⪡ 1وَحْيُ كَلاَمِ الرَّبِّ عَلَى إِسْرَائِيلَ. يَقُولُ الرَّبُّ بَاسِطُ السَّمَاوَاتِ وَمُؤَسِّسُ الأَرْضِ وَجَابِلُ رُوحِ الإِنْسَانِ فِي دَاخِلِهِ: هنا بيتكلم عن الله الكليّ القدرة. الخالق القادر علي كل شئ.
"وَحْيُ كَلاَمِ الرَّبِّ عَلَى إِسْرَائِيلَ. يَقُولُ الرَّبُّ بَاسِطُ السَّمَاوَاتِ وَمُؤَسِّسُ الأَرْضِ" ... الجميل إننا نفتكر دايما قدرة ربنا له المجد وعظمته. وده بيفرح ربنا. لأننا لما نحس إننا قليلين وفي حالة ضعف، بنخاف.
لكن لما بيكون جوة تفكيرنا: عظمة وقدرة ربنا له المجد، وأنه خالص السماء والأرض. يعني السماء والأرض وكل حاجة في ايده. فالواحد يبقي متطمن . مش خايف.
"وَجَابِلُ رُوحِ الإِنْسَانِ فِي دَاخِلِهِ." ... روحنا اللي جوانا، ديه بتاعة ربنا له المجد. وحق ربنا علينا، أن روحنا ديه تنشغل بربنا له المجد.
2«هأَنَذَا أَجْعَلُ أُورُشَلِيمَ كَأْسَ تَرَنُّحٍ لِجَمِيعِ الشُّعُوبِ حَوْلَهَا، وَأَيْضًا عَلَى يَهُوذَا تَكُونُ فِي حِصَارِ أُورُشَلِيمَ. الله كليّ القدرة. لكن أحيانا الله يسمح ببعض الأمور، لحكمة معينة عنده. ومنها مثلا: حصار أورشليم. ربنا هو اللي سمح بكده. وده كان بسبب خطاياهم.
ربنا بيقول: ممكن يكون عندي سماح أن حد يمد ايده علي أولادي، لهدف ما. لكن مستحيل يكون الانتصار لقوات الظلمة.
"هأَنَذَا أَجْعَلُ أُورُشَلِيمَ كَأْسَ تَرَنُّحٍ لِجَمِيعِ الشُّعُوبِ حَوْلَهَا،"... يعني تكون سبب أن اللي حواليها، و اللي عاوزين يتحدوا ضدها. يفقدوا اتزانهم ورؤيتهم، وكأنهم سكرانين ... " كَأْسَ تَرَنُّحٍ".
لأن، وان كانت أورشليم تُشير للكنيسة. فكتير الله سمح بعصور اضطهاد واستشهاد. وربنا قال: أبواب الجحيم لن تقوي عليها.
وكمان الكنيسة كانت سبب في فقدان ملوك كتير، لعرشهم وكراسيهم. لما كانوا بيحاربوها. زي مثلا: في عرش المملكة اليونانية أو الرومانية؟ فين نيرون ودقلديانوس؟ فين كل الأباطرة؟ كله انتهي. وبقيت أورشليم والكنيسة.
"وَأَيْضًا عَلَى يَهُوذَا تَكُونُ فِي حِصَارِ أُورُشَلِيمَ." ... لما الشعوب تحاصرها، هيغلبوا فيها. زي ما حصل مع: جيش سنحاريب لما حاصروها، وقت اشعياء النبي. وجه ملاك موت 185 ألف واحد من جيش أشور.
3وَيَكُونُ فِي ذلِكَ الْيَوْمِ أَنِّي أَجْعَلُ أُورُشَلِيمَ حَجَرًا مِشْوَالاً لِجَمِيعِ الشُّعُوبِ، وَكُلُّ الَّذِينَ يَشِيلُونَهُ يَنْشَقُّونَ شَقًّا. وَيَجْتَمِعُ عَلَيْهَا كُلُّ أُمَمِ الأَرْضِ. " حَجَرًا مِشْوَالًا" ... لما يكون في حجر كبير جدا. واحد بس ميقدرش يشيله. لازم يشيلوه كذا واحد.
فلو الحجر الضخم ده وقع علي حد. هيموته .
