⪡ 1فَعُدْتُ وَرَفَعْتُ عَيْنَيَّ وَنَظَرْتُ وَإِذَا بِأَرْبَعِ مَرْكَبَاتٍ خَارِجَاتٍ مِنْ بَيْنِ جَبَلَيْنِ، وَالْجَبَلاَنِ جَبَلاَ نُحَاسٍ. في الاصحاح السادس، أخر رؤيتين من رؤي زكريا النبي التسعة.
الرؤيا التامنة من رؤي زكريا النبي:
"فَعُدْتُ وَرَفَعْتُ عَيْنَيَّ"... دايما زكريا النبي بيرفع عينه للسماء. دايما عينه علي السماء.
"وَنَظَرْتُ وَإِذَا بِأَرْبَعِ مَرْكَبَاتٍ خَارِجَاتٍ مِنْ بَيْنِ جَبَلَيْنِ، وَالْجَبَلاَنِ جَبَلاَ نُحَاسٍ." ... ديه رؤيا المركبات والخيل.
يبدو أن هذه الرؤيا هي امتداد للرؤيا الأولى، في الأصحاح الأول، لما زكريا النبي شاف الراكب على فرس أحمر بين شجر الآس في الظل وخلفه خيل حمر وشقر وشهب، لكن هنا في الرؤيا ديه شاف 4 مركبات خارجين من وسط جبلين. والجبلين من النحاس.
لكن رؤيا الاصحاح الأول: تُشير لخطة الله الخلاصية، بتجسد الكلمة القادم علي الفرس الأحمر.
لكن الرؤيا هنا: تٌشير لخطة الله التأديبية ضد الشر وضد الأمم والشعوب الشريرة ومساندة الله للمؤمنين في حروبهم مع الشيطان. حرب ابليس ضد أولاد الله.
2فِي الْمَرْكَبَةِ الأُولَى خَيْلٌ حُمْرٌ، وَفِي الْمَرْكَبَةِ الثَّانِيَةِ خَيْلٌ دُهْمٌ، "فِي الْمَرْكَبَةِ الأُولَى خَيْلٌ حُمْرٌ،"... المركبة الأولي الخيل بتاعهم، لونه أحمر.
"وَفِي الْمَرْكَبَةِ الثَّانِيَةِ خَيْلٌ دُهْمٌ،" ... المركبة التانية الخيل بتاعهم، لونه أسود.
" دُهْمٌ،" ... يعني أسود.
3وَفِي الْمَرْكَبَةِ الثَّالِثَةِ خَيْلٌ شُهْبٌ، وَفِي الْمَرْكَبَةِ الرَّابِعَةِ خَيْلٌ مُنَمَّرَةٌ شُقْرٌ. "وَفِي الْمَرْكَبَةِ الثَّالِثَةِ خَيْلٌ شُهْبٌ،"... شُهْبٌ: يعني أبيض.
"وَفِي الْمَرْكَبَةِ الرَّابِعَةِ خَيْلٌ مُنَمَّرَةٌ شُقْرٌ." ... مُنَمَّرَةٌ شُقْر: يعني مخططة أصفر في أسود. زي جلد النمر.
الرؤيا عبارة عن.. جبلين من النحاس. وبيعدي من بيهم الأربع مركبات اللي شوفناهم، الأحمر والأبيض والأسود والمخططة.
الرؤيا الأولي، في الاصحاح الأول.. الراجل اللي راكب علي الحصان الأحمر، والجالس بين شجر الآس. وبرضه كان خلفه خيول متعددة الألوان.
والرجل: هو أقنوم الكلمة، ربنا له المجد اللي بيستعد للتجسد والفداء. والخيول اللي معاه: هي قوات السماء اللي بتُهئ وبتٌعد الطريق للخلاص. ففي ناس شايفين أن الرؤيا الثامنة ديه. فيها شبه للرؤيا الأولي، في الاصحاح الأول، أو امتداد ليها.
الجبلين النحاس:
- ان كانت الرؤيا الأولي بتتكلم عن التجسد والفداء.
- والرؤيا التامنة هنا: بتتكلم عن دينونة كل من يرفض خلاص ربنا يسوع المسيح له المجد.
