⏭ 1فِي السَّنَةِ الثَّانِيَةِ لِدَارِيُوسَ الْمَلِكِ، فِي الشَّهْرِ السَّادِسِ فِي أَوَّلِ يَوْمٍ مِنَ الشَّهْرِ، كَانَتْ كَلِمَةُ الرَّبِّ عَنْ يَدِ حَجَّي النَّبِيِّ إِلَى زَرُبَّابِلَ بْنِ شَأَلْتِيئِيلَ وَالِي يَهُوذَا، وَإِلَى يَهُوشَعَ بْنِ يَهُوصَادَاقَ الْكَاهِنِ الْعَظِيمِ قَائِلاً: "فِي السَّنَةِ الثَّانِيَةِ لِدَارِيُوسَ الْمَلِكِ،" ... الملك داريوس كان الملك رقم 3، في مملكة فارس. وده اللي في أيامه تم استئناف العمل في الهيكل.
نأخد بالنا هنا في الآية ديه من حاجتين:
1) " فِي الشَّهْرِ السَّادِسِ فِي أَوَّلِ يَوْمٍ مِنَ الشَّهْرِ،" ... نبوة حجي النبي بدايتها يوم واحد في الشهر السادس (1/ 6). علشان بعد كده هيكتب أخر يوم في النبوة. وهنلاقي أن فترة النبوة، مدتها 3 شهور و24 يوم.
2) تاني حاجة: أن أول يوم في الشهر عند اليهود، هو يوم عيد. وبيتجمعوا فيه. فواضح أن ربنا له المجد، شاف أن اليوم ده مناسب وأن كله متجمع. فكان مناسب علشان يبدأ رسالته للشعب كله، علي ايد حجي النبي.
"كَانَتْ كَلِمَةُ الرَّبِّ عَنْ يَدِ حَجَّي النَّبِيِّ" ... المفروض أن الكلمة تكون علي لسان النبي. لكن هنا بيقول: عن يد. فديه تفكرنا: أن كلمة ربنا له المجد عبارة عن سيف. سلاح في ايدينا. بنحارب بيها قويّ الشر.
الناس كلها كانت في حالة كسل وقتها. فهنا حجي النبي، بيوجه رسالته او نبوته لاتنين:
"إِلَى زَرُبَّابِلَ بْنِ شَأَلْتِيئِيلَ وَالِي يَهُوذَا،" ... بيوجه رسالته لزربابل، والي يهوذا.
"وَإِلَى يَهُوشَعَ بْنِ يَهُوصَادَاقَ الْكَاهِنِ الْعَظِيمِ قَائِلًا:" ... وكمان بيوجهها لرئيس الكهنة. وده أول رئيس كهنة بعد السبي.
معني " يَهُوشَعَ" ... يعني خلاص. يهوشع ، هو نفس اسم يشوع.
معني " يَهُوصَادَاقَ" ... يعني البر.
معني " زَرُبَّابِلَ" ... المولود في بابل.
وكورش الملك هو اللي خلي زربابل يكون: والي يهوذا، وده حصل بعد العودة من السبي.
وبالرغم أن الرسالة أو النبوة كانت للشعب كله. لكن متوجهة للوالي زربابل وللكاهن، باعتبارهم هما المسئولين عن الشعب كله. هما أصحاب المسئولية.
اذاً ربنا بيخاطب القادة، لأن "من له الأكثر، يُطالب بالأكثر."
وهنلاحظ أن في سفر زكريا: أن الملك / أو الوالي، والكاهن. الاتنين دول بالتحديد بيشيروا لشخص السيد المسيح يسوع له المجد.
وهنتكلم عن الشخصيتين دول كتير في سفر زكريا.2« هكَذَا قَالَ رَبُّ الْجُنُودِ قَائِلاً: هذَا الشَّعْبُ قَالَ إِنَّ الْوَقْتَ لَمْ يَبْلُغْ وَقْتَ بِنَاءِ بَيْتِ الرَّبِّ». "هكَذَا قَالَ رَبُّ الْجُنُودِ قَائِلًا:"... رسالة ربنا له المجد للشعب، ربنا بيقولهم:
"هذَا الشَّعْبُ قَالَ إِنَّ الْوَقْتَ لَمْ يَبْلُغْ وَقْتَ بِنَاءِ بَيْتِ الرَّبِّ." ... ربنا بيقولهم: خلوا بالكم الناس بتقول أن لسه مجاش الوقت، اننا نبني بيت ربنا.
