⪡ 1هُوَذَا يَوْمٌ لِلرَّبِّ يَأْتِي فَيُقْسَمُ سَلَبُكِ فِي وَسَطِكِ. إن كان الصليب ادي بركة لأولاد ربنا. فالصليب: هو دينونة للأشرار.. ربنا له المجد قالهم: لم تعرفي زمان افتقادك.
وقال: هوذا بيتكم يُترك لكم خراباً.
وبعد صعود يسوع المسيح له المجد، بأقل من 40 سنة جه تيطُس الروماني، وخرّب أورشليم تماماً.
في العادي: لما جيش بيأخد غنيمة، مش بيقسموا الغنيمة في البلد اللي أخدوها أو هجموا عليها. علشان ده ممكن يحفز جيش البلد اللي سلبوها، ويبقي عندهم فرصة انهم يهجموا علي الأعداء، وهما مشغولين في تقسيم الغنيمة. لكن التقسيم بيتم لما بيرجعوا بلدهم بكل الغنيمة.
"فَيُقْسَمُ سَلَبُكِ فِي وَسَطِكِ." ... يعني أورشليم انتهت تماما. مفيش فيها قوة ولا إمكانية أنها ترجع.
الكلام علي أورشليم. فربنا عاوز يقولها: كفاياكي كبرياء. لأن كانت مشكلتهم، الكبرياء.
وقد انتهت أمة اليهود كهنوتيًا يوم الصليب، يوم انشق حجاب الهيكل. وانتهت كدولة سنة 70 م. على يد تيطس، لكن يبدو أن قصة خراب أورشليم ستتكرر في نهاية الأيام.
2وَأَجْمَعُ كُلَّ الأُمَمِ عَلَى أُورُشَلِيمَ لِلْمُحَارَبَةِ، فَتُؤْخَذُ الْمَدِينَةُ، وَتُنْهَبُ الْبُيُوتُ، وَتُفْضَحُ النِّسَاءُ، وَيَخْرُجُ نِصْفُ الْمَدِينَةِ إِلَى السَّبْيِ، وَبَقِيَّةُ الشَّعْبِ لاَ تُقْطَعُ مِنَ الْمَدِينَةِ. الآية ديه: بتوضح، الخراب اللي هيحصل للأشرار.
واللي حصل في هجوم تيطُس علي أورشليم، ده صورة مصغرة في اللي هيحصل في الأيام الأخيرة. يعني: في الأيام الأخيرة هيتكرر خراب أورشليم من تاني. حسب كلام سفر الرؤيا.
"وَأَجْمَعُ كُلَّ الأُمَمِ عَلَى أُورُشَلِيمَ لِلْمُحَارَبَةِ، فَتُؤْخَذُ الْمَدِينَةُ، وَتُنْهَبُ الْبُيُوتُ،" ... الآية ديه : بتتكلم عن كل بيسلم نفسه للشيطان والشر. والإنسان ده بيحصله خراب علي المستوي الروحي والجسدي والنفسي. في الأخر بيصير خراب ومسكن للشياطين.
"وَتُفْضَحُ النِّسَاءُ،" ... جيش الأعداء كان بيأخد النساء قدام رجالتهم وأولادهم.
"وَيَخْرُجُ نِصْفُ الْمَدِينَةِ إِلَى السَّبْيِ،" ... هيحصل سبي للمدينة. النص هيروح السبي.
"وَبَقِيَّةُ الشَّعْبِ لاَ تُقْطَعُ مِنَ الْمَدِينَةِ." ... يعني: لسه أورشليم فيها ناس موجودين، لسه أولاد ربنا.
3فَيَخْرُجُ الرَّبُّ وَيُحَارِبُ تِلْكَ الأُمَمَ كَمَا فِي يَوْمِ حَرْبِهِ، يَوْمَ الْقِتَالِ. "فَيَخْرُجُ الرَّبُّ وَيُحَارِبُ تِلْكَ الأُمَمَ" ... ربنا هيفضل يحارب عن أولاده. مش هيسيبنا أبدا، طول ما احنا ماسكين في ربنا.
"كَمَا فِي يَوْمِ حَرْبِهِ، يَوْمَ الْقِتَالِ" ... يوم حرب ربنا، هو كان يوم الصليب. وربنا هزم فيه الشيطان وقواته، أجناد الشر الروحية.
4وَتَقِفُ قَدَمَاهُ فِي ذلِكَ الْيَوْمِ عَلَى جَبَلِ الزَّيْتُونِ الَّذِي قُدَّامَ أُورُشَلِيمَ مِنَ الشَّرْقِ، فَيَنْشَقُّ جَبَلُ الزَّيْتُونِ مِنْ وَسَطِهِ نَحْوَ الشَّرْقِ وَنَحْوَ الْغَرْبِ وَادِيًا عَظِيمًا جِدًّا، وَيَنْتَقِلُ نِصْفُ الْجَبَلِ نَحْوَ الشِّمَالِ، وَنِصْفُهُ نَحْوَ الْجَنُوبِ. بيكمل كلامه عن يوم الصليب.
