⪡ 1اُطْلُبُوا مِنَ الرَّبِّ الْمَطَرَ فِي أَوَانِ الْمَطَرِ الْمُتَأَخِّرِ، فَيَصْنَعَ الرَّبُّ بُرُوقًا وَيُعْطِيَهُمْ مَطَرَ الْوَبْلِ. لِكُلِّ إِنْسَانٍ عُشْبًا فِي الْحَقْلِ. - في الاصحاح التاسع: شوفنا نبوة دخول ربنا يسوع ا لمسيح له المجد، لأورشليم. "اِبْتَهِجِي جِدًّا يَا ابْنَةَ صِهْيَوْنَ، اهْتِفِي يَا بِنْتَ أُورُشَلِيمَ. هُوَذَا مَلِكُكِ يَأْتِي إِلَيْكِ. هُوَ عَادِلٌ وَمَنْصُورٌ وَدِيعٌ، وَرَاكِبٌ عَلَى حِمَارٍ وَعَلَى جَحْشٍ ابْنِ أَتَانٍ."
- في الاصحاح العاشر: زكريا النبي ابتدي يدخل أكتر وأكتر في عهد النعمة. العهد الجديد. بكده احنا في نبوات عن العهد الجديد. وأفراح الحياة الجديدة.
أرض الموعد – أرض فلسطين، كانت بتعتمد في الزراعة علي المطر. فالمزارع كان عنده نوعين من المطر. المطر المُبكر والمطر المتأخر.
- المطر المُبكر: وده لما الزارع يحط البذور في الأرض، ويبتدي يزرع.
- المطر المتأخر: ده بيجي عند نُضج المحصول، قبل الحصاد علطول.
"اُطْلُبُوا مِنَ الرَّبِّ الْمَطَرَ فِي أَوَانِ الْمَطَرِ الْمُتَأَخِّرِ،" ... ده المطر بتاع الثمار. اللي قبل الحصاد
الآباء قالوا: أن المطر المُبكر بيحمل إشارة للعهد القديم والنبوات والأنبياء. وديه كانت مجرد البذرة. أما ثمار الروح القدس، احنا شوفناها وعشناها، في العهد الجديد.
"اُطْلُبُوا مِنَ الرَّبِّ الْمَطَرَ فِي أَوَانِ الْمَطَرِ الْمُتَأَخِّرِ،" ... معناها: نطلب عمل الروح القدس، في حياتنا. فده إشارة لعمل الروح القدس في العهد الجديد، للكرازة وانتشار الكتاب المقدس. واتمتعنا بأسرار الكنيسة، من خلال الروح القدس.
"فَيَصْنَعَ الرَّبُّ بُرُوقًا" ... يعني ربنا بينور حياتنا وطريقنا.
"وَيُعْطِيَهُمْ مَطَرَ الْوَبْلِ." ... الْوَبْلِ: يعني الغزير – زي السيل. يعني مطر شديد.
ربنا، النِعم بتاعته كتيرة لأولاده. ولكل الناس. وعمل الروح القدس في حياتنا كأولاد ربنا، لا ينتهي. ربنا بيدي بسخاء وَلاَ يُعَيِّرُ.
"لِكُلِّ إِنْسَانٍ عُشْبًا فِي الْحَقْلِ." ... كل واحد عنده زرع. ربنا هيديله الثمار المطلوبة، من خلال الروح القدس.
فكأن حياتنا الروحية فيها مطر مُبكر ومطر متأخر.
أخدنا المطر المُبكر: في نعمة المعمودية والميرون والتلمذة في مدارس الأحد والكنيسة.
دلوقتي محتاجين المطر المتأخر، علشان نشوف الثمر الروحي بتاعنا. علشان كده " اُطْلُبُوا مِنَ الرَّبِّ الْمَطَرَ فِي أَوَانِ الْمَطَرِ الْمُتَأَخِّرِ،" ... ومش معناها: أن ربنا له المجد، أتأخر علينا. لكن المطر ده في أوانه. أوان الثمر.
