سفر دانيال هو سفر من اسفار العهد القديم موجود من ضمن اسفار الانبياء الكبار عندنا أربعة اسفار اسمهم الانبياء الكبار عندنا (اشعياء ،إرميا ،حزقيال ، دانيال ) وبعد كده في ١٢ سفر كمان اسمهم الانبياء الصغار ده ، مش معناه ان الانبياء الصغار ف المكانة او الشخصية ولكن يُطلق عليهم الانبياء الكبار لكبر حجم النبوة بتاعتهم يعني لما نشوف سفر اشعياء وارميا وحزقيال ودانيال النبوة نفسها كبيره فسفر دانيال موجود من ضمن الانبياء الكبار ( لان مضمون النبوة كبير من جهة الحجم ) و الحقيقة علشان نفهم سفر دانيال لازم ناخد خلفية كده مع بعض .. انتو عارفين إن أول ملك على بني اسرائيل كان شاول وبعده ملك داود وبعد داود ملك ابنه سليمان وبعد سليمان انقسمت المملكة الي قسمين هما ..  المملكة الشمالية كانت كل ملوكها اشرار وده ربنا عاقبهم بالسبي الآشوري وسقطت المملكة الشمالية سنة ٧٢٢ ق . م  المملكة الجنوبية ودي كانت عاصمتها أورشليم دي كان بعض الملوك فيها كويسين وبعض الملوك مش كويسين ( اشرار ) وربنا عاقب المملكة الجنوبية بالسبى البابلي وكان عقاب عليهم حوالي ٢٠ ملك .. والسبي البابلي كان علي ٣ مراحل ( خلال ٢٠ سنة ) مش مرحلة واحدة زي السبي الآشوري بمعني ان الملك كان بيتمرد فيعملوا حمله تانية وبعد مرور شوية يمشوا وفي الاخر خالص جم في الحملة الـ ٣ جم ودمروا تقريبا أورشليم كلها وحرقوا الهيكل ودمروه ، وحتي الملك ده كان آخر ملك ومات موتة شنيعة .. الحملة الأولى اتسبي فيها دانيال والـ ٣ فتيان تقريبا سنه ٦٠٥ ق.م وده كان في عهد الملك يهوياقيم وده هنشوفه ف سفر دانيال وده كان الملك الـ ١٨ علي ملوك مملكة يهوذا والملك ده الكتاب قال عنه مش هيدفن دفن عادي لكن هيموت موتة حمار .. كانت موته صعبة حتي مدفنش والكلام ده هنلاقيه في سفر إرميا ( إر ١٨:٢٢) لِذلِكَ هكَذَا قَالَ الرَّبُّ عَنْ يَهُويَاقِيمَ بْنِ يُوشِيَّا مَلِكِ يَهُوذَا: لاَ يَنْدُبُونَهُ قَائِلِينَ: آهِ يَا أَخِي أَوْ آهِ يَا أُخْتِي لاَ يَنْدُبُونَهُ قَائِلِينَ: آهِ يَا سَيِّدُ أَوْ آهِ يَا جَلاَلَهُ إرميا بيتنبئ عن موته بيقول الكتاب موته ويقول يُدفن دفن حمار مسحوبا ومطروحًا بعيداً عن ابواب اورشليم وكأن ربنا بيقولهم ده الملك وده اللي حصله ف اتعظوا ولكن محدش اتعظ .. بعد كده الحملة الثانية وتقريبا كانت ٥٩٧ ق.م وكان في الوقت ده يهوياكين ابن يهوياقيم والملك بقي اسير هو وزوجته والحملة دي اخدوا كمان حزقيال و ١٠ آلاف من الشعب .. يبقي احنا دلوقتي اخدنا اول مرحلتين من السبي .. ١ - الحملة ( المرحلة ) الأولى اتسبي فيها دانيال والفتيه الثلاثة ٢ - الحملة ( المرحلة ) الثانية اتسبي فيها حزقيال و الملك وأسرته و ١٠ آلاف من الشعب ٣ - الحملة ( المرحلة ) الثالثة دي كانت فيها خراب أورشليم وتدمير الهيكل ودي كانت ف ايام الملك صدقيا والمرحلة دي الحقيقة حصلت مذبحة بشعة دانيال من الشخصيات الجميلة الموجودة عندنا في الانجيل حتي تلاقوا الكنيسة ف الصيام الكبير لما تذكر الصوم والصلاة نلاقيها بتذكر صوم دانيال .. "الصوم والصلاة هما اللذان خلصا دانيال من جب الاسود " - نعمة دانيال .. هنشوف ان ربنا هيدي دانيال نعمة ف عين كل الملوك اللي هيتعامل معاهم طول دراستنا للسفر وهنشوف كمان النعمة اللي هياخدها عند رئيس الخصيان ورئيس السقاة - دانيال لما راح السبي هو وال ٣ فتيان كان ما بين ١٣ لـ ١٧ سنة وده كان تقريبا في ملك الملك نبوخذنصر في مملكة بابل .. فيقال ان دانيال وهو في جب الاسود كان عمره ما بين الـ ٨٠ او ٨٥ سنة - نلاقي مُعلمنا بولس الرسول يقول صفه جميلة في دانيال ف رسالته للعبرانيين .. قال ( عب ١١ : ٣٣ ) الَّذِينَ بِالإِيمَانِ: قَهَرُوا مَمَالِكَ، صَنَعُوا بِرًّا، نَالُوا مَوَاعِيدَ، سَدُّوا أَفْوَاهَ أُسُودٍ، - يبقي دانيال من ابطال الإيمان والحقيقة دي فعلا تلاقيها في سفر دانيال يبقي دانيال كان من ابطال الصوم والصلاة وكمان من ابطال الإيمان وكان بيفسر الاحلام .