"وَتَقِفُ قَدَمَاهُ فِي ذلِكَ الْيَوْمِ عَلَى جَبَلِ الزَّيْتُونِ الَّذِي قُدَّامَ أُورُشَلِيمَ مِنَ الشَّرْقِ،" ... جيل الزيتون ده كان شرق أورشليم. وسموه جبل الزيتون: لأنه كان بيشتهر بأشجار الزيتون، التي تنمو عليه.
جبل الزيتون: كان محور رئيسي في أحداث الفداء، في حياة ربنا يسوع المسيح له المجد، وهو في الجسد. وربنا يسوع له المجد، لما بكي علي أورشليم كان علي جبل الزيتون.
وبستان جسيماني، وفيه أُلقي القبض علي ربنا يسوع له المجد. كان برده علي جبل الزيتون. والصعود كان من علي جبل الزيتون.
"فَيَنْشَقُّ جَبَلُ الزَّيْتُونِ مِنْ وَسَطِهِ نَحْوَ الشَّرْقِ وَنَحْوَ الْغَرْبِ وَادِيًا عَظِيمًا جِدًّا،" ... الصعود والنزول من علي الجبل صعب جدا، لكن لما ينشق الجبل، ويبقي في وادي في النص، تبقي الحركة فيه سهلة.
وبالصليب: انشق الحاجز المتوسط بين الله والإنسان.. بالصليب: صار الطريق للسماء، وادي مُمهد.
(قبل الصليب: محدش كان يقدر يوصل للسماء. بالصليب، انشق حجاب الهيكل من وسطه.. بعد الصليب: بقي الوصول للسماء، ممكن)
"وَيَنْتَقِلُ نِصْفُ الْجَبَلِ نَحْوَ الشِّمَالِ، وَنِصْفُهُ نَحْوَ الْجَنُوبِ." ... كأن كرازة الصليب، وصلت للعالم كله. الشرق والغرب والشمال والجنوب. والخلاص كان لكل المسكونة.
وكمان الجزء ده يفكرنا: أن المسيح يسوع له المجد اللي فدانا علي الصليب، وضع خرافه عن يمينه. والجداء عن اليسار.
اللي قِبل الفداء واحتمي في دم المسيح، ومسك في الأسرار، وقدر ينفذ وصايا الكتاب المقدس. ربنا حطه عن يمينه. ربنا قال: تعالوا اليا يا مباركي أبي. رثوا المُلك المُعد لكم من قبل إنشاء العالم.. وقال للي علي اليسار: اذهبوا عني لا أعرفكم.
5وَتَهْرُبُونَ فِي جِوَاءِ جِبَالِي، لأَنَّ جِوَاءَ الْجِبَالِ يَصِلُ إِلَى آصَلَ. وَتَهْرُبُونَ كَمَا هَرَبْتُمْ مِنَ الزَّلْزَلَةِ فِي أَيَّامِ عُزِّيَّا مَلِكِ يَهُوذَا. وَيَأْتِي الرَّبُّ إِلهِي وَجَمِيعُ الْقِدِّيسِينَ مَعَكَ. الكلام علي أولاد ربنا:
"وَتَهْرُبُونَ فِي جِوَاءِ جِبَالِي،" ... جِوَاءِ جِبَالِي: يعني وادي الجبال. يعني يهربوا علي الجبل.
"لأَنَّ جِوَاءَ الْجِبَالِ يَصِلُ إِلَى آصَلَ." ... آصَلَ: ديه منطقة. ومعناها: المعزول. مكان معزول.
فربنا عاوز يقول لأولاده: بعد الصليب، أنتم مالكمش مكان في العالم. مكانكم علي الجبال.. يعني ترتفع. تطلع لفوق. متتمسكش بالأرضيات. متخليش عينيك علي الأرض وشهواتها.. ترتفع لفوق لغاية آصَلَ، المكان المعزول.
ربنا عاوز يقول: أن الكنيسة، مش جزء من العالم. لكنها معزولة عن العالم. مش مختلطة بأهل الشر"لاَ تَكُونُوا تَحْتَ نِيرٍ مَعَ غَيْرِ الْمُؤْمِنِينَ، لأَنَّهُ أَيَّةُ خِلْطَةٍ لِلْبِرِّ وَالإِثْمِ؟ وَأَيَّةُ شَرِكَةٍ لِلنُّورِ مَعَ الظُّلْمَةِ؟"
"وَتَهْرُبُونَ كَمَا هَرَبْتُمْ مِنَ الزَّلْزَلَةِ فِي أَيَّامِ عُزِّيَّا مَلِكِ يَهُوذَا. وَيَأْتِي الرَّبُّ إِلهِي وَجَمِيعُ الْقِدِّيسِينَ مَعَكَ." ... في زلزلة قوية حصلت في اليهودية، أيام عُزيا الملك (سفر الملوك وأخبار الأيام: بيوضحوا أن عُزيا الملك كان في البداية، ملك كويس، لغاية ما في أخر أيامه: اتمرد علي الكهنوت، وطلب أنه يقدم بخور. واتجرأ وقدم البخور. فاتضرب بالبرص في الحال، في جبهته. وطُرد من الهيكل)
فيبدو أن الزلزلة الي حصلت في أيامه، كانت قوية جدا. ومن قوة الزلزلة، زكريا النبي اتكلم عنا بعد مئات السنين. فبيقولهم: فاكرين الناس ديه هربت ازاي، أيام وقت عُزيا الملك؟ فأنا عاوزكم تهربوا من العالم والشر والخطية، كأنه زلزال.