مثلا: كام وعظة سمعناها، ويا ما خدمنا كتير. وسمعنا عن قديسين كتير. طيب هل بعد كل ده، كان في ثمر روحي؟ ولا لسه؟ هل بان علينا النعمة؟ هل اللي يشوفنا يقول علينا أولاد ربنا، ويشوف صورة ربنا فينا؟
فياريت نلحق نطلب المطر المتأخر. علشان نطلّع ثمر روحي. ونطلّع الثمر الحلو، اللي المسيح له المجد مستنيه مننا. علشان يقطفه.
2لأَنَّ التَّرَافِيمَ قَدْ تَكَلَّمُوا بِالْبَاطِلِ، وَالْعَرَّافُونَ رَأَوْا الْكَذِبَ وَأَخْبَرُوا بِأَحْلاَمِ كَذِبٍ. يُعَزُّونَ بِالْبَاطِلِ. لِذلِكَ رَحَلُوا كَغَنَمٍ. ذَلُّوا إِذْ لَيْسَ رَاعٍ. وهو بيتكلم عن الروح القدس وثمار الروح القدس. قالهم خدوا بالكم: عُمر ما الروح القدس يشتغل ويجيب ثمار، في إنسان مُتكل علي الشيطان والكذب والخداع.
"لأَنَّ التَّرَافِيمَ قَدْ تَكَلَّمُوا بِالْبَاطِلِ،" ... التَّرَافِيمَ: التماثيل الصغيرة. الأوثان الصغيرة.
الإنسان اللي عنده آلهة أخري، ومتكل عليها.
"وَالْعَرَّافُونَ رَأَوْا الْكَذِبَ وَأَخْبَرُوا بِأَحْلاَمِ كَذِبٍ. يُعَزُّونَ بِالْبَاطِلِ " ... والعرافين اللي أخبروا بأحلام كذب.
" يُعَزُّونَ بِالْبَاطِلِ " ... يعني الشيطان بيخدع الإنسان. لأن الشيطان خادع. بيخدر ضمير الإنسان. ومش عاوز الروح القدس يُثمر في حياة الإنسان. أوعي تصدق ان الدنيا فيها تعزية. كله تعزية باطلة.
" بِأَحْلاَمِ كَذِبٍ." ... يعني كل ما ينتمي لعدو الخير من تعاليم – لذة الخطية - وغيرها، كلها أمور وهمية. أحلام كذب وباطل. كله خداع للإنسان.
". لِذلِكَ رَحَلُوا كَغَنَمٍ. ذَلُّوا إِذْ لَيْسَ رَاعٍ." ... بعد كل ده الإنسان يسقط في الذل. لأنهم تركوا الراعي الحقيقي. وجريوا وراء الأباطيل. الغنم سابوا الحظيرة، وراحوا يدورا وسط الديابة علي الحماية.
3«عَلَى الرُّعَاةِ اشْتَعَلَ غَضَبِي فَعَاقَبْتُ الأَعْتِدَةَ، لأَنَّ رَبَّ الْجُنُودِ قَدْ تَعَهَّدَ قَطِيعَهُ بَيْتَ يَهُوذَا، وَجَعَلَهُمْ كَفَرَسِ جَلاَلِهِ فِي الْقِتَالِ. "عَلَى الرُّعَاةِ اشْتَعَلَ غَضَبِي" ... كان في مشكلة كبيرة عند اليهود. الرعاة الذين يرعون أنفسهم. مكانش مهم عندهم الشعب. مصلحتهم الأهم. وفي رعاة أصلا يرتدوا أقنعة الراعي. لكن في الحقيقة هما ذئاب خاطفة.
ربنا مش بيفرح بالراعي المُضلل. صاحب التعاليم الفاسدة الخاطئة. ولا بيفرح بالراعي اللي بيهتم بنفسه.
"فَعَاقَبْتُ الأَعْتِدَةَ،" ... الأَعْتِدَةَ: يعني الغنم القوية. الكباش.