النحاس في الكتاب المقدس: رمز للدينونة. علشان كده الجبلين من النحاس.
بعض المفسرين قالوا: أن في جبلين في أورشليم، وبينهم وادي، اسمه وادي الدينونة أو القضاء. (في سفر يوئيل: كان في وادي اسمه وادي يهوشافاط. لما ربنا له المجد قاله: هاتهم في وادي يهوشافاط. وهناك أحاكمهم)
وادي يهوشافاط ده بين جبلين: جبل الزيتون. وجبل المورية.. فالبعض قال: ممكن تكون الرؤيا ديه رمزية، ان أحداثها في وادي يهوشافاط. يعني وادي القضاء.
قالوا كده: لأن الرؤيا كلها بتتكلم عن الدينونة.. لكن في المُجمل احنا مش بنتكلم عن أماكن. لكن الكلام عن دينونة الله للأشرار. علشان كده الجبلين من نحاس ... رمز للدينونة.
طيب ليه هما الأربعة مركبات، بالأربعة ألوان؟
هنلاقي أن:
1) الرؤيا الأولي: الراجل الراكب علي الخيل الأحمر.
2) الرؤيا التانية: الأربع قرون.
زكريا النبي شاف 4 قرون. ودول كانوا عبارة عن 4 ممالك، اللي أتعبوا شعب ربنا له المجد. أو رمز لعمل الشيطان والشر، في كل العالم.
3) الرؤيا التالتة: الرجل الذي بيده حبل، للقياس.
4) الرؤيا الرابعة: رؤية يهوشع رئيس الكهنة والشيطان وملاك العهد.
وزي ما شوفنا في الرؤيا التانية، الأربع قرون. وأنها رمز لعمل الشر والشيطان.. في الرؤيا التامنة هنا، نفس الفكرة. الـ 4 مركبات هي دينونة الله للشر عموما. في جهات الأرض الأربعة. أو بنتكلم عن دينونة الله للمالك الأربعة، اللي أذلوا شعب الله.
بس هنأخدها برده بالمعني العام: دينونة الله لكل ممالك الأرض.
4فَأَجَبْتُ وَقُلْتُ لِلْمَلاَكِ الَّذِي كَلَّمَنِي: «مَا هذِهِ يَا سَيِّدِي؟» زكريا النبي بيسأل، عاوز يفهم الرؤيا. 5فَأَجَابَ الْمَلاَكُ وَقَالَ لِي: «هذِهِ هِيَ أَرْوَاحُ السَّمَاءِ الأَرْبَعُ خَارِجَةٌ مِنَ الْوُقُوفِ لَدَى سَيِّدِ الأَرْضِ كُلِّهَا. "فَأَجَابَ الْمَلاَكُ وَقَالَ لِي: هذِهِ هِيَ أَرْوَاحُ السَّمَاءِ الأَرْبَعُ"... يعني: قوات السماء. اللي هما الملائكة.
الملايكة، اللي ربنا له المجد بيستخدمهم لتأديب الأشرار. وفي نفس الوقت، الملايكة بتساند أولاد الله، ضد قوات الشر الروحية. "ملاك الرب حال حول خائفيه وينجيهم."
"خَارِجَةٌ مِنَ الْوُقُوفِ لَدَى سَيِّدِ الأَرْضِ كُلِّهَا." ... قوات السماء، الملايكة، جاهزين لتنفيذ أوامر وإرادة الله.
6الَّتِي فِيهَا الْخَيْلُ الدُّهْمُ تَخْرُجُ إِلَى أَرْضِ الشِّمَالِ، وَالشُّهْبُ خَارِجَةٌ وَرَاءَهَا، وَالْمُنَمَّرَةُ تَخْرُجُ نَحْوَ أَرْضِ الْجَنُوبِ». "الَّتِي فِيهَا الْخَيْلُ الدُّهْمُ تَخْرُجُ إِلَى أَرْضِ الشِّمَالِ،"... الْخَيْلُ الدُّهْمُ: الخيل الأسود. لونه أسود ودول رايحين علي أرض الشمال، اللي هي أرض بابل. أرض الشر. أرض شِنعار.
