هنلف حوالين السفر شوية. ومرة تاني هنلف جوة السفر. مراجعة عامة للكتاب المقدس ... العهدين القديم والجديد كل قسم منهم مقسم لأربع اجزاء. هنا هناخد العهد القديم: 1) أسفار موسى الخمسة: تكوين - لاويين - خروج - عدد - تثنية. 2) الأسفار التاريخية: أي سفر فى العهد القديم من اول وتاني يبقى أسفار تاريخية. زي صموئيل الأول والثاني. ملوك أول وتاني. أخبار أيام أول وثاني. وهكذا…… والأسفار التاريخية بتحكي تاريخ شعب الله أو قصة شعب الله أو قصة ربنا مع شعبه. 3) الأسفار الشعرية: وديه من اشهر الأسفار. المزامير - امثال - نشيد الأنشاد - الحكمة وهكذا. 4) الأسفار النبوية: أسفار الأنبياء وتنقسم إلى الأنبياء الكبار والأنبياء الصغار. الأنبياء الكبار: اشعياء - ارميا - حزقيال - دانيال. الأنبياء الصغار: 12 نبي (هوشع - يوئيل - عاموس - عوبديا - يونان - ميخا - ناحوم - حبقوق - صفنيا - حجي أو حجاي - زكريا - ملاخي.) الأنبياء الكبار والصغار مش متقسم على حسب أهمية الشخص. لكن على حسب حجم النبوة أو حجم السفر. مثلا مجموع أصحاحات الأنبياء الصغار 67 أصحاح. لكن مثلا سفر إشعياء النبي لوحده 66 أصحاح. سفر عوبديا عبارة عن أصحاح واحد. اخر 4 ملوك فى مملكة يهوذا ... اول ملك كان شاول وبعده داود وبعده ابنه سليمان الحكيم. وبعد سليمان جه ابنه رحبعام وكان شاب متهور. ومسمعش مشورة الشيوخ لما قالوا له نصيحة كويسة لكن مشي وراء مشورة اصدقائه الشباب وكانت نصيحة غلط وانقسمت المملكة من لقسمين: -المملكة الشمالية اللي هي مملكة اسرائيل وكانوا 10 اسباط. كل ملوكها اشرار. وفي الاخر وقع عليهم العقاب. وراحوا فى السبي الاشوري. وكان السبي بتاعهم حصل 100 سنة قبل مايحصل السبي البابلي لمملكة يهوذا. -المملكة الجنوبية إلى هي مملكة يهوذا وكانت سبطين. وبعض ملوكها ابرار والباقي غالبا اشرار. ملوك مملكة يهوذا المملكة الجنوبية (سبطين) مر عليهم 20 ملك. اخر 5 ملوك: يوشيا الملك واولاده التلاتة (يهواحاز - يهوياقيم ويهوياكين وليه اسم تاني كنيا) وحفيده. يهواحاز: وده كان ملك لفترة 3 شهور فقط. وفي الاخر فرعون مصر اخده ومات فى مصر. يهوياقيم: وكان ملك لفترة 11 سنة. وفرعون مصر غير اسمه من الياقيم إلى يهوياقيم. وكان ملك شرير يهوياكين: ده ابن يهوياقيم. وكان اسمه شبه اسم ابوه. وليه اسم تاني كنيا. وفي انجيل القديس متي: اتقال عليه اسم يكنيا. وبرده كان ملك لفترة 3 شهور. وفي الاخر استسلم هو وامه وزوجاته ورؤسائه واتسحبوا كلهم على بابل. صدقيا: جه بعدهم صدقيا الملك وكان شرير جدا ونهايته بشعة. وبنهاية صدقيا انتهت مملكة يهوذا. بيقولوا صدقيا الملك حاول فى الاخر يهرب بعد ما كان عامل عهد مع ملكك بابل لكن مامشيش على العهد وحاول يتمرد. وجم البابليين وحاصروا اورشليم وبهدلوا الدنيا. ولما حاول يهرب مسكوه. ويقال أن البابليين دبحوا أولاده قدامه وده كان اخر منظر شافه وبعدين فقعوله عنيه الاتنين وربطوه بالسلاسل وقادوه كالحيوان إلى بابل. حزقيال