عاوز يقول: أقوياء شعبي، اللي الرعاة تعبوهم وضللوهم وخلوهم ماشيين في طريق مش كويس. هما دول الرعاة اللي غضبي ينصب عليهم.
وطبعا بعد كده، ربنا استلم رعيته، من ايد الرعاة الذين يرعون أنفسهم.
ربنا له المجد في انجيل الراعي الصالح (يوحنا 10) "جَمِيعُ الَّذِينَ أَتَوْا قَبْلِي هُمْ سُرَّاقٌ وَلُصُوصٌ، وَلكِنَّ الْخِرَافَ لَمْ تَسْمَعْ لَهُمْ"
"لأَنَّ رَبَّ الْجُنُودِ قَدْ تَعَهَّدَ قَطِيعَهُ بَيْتَ يَهُوذَا،" ... رب الجنود تعهد قطيعه. هيجمع الحملان في حضنه.
" قَطِيعَهُ بَيْتَ يَهُوذَا،" ... القطيع الصغير. أولاد ربنا. الكنيسة.
"وَجَعَلَهُمْ كَفَرَسِ جَلاَلِهِ فِي الْقِتَالِ." ... في معركتنا ضد أجناد الشر الروحية، ربنا هو اللي بيقودها. احنا كأننا خيول في ساحة المعركة. لكن الفارس الحقيقي، قائد المعركة: هو ربنا يسوع المسيح له المجد. "وَلكِنْ شُكْرًا للهِ الَّذِي يَقُودُنَا فِي مَوْكِبِ نُصْرَتِهِ فِي الْمَسِيحِ كُلَّ حِينٍ،"
ربنا له المجد هو اللي بيدينا الانتصار.
4مِنْهُ الزَّاوِيَةُ. مِنْهُ الْوَتَدُ. مِنْهُ قَوْسُ الْقِتَالِ. مِنْهُ يَخْرُجُ كُلُّ ظَالِمٍ جَمِيعًا. الكلام هنا علي ربنا يسوع المسيح له المجد. "مِنْهُ الزَّاوِيَةُ." ... ربنا يسوع المسيح له المجد، هو حجر الزاوية.
"مِنْهُ الْوَتَدُ." ... الوتد: زي خشبة أو عامود بيربطوا فيه الخيمة. علشان يشدوا الخيمة وينصبوها.
معلمنا بولس الرسول، لما جه يشبه غربتنا عن العالم في هذا الجسد، قال: أن جسدنا عبارة عن خيمة. "لأَنَّنَا نَعْلَمُ أَنَّهُ إِنْ نُقِضَ بَيْتُ خَيْمَتِنَا الأَرْضِيُّ، فَلَنَا فِي السَّمَاوَاتِ بِنَاءٌ مِنَ اللهِ، بَيْتٌ غَيْرُ مَصْنُوعٍ بِيَدٍ، أَبَدِيٌّ."
يعني الوتد: هو اللي بيسند ضعفاتنا، في رحلة هذه الحياة. في غربتنا في العالم. احنا مسنودين علي ربنا له المجد. هو الوتد بتاعنا. من غيره نضيع ونقع.
"مِنْهُ قَوْسُ الْقِتَالِ." ... القديس يوحنا الحبيب في سفر الرؤيا: شاف السيد المسيح له المجد، راكب علي فرس أبيض. وفي ايده قوس. "فَنَظَرْتُ، وَإِذَا فَرَسٌ أَبْيَضُ، وَالْجَالِسُ عَلَيْهِ مَعَهُ قَوْسٌ، وَقَدْ أُعْطِيَ إِكْلِيلًا، وَخَرَجَ غَالِبًا وَلِكَيْ يَغْلِبَ."
يعني هو اللي بيدينا القوة في الحروب الروحية. احنا مش بنحارب بقوتنا. هنضيع لو وقفنا لوحدنا في وش الشيطان وأعوانه. لكن احنا بنحارب عدو الخير، بالسلطان اللي ربنا أدهولنا. أعطيكم سلطانا أن تدوسوا الحيات والعقارب وكل قوات العدو.