في سفر الرؤيا: كان الفرس الأسود، ده بيُشير للتعاليم الغريبة. الهرطقات والبدع. وكمان اللون الأسود، بيُشير للموت والهلاك.
كل إنسان عايش في الشر والخطية، ومخدوع بتعاليم مُضللة. ده انسان عايش في أرض الشمال. في بابل، رمز الخطية.
كل إنسان عايش في الشر والخطية، ورافض التوبة. هو ده اللون الأسود. لون الظُلمة.
" وَالشُّهْبُ خَارِجَةٌ وَرَاءَهَا،" ... الخيل الشُّهْبُ: هو الخيل الأبيض. ده برده رايح وراء الخيل الأسود. بتحصلّها.
قولنا أن الخيل الأسود: هو الموت والشر والهلاك. فطبيعي مكانه في أرض بابل.
طيب ايه اللي يخلي الخيل الأبيض، يمشي وراء الخيل الأسود؟ .. اللون الأبيض: بيتبع اللون الأسود.
لأن انتصار الله، علي قوات الظلمة. هو الفرح والنور لأولاد الله.
تأديبات الخطية ... هي الأفراح.
سقوط الأشرار ... هو اعلان مجد الله.
علشان كده الخيل الأبيض، وراء الخيل الأسود. تتبعها.
"وَالْمُنَمَّرَةُ تَخْرُجُ نَحْوَ أَرْضِ الْجَنُوبِ." ... الخيل اللي فيها ألوان كتيرة. رايحة أرض الجنوب. ليه؟
لأن بعد الانتصار علي الخطية والأفراح، تظهر في الإنسان ثمار الروح القدس. علشان كده الخيول ديه فيها كذا لون. مش لون واحد. ورايحة للجنوب: لأن رياح الجنوب، هي اللي بتخلي الثمار، تنضج.
في آية في سفر نشيد الأنشاد، العروس تقول "وَتَعَالَيْ يَا رِيحَ الْجَنُوبِ! هَبِّي عَلَى جَنَّتِي فَتَقْطُرَ أَطْيَابُهَا"
"فِي الْمَرْكَبَةِ الأُولَى خَيْلٌ حُمْرٌ،" ... آية 2.
الخيل الأحمر: بتفكرنا بحرب الاستشهاد. ربنا له المجد ساند أولاده في الحرب ديه. وهيكون في تأديبات لكل اللي اضطهدوا أولاد ربنا له المجد.
وكمان ديه حروبنا ضد الخطية والشر.
7أَمَّا الشُّقْرُ فَخَرَجَتْ وَالْتَمَسَتْ أَنْ تَذْهَبَ لِتَتَمَشَّى فِي الأَرْضِ، فَقَالَ: «اذْهَبِي وَتَمَشَّيْ فِي الأَرْضِ». فَتَمَشَّتْ فِي الأَرْضِ. "أَمَّا الشُّقْرُ فَخَرَجَتْ وَالْتَمَسَتْ أَنْ تَذْهَبَ لِتَتَمَشَّى فِي الأَرْضِ،"... الخيل الأشقر: خرجت تتمشي في الأرض.
"فَقَالَ: اذْهَبِي وَتَمَشَّيْ فِي الأَرْضِ. فَتَمَشَّتْ فِي الأَرْضِ." ... وكأن ربنا له المجد بيقول لأولاده: متخافوش. مفيش مكان، أنا بأسيب فيه أولادي.
في تفسير تاني مُبسط للرؤيا ديه: (تفسير حلو وجميل).
- قولنا في الرؤيا الأولي: أن الرجل الراكب علي الفرس الأحمر، هو المسيح يسوع له المجد، اللي بيستعد للتجسد والفداء. وهو ده الفرس الأحمر. أو المركبة اللي لونها أحمر.. فده يسوع المسيح له المجد، بلون الدم ... التجسد والفداء.
- واللي يرفض التجسد والفداء والخلاص. ده يسقط تحت الدينونة. الظلام. اللي هو الفرس الأسود.
المسيح يسوع له المجد، هو نور العالم. طيب اللي بيرفض نور العالم؟ ده عايش في ظُلمة.
- المسيح يسوع له المجد علي الصليب، حرر أولاده. هزم قوات الظلمة. فأدي أولاده، أفراح القيامة.