ولو سألنا الشعب ليه مش بتكلموا البناء؟ هنلاقي أن عندهم أعذار. مثلا: هيقولوا أن الملك القديم منع بناء الهيكل من 15 سنة.
طيب دلوقتي في ملك جديد، وأصدر أمر بتكملة بناء الهيكل. هيقولوا: أصل احنا لسه مفوقناش من أيام السبي.
أصل لسه مخلصناش بناء بيوتنا. أصل لسه الأعداء اللي حوالينا مالين الدنيا. أصل لسه أسوار أورشليم مش جاهزة.
حجج كتير. المهم أنه مش وقته.
وأخطر حاجة في الحياة الروحية: كلمة بعدين. مش دلوقتي. التأجيل.
قوم صلي. بعدين.. نقدم توبة. بعدين مش دلوقتي.. ندرس الكتاب المقدس أو نحضر قداس أو تسبحة. طيب لما أخلص اللي في ايدي.
" لَمْ يَبْلُغْ وَقْتَ بِنَاءِ بَيْتِ الرَّبِّ." ... الوقت لم يبلغ بعد. التأجيل. وده ليه شيطان مخصوص. شيطان التأجيل. لغاية ما الإنسان يلاقي حياته خلصت. وهو معملش اللي كان نفسه يعمله مع ربنا له المجد.
أصلا مش المفروض نأجل. لأننا منعرفش اذا كان في بكرة ولا مفيش.
3فَكَانَتْ كَلِمَةُ الرَّبِّ عَنْ يَدِ حَجَّي النَّبِيِّ قَائِلاً: فكانت رسالة ربنا لشعبه4«هَلِ الْوَقْتُ لَكُمْ أَنْتُمْ أَنْ تَسْكُنُوا فِي بُيُوتِكُمُ الْمُغَشَّاةِ، وَهذَا الْبَيْتُ خَرَابٌ؟ هو الوقت مناسب إنكم تشتغلوا في بيوتكم وتبنوها وتوضبوها. بس مش مناسب إنكم تبنوا الهيكل؟
ربنا عاوز يقولهم: طيب ما أنتم لاقين وقت أهو. ده أصلا عندكم الوقت والفلوس علشان تبنوا بيوتكم. بس معندكوش وقت لبناء بيت ربنا؟
" بُيُوتِكُمُ الْمُغَشَّاةِ،" ... يعني بيوتكم متزينة وفخمة أوي.
فربنا بيقولهم: مستكترين عليا مجرد مباني. وأنتم عندكم الرفاهيات. مستكترين عليا القليل. وبتدوا لنفسكم بزيادة.
زي بالظبط لما الروح القدس يقولنا: قوم صلي. نقوله: تعبانين وعاوز أنام. وبعدها نقعد علي النت بالساعات. مع ان علشان تصلي، أنت عاوز تنام.
اشمعنه عند ربنا، نقوله مفيش وقت. او تعبان. ودايما نطلع حجج. بس الواحد مع نفسه بيدي نفسه براح ورفاهية.
طبعا ربنا له المجد مش زعلان انهم بيبنوا بيوتهم. بس صعبان عليه، انهم مش لاقيين وقت لربنا ولبناء بيت ربنا. وقالوا: ان بناء الهيكل مش مناسب دلوقتي. لكن لحياتهم الخاصة ورفاهيتهم، لاقيين وقت.
تدريب حلو:
لما أجي أقول لربنا له المجد معنديش وقت. أجيب ورقة وقلم، وأحسب الوقت الضايع من يومي. علشان بعد كده ربنا، هيقولي: ازاي معندكش وقت ليا؟ وأنت مضيع كل الوقت ده؟
ازاي بتقولي مش قادر أقف، وأنت روحت مع أصحابك المشوار الفلاني.
ازاي الكتاب المقدس ملهوش وقت، بس لقيت وقت للقهوة والماتش والفرح والمشاوير بتاعتك؟
5وَالآنَ فَهكَذَا قَالَ رَبُّ الْجُنُودِ: اجْعَلُوا قَلْبَكُمْ عَلَى طُرُقِكُمْ. "وَالآنَ فَهكَذَا قَالَ رَبُّ الْجُنُودِ:"... حجي النبي بيوصل رسالة ربنا له المجد، وبيقولهم:
"اجْعَلُوا قَلْبَكُمْ عَلَى طُرُقِكُمْ." ... خدوا بالكم وعيدوا حساباتكم كويس. بص في قلبك، شوف اهتماماته ايه. بص الطريق اللي أنت ماشي فيه، أخرته ايه؟
وده شبه اللي قاله ارميا النبي في مراثي ارميا: "لنفصح طرقنا. ونمتحنها ونرجع الي الرب."