النبي اتنبا عن صدقيا الملك فى : حزقيال 17: ايه 16 و20. يوشيا الملك: عمل نهضة روحية وكان كويس وكان ملك حوالي 31 سنة. (اذا بعد يوشيا الملك جه ابنه يهواحاز وكان ملك حوالي 3 شهور واخدوه على مصر ومات هناك. وبعده ابنه يهوياقيم وكان شرير وكان ملك لمدة 11 سنة وفي الآخر اتدفن دفن حمار. وبعده يهوياكين قعد 3 شهور ملك واستسلم وراح على بابل. و بصدقيا الملك انتهت مملكة يهوذا) ترتيب الامبراطوريات: - مملكة اشور: اخدوا مملكة اسرائيل. -مملكة بابل: وديه كانت بعد السبي الاشوري ب 100 سنة. بس السبي الاشوري كان لمملكة يهوذا. -مملكة مادي وفارس. -مملكة اليونان. -مملكة الرومان. طيب حزقيال راح السبي ازاي؟ السبي البابلي كان على 3 مراحل: -المرحلة الاولي: شوفناها فى دانيال واتاخد فيها دانيال والتلات فتية. كان حوالي سنة 606 قبل الميلاد. -المرحلة التانية: كانت اكبر مرحلة واكبر سبي. واتاخد فيها الملك يهوياكين (الملك ال19) ورؤوساء كتير جدا والصناع يعني اخدوا احسن الناس من أورشليم ومن ضمنهم حزقيال النبي. (وفي سفر استير: مردخاي راح مع الدفعة ديه.) والسبي الثانى بعد السبي الأول بحوالي 9 سنين. -المرحلة التالتة والاخيرة: وده حصل فى وقت صدقيا الملك. جه نبوخذنصر ودمر اورشيلم تمام وكمان الهيكل. وكان سنة 586 قبل الميلاد (وتقريبا كان يوم 28 أو 29 يوليو واليهود لغاية دلوقتي عندهم يوم بيبكوا فيه ويتذكروا خراب اورشليم بيد نبوخذنصر. اسمه يوم الحزن.) وفي المرحلة الاخيرة ديه اخدوا انية بيت الرب ومخلوش حاجة فى اورشليم. +حزقيال النبي اتاخد السبي وكان سنه حوالي 25 سنة واتاخد من السبايا مع يهوياكين الملك. وحزقيال شاف بنفسه أن يهوياكين مقيد بالسلاسل. واتولد فى السنة ال 18 لملك يوشيا تقريبا سنة 623 قبل الميلاد (يوشيا كان الملك رقم 16 من ملوك يهوذا). وكان ارميا النبي ابتدي يتنبا فى السنة ال13 لملك يوشيا. ولما ملك يهواحاز كان سن حزقيال 13 سنة ونص. (حزقيال النبي قعد 13سنة ونص فى ظل نهضة روحية كانت عند الشعب لأن يوشيا الملك عمل لهم نهضة روحية جميلة.) حزقيال اساسا من بيت كهنوتي. ابوه وجده كانوا كهنة. حزقيال قعد 5 سنين وابتديت تيجي له الرؤية فى الااصحاح الاول وابتدي الخدمة وهو عنده 30 سنة ودعي للخدمة للنبوة .( ولو كان فضل فى اورشليم كان هيبتدي خدمته ككاهن وهو عنده 30 سنة وكان ربنا له المجد بيعوضه وبيقوله مش هاسيبك.) حزقيال كان من نسل كهنوتي . فكان كاهن ومعاهم فى السبي فكان دايما بيذكرهم باستمرار بالعبادة والختان والوصايا والطقوس والتطهيرات وهكذا. فكان فايدة ليهم أنه معاهم فى السبي. وفي نفس الوقت كان نبي — يعني يقولهم ربنا بيحذركم من كذا وبيقولكم كذا. ( يبقي حزقيال راح السبي البابلي وهو عنده 25 سنة وفي سن التلاتين جت له الدعوة للخدمة والنبوة وده قبل سقوط اورشليم ب 7سنين. يعني ربنا له المجد عمال يحذرهم وينذرهم ويقولهم. ارجعوا توبوا ومفيش فايدة ومن قبله كان ارميا برده بيحذرهم.) + حزقيال