كل الأباطرة وكل الأعداء اللي حوالين أورشليم. كل الأعداء الروحيين الخفيين والظاهرين، عاوزين يشيلوا أورشليم من طريقهم. ويرموها.
"وَيَكُونُ فِي ذلِكَ الْيَوْمِ أَنِّي أَجْعَلُ أُورُشَلِيمَ حَجَرًا مِشْوَالًا لِجَمِيعِ الشُّعُوبِ، وَكُلُّ الَّذِينَ يَشِيلُونَهُ يَنْشَقُّونَ شَقًّا."
... ربنا له المجد لما اتكلم عن حجر الزاوية قال: من سقط هذا الحجر عليه يترضض. ومن سقط هو عليه، يسحقه.
كل اللي هيعادي الكنيسة، أورشليم. ينشقون شقاً.
زي كل اللي أذي الكنيسة أو كان بيحاول يأذيها: زي دقلديانوس – نيرون – أي حد مد ايده علي الكنيسة، دلوقتي ملهومش وجود.
فعاوز يقول: انهم فاكرين انهم هيقدروا يشيلوا أورشليم علشان يطوحوها ويرموها. لكن أورشليم بالنسبة لهم، هتبقي حجر مشوالا. يعني اللي هيشيلها ، هي هتكسره.
اللي يقرب من أورشليم، يدوخ. ( آية 2). واللي يشيلها، هيقع تحتها.
يعني: متستقلوش بأورشليم الغلبانة ديه. ديه بتاعة ربنا . محمية في ايد ربنا. محدش هيقدر عليها. وكل اللي يشيل أورشليم، ينشق.
"وَيَجْتَمِعُ عَلَيْهَا كُلُّ أُمَمِ الأَرْضِ." ... زي المزمور "لِمَاذَا ارْتَجَّتِ الأُمَمُ، وَتَفَكَّرَ الشُّعُوبُ فِي الْبَاطِلِ؟
قَامَ مُلُوكُ الأَرْضِ، وَتَآمَرَ الرُّؤَسَاءُ مَعًا عَلَى الرَّبِّ وَعَلَى مَسِيحِهِ، قَائِلِينَ: لِنَقْطَعْ قُيُودَهُمَا، وَلْنَطْرَحْ عَنَّا رُبُطَهُمَا. اَلسَّاكِنُ فِي السَّمَاوَاتِ يَضْحَكُ. الرَّبُّ يَسْتَهْزِئُ بِهِمْ."
يعني: كل شوية الشيطان يهيج العالم علي الكنيسة. علي أولاد ربنا. سواء عن طريق: بدع جديدة – أفكار جديدة - خطايا جديدة وهكذا.
4فِي ذلِكَ الْيَوْمِ، يَقُولُ الرَّبُّ، أَضْرِبُ كُلَّ فَرَسٍ بِالْحََيْرَةِ وَرَاكِبَهُ بِالْجُنُونِ. وَأَفْتَحُ عَيْنَيَّ عَلَى بَيْتِ يَهُوذَا، وَأَضْرِبُ كُلَّ خَيْلِ الشُّعُوبِ بِالْعَمَى. "وَأَفْتَحُ عَيْنَيَّ عَلَى بَيْتِ يَهُوذَا،" ... ربنا فاتح عينه علي شعبه وكنيسته. ربنا حامينا وحامي كنيسته.
"وَأَضْرِبُ كُلَّ خَيْلِ الشُّعُوبِ بِالْعَمَى." ... كل اللي هيتجمع علي أورشليم الجديدة. اللي هي الكنيسة. يُصاب بالعمي. كل واحد عايش في الشر، ده أعمي. ماشي في الظلمة. لكن أبناء الله: هنا أبناء النور.
كل عين ربنا علي بيت يهوذا، أولاده. شعبه. ربنا قالنا: نقشتكم علي كف يديّ. وقال: من يمسكم يمس حدقة عينه.
الأشرار اللي عاوزين يأذوا الكنيسة ويأذونا، هيقعوا في بعض. لأن ربنا له المجد، فوق الكل. فهو يملك كل القرارات.
5فَتَقُولُ أُمَرَاءُ يَهُوذَا فِي قَلْبِهِمْ: إِنَّ سُكَّانَ أُورُشَلِيمَ قُوَّةٌ لِي بِرَبِّ الْجُنُودِ إِلهِهِمْ. "فَتَقُولُ أُمَرَاءُ يَهُوذَا فِي قَلْبِهِمْ:" ... أُمَرَاءُ يَهُوذَا: اللي هو احنا. أولاد ربنا. أولاد الملك.