ربنا بيقولهم: مش أنتم بتقولوا أن معندكوش وقت. طيب ما تعيدوا حساباتكم. شوفوا بتضيعوا الوقت ده في ايه. اهتمامك رايح فين. بتقضي يومك ازاي؟
6زَرَعْتُمْ كَثِيرًا وَدَخَّلْتُمْ قَلِيلاً. تَأْكُلُونَ وَلَيْسَ إِلَى الشَّبَعِ. تَشْرَبُونَ وَلاَ تَرْوُونَ. تَكْتَسُونَ وَلاَ تَدْفَأُونَ. وَالآخِذُ أُجْرَةً يَأْخُذُ أُجْرَةً لِكِيسٍ مَنْقُوبٍ. " دَخَّلْتُمْ" و " وَلاَ تَدْفَأُونَ." هنا ربنا له المجد بيقولهم حاجة صعبة أويي: مش ملاحظين أن مفيش بركة في حياتكم؟ مش ملاحظين انكم بتتعبوا في الزرع، ومش بتلاقوا محصول؟
مش ملاحظين أن مهما يكون عندكم أكل، مش حاسين بشبع؟ ومش حاسين بالرضا؟
" تَكْتَسُونَ وَلاَ تَدْفَأُونَ." ... ومهما تلبسوا، برده مش حاسين بالدفأ؟
"وَالآخِذُ أُجْرَةً يَأْخُذُ أُجْرَةً لِكِيسٍ مَنْقُوبٍ." ... حتي الفلوس اللي معاكم، كأنهم بتحطوها في كيس مخروم. مش حاسين بياه. مفيش بركة في حياتكم. فبيقولهم: مش حاسين أن في حاجة غلط في حياتكم؟ وده بسبب اني مش موجود في حياتكم.
بيوت صلاة. بيوت طهارة. بيوت بركة. ... طيب تيجي منين البركة من غير ربنا له المجد؟ "بركة الرب هي تُغني ولا يزيد معها تعبا."
7« هكَذَا قَالَ رَبُّ الْجُنُودِ: اجْعَلُوا قَلْبَكُمْ عَلَى طُرُقِكُمْ. نفس الآية رقم 5. ربنا بيكررها تاني. عيدوا حساباتكم. ولو عاوز بركة في حياتك، راجع وعيد حساباتك. وصحح الغلط اللي في حياتك8اِصْعَدُوا إِلَى الْجَبَلِ وَأْتُوا بِخَشَبٍ وَابْنُوا الْبَيْتَ، فَأَرْضَى عَلَيْهِ وَأَتَمَجَّدَ، قَالَ الرَّبُّ. ربنا بيديهم نصيحة: طيب ما تجربوا تهتموا بيا شوية. جرب تتعب معايا شوية. سايبك 15 سنة، كل واحد بيبني بيته وبيزين فيه. وسايبين الهيكل خراب.
"اِصْعَدُوا إِلَى الْجَبَلِ"... المقصود هنا جبال لبنان. علشان يجيبوا منها الخشب، خشب الأرز.
"وَأْتُوا بِخَشَبٍ وَابْنُوا الْبَيْتَ،" ... وتعالي أبني الهيكل بتاعي.
"فَأَرْضَى عَلَيْهِ وَأَتَمَجَّدَ، قَالَ الرَّبُّ." ... ساعتها هأحس اني في حساباتك. وهأبقي راضي عليك. ومجدي يكون في وسطكم. وبركتي تحل عليكم.
من الناحية الروحية: "اِصْعَدُوا إِلَى الْجَبَلِ" ... عاوز يقول: خلي عينك علي ربنا، فوق.
رفعت عيني الي الجبال من حيث يأتي عوني ومعونتي من عند الرب.
وممكن الجبل ده يكون: هو جبل الجلجثة. ويقول "وَأْتُوا بِخَشَبٍ" ... اللي هو الصليب.
بيتي وجسدي وحياتي، مش بيتبنوا من غير الصليب. من غير الخلاص. ودم المسيح يسوع له المجد. ووقتها البيت، يتبني لأنه متأسس علي الصخر. علي المسيح له المجد. مهما كانت في رياح وزوابع. مفيش حاجة هتأثر فيه.
