَهَّدُهُمْ وَيَرُدُّ سَبْيَهُمْ. في بقية ليها نجاة. وطبعا البقية ديه، هي اللي استترت واختبأت في ربنا. مش هيكون ليها الهلاك. دول البقية التقية.. فبيقول: ساحل البحر، هيبقي لبقية يهوذا.
"عَلَيْهِ يَرْعَوْنَ. فِي بُيُوتِ أَشْقَلُونَ عِنْدَ الْمَسَاءِ يَرْبُضُونَ،" ... الصبح بيرعوا. وفي المساء يربضون: يعني يستريحوا.
الساحل هيبقي لبيت يهوذا. وفي بيت أشقلون يربضون. وديه نبوة: أن أشقلون اللي من ضمن بلاد الفلسطينيين، وكانوا بيقاوموا شعب الله. ديه هتبقي بلاد خاضعة لشعب الله.
الإسكندر الأكبر لما خَرّب البلاد ديه، جت بعد كده الناس اللي سكنت فيها، في أيام حُكم المكابيين .
وقتها المكابيين فرضوا الختان والتهود علي كل سكان الممالك ديه. فالبلاد ديه بقت خاضعة لليهود.
"لأَنَّ الرَّبَّ إِلهَهُمْ يَتَعَهَّدُهُمْ وَيَرُدُّ سَبْيَهُمْ." ... في ناس ربنا بيتعهدهم. ربنا بيحفظهم في وقت الضيق. ووقت الدينونة. المختبئين فيه. البقية الباقية، اللي تابت.
فاذا كان خراب، نتيجة دينونة علي كل العالم. لكن في اللي اختبر الخراب، بس كان قلبه مفتوح ناحية ربنا. الخراب ده بالنسبة لناس كتير، بيفجر قصص توبة عجيبة جدا.
فهنا ربنا بيقول: أنه هيتعهد البقية الباقية التائبة. وهيحفظهم وهيرد سبيهم. ويخصلهم من كل آثار الخطية. وأي آثار للدمار اللي أصابهم.
8«قَدْ سَمِعْتُ تَعْيِيرَ مُوآبَ وَتَجَادِيفَ بَنِي عَمُّونَ الَّتِي بِهَا عَيَّرُوا شَعْبِي، وَتَعَظَّمُوا عَلَى تُخُمِهِمْ. دول شعبين تانين، غير الفلسطينيين. ودول برده كانوا حوالين شعب الله. وكانوا بيعييروا شعب إسرائيل. ودول من نسل لوط من بناته الاتنين. وكانوا في عداوة مع شعب الله.
"قَدْ سَمِعْتُ" ... ربنا بيقول أنه سمع التعيير.
ربنا مش بيسكت للناس اللي بتعيير أولاده.. في بعض الأحيان ناس تعيير اللي عايشين في حياة روحية مع الله. ويقولولهم: بلاش الدروشة اللي انت عايش فيها ديه. أنت أخدت ايه من عيشتك مع ربنا. من صلاتك وصومك.
فهنا ربنا سمع تعيير موآب وبني عمون، لشعبه. "تعييرات مُعيرك، وقعت عليا."
الناس اللي بتستهزء بالحياة الروحية. ربنا مش هيسيبهم ولا هيعدي التعيير والاستهزاء ده.
"وَتَعَظَّمُوا عَلَى تُخُمِهِمْ." ... يعني حاولوا يعتدوا علي حدود (تخوم) مملكة يهوذا.
فربنا قالهم: أنا سمعت كل التعييرات ديه.
9فَلِذلِكَ حَيٌّ أَنَا، يَقُولُ رَبُّ الْجُنُودِ إِلهُ إِسْرَائِيلَ، إِنَّ مُوآبَ تَكُونُ كَسَدُومَ وَبَنِي عَمُّونَ كَعَمُورَةَ، مِلْكَ الْقَرِيصِ، وَحُفْرَةَ مِلْحٍ، وَخَرَابًا إِلَى الأَبَدِ. تَنْهَبُهُمْ بَقِيَّةُ شَعْبِي، وَبَقِيَّةُ أُمَّتِي تَمْتَلِكُهُمْ». سدوم وعمورة، اللي أُحرقت بالنار والكبريت.
بني موآب وبني عمون: كانوا عايشين في دايرة الأردن. لكن دلوقتي ملهوش وجود نهائي. وبقوا زي شعب سدوم وعمورة، يعني ملهومش أي ذِكر. انتهوا.
إنسان العالم، اللي عايش في العالم. وبيعيير أولاد الله، اللي عايشين في الحياة الروحية. ده مش بيبقي ليه وجود بعد كده.
"مِلْكَ الْقَرِيصِ،" ... القريص: نبات بري. ملهوش أي قيمة.
"وَحُفْرَةَ مِلْحٍ، وَخَرَابًا إِلَى الأَبَدِ." ... بدل ما فيها بيوت وناس عايشين وزراعة. تبقي عبارة عن نبات شوكي. صحراوي. وحُفر مياه، بتطلع مياه مالحة. مش بتطلع مياه عذبة.