النبي: - حزقيال ابن بوزي. بوزي — كلمة معناها احتقار. بوزي اسم ابوه. - حزقيال معني اسمه: الله يعضد / يقوي/ يشدد. (حزقيال 2 : 3 ربنا بيبعت الشخص المناسب فى الوقت المناسب وللشعب المناسب. وربنا له المجد قال لحزقيال: اذا كانوا شعب صلاب الرقبة وقلوبهم حجر انا هاخليك جامد. متخافش من وجوههم.) -اسم حزقيال مذكور بس فى سفره. - كان كاهن ونبي. وكمان كان رائي شاف رؤي كثيرة. وراعي. وكمان كان لاهوتي واتكلموا كتير عن الللاهوت فى سفره. وشاعر وفنان. كان خادم متمكن. وكان بيعمل لهم وسائل ايضاح وبيمثل لهم بنفسه الدرس أو ايه اللي هيحصل لهم. فكان بكل قلبه وطاقته بيوصل كلمة الله للناس. - استمرت نبوة حزقيال النبي حوالي 22 سنة وده واضح من اول تاريخ فى السفر لاخر تاريخ فى سفر حزقيال. اتاثر كتير بالانبياء المعاصرين ليه وكمان باللي قبله. وخاصة ارميا النبي بالرغم أنه مذكرش ارميا النبي فى سفره لكن كان بياخد حاجات من ارميا ويتوسع فيها ويوضحها اكتر ويحطها فى قالب فني ادبي. - فى نفس العصر والوقت ده: . دانيال كان موجود فى القصر فى بابل لأنه كان رئيس الوزراء فى السبي. . حزقيال كاهن وسط شعبه فى السبي. . ارميا كان جوة اورشليم لأنه مراحش السبي. لغاية ما اليهود اخدوه بالعافية لمصر وقتلوه هناك. - حزقيال النبي كان متجوز وماتت فى الإصحاح 24 (وديه الحاجة الوحيدة الشخصية تقريبا اللي اتقالت عن حزقيال.) وتنهد عليها . وبده اخدها كعلامة عشان يوصل لشعبه الرسالة بتاعة ربنا له المجد. وكان شديد فى توبيخه لشعبه. - كان ليه مكانة وسط شعبه. وده يبان فى حزقيال 33 : 30 -31 30 «وَأَنْتَ يَا ابْنَ آدَمَ، فَإِنَّ بَنِي شَعْبِكَ يَتَكَلَّمُونَ عَلَيْكَ بِجَانِبِ الْجُدْرَانِ( انت السيرة بتاعتهم يا حزقيال)، وَفِي أَبْوَابِ الْبُيُوتِ، وَيَتَكَلَّمُ الْوَاحِدُ مَعَ الآخَرِ، الرَّجُلُ مَعَ أَخِيهِ قَائِلِينَ: هَلُمَّ اسْمَعُوا مَا هُوَ الْكَلاَمُ الْخَارِجُ مِنْ عِنْدِ الرَّبِّ!(كل واحد بيتكلم مع الثانى بيقولوا يالا نروح لحزقيال عشان نسمع كلام ربنا وياريتهم رايحين عشان يسمعوا ويعملوا.) 31 وَيَأْتُونَ إِلَيْكَ كَمَا يَأْتِي الشَّعْبُ، وَيَجْلِسُونَ أَمَامَكَ كَشَعْبِي(المشكلة مش فيك يا حزقيال. المشكلة معايا : رفضوني انا.)، وَيَسْمَعُونَ كَلاَمَكَ وَلاَ يَعْمَلُونَ بِهِ (من ناحية انهم بيسمعوا فكانوا عادي بيسمعوا بس مكانوش بيعملوا حاجة باللي سمعوه.)، لأَنَّهُمْ بِأَفْوَاهِهِمْ يُظْهِرُونَ أَشْوَاقًا وَقَلْبُهُمْ ذَاهِبٌ وَرَاءَ كَسْبِهِمْ (بيكون قاعد يسمع ويقول الله الكلام جميل اووي ومؤثر. بس ولا اي تاثير أو تغيير. وديه ناخدها علينا: ياما سمعنا عظات كتيرة وتعجبنا لكن بعد كده ولا كانانا سمعنا حاجة ولا اثرت فينا اصلا.)