9انْتَظَرْتُمْ كَثِيرًا وَإِذَا هُوَ قَلِيلٌ. وَلَمَّا أَدْخَلْتُمُوهُ الْبَيْتَ نَفَخْتُ عَلَيْهِ. لِمَاذَا؟ يَقُولُ رَبُّ الْجُنُودِ. لأَجْلِ بَيْتِي الَّذِي هُوَ خَرَابٌ، وَأَنْتُمْ رَاكِضُونَ كُلُّ إِنْسَانٍ إِلَى بَيْتِهِ. هنا بيكرر ليهم تاني حالهم البعيد عن ربنا.
آية صعبة: ربنا له المجد بيقولهم، لما أن كل واحد كده معدي وشايف بيتي خراب في أورشليم. ومش في دماغه، وشغال يشيل ويودي الحاجات لبيته هو. فكل اللي هيروح بيتكم ده، هيطير.
" نَفَخْتُ عَلَيْهِ." ... كل حاجة هتطير. مش هتحس بحاجة. مش هتحسوا ببركة.
"انْتَظَرْتُمْ كَثِيرًا وَإِذَا هُوَ قَلِيلٌ. وَلَمَّا أَدْخَلْتُمُوهُ الْبَيْتَ نَفَخْتُ عَلَيْهِ.
"لِمَاذَا؟ يَقُولُ رَبُّ الْجُنُودِ. لأَجْلِ بَيْتِي الَّذِي هُوَ خَرَابٌ،" ... لماذا: بيسألوا ربنا ليه؟ فربنا بيقولهم: لأجل بيتي اللي سايبينه خراب.
طبعا ربنا له المجد لو عاوز يبني الهيكل، هيبنيه في لحظة. بس الهيكل أو بيت ربنا عموما، هو احنا. فلو الإنسان معندهوش غيرة علي بيت ربنا له المجد، فاية فايدة المكان؟
"غيرة بيتك أكلتني" ربنا له المجد عاوزنا نشترك، يكون لينا دور. ربنا له المجد مش هيغلب أنه يبنيه.
"وَأَنْتُمْ رَاكِضُونَ كُلُّ إِنْسَانٍ إِلَى بَيْتِهِ." ... كل واحد مهتم ببيته وبيبنيه.
10لِذلِكَ مَنَعَتِ السَّمَاوَاتُ مِنْ فَوْقِكُمُ النَّدَى، وَمَنَعَتِ الأَرْضُ غَلَّتَهَا. حتي الطبيعة هتمنع بركتها عنكم. لأن إله الطبيعة حزين. مش راضي عن اللي بيحصل.11وَدَعَوْتُ بِالْحَرِّ عَلَى الأَرْضِ وَعَلَى الْجِبَالِ وَعَلَى الْحِنْطَةِ وَعَلَى الْمِسْطَارِ وَعَلَى الزَّيْتِ وَعَلَى مَا تُنْبِتُهُ الأَرْضُ، وَعَلَى النَّاسِ وَعَلَى الْبَهَائِمِ، وَعَلَى كُلِّ أَتْعَابِ الْيَدَيْنِ». الرياح الحارة: هتضرب المحصول كله. وبالتالي مش هيبقي في حنطة، والمسطار (الكروم) ، ولا الزيت ( بيجي من شجر الزيتون) .
كل حاجة تعبتوا فيها، خلاص مش موجودة. علشان كده أي حاجة بنقدمها لربنا له المجد، وللكنيسة ولاخوة ربنا. هي راجعة لينا بالبركة.
"هَاتُوا جَمِيعَ الْعُشُورِ إِلَى الْخَزْنَةِ لِيَكُونَ فِي بَيْتِي طَعَامٌ، وَجَرِّبُونِي بِهذَا، قَالَ رَبُّ الْجُنُودِ، إِنْ كُنْتُ لاَ أَفْتَحُ لَكُمْ كُوَى السَّمَاوَاتِ، وَأَفِيضُ عَلَيْكُمْ بَرَكَةً حَتَّى لاَ تُوسَعَ." (ملاخي 3 : 10)
"هذَا وَإِنَّ مَنْ يَزْرَعُ بِالشُّحِّ فَبِالشُّحِّ أَيْضًا يَحْصُدُ، وَمَنْ يَزْرَعُ بِالْبَرَكَاتِ فَبِالْبَرَكَاتِ أَيْضًا يَحْصُدُ."
هما زرعوا بالشح، بالتالي ملقيوش حاجة. مدوش لربنا له المجد حاجة.