- في زلزلة عقاب من ربنا.
- وفي زلزلة، وقت الصليب. وحصل معاها أن القبور تفتحت. وأجساد الراقدين قامت.
- وفي زلزلة: تحرك توبة الإنسان وتخليه، يقوم من الخطية. وفي زلزلة غضب من ربنا.
فربنا بيقولهم علي لسان زكريا النبي: اهربوا من غضب ربنا. وخليكم في الزلزلة بتاعة القيامة.
" وَيَأْتِي الرَّبُّ إِلهِي وَجَمِيعُ الْقِدِّيسِينَ مَعَكَ." ... اللي هيفضل ماسك في الصليب، ده اللي عينه علي الجبال. عينه مرتفعة في السماء. ده اللي بيقول لربنا: أمين تعالي أيها الرب.. منتظرين مجيئك يارب.
لازم تكون قلوبنا وعيونا ناحية السماء. علشان نتمتع بأفراح السماء.
6وَيَكُونُ فِي ذلِكَ الْيَوْمِ أَنَّهُ لاَ يَكُونُ نُورٌ. الْدَّرَارِي تَنْقَبِضُ. آية 6 و 7: الجزء ده جميل، نبوة عن الصليب. بنقرأها يوم الجمعة العظيمة.
"وَيَكُونُ فِي ذلِكَ الْيَوْمِ" ... يوم الصليب.
"أَنَّهُ لاَ يَكُونُ نُورٌ. الْدَّرَارِي تَنْقَبِضُ." ... الْدَّرَارِي: هي أفلام السماء. الشمس والقمر والنجوم.
وقت الصليب، مكانش في نور علي الأرض. كانت ظلمة علي الأرض كلها. من الساعة السادسة الي الساعة التاسعة.
7وَيَكُونُ يَوْمٌ وَاحِدٌ مَعْرُوفٌ لِلرَّبِّ. لاَ نَهَارَ وَلاَ لَيْلَ، بَلْ يَحْدُثُ أَنَّهُ فِي وَقْتِ الْمَسَاءِ يَكُونُ نُورٌ. "وَيَكُونُ يَوْمٌ وَاحِدٌ مَعْرُوفٌ لِلرَّبِّ." ... لأن يوم الصليب، كان في ذهن الله منذ الأزل. (ربنا معملش قصة الصليب، مفاجأة)
"لاَ نَهَارَ وَلاَ لَيْلَ،" ... الساعة السادسة اللي حصل فيها الظلمة: كانت الساعة 12 الظهر. بس النهار بقي مُظلم. بقي ضلمة. لكن في التوقيت ده أصلا، ماهواش توقيت ليل.. وبكده هو لا نهار ولا ليل. والساعة التاسعة: اللي هي الساعة 3 الضهر.
"بَلْ يَحْدُثُ أَنَّهُ فِي وَقْتِ الْمَسَاءِ يَكُونُ نُورٌ." ... وبعدها يبدأ الغروب. اللي حصل أن النور رجع تاني .. فده وصف دقيق من زكريا النبي لأحداث الصليب.
والجو ده، الكنيسة بتعيشنا فيه يوم الجمعة العظيمة. أول ما نقرأ انجيل الساعة السادسة "وكانت ظلمة علي الأرض" كل أنوار الكنيسة تطفي وقتها. و أول ما نقرأ في قراءات الساعة التاسعة كل أنوار الكنيسة ، تنور من تاني.
8وَيَكُونُ فِي ذلِكَ الْيَوْمِ أَنَّ مِيَاهًا حَيَّةً تَخْرُجُ مِنْ أُورُشَلِيمَ نِصْفُهَا إِلَى الْبَحْرِ الشَّرْقِيِّ، وَنِصْفُهَا إِلَى الْبَحْرِ الْغَرْبِيِّ. فِي الصَّيْفِ وَفِي الْخَرِيفِ تَكُونُ. "وَيَكُونُ فِي ذلِكَ الْيَوْمِ" ... بيكمل كلامه عن الصليب.
في رؤيا شوفناها في سفر حزقيال النبي: شاف مية طالعة من تحت عتبة البيت من الناحية اليمين: كونت في النهاية، خارج الهيكل: نهر.
وفي البداية كانت المية لغاية الكعبين. وبعدين للركبتين. وبعدين للحقوين. وفي الأخر قال: نهر لم أستطع عبوره.
زكريا النبي هنا: شاف مياه حية، خارجة من أورشليم، لغاية ما وصلت للبحر الشرقي والبحر الغربي. اللي هما البحر الميت والبحر المتوسط.