"مِنْهُ يَخْرُجُ كُلُّ ظَالِمٍ جَمِيعًا." ... يعني: في ربنا له المجد، لا في ظلم ولا فساد. اللي بيتحد بربنا، يحيا حياة القداسة. ينسي كل شر وخطية وظلم.
5وَيَكُونُونَ كَالْجَبَابِرَةِ الدَّائِسِينَ طِينَ الأَسْوَاقِ فِي الْقِتَالِ، وَيُحَارِبُونَ لأَنَّ الرَّبَّ مَعَهُمْ، وَالرَّاكِبُونَ الْخَيْلَ يَخْزَوْنَ. "وَيَكُونُونَ كَالْجَبَابِرَةِ "... احنا أضعف من إننا نعمل حاجة ونحارب. لكن واحنا في ايد ربنا له المجد، بيكون عندنا قوة جبارة
" الدَّائِسِينَ طِينَ الأَسْوَاقِ فِي الْقِتَالِ،" ... اللي عاوز ينتصر في حربه الروحية علي عدو الخير، لازم يدوس علي طين العالم. يدوس علي شهوات العالم. الإنسان المفروض زي ما قال معلمنا بولس الرسول: يحسب هذا العالم نفاية.
"وَيُحَارِبُونَ لأَنَّ الرَّبَّ مَعَهُمْ،" ... وأنا بأحارب، بأكون مطمئن. لأن ربنا معايا. "إِنْ كَانَ اللهُ مَعَنَا، فَمَنْ عَلَيْنَا؟".
"وَالرَّاكِبُونَ الْخَيْلَ يَخْزَوْنَ." ... كل اللي بيفتخر بقوته الشخصية، هو ده اللي ينهزم. ويَخزي.
لكن أولاد الله، احنا، متكلين دايما علي ربنا. وبقوة ربنا، بننتصر علي الشر وعدو الخير. أهم حاجة الاتكال علي ربنا له المجد.
6وَأُقَوِّي بَيْتَ يَهُوذَا، وَأُخَلِّصُ بَيْتَ يُوسُِفَ وَأُرَجِّعُهُمْ، لأَنِّي قَدْ رَحِمْتُهُمْ. وَيَكُونُونَ كَأَنِّي لَمْ أَرْفُضْهُمْ، لأَنِّي أَنَا الرَّبُّ إِلهُهُمْ فَأُجِيبُهُمْ. ربنا في غضبه علي شعبه، تركهم لتأديبات الأعداء. وتركهم للخراب. لكن دلوقتي ربنا قالهم: أنا هأرجع لكم من تاني.
"وَأُقَوِّي بَيْتَ يَهُوذَا، وَأُخَلِّصُ بَيْتَ يُوسُفَ وَأُرَجِّعُهُمْ،" ... بدل الخسائر، ربنا هيديهم بركة. هنا ذكر يهوذا ويوسف. وده ليه مخزي:
يهوذا: هو السبط الذي خرج منه ربنا يسوع المسيح، بالجسد. سبط يهوذا.
والقوة والنُصرة في المسيح يسوع له المجد ... "وَأُقَوِّي بَيْتَ يَهُوذَا،". لأنه الأسد الخارج من سبط يهوذا.
" وَأُخَلِّصُ بَيْتَ يُوسُفَ وَأُرَجِّعُهُمْ،" ... ديه تفكرنا: أن يوسف كان برده رمز للمسيح يسوع له المجد. يوسف اللي اتباع من أخواته، وصار عبد. اتحكم عليه بدون أي ذنب ليه. وكمان أنقذ شعبه من المجاعة.
وربنا يسوع المسيح له المجد، هو الخبز الحي. الذي يُشبع الجميع. المسيح له المجد هو: الشِبع الحقيقي.
"لأَنِّي قَدْ رَحِمْتُهُمْ." ... مفيش حاجة تدي بركة ونعمة وتعوض، غير مراحم الله. مراحم الله: بتيجي للإنسان اللي عاوز يتوب. اللي بيجاهد. ورافض الشر في حياته.