وده حال الإنسان اللي عايش في الخطية، بعيد عن ربنا. مفيش في حياته غير الشوك، بيأذي نفسه وبيأذي غيره. ورافض أنه يرتوي من المياة العذبة. رافض يرتوي من المسيح يسوع له المجد والروح القدس. اللي هو أنهار ماء حي. فبيبقي عبارة عن حفرة ماء مالحة.
"تَنْهَبُهُمْ بَقِيَّةُ شَعْبِي، وَبَقِيَّةُ أُمَّتِي تَمْتَلِكُهُمْ." ... الناس اللي عايشين معايا. اللي هما شعبي.
والكلام ده اتحقق في كنيسة العهد الجديد. أن الأمم دخلوا في الإيمان.
10هذَا لَهُمْ عِوَضُ تَكَبُّرِهِمْ، لأَنَّهُمْ عَيَّرُوا وَتَعَظَّمُوا عَلَى شَعْبِ رَبِّ الْجُنُودِ. لما الإنسان الغير روحي، يستهزأ بالإنسان الروحي، ابن ربنا. كأنه بيعادي رب الجنود نفسه.
"هذَا لَهُمْ عِوَضُ تَكَبُّرِهِمْ،"... الكبرياء اوحش خطية.
"لأَنَّهُمْ عَيَّرُوا وَتَعَظَّمُوا عَلَى شَعْبِ رَبِّ الْجُنُودِ." ... تَعَظَّمُوا: يعني تكبروا علي شعب ربنا. وعيروا شعب ربنا.
11الرَّبُّ مُخِيفٌ إِلَيْهِمْ، لأَنَّهُ يُهْزِلُ جَمِيعَ آلِهَةِ الأَرْضِ، فَسَيَسْجُدُ لَهُ النَّاسُ، كُلُّ وَاحِدٍ مِنْ مَكَانِهِ، كُلُّ جَزَائِرِ الأُمَمِ. كل الناس اللي عبدوا: المال – الشهوة - الجسد - المركز – الإلحاد – الذات ... كل ديه آلهة. كله هينتهي.
مخافة ربنا له المجد هتبقي علي كل الأرض. وكل الأمم هيسجدوا لربنا له المجد.
"فَسَيَسْجُدُ لَهُ النَّاسُ، كُلُّ وَاحِدٍ مِنْ مَكَانِهِ،" ... ومش هيبقي غير إله واحد، كل الناس هتسجد له. الكل يخضع للإله الواحد. ربنا يسوع المسيح له المجد.
"كُلُّ جَزَائِرِ الأُمَمِ." ... هيجي وقت، الله يَسود علي الأمم. والكل يخضع له. وده حصل فعلا في كنيسة العهد الجديد.
كل نبوات الخراب والدمار ديه، صفنيا النبي بيتكلم عنها، مش علشان يخلي شعبه ييأس. لكن علشان يدفعهم للتوبة ويشجعهم انهم يستتروا ويختبئوا في ظل الله.
12«وَأَنْتُمْ يَا أَيُّهَا الْكُوشِيُّونَ. قَتْلَى سَيْفِي هُمْ». دول ناس بشرتهم سمراء. اللي في اثيوبيا. وساعات يقصد بيها أهل مصر. لأن كانت الحبشة ومصر في وحدة واحدة.
"قَتْلَى سَيْفِي هُمْ." ... سَيْفِي: المقصود بيه نبوخذنصّر.. اللي ربنا له المجد أداله السماح أنه يدخل كوش (اثيوبيا).
13وَيَمُدُّ يَدَهُ عَلَى الشِّمَالِ وَيُبِيدُ أَشُّورَ، وَيَجْعَلُ نِينَوَى خَرَابًا يَابِسَةً كَالْقَفْرِ. يمد يده: الكلام برده علي نبوخذنصّر.
"وَيَجْعَلُ نِينَوَى خَرَابًا يَابِسَةً كَالْقَفْرِ." ... نينوي: كانت عاصمة آشور. وكانت من الممالك الغنية جدا. وليها مجد وتاريخ وشهرة.
وفعلا نبوخذنصّر حطم مملكة آشور.
14فَتَرْبُضُ فِي وَسَطِهَا الْقُطْعَانُ، كُلُّ طَوَائِفِ الْحَيَوَانِ. اَلْقُوقُ أَيْضًا وَالْقُنْفُذُ يَأْوِيَانِ إِلَى تِيجَانِ عُمُدِهَا. صَوْتٌ يَنْعِبُ فِي الْكُوَى. خَرَابٌ عَلَى الأَعْتَابِ. لأَنَّهُ قَدْ تَعَرَّى أَرْزِيُّهَا. كل مرة يتكلم ويقول: تبقي خراب، ويسكن فيها الحيوان.
الناس اللي عاشوا في عيشة حيوانية وشهوات حيوانية، سواء في تصرفاتهم أو أفكارهم أو أفعالهم. دول عاشوا علي مستوي الحيوان، العيشة الحيوانية الشهوانية.