أمراء يهوذا: بالمعني الحرفي، هما الناس المسئولين في يهوذا. ويقولوا: ده شعبنا شعب قوي. لأن الهنا قوي. القوة مش مننا. ... "إِنَّ سُكَّانَ أُورُشَلِيمَ قُوَّةٌ لِي بِرَبِّ الْجُنُودِ إِلهِهِمْ."
ابن الملك: هو الأمير. وكمان ممكن أمراء يهوذا: هما أباءنا الرسل. اللي نشروا الإيمان في العالم كله. واحنا مبنيين علي أساس الرسل. كنيستنا كنيسة رسولية. مستلمة تعليمها من آبائنا الرسل الأطهار.
"إِنَّ سُكَّانَ أُورُشَلِيمَ قُوَّةٌ لِي بِرَبِّ الْجُنُودِ إِلهِهِمْ." ... أولاد ربنا، قوتنا في ربنا له المجد. "الرَّبُّ قُوَّتِي وَنَشِيدِي، وَقَدْ صَارَ خَلاَصِي." "الرَّبُّ لِي فَلاَ أَخَافُ. مَاذَا يَصْنَعُ بِي الإِنْسَانُ؟".
فلازم نعرف إننا أمراء يهوذا. قوتنا في ربنا له المجد.
6فِي ذلِكَ الْيَوْمِ أَجْعَلُ أُمَرَاءَ يَهُوذَا كَمِصْبَاحِ نَارٍ بَيْنَ الْحَطَبِ، وَكَمِشْعَلِ نَارٍ بَيْنَ الْحُزَمِ. فَيَأْكُلُونَ كُلَّ الشُّعُوبِ حَوْلَهُمْ عَنِ الْيَمِينِ وَعَنِ الْيَسَارِ، فَتَثْبُتُ أُورُشَلِيمُ أَيْضًا فِي مَكَانِهَا بِأُورُشَلِيمَ. "فِي ذلِكَ الْيَوْمِ أَجْعَلُ أُمَرَاءَ يَهُوذَا كَمِصْبَاحِ نَارٍ بَيْنَ الْحَطَبِ،"... أمراء يهوذا: احنا أولاد الملك. بنكون زي مصباح: لأن ربنا قالنا: أنتم نور العالم.. والعذارى الحكيمات كانوا شايلين مصابيح، فيها زيت. مصابيح منورة.
" كَمِصْبَاحِ نَارٍ بَيْنَ الْحَطَبِ،" ... في الرؤيا بتاعة يهوشع رئيس الكهنة الأعظم، والشيطان اللي كان بيقاومه. قاله "كشعلة مُنتشلة من النار." المقصود بالنار: نار الروح القدس اللي جوانا.
فالمعني: الروح القدس اللي جوانا، تقدر تحرق كل شهوة وخطية جوانا. زي ما النار، بتولع في الحطب.
بالروح القدس اللي جوانا، نقدر ننتصر علي نيران الشهوة والضعف والخطية.
"وَكَمِشْعَلِ نَارٍ بَيْنَ الْحُزَمِ." ... بيكررها تاني. لما يحطوا نار علي التبن، بيولع في لحظات. فقوة الروح القدس اللي جوانا، بتعمل كده. بتدينا الانتصار علي كل حاجة جوانا.
"فَيَأْكُلُونَ كُلَّ الشُّعُوبِ حَوْلَهُمْ عَنِ الْيَمِينِ وَعَنِ الْيَسَارِ،" ... الآباء اللي فسروا لنا الكتاب المقدس، أباء الكنيسة الأوائل. قالوا: نار الروح القدس اللي بتأكل اللي علي اليمين واليسار. المقصود بيها الانتصار علي الضربات اليمينية والضربات اليسارية.. احنا مش بنحارب ناس. لكن حربنا مع قوات الظلمة الروحية. أجناد الشر الروحية.
- ا لضربات اليسارية: المقصود بيها، الشهوة والخطية.
- الضربات اليمينية: المقصود بيها، البر الذاتي – الكبرياء (حب الكرامة) – المديح – وهكذا. فربنا يدينا الانتصار علي الأعداء. وأورشليم تبقي ثابتة للأبد.