اللون الأبيض: الفرس الأبيض. يعني الانتصار. "أيْنَ شَوْكَتُكَ يَا مَوْتُ؟ أَيْنَ غَلَبَتُكِ يَا هَاوِيَةُ؟"
- واللي بينعم بالصليب والقيامة. تيجي بعدها خطوة، عمل الروح القدس في حياته. وتبدأ تظهر المواهب المتعددة في حياته. وده الخيل المُنمرة.
8فَصَرَخَ عَلَيَّ وَكَلَّمنِي قَائِلاً: «هُوَذَا الْخَارِجُونَ إِلَى أَرْضِ الشِّمَالِ قَدْ سَكَّنُوا رُوحِي فِي أَرْضِ الشِّمَالِ». "فَصَرَخَ عَلَيَّ وَكَلَّمنِي قَائِلًا:"... ربنا له المجد كلم زكريا النبي وقاله:
"هُوَذَا الْخَارِجُونَ إِلَى أَرْضِ الشِّمَالِ قَدْ سَكَّنُوا رُوحِي فِي أَرْضِ الشِّمَالِ." ... ربنا له المجد بيقول للمركبات، اللي راحت في اتجاه أرض الشمال. أرض بابل. أرض الشر. دول ريحوني ... " سَكَّنُوا رُوحِي".
يعني فرحوني. طيب يارب ديه أرض الشمال. أصل المركبات ديه، بتُشير للتأديبات كل تأديب للأشرار، هو تنفيذ لمقاصد الله، وعدل الله.
ربنا له المجد، زي ما هو رحيم. هو كمان عادل. فتأديبات الأشرار هي عدل الله.
9وَكَانَ إِلَيَّ كَلاَمُ الرَّبِّ قَائِلاً: الرؤيا التاسعة والأخيرة من رؤي زكريا النبي.10«خُذْ مِنْ أَهْلِ السَّبْيِ مِنْ حَلْدَايَ وَمِنْ طُوبِيَّا وَمِنْ يَدَعْيَا الَّذِينَ جَاءُوا مِنْ بَابِلَ، وَتَعَالَ أَنْتَ فِي ذلِكَ الْيَوْمِ وَادْخُلْ إِلَى بَيْتِ يُوشِيَّا بْنِ صَفَنْيَا. "خُذْ مِنْ أَهْلِ السَّبْيِ مِنْ حَلْدَايَ وَمِنْ طُوبِيَّا وَمِنْ يَدَعْيَا الَّذِينَ جَاءُوا مِنْ بَابِلَ،"... ربنا له المجد قال لزكريا النبي: أن في وفد جاي من بابل.
أن التلاتة دول جايين من بابل. ومعاهم ذهب وفضة، زي ما هنشوف بعد كده.. خد منهم يا زكريا الحاجات اللي هما جايبينها.
"وَتَعَالَ أَنْتَ فِي ذلِكَ الْيَوْمِ وَادْخُلْ إِلَى بَيْتِ يُوشِيَّا بْنِ صَفَنْيَا." ... وادخل بيت يوشيا.
معني كده أن الناس ديه، جت من بابل. فده حاجة من الاتنين:
- يا إما هما من الناس اللي رجعت من بابل لأورشليم، مع زربابل. ولما لقوا أن في بناء الهيكل. ابتدوا يجمعوا الذهب والفضة ... علشان يسلموها للبناء.
- أو هما مرجعوش مع زربابل. لكن لما سمعوا أن البناء في الهيكل شغال. فجمعوا الذهب والفضة، من أرض بابل. ورايحين يسلموها في أورشليم.
11ثُمَّ خُذْ فِضَّةً وَذَهَبًا وَاعْمَلْ تِيجَانًا وَضَعْهَا عَلَى رَأْسِ يَهُوشَعَ بْنِ يَهُوصَادَقَ الْكَاهِنِ الْعَظِيمِ. "ثُمَّ خُذْ فِضَّةً وَذَهَبًا"... يا زكريا، خد الفضة والذهب اللي جايبينوه.