وقولنا المية الحية: هي المية الطالعة من جنب يسوع المسيح له المجد، علي عود الصليب. وقاله عنها في الاصحاح 13: ينبوع مفتوح.. المية ديه تروح لكل حتة، للشرق والغرب.
"فِي الصَّيْفِ وَفِي الْخَرِيفِ تَكُونُ." ... معروف أن ينابيع المية في الصيف بتجف، لأن المية بتتبخر مع ا الحرارة.
لكن هنا بيقول : في الصيف والخريف. عاوز يقول إن المية ديه مش بتخلص. ينبوع مفتوح (اصحاح 13)، اللي هو جنب المسيح المطعون، هتفضل المية اللي فيه، تروي كنيسته وأولاده. لغاية المجيء التاني.
9وَيَكُونُ الرَّبُّ مَلِكًا عَلَى كُلِّ الأَرْضِ. فِي ذلِكَ الْيَوْمِ يَكُونُ الرَّبُّ وَحْدَهُ وَاسْمُهُ وَحْدَهُ. "وَيَكُونُ الرَّبُّ مَلِكًا عَلَى كُلِّ الأَرْضِ." ... داود النبي يقول: الرب قد مَلك علي خشبة.
"فِي ذلِكَ الْيَوْمِ يَكُونُ الرَّبُّ وَحْدَهُ وَاسْمُهُ وَحْدَهُ." ... اليوم ده: هو هزيمة الشر. والعالم وممالك الشيطان.
10وَتَتَحَوَّلُ الأَرْضُ كُلُّهَا كَالْعَرَبَةِ مِنْ جَبْعَ إِلَى رِمُّونَ جَنُوبَ أُورُشَلِيمَ. وَتَرْتَفِعُ وَتُعْمَرُ فِي مَكَانِهَا، مِنْ بَابِ بِنْيَامِينَ إِلَى مَكَانِ الْبَابِ الأَوَّلِ، إِلَى بَابِ الزَّوَايَا، وَمِنْ بُرْجِ حَنَنْئِيلَ إِلَى مَعَاصِرِ الْمَلِكِ. "وَتَتَحَوَّلُ الأَرْضُ كُلُّهَا كَالْعَرَبَةِ" ... الْعَرَبَةِ يعني: أرض سهلة. مستوية. ربنا له المجد، سهل الطريق ومهده قدام أولاده.
هيقول: وكأنها أبعاد الكنيسة التي أسسها بدمه، علي الصليب. ويستخدم أسماء أماكن موجودة فعلا في أرض فلسطين. بس كل مكان ليه معني:
"مِنْ جَبْعَ إِلَى رِمُّونَ جَنُوبَ أُورُشَلِيمَ." ...كلمة جَبْعَ: معناها شهادة.. كل اللي في الكنيسة، لازم يكونوا شهود لربنا يسوع المسيح له المجد، قدام العالم.
" رِمُّونَ" ... معناها: مرتفع.
أولاد ربنا اللي جوة الكنيسة، عينهم لفوق. مرتفعين عن العالم والأرضيات والشهوات. علشان كده يقول:
"وَتَرْتَفِعُ وَتُعْمَرُ فِي مَكَانِهَا،" ... الكنيسة أعلي من العالم. لكن ربنا بيعّمر الكنيسة، بخيراته وبروحه القدوس.
"مِنْ بَابِ بِنْيَامِينَ إِلَى مَكَانِ الْبَابِ الأَوَّلِ،" ... باب بنيامين: كانوا بيسموه الباب الأول.
أورشليم أسوارها، ليها 12 باب.. كلمة بنيامين: معناها ابن اليمين. وأولاد ربنا: مكانهم من خراف اليمين.
"إِلَى بَابِ الزَّوَايَا،" ... الكنيسة كلها متأسسة علي ربنا يسوع المسيح له المجد، حجر الزاوية.
احنا ثابتين في المسيح له المجد. حجز الزاوية: اللي جمّع اليهود والأمم. والسماء والأرض، في كنيسته.
"وَمِنْ بُرْجِ حَنَنْئِيلَ إِلَى مَعَاصِرِ الْمَلِكِ." ... كلمة حَنَنْئِيلَ: معناها الله تحنن. وده برج كان موجود قريب من باب الضأن، في سور أورشليم. (باب الضأن اللي كانوا بيدخلوا منه حيوانات الذبائح)
و احنا أصلا: حمايتنا في الذبيحة. دم المسيح يسوع له المجد. الصليب."اِسْمُ الرَّبِّ بُرْجٌ حَصِينٌ، يَرْكُضُ إِلَيْهِ الصِّدِّيقُ وَيَتَمَنَّعُ."
احنا بنتحصن في ربنا له المجد. في مراحم ربنا ... حَنَنْئِيلَ: الله تحنن. وفي محبة ربنا وغفرانه لينا.