" وَيَكُونُونَ كَأَنِّي لَمْ أَرْفُضْهُمْ،" ... ربنا بيقول: خلاص هأنسي اللي حصل. هابدأ معاهم من جديد. صفحة جديدة.
ليه ربنا هيعمل كده؟
"لأَنِّي أَنَا الرَّبُّ إِلهُهُمْ فَأُجِيبُهُمْ." ... كأن ربنا بيقول: أنا الخالق. ودول صنعة يداي. دول أولادي. فمش ممكن أتخلي عنهم.
7وَيَكُونُ أَفْرَايِمُ كَجَبَّارٍ، وَيَفْرَحُ قَلْبُهُمْ كَأَنَّهُ بِالْخَمْرِ، وَيَنْظُرُ بَنُوهُمْ فَيَفْرَحُونَ وَيَبْتَهِجُ قَلْبُهُمْ بِالرَّبِّ. - في آية 6: اتكلم عن سبط يهوذا. وأبناء يوسف (بيت يوسف). وهنا يقول:
"وَيَكُونُ أَفْرَايِمُ كَجَبَّارٍ،" ... طيب ما هو افرايم ابن يوسف. طيب ليه ذكر افرايم هنا بالتحديد؟
افرايم: كان رمز للشر والخطية. وده كان واضح في سفر هوشع. "أَفْرَايِمُ يَخْتَلِطُ بِالشُّعُوبِ. أَفْرَايِمُ صَارَ خُبْزَ مَلَّةٍ لَمْ يُقْلَبْ."
افرايم الشرير، هيبقي جبار، من أولاد ربنا. وده يتحقق في كنيسة العهد الجديد. ويكون افرايم: مُتمثل في موسي الأسود، اللي بقي قديس. بقي الأنبا موسي الأسود. وكان جبار في حياته الروحية.
وهي ديه: بركة العهد الجديد. المطر المتأخر. عمل الروح القدس. تحول افرايم لأحد الجبابرة في جيش الله الروحي.
"وَيَفْرَحُ قَلْبُهُمْ كَأَنَّهُ بِالْخَمْرِ،" ... الخمر في الكتاب المقدس يُشير للفرح. في العهد الجديد، ربنا له المجد وعدنا وقال "وَلاَ يَنْزِعُ أَحَدٌ فَرَحَكُمْ مِنْكُمْ."
"وَيَنْظُرُ بَنُوهُمْ فَيَفْرَحُونَ وَيَبْتَهِجُ قَلْبُهُمْ بِالرَّبِّ." ... رسالة الكنيسة من جيل الي جيل. لأنه مش بتوقف عند حد معين، أو ناس معينة.. رسالة الكنيسة: هي خلاص ربنا له المجد، لينا.
8أَصْفِرُ لَهُمْ وَأَجْمَعُهُمْ لأَنِّي قَدْ فَدَيْتُهُمْ، وَيَكْثُرُونَ كَمَا كَثُرُوا. الراعي بيصفر لخرافه علشان يجمعهم.
"أَصْفِرُ لَهُمْ وَأَجْمَعُهُمْ" ... وده نفس اللي قاله ربنا يسوع المسيح له المجد، في انجيل الراعي "خِرَافِي تَسْمَعُ صَوْتِي، وَأَنَا أَعْرِفُهَا فَتَتْبَعُنِي. وَأَنَا أُعْطِيهَا حَيَاةً أَبَدِيَّةً، وَلَنْ تَهْلِكَ إِلَى الأَبَدِ، وَلاَ يَخْطَفُهَا أَحَدٌ مِنْ يَدِي." يو 10... لأنها تتبع ربنا له المجد. الراعي عارفهم، وهما عارفين الراعي وبيتبعوه.
"لأَنِّي قَدْ فَدَيْتُهُمْ،" ... هو ده الراعي الصالح. المُحب. اللي قدم ذاته فداء لأولاده، علي الصليب.