12حِينَئِذٍ سَمِعَ زَرُبَّابِلُ بْنُ شَأَلْتِيئِيلَ وَيَهُوشَعُ بْنُ يَهُوصَادِقَ الْكَاهِنِ الْعَظِيمِ، وَكُلُّ بَقِيَّةِ الشَّعْبِ صَوْتَ الرَّبِّ إِلهِهِمْ وَكَلاَمَ حَجَّي النَّبِيِّ كَمَا أَرْسَلَهُ الرَّبُّ إِلهُهُمْ. وَخَافَ الشَّعْبُ أَمَامَ وَجْهِ الرَّبِّ. هنا كانت في استجابة، من زربابل ويهوشع رئيس الكهنة وكل الشعب. ابتدوا يستجيبوا لصوت ربنا له المجد.
"وَكَلاَمَ حَجَّي النَّبِيِّ كَمَا أَرْسَلَهُ الرَّبُّ إِلهُهُمْ. وَخَافَ الشَّعْبُ أَمَامَ وَجْهِ الرَّبِّ." ... كان في خوف في قلوبهم، ناحية ربنا له المجد.
13فَقَالَ حَجَّي رَسُولُ الرَّبِّ بِرِسَالَةِ الرَّبِّ لِجَمِيعِ الشَّعْبِ قَائِلاً: «أَنَا مَعَكُمْ، يَقُولُ الرَّبُّ». "أَنَا مَعَكُمْ، يَقُولُ الرَّبُّ." ... من كام آية ربنا له المجد كان سايب الشعب. لكن هنا بمجرد انهم سمعوا، وحسوا أن الرسالة ديه مهمة.
ربنا قالهم: أنا معاكم. وعلي فكرة، لما ربنا قالهم أنا معاكم، مكانوش لسه ابتدوا في الهيكل من تاني. لكن بمجرد أن قلبهم اتحرك. ربنا طمنهم.
حلوة أوي:
ربنا له المجد بيتلكك لنا علي أي حاجة حلوة بنعملها. أو أي استجابة مننا لربنا له المجد.
ربنا له المجد، عمره ما بيسيب أولاده. احنا اللي بنسيب ربنا وبنبعد عنه. احنا اللي بنتخلي عنه.
وربنا دايما بيقولنا " ها أنا معكم كل الأيام. والي انقضاء الدهر"
14وَنَبَّهَ الرَّبُّ رُوحَ زَرُبَّابِلَ بْنِ شَأَلْتِيئِيلَ وَالِي يَهُوذَا، وَرُوحَ يَهُوشَعَ بْنِ يَهُوصَادِاقَ الْكَاهِنِ الْعَظِيمِ، وَرُوحَ كُلِّ بَقِيَّةِ الشَّعْبِ. فَجَاءُوا وَعَمِلُوا الشُّغْلَ فِي بَيْتِ رَبِّ الْجُنُودِ إِلهِهِمْ، عمل الروح القدس اللي جوانا: يُبكت علي خطية وعلي بر. علي بر: يعني هو اللي بينبهني ، من فضلك قوم صلي. أخدم. روح القداس. أقرا في الكتاب المقدس. وهكذا....
فهنا روح ربنا، نبه زربابل ويهوشع رئيس الكهنة والشعب.
"فَجَاءُوا وَعَمِلُوا الشُّغْلَ فِي بَيْتِ رَبِّ الْجُنُودِ إِلهِهِمْ،" ... وابتدوا يشتغلوا ويكملوا بناء الهيكل.
بس في ناس كتير، ربنا له المجد بينبهم، وهما بيكملوا نوم. علشان كده معلمنا بولس الرسول يقول "لا تحزنوا روح الله القدوس"
نطلب من ربنا له المجد ونقوله: نبه يارب روحي. واديني الاستجابة لصوتك. لأن المهم اللي يستجيب لصوت ربنا، ويسمع ويعمل.
15فِي الْيَوْمِ الرَّابعِ وَالْعِشْرِينَ مِنَ الشَّهْرِ السَّادِسِ، فِي السَّنَةِ الثَّانِيَةِ لِدَارِيُوسَ الْمَلِكِ. ابتدوا يشتغلوا بعد 24 يوم من نبوة حجي النبي. يعني قبل ما يمر شهر، كان الشغل بدأ في بيت ربنا له المجد. في الهيكل. بعد ما كان الشغل واقف لمدة 15 سنة. ⏮