"وَاعْمَلْ تِيجَانًا وَضَعْهَا عَلَى رَأْسِ يَهُوشَعَ بْنِ يَهُوصَادَقَ الْكَاهِنِ الْعَظِيمِ." ... وأعمل بيها تيجان، مش تاج واحد. وحطها علي رأس يهوشع بين يهوصادق الكاهن الأعظم، رئيس الكهنة.
والكلام ده هيحصل في بيت يوشيا. (آية 10).
الناس دول جايين من بابل. أرض السبي. جايين ومعاهم فضة وذهب.
نبوخذ نصّر لما خرّب أورشليم والهيكل، أخد كل الذهب اللي في الهيكل. فدلوقتي حصل العكس. راجعيين من بابل لأورشليم، بالفضة والذهب. وكأن بالخطية، الطاقات اللي عندي، بتروح لحساب الشيطان. المُتمثل في نبوخذنصّر.
لكن اللي يحرر نفسه من الخطية. ويرجع من أرض السبي. تبيقي الطاقات بتاعته، مِلك للسيد المسيح له المجد. المُتمثل في يهوشع رئيس الكهنة. اللي هو رمز ليسوع المسيح له المجد. (كلمة يهوشع. هي نفسها كلمة يشوع. ونفسها: يسوع)
والحاجة التانية: أن زكريا النبي، لازم يقدس الذهب والفضة (اللي هيتعملوا تيجان) في بيت يوشيا.
واللذيذ: أن كلمة يوشيا، معناها: الذي يُخلص.
فكأن اللي عاوز يحرر نفسه، ويقدم مواهبه وطاقاته لربنا له المجد، لازم يكون في الكنيسة. بيت الله الذي يُخلص.
اللي عاوز يتحرر من السبي، بيجري علي الكنيسة. بيت يوشيا. ويقدم مواهبه وطاقته وامكانياته هناك.
فالمعني: أن الذهب والفضة، هيتعملوا تيجان. وهيتحطوا علي رأس يهوشع رئيس الكهنة.
في سفر الرؤيا.. القديس يوحنا الحبيب، شاف السيد المسيح له المجد، راكب علي فرس أبيض. وشاف سيف ذِي حدين خارج من فمه. وقال عبارة مهمة: وعلي رأسه تيجان كثيرة. لأنه ملك الملوك ورب الأرباب.
الملك الفادي بيلبس تاج. لأنه ملك الملوك.
كمان في الرؤيا بتاعة يهوشع (الاصحاح التالت من سفر زكريا)، لما كان لابس ثياب قذرة. قاله المسيح يسوع له المجد: لبسوه ثياب نضيفة. وحطوا عمامة طاهرة علي رأسه.
وقولنا أن ده هو السيد المسيح يسوع له المجد، اللي حمل الخطايا والملابس النجسة بتاعتنا، لما كان علي الصليب.
فعن طريق الصليب: أخدنا الحُلة البيضاء النضيفة. والأكاليل. اللي هي العمامة الطاهرة، اللي كانت علي رأس يهوشع.
ويوشع يُمثل جسد السيد المسيح له المجد. واحنا كتير. وربنا واعدنا بالإكليل. كل واحد ليه إكليل.
فالنتيجة: أن علي رأس السيد المسيح له المجد أكاليل. لأن المسيح يسوع له المجد هو رأس الكنيسة. واحنا بنُكلل في المسيح له المجد.
12وَكَلِّمْهُ قَائِلاً: هكَذَا قَالَ رَبُّ الْجُنُودِ قَائِلاً: هُوَذَا الرَّجُلُ «الْغُصْنُ» اسْمُهُ. وَمِنْ مَكَانِهِ يَنْبُتُ وَيَبْنِي هَيْكَلَ الرَّبِّ. "وَكَلِّمْهُ قَائِلًا: هكَذَا قَالَ رَبُّ الْجُنُودِ قَائِلًا: هُوَذَا الرَّجُلُ «الْغُصْنُ» اسْمُهُ."... الرَّجُلُ «الْغُصْنُ شوفناه قبل كده في الاصحاحات اللي فاتت. وقولنا: المسيح له المجد هو أصل الكرمة، ظهر في الجسد، كغصن. يعني فرع من شجرة داود الملكية. لكن يسوع المسيح له المجد، هو الكرمة نفسها. هو اللي خلق داود. هو الأصل.