" إِلَى مَعَاصِرِ الْمَلِكِ." ... ده أخر الحدود. كانوا بيعصروا فيها العنب. علشان خمر الملك. والخمر في الكتاب المقدس: يُشير للفرح. وكمان يُشير لسر الافخارستيا.
احنا فرحانين بثباتنا في ربنا، من خلال جسده ودمه اللي علي المذبح. هو ده حمايتنا.
11فَيَسْكُنُونَ فِيهَا وَلاَ يَكُونُ بَعْدُ لَعْنٌ. فَتُعْمَرُ أُورُشَلِيمُ بِالأَمْنِ. بعد ما كانت أورشليم خراب ودمار. الوضع يختلف: لأن أورشليم الجديدة، ربنا يسوع المسيح في وسطها. الهنا الحنّان قائم في وسطها، بجسده ودمه. الكنيسة أصلا عبارة عن جسد ربنا يسوع المسيح له المجد.
"فَيَسْكُنُونَ فِيهَا وَلاَ يَكُونُ بَعْدُ لَعْنٌ." ... الإنسان المُتحد بربنا، لا يسقط تحت اللعنات.
ربنا يسوع له المجد علي الصليب، حمل اللعنة. ليُعطي الإنسان، البركة.
"فَتُعْمَرُ أُورُشَلِيمُ بِالأَمْنِ." ... بقت كلها أمان.
الهنا الصالح قال: وأكون سور نار من حولها. فربنا هو أمانا وحمايتنا.
12وَهذِهِ تَكُونُ الضَّرْبَةُ الَّتِي يَضْرِبُ بِهَا الرَّبُّ كُلَّ الشُّعُوبِ الَّذِينَ تَجَنَّدُوا عَلَى أُورُشَلِيمَ. لَحْمُهُمْ يَذُوبُ وَهُمْ وَاقِفُونَ عَلَى أَقْدَامِهِمْ، وَعُيُونُهُمْ تَذُوبُ فِي أَوْقَابِهَا، وَلِسَانُهُمْ يَذُوبُ فِي فَمِهِمْ. " الَّذِينَ تَجَنَّدُوا عَلَى أُورُشَلِيمَ." ... يعني كل الشعوب اللي حاربوها. الكلام علي الأشرار.
"لَحْمُهُمْ يَذُوبُ وَهُمْ وَاقِفُونَ عَلَى أَقْدَامِهِمْ، وَعُيُونُهُمْ تَذُوبُ فِي أَوْقَابِهَا، وَلِسَانُهُمْ يَذُوبُ فِي فَمِهِمْ." ... في أراء كتير في الجزء ده:
- بعض المفسرين قالوا: أن ده كناية عن شدة ضربات الأشرار.
- والبعض قال: أنها كناية عن العذاب في بحيرة الكبريت والنار.
أيا كان التفسير: لكن في فرق شاسع بي اللي ربنا بيقدمه لأولاده. وبين اللي بيجي علي الأشرار.
13وَيَكُونُ فِي ذلِكَ الْيَوْمِ أَنَّ اضْطِرَابًا عَظِيمًا مِنَ الرَّبِّ يَحْدُثُ فِيهِمْ، فَيُمْسِكُ الرَّجُلُ بِيَدِ قَرِيبِهِ وَتَعْلُو يَدُهُ عَلَى يَدِ قَرِيبِهِ. من كتر الضربات اللي جاية علي الأشرار، وده كمان واضح في سفر الرؤيا: انهم يعضون علي ألسنتهم.
ومهما يكون في اتحاد ..."، فَيُمْسِكُ الرَّجُلُ بِيَدِ قَرِيبِهِ" ... برده هيفضلوا منقسمين علي أنفسهم.
" وَتَعْلُو يَدُهُ عَلَى يَدِ قَرِيبِهِ." ... وتفضل في حروب بينهم.
"وَيَكُونُ فِي ذلِكَ الْيَوْمِ أَنَّ اضْطِرَابًا عَظِيمًا مِنَ الرَّبِّ يَحْدُثُ فِيهِمْ" ... صحيح ماسكين في ايد بعض. لكن في نفس الوقت بيتخانقوا.
14وَيَهُوذَا أَيْضًا تُحَارِبُ أُورُشَلِيمَ، وَتُجْمَعُ ثَرْوَةُ كُلِّ الأُمَمِ مِنْ حَوْلِهَا: ذَهَبٌ وَفِضَّةٌ وَمَلاَبِسُ كَثِيرَةٌ جِدًّا. الآية ديه أصلا معناها: يهوذا تُحارب في أورشليم. لأن اللي ساكن في أورشليم، هما يهوذا. فأكيد يهوذا مش هيحارب نفسه.
"وَيَهُوذَا أَيْضًا تُحَارِبُ أُورُشَلِيمَ،" ... لكن معني الآية: يهوذا يُحارب في أورشليم. اللي بيحارب عن الكنيسة، هو الأسد الخارج من سبط يهوذا. المسيح يسوع له المجد. بيحارب عن كنيسته وأولاده.