."32 وَهَا أَنْتَ لَهُمْ كَشِعْرِ أَشْوَاق لِجَمِيلِ الصَّوْتِ يُحْسِنُ الْعَزْفَ،(نت ليهم كمغني صوته حلو. بيقول اغنية جميلة والموسيقي حلوة . الناس استمتعت وخلاص الموضوع انتهي على كده.) فَيَسْمَعُونَ كَلاَمَكَ وَلاَ يَعْمَلُونَ بِهِ. فحزقيال كان ليه مكانة فى وسط شعبه ويسالوه ويسمعوا منه لأنه كاهن ورائي. لكن فى الاخر قلب الانسان قاسي. *طيب يا رب ايه مشكلة بيت يهوذا؟ المشكلة واضحة فى حزقيال 9 : 8-10 8 وَكَانَ بَيْنَمَا هُمْ يَقْتُلُونَ، وَأُبْقِيتُ أَنَا، أَنِّي خَرَرْتُ عَلَى وَجْهِي وَصَرَخْتُ وَقُلْتُ: «آهِ، يَا سَيِّدُ الرَّبُّ! هَلْ أَنْتَ مُهْلِكٌ بَقِيَّةَ إِسْرَائِيلَ كُلَّهَا بِصَبِّ رِجْزِكَ عَلَى أُورُشَلِيمَ؟»9 فَقَالَ لِي: «إِنَّ إِثْمَ بَيْتِ إِسْرَائِيلَ وَيَهُوذَا عَظِيمٌ جِدًّا جِدًّا (قلب ربنا له المجد متمرر بسبب خطايا شعبه وانهم زنوا وراء الهه اخري وعبدوها.)، وَقَدِ امْتَلأَتِ الأَرْضُ دِمَاءً، وَامْتَلأَتِ الْمَدِينَةُ جَنَفًا. لأَنَّهُمْ يَقُولُونَ: الرَّبُّ قَدْ تَرَكَ الأَرْضَ، وَالرَّبُّ لاَ يَرَى.(وهي ديه المشكلة . مشكلتهم بيقولوا أن ربنا مش شايف. فبيعملوا الخطايا : زنا - يعبدوا اوثان -يغيظوا ربنا له المجد بالمرتفعات - مفيش شريعة ولا ناموس ماشين عليه. وديه برده مشكلة الملحدين حاليا : يقولوا أن ربنا ترك الارض . الرب لايري. مفيش ربنا. حتى لو فى ربنا خليه فوق واحنا تحت على الأرض. بيعلموا كل حاجة لانهم مش شايفين عقاب ولا ابدية.) 10 وَأَنَا أَيْضًا عَيْنِي لاَ تَشْفُقُ وَلاَ أَعْفُو. أَجْلِبُ طَرِيقَهُمْ عَلَى رُؤُوسِهِمْ». + سفر حزقيال من اكتر الأسفار احساسا بمدي جرم الشعب ضد الله. + اسهل طريقة لتقسيم سفر حزقيال: اننا نفسمه لتلات اقسام: - القسم الأول: من اصحاح 1 ل 24 دينونة يهوذا. - القسم الثانى: من اصحاح 25 ل 32 دينونة بقية الامم الشامتة. - الفسم التالت: من اصحاح 33 ل 48 ومن بعد النهاية الصعبة يجي الشفاء والخلاص وعودة المجد. عشان كده نلاقيه بيوصف الهيكل الجديد "هوذا كل شئ قد صار جديدا." علشان كده هنلاقي فى تقارب هنا مع سفر الرؤيا ليوحنا الحبيب. ويوحنا الحبيب وضع الكائنات الاربعة اللي موجودة فى الرؤية الاولي اللي شافها حزقيال موجودين كمان فى سفر الرؤيا: الاربعة كائنات. - حزقيال بما أنه دارس جيد للكتاب المقدس: فحط فى سفره قصة الخلق والكاروبيم. - فى مشكلة ظهرت: أن طلع بين الناس اشاعة : احنا مالنا ليه ناخد عقاب الاباء؟ فربنا له المجد رد عليهم وقالهم أن اللي يغلط هو اللي يتعاقب. لانكم انتم كمان غلطانين وقالهم على خطاياهم. فقالهم ربنا : حتى لو وقف قدامي نوح ودانيال وايوب — طيب اشمعنه التلاتة دول؟ لانهم من كبار الآباء وده يوضح لنا مكانة دانيال النبي. وعلي فكرة : حزقيال ودانيال النبي كانوا معاصرين لبعض وتقريبا فى سن واحد . بس مكانش فى غيره بينهم . حتى حزقيال النبي ذكر اسم دانيال فى سفره. + حزقيال فى الكنيسة القبطية: - بنعيد لحزقيال النبي فى يوم 5 برموده فى السنكسار. بنقرا قصته. - الكنيسة فى الغرب بتعيد بنقل اعضائه إلى القسطنطينية فى عهد القديس يوحنا ذهبي الفم. يوم 22 