الآية ديه اتكررت في سفر ارميا النبي: أنه ينبت غصن.
- كلمة غصن في العبري: هي نفسها كلمة، الناصرة. علشان كده الجزء ده. والجزء بتاع ارميا النبي. هو اللي استند عليه القديس متي الإنجيلي، في إنجيله. وقال " لِكَيْ يَتِمَّ مَا قِيلَ بِالأَنْبِيَاءِ إِنَّهُ سَيُدْعَى نَاصِرِيًّا"
" هُوَذَا الرَّجُلُ" ... ليه رجُل؟ لأنه ظهر في صورة الجسد.
"وَمِنْ مَكَانِهِ يَنْبُتُ وَيَبْنِي هَيْكَلَ الرَّبِّ" ... الكنيسة اتبنت علي السيد المسيح له المجد. هو حجر الزاوية. وكأن السيد المسيح له المجد، هو أساس الشجرة، وشايل الكنيسة. "أنا هو الكرمة الحقيقية وأبي الكرام."
13فَهُوَ يَبْنِي هَيْكَلَ الرَّبِّ، وَهُوَ يَحْمِلُ الْجَلاَلَ وَيَجْلِسُ وَيَتَسَلَّطُ عَلَى كُرْسِيِّهِ، وَيَكُونُ كَاهِنًا عَلَى كُرْسِيِّهِ، وَتَكُونُ مَشُورَةُ السَّلاَمِ بَيْنَهُمَا كِلَيْهِمَا. "فَهُوَ يَبْنِي هَيْكَلَ الرَّبِّ،"... يعني السيد المسيح له المجد، هو الصخرة اللي هيتأسس عليه الكنيسة.
"وَهُوَ يَحْمِلُ الْجَلاَلَ" ... ديه شبه الآية اللي قالها اشعياء النبي "وتكون الرئاسة علي كتفيه." ... بمعني: المسيح له المجد، شال الصليب علي كتفه. هو الجلال بتاعنا.
صولجان المُلك بتاع ربنا له المجد: هو صليبه. محبته لينا. "أَنَّهُ يُولَدُ لَنَا وَلَدٌ وَنُعْطَى ابْنًا، وَتَكُونُ الرِّيَاسَةُ عَلَى كَتِفِهِ، وَيُدْعَى اسْمُهُ عَجِيبًا، مُشِيرًا، إِلهًا قَدِيرًا، أَبًا أَبَدِيًّا، رَئِيسَ السَّلاَمِ."
"وَيَجْلِسُ وَيَتَسَلَّطُ عَلَى كُرْسِيِّهِ،" ... إشارة أن المسيح له المجد هو الملك، وضابط الكل.
"وَيَكُونُ كَاهِنًا عَلَى كُرْسِيِّهِ،" ... هو ملك جلس على كرسيه.
فالكرسي هو كرسي الملك. ولأول مرة منذ أيام ملكي صادق، نسمع أن يجتمع الملك والكهنوت لأحد.
ربنا يسوع المسيح له المجد، كرئيس كهنة قدم ذبيحة نفسه، وبهذا ملك على قلوبنا. وجلس وتسلط ووضع أعداؤه عند موطئ قدميه.
"وَتَكُونُ مَشُورَةُ السَّلاَمِ بَيْنَهُمَا كِلَيْهِمَا." ... بَيْنَهُمَا كِلَيْهِمَا: اللي هو المُلك والكهنوت.
وبفضل الكهنوت والمُلك: بتحصل مشورة السلام، فهو ككاهن قدم ذبيحة نفسه، صالحنا مع الله مصالحة أبدية. وحين نملكه على قلوبنا، وإذ هو ملك السلام، يملأ قلوبنا سلامًا.
كل سفر زكريا النبي: بيدور حوالين شخص السيد المسيح له المجد. المُتمثل في:
- زربابل ... اللي بيمثل المُلك.
- و يهوشع رئيس الكهنة ... اللي بيمثل الكهنوت.
ربنا له المجد حقق المصالحة بي السماء والأرض، بكهنوته. هو الكاهن والذبيحة. هو الملك اللي جه من سبط يهوذا.