"فَتَثْبُتُ أُورُشَلِيمُ أَيْضًا فِي مَكَانِهَا بِأُورُشَلِيمَ." ... أورشليم تبقي قوية. ثابتة بقوة ربنا للأبد.
7وَيُخَلِّصُ الرَّبُّ خِيَامَ يَهُوذَا أَوَّلاً لِكَيْلاَ يَتَعَاظَمَ افْتِخَارُ بَيْتِ دَاوُدَ وَافْتِخَارُ سُكَّانِ أُورُشَلِيمَ عَلَى يَهُوذَا. "وَيُخَلِّصُ الرَّبُّ خِيَامَ يَهُوذَا أَوَّلًا"... أورشليم فيها ناس غلابة. ساكنين في الخيام.
"لِكَيْلاَ يَتَعَاظَمَ افْتِخَارُ بَيْتِ دَاوُدَ وَافْتِخَارُ سُكَّانِ أُورُشَلِيمَ عَلَى يَهُوذَا." ... وفيها ناس ساكنين في بيوت. وفيها أغنياء ساكنين في قصور. فكان في طبقية في أرشليم. مملكة يهوذا.
"وَيُخَلِّصُ الرَّبُّ خِيَامَ يَهُوذَا أَوَّلًا" ... يعني ربنا دايما بيشتغل بالضعيف. والقديس بولس الرسول قال: "لأَنِّي حِينَمَا أَنَا ضَعِيفٌ فَحِينَئِذٍ أَنَا قَوِيٌّ.".. ربنا له المجد، بيشتغل مع المنسحق. الهنا إله الضعفاء والمنسحقين.
والقديس يعقوب قال "أَمَا اخْتَارَ اللهُ فُقَرَاءَ هذَا الْعَالَمِ أَغْنِيَاءَ فِي الإِيمَانِ، وَوَرَثَةَ الْمَلَكُوتِ الَّذِي وَعَدَ بِهِ الَّذِينَ يُحِبُّونَهُ؟" ... هما دول اللي هيورثوا ملكوت السماوات. لأنهم بيفتخروا بربنا يسوع المسيح ومتكلين عليه.
لكن المفتخرين بقوتهم، المتكلين علي غناهم. ربنا يقولهم: يالا بقي خلّص نفسك بنفسك.
ولما ربنا يخلصني أنا الضعيف ويديني انتصار. مينفعش بعد كده، أفتخر وأقول أنا خلصت نفسي ..."لِكَيْلاَ يَتَعَاظَمَ افْتِخَارُ بَيْتِ دَاوُدَ" ... لئلا الناس تفتخر بقوتها والعِلم بتاعها ويفتخروا بغناهم.
8فِي ذلِكَ الْيَوْمِ يَسْتُرُ الرَّبُّ سُكَّانَ أُورُشَلِيمَ، فَيَكُونُ الْعَاثِرُ مِنْهُمْ فِي ذلِكَ الْيَوْمِ مِثْلَ دَاوُدَ، وَبَيْتُ دَاوُدَ مِثْلَ اللهِ، مِثْلَ مَلاَكِ الرَّبِّ أَمَامَهُمْ. "فِي ذلِكَ الْيَوْمِ يَسْتُرُ الرَّبُّ سُكَّانَ أُورُشَلِيمَ،"... كل يوم في صلاة الشكر، نصلي ونقول: لأنك سترتنا
ربنا بيستر علينا. يعني بيحمينا من الشيطان. مش بيفضح ضعفاتنا. بيكسي العُري اللي الخطية عملته فينا. فبقينا مستورين.
"فَيَكُونُ الْعَاثِرُ مِنْهُمْ فِي ذلِكَ الْيَوْمِ مِثْلَ دَاوُدَ،" ... داود النبي لما سقط. وعثُر في الخطية، داود النبي قدر يقدم توبة. ويستعيد قداسته. وعلاقته الحلوة مع ربنا من تاني. وكتب لنا المزامير الجميلة بتاعة التوبة.
فالإنسان اللي بيسقط، ويتكل علي ربنا. ربنا يُقيمه من سقطته. وربنا يقوله: الصدّيق يسقط 7 مرات ويقوم.
ويقدر يقول: لا تشتمي بي يا عدوتي. لأني اذا سقطت أقوم.