"وَيَكْثُرُونَ كَمَا كَثُرُوا." ... أولاد ربنا في ازدياد. والبشارة مستمرة لأخر الدهور.
ومهما حصل اضطهاد أو تعب للكنيسة. فالكنيسة باقية لأخر الدهور. ومازالت الكرازة تنمو وتزداد.
9وَأَزْرَعُهُمْ بَيْنَ الشُّعُوبِ فَيَذْكُرُونَنِي فِي الأَرَاضِي الْبَعِيدَةِ، وَيَحْيَوْنَ مَعَ بَنِيهِمْ وَيَرْجِعُونَ. جميلة الآية ديه. "وَأَزْرَعُهُمْ بَيْنَ الشُّعُوبِ" ... ربنا يسوع له المجد قال:"اَلْحَقَّ الْحَقَّ أَقُولُ لَكُمْ: إِنْ لَمْ تَقَعْ حَبَّةُ الْحِنْطَةِ فِي الأَرْضِ وَتَمُتْ فَهِيَ تَبْقَى وَحْدَهَا. وَلكِنْ إِنْ مَاتَتْ تَأْتِي بِثَمَرٍ كَثِيرٍ."
فالمعني: كأننا بنتدفن في التربة ونتزرع. والتربة ديه: هي المعمودية. مدفونين مع المسيح. علشان نأتي بثمر كتير.
بنمّوت نفسنا عن الشهوة والخطية. وبكده، بيموت فينا الإنسان العتيق.
فربنا يزرعنا بين الشعوب. علشان تبدأ الثمار تبان. الناس تشوف عمل الروح القدس فينا. وصورة المسيح له المجد، تظهر للناس كلها. "إِذًا نَسْعَى كَسُفَرَاءَ عَنِ الْمَسِيحِ،"
"فَيَذْكُرُونَنِي فِي الأَرَاضِي الْبَعِيدَةِ،" ... كل مكان راح فيه أولاد ربنا، يكونوا شهادة حية لاسم ربنا له المجد.
"وَيَحْيَوْنَ مَعَ بَنِيهِمْ وَيَرْجِعُونَ." ... أولاد ربنا، عمرهم ما يبعدوا عن ربنا أبدا. بينتشروا في كل مكان. وبيشهدوا للمسيح له المجد. لكن في الأخر استقرارهم في حضن المسيح له المجد.
10وَأُرْجِعُهُمْ مِنْ أَرْضِ مِصْرَ، وَأَجْمَعُهُمْ مِنْ أَشُّورَ، وَآتِي بِهِمْ إِلَى أَرْضِ جِلْعَادَ وَلُبْنَانَ، وَلاَ يُوجَدُ لَهُمْ مَكَانٌ. " أَرْضِ مِصْرَ،" ... في الكتاب المقدس، هي رمز للعبودية.
لكن ربنا حررنا من العبودية. "فَإِنْ حَرَّرَكُمْ الابْنُ فَبِالْحَقِيقَةِ تَكُونُونَ أَحْرَارًا."
المفروض بعد فداء يسوع المسيح له المجد، أنا مكونش عبد للخطية. فملناش مكان في العبودية.
" أَشُّورَ" ... في الكتاب المقدس، رمز للكبرياء والدموية. وملك آشور في الكتاب المقدس يحمل إشارات لعدو الخير.
أولاد ربنا له المجد، ملهومش مكان في أرض الكبرياء والدماء.
"وَآتِي بِهِمْ إِلَى أَرْضِ جِلْعَادَ وَلُبْنَانَ،" ... أرض جلعاد: ديه أرض خصبة للمراعي.
أرض جلعاد: معناها المرعي الحسن. والمقصود بيها: الكنيسة.
أولاد ربنا له المجد، ملهومش مكان في أرض مصر ولا في آشور. مكانهم في أرض جلعاد. في الكنيسة، وسط القطيع الصغير. حيث الراعي الصالح، الذي يجمع قطيعه في المرعي الحَسن.