ديسمبر. - حزقيال فى اسبوع الالام. من اول يوم تلات البصخة لغاية الجمعة العظيمة بنقرا 12 قراءة من سفره. - لما بنعمل تمجيد ونقول السلام ليك يامريم وتيجي سيرة حزقيال النبي نقول: علم حزقيال (اصله رجل رؤي. مفتوح العينين.) وهي ديه فكرة السلام لك يامريم . لما بنقول الآباء مع صفة لكل اب . بنقول نفس الصفات ديه فى ام النور وزيادة كمان). - كمان فى لبش الأربع فى التسبحة : يقول : *حزقيال النبى يشهد قائلاً إننى رأيت باباً ناحية المشرق مختوماً بخاتم عجيب *ولم يدخل فيه أحد إلا رب القوات. دخل وخرج وبقى مختوماً على حاله. *الباب هو العذراء التى ولدت مخلصنا. وقد بقيت عذراء بعد ولادته. وديه نبوة موجودة فى حزقيال 44 عن العذراء: باب المشارق.... بنقولها فى ثيؤطوكية الأربع: باب المشارق هو مريم العذراء. وبكده اخدنا فكرة عن السفر من بره. + دعوة حزقيال للنبوة: هنشوف دعوة حزقيال فى الأصحاحات 1و2و3. : تمت برؤيتين : - الرؤية الأولي: فى الإصحاح الأول (وطبعا بنشوف الرؤية ديه صعبة علينا.) - الرؤية التانية: لما ربنا اداله الدرج مكتوب من قدام ومن وراء وقاله ياكله. * حزقيال 1: 28 حزقيال بيقول 28 كَمَنْظَرِ الْقَوْسِ الَّتِي فِي السَّحَابِ يَوْمَ مَطَرٍ، هكَذَا مَنْظَرُ اللَّمَعَانِ مِنْ حَوْلِهِ. هذَا مَنْظَرُ شِبْهِ مَجْدِ الرَّبِّ. وَلَمَّا رَأَيْتُهُ خَرَرْتُ عَلَى وَجْهِي، وَسَمِعْتُ صَوْتَ مُتَكَلِّمٍ. " شِبْهِ" — ديه كلمة مهمة. زي يوحنا الحبيب فى سفر الرؤيا: الحيوان الأول شبه…. لأن مفيش لغة تعبر بالظبط أو تقدر توصف اللي شايفه. وحزقيال النبي شاف شبه مجد الرب — والرؤيا فى اول 11 اصحاح "مجد الرب" — متكررة 12 مرة.غالبا سفر حزقيال كله بيدور حول مجد الرب ( وأن جاز التعبير: اهانوا مجد الرب. وربنا له المجد زعل منهم قوي.) و هنشوف ازاي مجد الرب ارتفع عن الهيكل وغادر الهيكل وديه كانت صعبة اووي على اليهود. حزقيال شاف شبه مجد الرب. وبالنسبة لليهود ديه حاجة كبيرة ويمكن مش فاهمينها. في أرض السبي ارض غريبة بالنسبة لهم و تعتبر نجسة وازاي مجد الرب يظهر فى أرض غريبة ونجسة؟ الرؤية الاولانية ديه ساعات مش بنفهمها. وديه شغلت اليهود مئات السنين عشان يفسروها. أجيال اتفرغت للرؤية ديه "شبه مجد الرب." : لدرجة أن بعض الرابيين اليهود (الرابي) يقولوا لصغار السن ممنوع حد يقرا سفر حزقيال وخاصة التلات أصحاحات الاولي . هي حاجة صعبة انهم يقولوا كده بس الحلو اللي فيها انهم حريصين انهم ازاي يقروا عن مجد الرب؟ ده ربنا له المجد قال: "من يراني ويعيش." لدرجة أن الرابيين هددوا اللي يقرا الإصحاح الأول هتقع عليهم عقوبات. أصل ده مجد الرب. * فنتعلم منهم : توقير واحترام لكلمة الله. يعني منقرهوش ونتريق اننا مش فاهمين و اننا صعب نفهم كل ده.* إذا حزقيال شاف شبه مجد الرب واختطفت فى رؤية وهيروح الهيكل. - من اول الإصحاح العاشر والاصحاح ال11 هيرجع تاني للرؤية التانية. - اصحاح 11 : 22-23 22 ثُمَّ رَفَعَتِ الْكَرُوبِيمُ أَجْنِحَتَهَا وَالْبَكَرَاتِ مَعَهَا، وَمَجْدُ إِلهِ إِسْرَائِيلَ عَلَيْهَا مِنْ فَوْقُ. 