"وَبَيْتُ دَاوُدَ مِثْلَ اللهِ،" ... المسيح له المجد بالجسد، أتي من نسل داود. فالمقصود ببيت داود: هو السبط أو العشيرة، اللي جه منها ربنا يسوع المسيح له المجد، بالجسد.
الكنيسة: هي جسد ربنا يسوع المسيح له المجد. هي بيت داود.
فالمعني: ربنا عاوز كل واحد في الكنيسة، يكون جواه صورة المسيح له المجد.
"مِثْلَ مَلاَكِ الرَّبِّ أَمَامَهُمْ." ... يعني: ليهم سيرة ملائكية حلوة. يسلكوا بحسب قانون السماء. مش بحسب الأرض وترابها وشهواتها.
"وَبَيْتُ دَاوُدَ مِثْلَ اللهِ، مِثْلَ مَلاَكِ الرَّبِّ أَمَامَهُمْ." ... جميلة الآية ديه. الكنيسة هي بيت الملايكة. هي معمل القديسين. حتي اللي بيسقط، بيقوم تاني زي داود النبي، لما قام من سقوطه.
9وَيَكُونُ فِي ذلِكَ الْيَوْمِ أَنِّي أَلْتَمِسُ هَلاَكَ كُلِّ الأُمَمِ الآتِينَ عَلَى أُورُشَلِيمَ. العكس بيكون اللي بره الكنيسة. شوفنا حالة الكنيسة وبيت داود.
هنا في هلاك لكل اللي بيقاوموا الكنيسة و أولاد ربنا. ربنا طمنا وقالنا "الرَّبُّ يُقَاتِلُ عَنْكُمْ وَأَنْتُمْ تَصْمُتُونَ."
10«وَأُفِيضُ عَلَى بَيْتِ دَاوُدَ وَعَلَى سُكَّانِ أُورُشَلِيمَ رُوحَ النِّعْمَةِ وَالتَّضَرُّعَاتِ، فَيَنْظُرُونَ إِلَيَّ، الَّذِي طَعَنُوهُ، وَيَنُوحُونَ عَلَيْهِ كَنَائِحٍ عَلَى وَحِيدٍ لَهُ، وَيَكُونُونَ فِي مَرَارَةٍ عَلَيْهِ كَمَنْ هُوَ فِي مَرَارَةٍ عَلَى بِكْرِهِ. آية مهمة. ونبوة من نبوات، في سفر زكريا النبي. وبتتقال في الجمعة العظيمة.
هنبتدي الأخبار الحلوة:
- ربنا قال: هأخلي أورشليم تدّوخ العالم كله. أورشليم اللي هي الكنيسة. واللي يجي عليها يا أما يدوخ أو يتشق اتنين. (آية 3).
- أباءنا الرسل، أمراء يهوذا. ينوروا العالم كله. ينشروا نار الحب الإلهي في العالم. واحنا كمان أولاد ربنا، المفروض ننشر الحب الإلهي.
- أن الغلابة هما يبقوا أصحاب السماء.
- ربنا بيستر علينا. واللي بيتكعبل فينا ويقع، بيبقي زي داود النبي وقلب داود. يقوم بقوة ربنا من سقطته.
"وَأُفِيضُ عَلَى بَيْتِ دَاوُدَ وَعَلَى سُكَّانِ أُورُشَلِيمَ رُوحَ النِّعْمَةِ وَالتَّضَرُّعَاتِ،"... روح النعمة والتضرع، ده هو روح العهد الجديد.
" رُوحَ النِّعْمَةِ" ... هو الروح القدس. روح ربنا له المجد، اللي بتطلّع من الضعف، قوة.
" وَأُفِيضُ" ... يبقي كل أولاد الكنيسة، يتملوا من الروح القدس. يتدلق عليهم الروح القدس. يفيض عليهم. زي ما حصل في يوم الخمسين.
" رُوحَ النِّعْمَةِ وَالتَّضَرُّعَاتِ،" ... كل ما الواحد يتضرع لربنا له المجد، كل ما النعمة تملانا. الروح اللي يخليك تتضرع وتصلي وتشجعنا علي الصلاة والصوم ومقاومة الخطية، هو نفسه اللي يملاك بالنعمة.
فلما الواحد فينا يصلي بحرارة، ده الروح القدس اللي جوانا بيساعدنا.