"وَتُجْمَعُ ثَرْوَةُ كُلِّ الأُمَمِ مِنْ حَوْلِهَا: ذَهَبٌ وَفِضَّةٌ وَمَلاَبِسُ كَثِيرَةٌ جِدًّا." ... الذهب والفضة والملابس الكثيرة جدا، بتاعة الأمم. لكن بعد كده هتبقي مِلك لأورشليم.
احنا كنا من الأمم. لأننا مش يهود. لكن دلوقتي بقينا مِلك لأورشليم. أجمل ثروة الأمم، اللي دخلت أورشليم. هو احنا. خلاص الأمم.
كل الطاقات: من ذهب وفضة وملابس، اللي كانت موجهة للعالم. صارت مِلك للكنيسة.
"وَتُجْمَعُ ثَرْوَةُ كُلِّ الأُمَمِ مِنْ حَوْلِهَا: ذَهَبٌ وَفِضَّةٌ وَمَلاَبِسُ كَثِيرَةٌ جِدًّا." ... كل ديه أمور رمزية، وضح الغني الروحي، اللي في السماء.
15وَكَذَا تَكُونُ ضَرْبَةُ الْخَيْلِ وَالْبِغَالِ وَالْجِمَالِ وَالْحَمِيرِ وَكُلِّ الْبَهَائِمِ الَّتِي تَكُونُ فِي هذِهِ الْمَحَالِّ. كَهذِهِ الضَّرْبَةِ. الكلام هنا مش علي الحيوانات. لأنهم هيموتوا وخلاص. لكن المعني والكلام علي اللي عاشوا زي الحيوانات. هتبقي ضربتهم وحشة. لأن في بشر اتنازلوا علي بشريتهم، وإنسانيتهم. ومشيوا وراء شهواتهم الحيوانية.
الخيل ... رمز للشهوات الجسدية الزيادة.
البغال ... البغل: علشان مش بيجيب أولاد. فهي رمز للعُقم الروحي. مفيش ثمر.
الجمل ... رمز للنجاسة.
الحمير... رمز لقلة العقل. اللي هما ميعرفوش ربنا طول حياتهم. ومفهموش كلام ربنا.
البهائم ... الناس اختاروا الحياة البهيمية. يأكلوا ويشربوا ويناموا وبس.
فكل دول نهايتهم صعبة.
الرسالة لينا.. نرتقي من الإنسان الي شِبه المسيح يسوع له المجد. ونخلي بالنا لأحسن ننزل من مستوي الإنسان، لمستوي الحيوان.
16وَيَكُونُ أَنَّ كُلَّ الْبَاقِي مِنْ جَمِيعِ الأُمَمِ الَّذِينَ جَاءُوا عَلَى أُورُشَلِيمَ، يَصْعَدُونَ مِنْ سَنَةٍ إِلَى سَنَةٍ لِيَسْجُدُوا لِلْمَلِكِ رَبِّ الْجُنُودِ وَلِيُعَيِّدُوا عِيدَ الْمَظَالِّ. زكريا النبي مش قادر يتخيل جمال الأبدية. ما لم تراه عين. ولم تسمع بيه أذن.
"وَيَكُونُ أَنَّ كُلَّ الْبَاقِي مِنْ جَمِيعِ الأُمَمِ " ...الكلام هنا علي الأمم. مش علي اليهود.
وكانت أجمل أيام اليهود، لما يروح لأورشليم في الأعياد. وكانت أكتر فرحة بالنسبة لهم، الأيام ديه.
فزكريا النبي، حب يوصف لهم الجمال ده، بالطريقة اللي يفهموها.
"وَلِيُعَيِّدُوا عِيدَ الْمَظَالِّ." ... يعني ربنا مضلل علينا في السماء.
17وَيَكُونُ أَنَّ كُلَّ مَنْ لاَ يَصْعَدُ مِنْ قَبَائِلِ الأَرْضِ إِلَى أُورُشَلِيمَ لِيَسْجُدَ لِلْمَلِكِ رَبِّ الْجُنُودِ، لاَ يَكُونُ عَلَيْهِمْ مَطَرٌ. احنا بنروح الكنيسة، علشان ينزل علينا المطر. يعني نتملي من الروح القدس. فاحنا بنروح الكنيسة. وبنسجد والمطر، اللي هو الروح القدس، ينزل علينا. ونطلّع ثمر روحي.
"وَيَكُونُ أَنَّ كُلَّ مَنْ لاَ يَصْعَدُ مِنْ قَبَائِلِ الأَرْضِ إِلَى أُورُشَلِيمَ لِيَسْجُدَ لِلْمَلِكِ رَبِّ الْجُنُودِ،" ... يعني: اللي مش هيجي، ومش هيسجد.
"لاَ يَكُونُ عَلَيْهِمْ َمطَرٌ." ... مش هيجيله مطر. فالأرض بتاعته هتبيقي خربانة، من غير ثمر. وهيكون عليها لعنة. اللي عايش في العالم، مش هيتمتع بالروح القدس. اللي هو المطر.