23 وَصَعِدَ مَجْدُ الرَّبِّ مِنْ عَلَى وَسْطِ الْمَدِينَةِ وَوَقَفَ عَلَى الْجَبَلِ الَّذِي عَلَى شَرْقِيِّ الْمَدِينَةِ. "صعد مجد الرب" — يعني خلاص ساب الهيكل خالص. وكمان ساب اورشليم. + ترتيب اصحاحات السفر (هندرسه بالترتيب ده): اصحاح 2 - 3 - 4 - 5 - 6 - 7 - 8 - 9 - 1 - 10 - 11. وبكده هناخد مجد الرب وارتفاع مجد الرب. عشان تبقى الرؤية متكاملة مع بعضها. لأن حزقيال رجع تاني فى اصحاح 10 و11 للرؤية اللي قولناها فى اصحاح 1. - حزقيال معناها اللي يقوي. وكلمة حزقيال متذكرتش فى كل الكتاب المقدس غير مرة واحدة فى يشوع بن سيراخ 49 : 10. - حزقيال 34 اصحاح عنوانه: رعاة اسرائيل. بيتكلم عن الراعي الصالح فى مقابل الرعاة الكاذبون. حزقيال 34 : 11 و16. الكلام عن الراعي الصالح. وكتير فى الإصحاح اتكلم عن رعاة اسرائيل اللي بوظوا الرعية خالص. ( وطبعا فى يوحنا 10 فى العهد الجديد ده انجيل الراعي الصالح.) + خصائص سفر حزقيال النبي: 1) بيسموا حزقيال: المتكلم دائما. كتير فى اصحاحاته يقول "فقال لي .." / "وانت يا ابن ادم …" / "وكان اليا كلام الرب …." فى كل سفره هو المتكلم وهو اللي كاتب. ( مثلا فى سفر اشعياء أو ارميا : ساعات الكلام يوجه ليهم بصيغة الغائب.) 2) ابن ادم: من اكتر العبارات والجمل اللي اتكررت فى السفر. اتكررت حوالي من 90 ل 100 مرة. وده عشان ربنا له المجد يبين الفارق الكبير بين مجد الرب وضعف الانسان. عشان حزقيال ميتعبش من فرط الاعلانات . فدايما ربنا يفكره ويقوله " وانت يا ابن ادم". وكمان بتتقال لينا احنا كمان لأننا أولاد ادم فى الخطية. 3) فى تعبيرات مشهورة جدا "وكانت اليا كلمة الرب" اتقالت كتير حوالي 52 مرة . عشان كده اوقات يقسموا السفر على حسب التعبير ده. "وكانت اليا كلمة الرب" يبقي كده بداية مقطع جديد. 4) "هكذا قال السيد الرب" الآية ديه اتقالت 126 مرة وتتقال كبداية للكلام. أو يختم فى الاخر "يقول السيد الرب" برده نلاقيها كتير. 5) "فيعلمون اني أن الرب"ديه شدت انتباه الدارسين واتكررت اكتر من 70 مرة. معرفة ربنا له المجد وادارك أنه الله بالحقيقة ديه محتاجة التسليم الكامل لمشيئة الله. الطاعة الكاملة لوصياه. الثقة الكاملة فى وعوده. التسليم - الطاعة - الثقة التلاتة دول مكانوش فى بني اسرائيل عشان كده كان يكرر دايما "فيعلمون اني انا الرب." + بعض المفاهيم اللاهوتية فى سفر حزقيال: 1) رؤية "شبه مجد الرب" – اللي فى افتتاح السفر منقدرش نعديها كده لأن شبه مجد الرب فى ارض غريبة. وديه رسالة ربنا له المجد بينقلها للشعب كله. زمان اله كل شعب (الامم) موجود فى بلد وارض الشعب ده. اله الشعب الفلاني موجود فى البلد الفلانية. فربنا له المجد بيقولهم انا مش كده. مش هتحصروني فى اورشليم وبس. ده انا اله الالهة ورب الارباب. عشان كده مجد الرب ارتفع عن الهيكل. وحزقيال شاف شبه مجد الرب