علشان كده ربنا له المجد، وصي تلاميذه: لا تبرحوا أورشليم الي أن تلبسوا قوة من الأعالي. وده فعلا اللي حصل. أن يوم الخمسين، دخلت فيهم قوة الروح القدس. والنار كانت بتجري فيهم. نار التعليم والايمان بربنا له المجد.
التضرع: ده احساس من القلب. "طوبي للمساكين بالروح." المسكين بالروح : هو اللي بيتضرع. بيصرخ لربنا، يارب صلح حالي وقلبي.
"فَيَنْظُرُونَ إِلَيَّ، الَّذِي طَعَنُوهُ،" ... وكأن زكريا النبي، كان موجود في اللحظة ديه. وكمان قالها يوحنا الحبيب في سفر الرؤيا "ينظرون اليه، كل الذين طعنوه."
اللي طعنوه، اللي كانوا تحت الصليب. أو طعنوه كرفضهم لربنا له المجد عن طريق الإلحاد والأفكار الغريبة اللي موجودة في العالم. وهيعترفوا أنه فعلا، ربنا يسوع له المجد. بس هيكون خلاص الوقت فات.
فهنا بيقول: احنا ككنيسة عنينا تروح علي الصليب. فلما نتملي بروح النعمة والتضرعات، اللي هو الروح القدس ... " فَيَنْظُرُونَ إِلَيَّ،" ... يبقي الروح القدس، هتخلي عنينا تروح علي المسيح له المجد.
المسيح المصلوب. لأن طول ما بنبص علي المسيح له المجد وصليبه، الدنيا هتصغر في نظرنا.
" الَّذِي طَعَنُوهُ،" ... فهنا ربنا يسوع له المجد، بيعّرف نفسه. انهم طعنوه وصلبوه.
"وَيَنُوحُونَ عَلَيْهِ كَنَائِحٍ عَلَى وَحِيدٍ لَهُ،" ... يَنُوحُونَ: زي ما قال يوحنا الحبيب في سفر الرؤيا: انهم أول ما هيشوفوا ربنا يسوع له المجد علي السحاب، هيقولوا: للجبال اسقطي علينا. وللآكام غطينا من وجه الجالس علي العرش.
وده لأنهم استهزوا بالصليب واستهانوا بجراحات ربنا يسوع المسيح له المجد.
فهيكون وقتها: النوح، نوح أبدي. عذاب أبدي. وديه هتكون مرارة الهلاك والندم اللي ملهوش علاج.
"وَيَنُوحُونَ عَلَيْهِ كَنَائِحٍ عَلَى وَحِيدٍ لَهُ،" ... يعني: كأنه إنسان فقد ابنه الوحيد.
"وَيَكُونُونَ فِي مَرَارَةٍ عَلَيْهِ كَمَنْ هُوَ فِي مَرَارَةٍ عَلَى بِكْرِهِ." ... يعني: مرارة الفقد. فقد الابن الوحيد.
في ناس تبص لصورة الصليب، وتبكي علي خطاياها. علشان كده بنحط صورة الصلبوت في أسبوع الآلام. لأن مشاعرنا بتتحرك.
"فَيَنْظُرُونَ إِلَيَّ، الَّذِي طَعَنُوهُ،" ... يبصوا علي الجراحات واكليل الشوك والمسامير وطعنة الحربة.
11فِي ذلِكَ الْيَوْمِ يَعْظُمُ النَّوْحُ فِي أُورُشَلِيمَ كَنَوْحِ هَدَدْرِمُّونَ فِي بُقْعَةِ مَجِدُّونَ. "هَدَدْرِمُّونَ فِي بُقْعَةِ مَجِدُّونَ." ... ده المكان اللي مات فيه يوشيا الملك، ملك يهوذا. لما طلع يحارب فرعون مصر. وفرعون، قتله. (قصته موجودة في ملوك التاني – وأخبار الأيام التاني.)
يوشيا الملك: كان ملك صالح. ومن أعظم ملوك مملكة يهوذا. وحالة الحزن والبكاء اللي حصل علي يوشيا الملك، محصلتش قبل كده في شعب إسرائيل.
لدرجة أن ارميا النبي، عمل رثاء ليوشيا الملك. فهنا بيقولهم: ولا كأنه اليوم، اللي أورشليم حزنت فيه، وبكت بكاء مُر. يوم موت يوشيا الملك.