" بَيْنَهُمَا كِلَيْهِمَا." ... بين المُلك والكهنوت. هو اللي صنع السلام بين الأرض والسماء بكهنوته، من خلال الذبيحة اللي قدمها بجسده الطاهر، علي عود الصليب.
14وَتَكُونُ التِّيجَانُ لِحَالِمَ وَلِطُوبِيَّا وَلِيَدَعْيَا وَلِحَيْنِ بْنِ صَفَنْيَا تَذْكَارًا فِي هَيْكَلِ الرَّبِّ. "وَتَكُونُ التِّيجَانُ لِحَالِمَ وَلِطُوبِيَّا وَلِيَدَعْيَا وَلِحَيْنِ بْنِ صَفَنْيَا" ... دول الناس اللي جابوا الذهب والفضة. واخدوها لبيت يوشيا. وعملوا منها التيجان ليهوشع.
فهنا بيقول : أن التيجان للناس ديه.
ربنا له المجد انتصر واتكلل بالمجد. بالصليب. علشان يمجدنا معاه. الأكاليل ديه لينا احنا، أولاد الله.
"هو بكراً بين أخوة كثيرين.". فربنا يسوع المسيح له المجد، أخد التاج الأول. وبعدين أدي التيجان لأولاده.
المسيح له المجد صعد الأول للسماء. علشان بعد كده، يأخدنا معاه. ويدينا المجد في السماء.
بس تاج السيد المسيح له المجد، هو تاج الشوك علي الصليب. وكل ده علشانن ربنا له المجد يدينا تيجان (تاج)، علشان احنا أولاده.
في تماجيد القديسين بنقول: اكليل ذهب. واكليل فضة. واكليل جوهري علي رأس القديس (فلان ...).
في سفر نشيد الأنشاد "اُخْرُجْنَ يَا بَنَاتِ صِهْيَوْنَ، وَانْظُرْنَ الْمَلِكَ سُلَيْمَانَ بِالتَّاجِ الَّذِي تَوَّجَتْهُ بِهِ أُمُّهُ فِي يَوْمِ عُرْسِهِ،" ... التاج: ده هو اكليل الشوك. وأمه ... هي الأمة اليهودية. توجوه بالشوك. اليهود هما اللي سلموا ربنا يسوع المسيح له المجد، وصلبوه.
"تَذْكَارًا فِي هَيْكَلِ الرَّبِّ." ... اللي في بيت ربنا له المجد، هما اللي بيأخدوا التيجان والاكاليل.
15وَالْبَعِيدُونَ يَأْتُونَ وَيَبْنُونَ فِي هَيْكَلِ الرَّبِّ، فَتَعْلَمُونَ أَنَّ رَبَّ الْجُنُودِ أَرْسَلَنِي إِلَيْكُمْ. وَيَكُونُ، إِذَا سَمِعْتُمْ سَمَعًا صَوْتَ الرَّبِّ إِلهِكُمْ». "وَالْبَعِيدُونَ يَأْتُونَ وَيَبْنُونَ فِي هَيْكَلِ الرَّبِّ،"... المقصود: هما الأمم. الكنيسة مش بس لليهود.
التيجان، هي للي الناس اللي بتسمع صوت ربنا له المجد. للي بيسمع ويعمل. للي موجودين في بيت ربنا، اللي هو يوشيا .
يعني اللي قبلوا الخلاص. مكانهم جوة الكنيسة. لكن الدينونة والهلاك: اللي هما الجبلين النحاس، للي رفضوا صوت ربنا يسوع المسيح له المجد.. اللعنة والكتاب الطاير: للي رفضوا وصايا ربنا له المجد.
"فَتَعْلَمُونَ أَنَّ رَبَّ الْجُنُودِ أَرْسَلَنِي إِلَيْكُمْ. وَيَكُونُ، ... ربنا له المجد بيوجه كلامه لأولاده.
ربنا بيحبنا، وعاوز يدينا اكاليل وتيجان في السماء. لأننا أولاده. وهنرث معه ملكوت السماء.
" إِذَا سَمِعْتُمْ سَمَعًا صَوْتَ الرَّبِّ إِلهِكُمْ." ... وطبعا ده في حالة اننا ماشين في طريق ربنا له المجد. حافظين وصاياه. سالكين في طريق التوبة.
⪢