فكانت أرضهم خراب. والحيوان عاش مكانهم، في أرضهم. لأن بتصرفاتهم وأفعالهم وصلوا للحال ده. حبوا أن الحيوان اللي فيهم وجواهم، هو اللي يعيش. مش الإنسانية ولا الروحانية هي اللي تعيش.
"كُلُّ طَوَائِفِ الْحَيَوَانِ. اَلْقُوقُ أَيْضًا وَالْقُنْفُذُ يَأْوِيَانِ إِلَى تِيجَانِ عُمُدِهَا." ... اَلْقُوقُ: غالبا هو نوع من أنواع البجع. (لاويين 15: بيتكلم عن الطيور النجسة. وفيها الاسم ده. وبحسب شريعة موسي النبي، فهو طائر نجس. وكمان صوته كئيب. وبعش الشعوب بتعبتره طائر شؤم، زي البومة مثلا).
زمان كانوا يعملوا الأعمدة وفوقيها تيجان. كل عمود فوقه تاج.. فتيجان الأعمدة ديه هتتهد. وتروح تعيش فيها البومة والقنفذ. وهتتحول لخراب.
" وَالْقُنْفُذُ يَأْوِيَانِ إِلَى تِيجَانِ عُمُدِهَا." ... معناها: أن القنفد هيدخل في أعمدة التيجان. والقنفد مش بيقدر يتسلق الأعمدة. فده معناه: أن الأعمدة ديه هتتهد. أو وقعت واتكسرت علي الأرض. وبقوا يعملوها جُحر ليهم ويستخبوا فيها.
خلاص راح مجدها وكرامتها.
"صَوْتٌ يَنْعِبُ فِي الْكُوَى." ... يَنْعِبُ: ده صوت البومة.
"خَرَابٌ عَلَى الأَعْتَابِ. لأَنَّهُ قَدْ تَعَرَّى أَرْزِيُّهَا." ... الأرز: اللي هي هنا أسقف البيوت اللي معمولة من خشب الأرز. اتكشفت وبقت عشش للطيور والقوارض. بقي خراب تام في نينوي.
15هذِهِ هِيَ الْمَدِينَةُ الْمُبْتَهِجَةُ السَّاكِنَةُ مُطْمَئِنَّةً، الْقَائِلَةُ فِي قَلْبِهَا: «أَنَا وَلَيْسَ غَيْرِي». كَيْفَ صَارَتْ خَرَابًا، مَرْبِضًا لِلْحَيَوَانِ! كُلُّ عَابِرٍ بِهَا يَصْفِرُ وَيَهُزُّ يَدَهُ. ده أكبر مُعطل للتوبة.
والخمس كلمات دول هما اللي بيضيعونا :
" الْمَدِينَةُ" ... ديه رمز لك واحد فينا.
1) "الْمُبْتَهِجَةُ" ... يعني ملهية في ابتهاجات ولذات العالم. مشغولة بالبهجة الشكلية.
2) "السَّاكِنَةُ مُطْمَئِنَّةً،" ... وعندها احساس خاطئ، أنها مطمئنة.
أنا مطمن أن صحتي كويسة. معايا فلوس متكل عليها. معارفي كتير. متكل علي مركز أو حد مركزه قوي. كل ده اطمئنان مُزيف.
الاطمئنان المُزيف والبهجة المزيفة، دول بيبعدونا عن ربنا.
3) "الْقَائِلَةُ فِي قَلْبِهَا:" ... من جواها. من أعماقها.
4) "أَنَا" ... إنسان عايش من أجل الأنا. الذات. وديه أكبر مُعطل عن التوبة. وفي الحياة الروحية عامة. وأكبر عائق لمعرفة الله. لأن الإنسان المتكبر، مش شايف نفسه بيغلط. وبالتالي مش شايف أنه محتاج للتوبة.
5) "وَلَيْسَ غَيْرِي." ... تفكيره في نفسه وبس. بيبص لنفسه وبس. مش بيبص لغيره. مش بيقدم لغيره: محبة – رحمة - خدمة – غفران ... أهم حاجة عنده نفسه وبس. مُتمركز حول نفسه.
انسان بعيد تماما عن الحياة الروحية.
كانت مشكلة المدينة ديه أنها: مُبتهجة. ساكنة مطمئنة. قالت في قلبها: أنا وليس غيري.
"كَيْفَ صَارَتْ خَرَابًا،" ... بالرغم من بهجتها واطمئنانها وأنانيتها. صارت كمان:
"مَرْبِضًا لِلْحَيَوَانِ!" ... عاشت عيشة حيوانية. فالحيوان قعد جواها. ربض جواها.
"كُلُّ عَابِرٍ بِهَا يَصْفِرُ وَيَهُزُّ يَدَهُ." ... يَصْفِرُ: يعني يستعجب من شدة المنظر والكآبة.
" وَيَهُزُّ يَدَهُ." ... يعني بيضرب كف علي كف.
⏮