12وَتَنُوحُ الأَرْضُ عَشَائِرَ عَشَائِرَ عَلَى حِدَتِهَا: عَشِيرَةُ بَيْتِ دَاوُدَ عَلَى حِدَتِهَا، وَنِسَاؤُهُمْ عَلَى حِدَتِهِنَّ. عَشِيرَةُ بَيْتِ نَاثَانَ عَلَى حِدَتِهَا، وَنِسَاؤُهُمْ عَلَى حِدَتِهِنَّ. "وَتَنُوحُ الأَرْضُ عَشَائِرَ عَشَائِرَ عَلَى حِدَتِهَا:"... عَلَى حِدَتِهَا: يعني كل واحد لوحده. كل عشيرة لوحدها.
" عَشِيرَةُ بَيْتِ دَاوُدَ عَلَى حِدَتِهَا، وَنِسَاؤُهُمْ عَلَى حِدَتِهِنَّ." ... كمان الرجالة لوحدهم. والسيدات لوحدهن.
بيت داود: إشارة للنسل الملكي.
"عَشِيرَةُ بَيْتِ نَاثَانَ عَلَى حِدَتِهَا، وَنِسَاؤُهُمْ عَلَى حِدَتِهِنَّ." ... ناثان: في أيام دواد النبي، كان ناثان النبي وقتها. فهم إشارة للأنبياء.
13عَشِيرَةُ بَيْتِ لاَوِي عَلَى حِدَتِهَا، وَنِسَاؤُهُمْ عَلَى حِدَتِهِنَّ. عَشِيرَةُ شَمْعِي عَلَى حِدَتِهَا، وَنِسَاؤُهُمْ عَلَى حِدَتِهِنَّ. "عَشِيرَةُ بَيْتِ لاَوِي عَلَى حِدَتِهَا، وَنِسَاؤُهُمْ عَلَى حِدَتِهِنَّ."... بيت لاوي: إشارة للكهنوت.
"عَشِيرَةُ شَمْعِي عَلَى حِدَتِهَا، وَنِسَاؤُهُمْ عَلَى حِدَتِهِنَّ." ... بيت شمعي: في ناس بتقول: ده اللي ظهر منه المعلمون والكتبة.
14كُلُّ الْعَشَائِرِ الْبَاقِيَةِ عَشِيرَةٌ عَشِيرَةٌ عَلَى حِدَتِهَا، وَنِسَاؤُهُمْ عَلَى حِدَتِهِنَّ. هنا بيقول الحزن عام. وفردي.
يعني: كل العشائر حزينة. بس كل واحد كمان، بيبكي مع نفسه. حتى الراجل لوحده. والسيدة لوحدها.
كأن مفيش حد عارف يعزي التاني. حتي الزوج مش عارف يعزي زوجته. ولا الزوجة عارفة تعزي زوجها.
وكأن ربنا عاوز يقولنا في نها ية الاصحاح:
كل إنسان هيرفض جراحات المسيح له المجد. ويستهين الفداء ودم ربنا يسوع المسيح المسفوك علي عود الصليب ويستهين بالخلاص. هذا الإنسان، لن يكون له تعزية.
لن يوجد ما يرفع الحزن عنه. ولا حاجة هتخفف الآمه.
كل إنسان هيرفض يسوع المسيح له المجد، هيكون ألمه وحزنه، لانهاية لهم. هيكون عذاب وهلاك أبدي.
ربنا مش عاوزنا نوصل للحزن اللي من النوع ده. ربنا عاوزنا نحزن علي خطايانا. الحزن الذي يقود للتوبة. للخلاص. ربنا عاوز مننا، دموع التوبة اللي من القلب بجد.
"كُلُّ الْعَشَائِرِ الْبَاقِيَةِ عَشِيرَةٌ عَشِيرَةٌ عَلَى حِدَتِهَا، وَنِسَاؤُهُمْ عَلَى حِدَتِهِنَّ" ... ربنا له المجد: الي خاصته
جاء، وخاصته لم تقبله.
فربنا جاب عينات من العشائر بتاعة اليهود. وفي الأخر قال: كله هيبكي. هيهلكوا. لأنهم رفضوا ربنا يسوع المسيح له المجد. ورفضوا الحياة الأبدية.
والكلام علي الرجال والسيدات، لئلا حد يفتكر، أن العقاب للرجال فقط.
⪢