18وَإِنْ لاَ تَصْعَدْ وَلاَ تَأْتِ قَبِيلَةُ مِصْرَ وَلاَ مَطَرٌ عَلَيْهَا، تَكُنْ عَلَيْهَا الضَّرْبَةُ الَّتِي يَضْرِبُ بِهَا الرَّبُّ الأُمَمَ الَّذِينَ لاَ يَصْعَدُونَ لِيُعَيِّدُوا عِيدَ الْمَظَالِّ. أي بلد مهما كانت عظمتها، لا تسجد للإله الحقيقي. مش هيجي عليها مطر. والبلد ديه، مش هتعيد عيد المظال.
يعني مش هتدخل السماء. ملهاش الحياة الأبدية.
"وَإِنْ لاَ تَصْعَدْ وَلاَ تَأْتِ قَبِيلَةُ مِصْرَ وَلاَ مَطَرٌ عَلَيْهَا،" ... قبيلة مصر، ربنا يضربها بنفس الضربات بتاعة اللي مش هيصعدوا علشان يعيّدوا عيد المظال.
بمعني: في سفر الرؤيا، لما ربنا اتكلم علي الشر والخطية وأرض الشر. قال: التي تُدعي روحيا مصر.. المقصود بيها الكبرياء. العبودية للخطية. مصر بالنسبة لليهود، كانت أرض العبودية. كبرياء فرعون. عِناده مع ربنا. قساوة قلبه.
اللي فيه الصفات ديه، هل ينعم بعمل الروح القدس؟ مستحيل. ولا هيعرف ولا هيقدر يعيّد عيد المظال. ولا هيعرف يعيش غريب عن العالم.
"تَكُنْ عَلَيْهَا الضَّرْبَةُ الَّتِي يَضْرِبُ بِهَا الرَّبُّ الأُمَمَ الَّذِينَ لاَ يَصْعَدُونَ لِيُعَيِّدُوا عِيدَ الْمَظَالِّ." ... فاللي فيه صفات قبيلة مصر، مش هيتمتع بالمطر. ولا هيعيّد عيد المظال.
19هذَا يَكُونُ قِصَاصُ مِصْرَ وَقِصَاصُ كُلِّ الأُمَمِ الَّذِينَ لاَ يَصْعَدُونَ لِيُعَيِّدُوا عِيدَ الْمَظَالِّ. "هذَا يَكُونُ قِصَاصُ مِصْرَ" ... لأن زمان مصر كانت رمز للوثنية.
"وَقِصَاصُ كُلِّ الأُمَمِ الَّذِينَ لاَ يَصْعَدُونَ لِيُعَيِّدُوا عِيدَ الْمَظَالِّ." ... الآباء قالوا عن عيد المظال:
أن فيه معني جميل. هو معني الغربة. لأن اللي عايش في مظال، يعني زي الخيام. فده عيشته مش مستقرة.
فالمعني: اننا غرباء هنا علي الأرض. يومين وهنمشي منها. "لأَنَّنَا نَعْلَمُ أَنَّهُ إِنْ نُقِضَ بَيْتُ خَيْمَتِنَا الأَرْضِيُّ، فَلَنَا فِي السَّمَاوَاتِ بِنَاءٌ مِنَ اللهِ، بَيْتٌ غَيْرُ مَصْنُوعٍ بِيَدٍ، أَبَدِيٌّ."
اللي هيرفض يعيّد عيد المظال، ويرفض يعيش غريب عن العالم. هيُحرم من عمل الروح القدس. يُحرم من بركات ربنا.
20فِي ذلِكَ الْيَوْمِ يَكُونُ عَلَى أَجْرَاسِ الْخَيْلِ: «قُدْسٌ لِلرَّبِّ». وَالْقُدُورُ فِي بَيْتِ الرَّبِّ تَكُونُ كَالْمَنَاضِحِ أَمَامَ الْمَذْبَحِ. "فِي ذلِكَ الْيَوْمِ" ... اشارة لعز العهد الجديد. ومجد السماء.
وقت السبي: من ضمن الحاجات اللي وجعت اليهود، أن جيش الأعداء موتوا الشباب. وأخدوا كمان شباب مسبيين. لكن كمان اللي وجعهم اوي: ان العدو، أخد قدور المذبح، وودوها بابل. والقدور ديه كانت مقدسة. خاصة بالعبادة.
"يَكُونُ عَلَى أَجْرَاسِ الْخَيْلِ: «قُدْسٌ لِلرَّبِّ»." ... فهنا بيورينا أن ازاي ربنا له المجد، مَلك. وكل حاجة اتظبطت. فبيقول: حتي الخيل عليه جرس، مكتوب عليه "قدس للرب."
الخيل: إشارة للجسد. احنا مجرد خيول في المعركة الروحية. سفر الأمثال بيقول "اَلْفَرَسُ مُعَدٌّ لِيَوْمِ الْحَرْبِ، أَمَّا النُّصْرَةُ فَمِنَ الرَّبِّ." .. المسيح له المجد بيقودنا، في موكب النصرة.