فى ارض غريبة. فكان ربنا له المجد بيوصلهم رسالة : انا هو الله "هكذا يقول السيد الرب." انا اله كل الكون مش اورشليم وبس. 2) حزقيال اصحاح 5: ربنا له المجد اختارهم شعبه واداهم مجده وحل بمجده فى وسطهم "فخالفت احكامي باشر من الامم" هنا فى سفر حزقيال ويمكن فى بعض اسفار الانبياء التانيين ربنا له المجد بيقول أن اللي عملوه شعبه اشر من اللي عملوه سدوم وعمورة. عشان لما نفهم أن فى عقاب وأن حزقيال النبي بيتكلم بتفاصيل شديدة كده نعرف ليه. وده لأن ربنا اختار الشعب ده. 5 «هكَذَا قَالَ السَّيِّدُ الرَّبُّ: هذِهِ أُورُشَلِيمُ. فِي وَسْطِ الشُّعُوبِ قَدْ أَقَمْتُهَا وَحَوَالَيْهَا الأَرَاضِي. 6 فَخَالَفَتْ أَحْكَامِي بِأَشَرَّ مِنَ الأُمَمِ، وَفَرَائِضِي بِأَشَرَّ مِنَ الأَرَاضِي الَّتِي حَوَالَيْهَا، لأَنَّ أَحْكَامِي رَفَضُوهَا وَفَرَائِضِي لَمْ يَسْلُكُوا فِيهَا. وكمان ربنا له المجد اخد حزقيال لاورشليم عشان يوريله بيعملوا ايه فى الهيكل "هيكل قدسي" ... عشان لما يتعاقبوا ميزعلوش ومحدش يقول ليه كده ( حز8 : 10) علشان كده ربنا كان بيشبهم بالمراة الزانية . وكانت كل مشكلتهم (حز 8 :12) أن ربنا مش شايفنا وساب الأرض فخلينا نعمل كل اللي احنا عاوزينه. ربنا اختار شعب اسرائيل بس محافظوش على العهد فاستحقوا العقاب. على فكرة ربنا طويل الاناة جدا جدا لكن لما الواحد ميستجبش لمراحم ربنا وطول أناته يبقي لازم التاديب مفيش حل تاني. "احسبوا طول اناة الله خلاصا." 3) النقطة ديه واضحة فى سفر حزقيال ومن الاماكن المحببة لاباء الكنيسة واستخدموها كتير (حز14 : 14 و 18) كان بيتكلم عن نوح ودانيال وايوب. فبيقول أن اخطئت اليا الأرض وخانت خيانة وانا عاقبتها "وكان فيها هولاء الرجال التلاتة نوح ودانيال وايوب ……. يخصلون انفسهم ببرهم." واتكررت تاني فى ايه 18. وده مفهوم مهم جدا المسئولية الشخصية: كل واحد مسئول عن خلاص نفسه وبس. مسئول عن اخطائه هو وبس محدش مسئول عن خطايا ابوه أو أولاده أو اي شخص تاني. كل واحد بياخد اجرته حسب اعماله. لأن كان عندهم فكرة أو مفهوم: اشمعنه ابائنا يخطئوا واحنا اللي نتعاقب وأن ده مش عدل. "الآباء اكلوا الحصرم واسنان الابناء ضرست." فالتوضيح أن كل واحد حسب اعماله. (حز18 : 1) — لأن الناس اللي فى السبي عشان يبرروا نفسهم قالوا أن ابائنا اخطاؤا واحنا شيلنا غلطهم. فربنا له المجد رد عليهم "حي انا يقول الرب…… النفس التي تخطئ هي تموت." عشان يبطلوا يقولوا المثل ده تاني. 4) حزقيال 33 — حتة جميلة ومؤثرة فى الكنيسة وبنقولها فى الصوم الكبير. حز 33 : 11 "قل لهم …. بان يرجع الشرير عن طريقه (بنقول لانك لاتشاء موت الخاطئ مثلما يرجع ويحيا. وده لحن فى الصوم الكبير.) …. تموتون يابيت اسرائيل." لاحسن واحنا بندرس سفر حزقيال حد يقول: ليه يا رب العقوبات ديه كلها؟ هنلاقي ربنا له المجد فى حز33 : 11 " اني لا اسر بموت الشرير." اذا شوفنا: - شبه مجد الرب. ومعناها. - ربنا اختار شعبه بيت إسرائيل ولما خالفوا. اتعاقبوا. - المسئولية الشخصية أن كل واحد مسئول على خطاياه ويتحمل نتيجتها. - إن الله لا يشاء موت الخاطئ. + 4 رؤي كبيرة: من اكتر الحاجات اللي شوفناها فى سفر حزقيال الرؤى و التصويرات والمجسمات والصور. 1) من اصحاح 1 —- 3 رؤية شبه مجد الرب ورؤية الدرج اللي ربنا له المجد قاله يأكله. 2) من اصحاح 8 — 11 اختطافه لأورشليم. 3) من اصحاح 37 — 39 من الرؤي الجميلة: رؤية العظام اليابسة والقيامة فى احلي مفاهيمها (ربنا له المجد وداه وادي مليان جماجم وعظام يابسة وقاله "تنبا. هل تحي هذة العظام؟" وشاف أن فى عظام تتجمع ويكسيها لحم وتقوم وتبقي جيش عظيم.) 4) من أصحاح 40 — 48 رؤية الهيكل الجديد وأورشليم الجديدة. بعد كل رؤية من دول كان حزقيال كتير يمثل ليهم الاحداث اللي هتحصل وتحذيرات ربنا له المجد والدروس اللي ربنا عاوز يوصلها لهم. مكانش بيتكلم كان بيمثل حسب مارربنا كان بيطلب منه. مثلا حزقيال 4 و 5 دينا تصوير لحصار أورشليم وانها فى الاخر هتخرب . وبعد كده ربنا يقوله نام على جنبك فترة معينة ومتتكلمش. وبعدين نام على جنبك الثاني فترة وبرده متتكلمش. وأنه يخبز بطريقة معينة. ويشرب بالكيل و ياكل بالكيل. وكل ده عشان اللي هيحصل في أورشليم لما تقع والسبي يجي عليهم مش هيعرفوا ياكلوا ولا يشربوا ولايناموا ومش هيلاقوا راحة خالص. وكمان ربنا له المجد قاله: احلق شعرك ولحيتك واضرب تلته بالسيف واحرق تلته وطير تلته ... وده اللى حصل فى شعب اسرائيل البعض يتحرق والبعض يتشتت والبعض هيموت بالسيف. حزقيال 12 ... يصور ليهم بالتمثيل: أن ربنا له المجد قاله اخرم فى الحيطة وخد البوئجة بتاعتك وبليل اخرج من الخرم ده وكانه هربان وكل ده قدامهم. أصل ده اللي هيحصل لهم. وغالبا لأن الشعب قاسي القلب ومش بيفهموا بسهولة فكان بيمثل لهم عشان ميبقاش ليهم حجة تانية. حزقيال 37 ... بعد رؤية العظام اليابسة. ربنا له المجد قاله: هات عصايتين وضمهم لبعض وأن ده اللي هيحصل ليهوذا واسرائيل فى الاخر ويبقى ليهم ملك جديد. حزقيال 24 ... ربنا له المجد قاله هات "قدر" زي حلل وحط فيها قطع لحم واغليه اوووي لغاية ماتتفحم . وأن هو ده اللي هيحصل لهم. والحاجة الشخصية اللي اتذكرت عن حزقيال النبي أن ربنا قاله مراتك هتموت. لاتندبها ولا تبكي عليها و لاتتنهد. احزن جواك وبس. (حز24 : 15 و16) وده لأن فى دمار وخراب اورشليم لا هيلحقوا يحزنوا ولا يبكوا ولا اي حاجة. حز24 : 24 " ويكون حزقيال لكم ايه. مثل كل ما صنع تصنعون." حزقيال 47 ... لما وصف النهر. كلنا بنشوف ابونا فى اخر القداس بيحط مية على ايده ويقول: يا ملاك هذه الذبيحة …… ويرش الشعب بالمية. طيب ليه ابونا بيعمل كده؟ فى حز 47 : ا و 9 أن المية ديه جاية من عند المذبح فلما ابونا بيرش المية فى نهاية القداس علينا بيفكرنا برؤية حزقيال أن كل من اخذ من خبز الحياة يحيا . خبز الحياة يعني كل المشتركين فى التناول كلنا بنحيا. فكتير من الآباء ربطوا الجزء ده بالقداس.