" وَلُبْنَانَ،" ... لبنان: كلها جبال. أحيانا في الكتاب المقدس، لبنان: ترمز للعالم ومباهج الحياة. لكن في الآية هنا: يقصد بيها الارتفاع عن العالم.
عروس النشيد لما اتكلمت عن عريسها قالت: حبيبي فتي، كأرز لبنان.
فهنا لبنان المقصود بيها: أن أولاد ربنا، يرتفعوا عن الأرضيات. ملهومش مكان في الأرض.
"وَلاَ يُوجَدُ لَهُمْ مَكَانٌ." ... في الأول والأخر، حياتنا علي الأرض عبارة عن غربة. ملناش مكان هنا.
في القداس نصلي ونقول: ونحن أيضا الغرباء في هذا العالم. أحفظنا في إيمانك.
ربنا له المجد بيجمعنا في الكنيسة، ويقولنا: أنتم مش من الأرض. أنتم أولادي، تبع السماء.
11وَيَعْبُرُ فِي بَحْرِ الضِّيقِ، وَيَضْرِبُ اللُّجَجَ فِي الْبَحْرِ، وَتَجِفُّ كُلُّ أَعْمَاقِ النَّهْرِ، وَتُخْفَضُ كِبْرِيَاءُ أَشُّورَ، وَيَزُولُ قَضِيبُ مِصْرَ. معني الآية: ربنا وهو ماشي بينا ناحية المرعي الحسن. وأرض جلعاد. اللي هي الكنيسة. أورشليم السمائية. ربنا لازم يعبر بينا ضيقات في هذا العالم. "قَدْ كَلَّمْتُكُمْ بِهذَا لِيَكُونَ لَكُمْ فِيَّ سَلاَمٌ. فِي الْعَالَمِ سَيَكُونُ لَكُمْ ضِيقٌ، وَلكِنْ ثِقُوا: أَنَا قَدْ غَلَبْتُ الْعَالَمَ"
علشان كده يقول: "وَيَعْبُرُ فِي بَحْرِ الضِّيقِ،" ... جهادنا في العالم ضد الخطية، مش حاجة سهلة. لكن ربنا بيطمنا: أنه هيعبر بينا بحر الضيق.
"وَيَضْرِبُ اللُّجَجَ فِي الْبَحْرِ، وَتَجِفُّ كُلُّ أَعْمَاقِ النَّهْرِ،" ... وكمان أي معوقات، ربنا هينهيها. هتنتهي.
وفعليا: وهما في طريقهم لأرض الموعد، البحر انشق قدامهم. ونهر الأردن جف قدامهم.
فربنا له المجد، بيشيل كل المعوقات، علشان نوصل لأرض الموعد. السماء. أورشليم السمائية. أهم حاجة نفضل ماسكين في ربنا يسوع المسيح له المجد.
"وَتُخْفَضُ كِبْرِيَاءُ أَشُّورَ، وَيَزُولُ قَضِيبُ مِصْرَ." ... حتي هجمات عدو الخير، اللي عاوز يستعبد الإنسان في الخطية. الشيطان اللي عاوز يمشينا في كبرياء العالم والشهوات والأرضيات. ربنا أدانا سلطان، إننا ننتصر عليه.
12وَأُقَوِّيهِمْ بِالرَّبِّ، فَيَسْلُكُونَ بِاسْمِهِ، يَقُولُ الرَّبُّ». "وَأُقَوِّيهِمْ بِالرَّبِّ،" ... واحنا ماشيين في بحر العالم. ربنا هو اللي بيقودنا. وهو اللي بيدينا القوة.
"فَيَسْلُكُونَ بِاسْمِهِ، يَقُولُ الرَّبُّ." ... يا بخت اللي ماشي في العالم، ماسك في ربنا. هو ده اللي ينتصر بقوة ربنا، ويوصل للسماء.
ربنا له المجد، هيُرسل روحه القدوس، تقوينا. واتكلنا هيبقي علي ربنا له المجد. وهنسلك حسب مشيئته.
⪢