والأجراس مكتوب عليها: قدس للرب. العبارة ديه كانت مكتوبة علي صفيحة من ذهب، علي العمامة بتاعة رئيس الكهنة. وحاططها علي رأسه. ومعني أن العبارة ديه موجودة علي كل أولاد ربنا له المجد في الكنيسة، علي كل الخيل. ديه بتفكرنا: أن في العهد الجديد، في حاجة اسمها: الكهنوت العام للكل. "وَجَعَلَنَا مُلُوكًا وَكَهَنَةً للهِ أَبِيهِ،"
الكهنوت العام ... يعني: كلنا مُقدسين لله.
كل واحد فينا: اتعمد واتدهن بزيت الميرون. وبقينا مقدسين للرب. "قدس للرب." هيكل للروح القدس.
- كهنوت عام: يعني بأقدم الذبيحة. ذبيحة: الصلاة – الصوم - التسبيح - ذبيحة جسدي، كعبادة.
والجرس اللي في رقبة الخيل: طول ما هي بتجري، الجرس يشخلل. يعمل صوت. لأن دورنا في العالم، نحذر الناس من الشر والخطية.. ده كان تشبيه.
والتشبيه التاني.. "وَالْقُدُورُ فِي بَيْتِ الرَّبِّ تَكُونُ كَالْمَنَاضِحِ أَمَامَ الْمَذْبَحِ." ... القدور: اللي هي الأواني.
احنا الأواني المقدسة لربنا له المجد.
" الْمَنَاضِحِ" ... المنضحة: في العهد القديم: لما كانوا بيذبحوا الذبيحة علي مذبح المحرقة، كانوا بيجمعوا الدم بتاع الذبيحة، في إناء ويسموه: المنضحة. وينضحوا منه. يعني يرشوا الدم ده علي المذبح.
المنضحة: بتأخد من دم الذبيحة.
فاحنا الأواني: شغلتنا، نأخد من دم الذبيحة، المسيح يسوع له المجد. في بيت ربنا له المجد. فاحنا عايشين علي دم الصليب. عايشين علي التناول.
21وَكُلُّ قِدْرٍ فِي أُورُشَلِيمَ وَفِي يَهُوذَا تَكُونُ قُدْسًا لِرَبِّ الْجُنُودِ، وَكُلُّ الذَّابِحِينَ يَأْتُونَ وَيَأْخُذُونَ مِنْهَا وَيَطْبُخُونَ فِيهَا. وَفِي ذلِكَ الْيَوْمِ لاَ يَكُونُ بَعْدُ كَنْعَانِيٌّ فِي بَيْتِ رَبِّ الْجُنُودِ. "وَكُلُّ قِدْرٍ" ... يعني: كل واحد فينا.
"وَكُلُّ الذَّابِحِينَ" ... الكهنة هما اللي كانوا بيذبحوا الذبائح. فهنا الكلام عن الكهنة.
"يَأْتُونَ وَيَأْخُذُونَ مِنْهَا وَيَطْبُخُونَ فِيهَا." ... الأواني اللي كانوا بيطبخوا فيها لحم الذبيحة، كانت أواني مقدسة.
المعني: اننا بدم يسوع المسيح له المجد، بقينا مقدسين. ومينفعش يبقي جوانا حاجة تانية، تشارك ربنا له المجد، فينا. مينفعش يبقي جوانا خطية – شهوة – عادة سيئة – مينفعش القلب يبقي شوية مع ربنا وشوية مع العالم وشهواته.
مهمة الكهنة والخدام في العهد الجديد: يساعدوا أولاد ربنا، علي حياة القداسة والطهارة.
"وَفِي ذلِكَ الْيَوْمِ لاَ يَكُونُ بَعْدُ كَنْعَانِيٌّ فِي بَيْتِ رَبِّ الْجُنُودِ." ... كنعان: مشكلة نوح مع أولاده. لما حام نظر الي عورة أبيه، وراح قال لأخواته. ولما نوح صحي وفاق تاني يوم، لعن كنعان ابن حام. وقال "فلما استيقظ نوح من خمره علِم ما فعله به ابنه الأصغر فقال ملعون كنعان. عبد العبيد يكون لأخوته."
يعني: مش ممكن يكون في بيت ربنا، إنسان ملعون. لان الكنيسة بقت مكان للبركة والقداسة.
مفيش لعنة، بعد ما ربنا يسوع المسيح له المجد، حمل لعنتنا علي عود الصليب.
واللي بيقع في الخطية، بيقوم ويتوب. "لا تشمتي بي يا عدوتي. إذا سقطت أقوم."
الملعون: هو اللي بيرفض صوت الله. وبيجدف علي الروح القدس. ومش عاوز يجاهد ويتعب.
الكنيسة مكان للبركة. وبنصلي وابونا يقول: البركة والسلام لجميعكم.
ياريت دايما نقول لربنا: يارب قدس حواسي وأفكاري وكلامي. قدس هذا الهيكل، اللي هو جسدي. "قدس للرب."
الهنا الصالح يقدس حياتنا وأجسادنا وحواسنا وأفكارنا.
⪢