- هو السفر رقم 33 في أسفار العهد ا لقديم في الكتاب المقدس.
- من الأسفار النبوية: يعني الأسلوب الغالب هو الأسلوب النبوي.
- أول أسفار الأنبياء الصغار ال 12.
- هو الصوت النبوي الأخير للمملكة الشمالية. مملكة اسرائيل، العشر أسباط.
- عدد اصحاحاته 14 اصحاح.
- يعتبر أكبر أسفار الأنبياء الصغار من جهة عدد الاصحاحات.
- اختصاره ... ( هو )، أول حرفين من هوشع.
- الفكرة الرئيسية في السفر: خيانة اسرائيل.
- عنوان السفر: السفر بيكتسب اسمه من كاتبه، هوشع النبي.
كلمة هوشع: هو اسم عبري، يعني خلاص الرب... هوشع: مساوي اسمه ليشوع ويسوع.
والتلات كلمات دول، من مصدر واحد. وتعني: خلاص الرب. أو الله يخلًص.
- هوشع النبي غير مذكور خارج سفره. كل المعلومات عنه في سفره وبس.
- هوشع بن بئيري. والده بئيري: غير مذكور في أي جزء تاني من الكتاب المقدس. وهي كلمة عبرية، معناها: بئر.
- هوشع كان في مملكة اسرائيل. المملكة الشمالية. اللي مكونة من عشر أسباط. وعاصمتها السامرة.
- هوشع تجوز جومر وأنجب منها ولدين: يزرعيل و لُوعمًي. وابنة: لُورحامة.
- ربنا دعاه يخدم في المملكة الشمالية، وامتدت خدمته تقريبا ما بين سنة 760 الي 722 قبل الميلاد. دامت خدمته أكتر من 40 سنة. والبعض قال إنها وصلت ل 50 سنة.
- خدم في المملكة الشمالية، وظل يخدم فيها حتي سقوطها وانهيارها علي يد مملكة آشور سنة 722 قبل الميلاد.
غرض السفر
+ معظم نبوات السفر موجهة لشعب اسرائيل، سكان المملكة الشمالية. وده بيظهر بوضوح في الاصحاح السابع "حِينَمَا كُنْتُ أَشْفِي إِسْرَائِيلَ، أُعْلِنَ إِثْمُ أَفْرَايِمَ وَشُرُورُ السَّامِرَةِ،"
- نلاحظ أنه كان بيستخدم اسم افرايم، اللي كان أكبر الأسباط الشمالية من جهة العدد. فكان بيسخدم كلمة افرايم لتدل علي المملكة الشمالية.
- بيعلن عن حب ربنا ليهم. وبالرغم من خيانتهم وارتدادهم عن ربنا، وعبادتهم اللأصنام ، الا أن حب ربنا ليهم ثابت.
- دعوة أخيرة للشعب اللي كسر العهد مع ربنا، علشان يتوبوا ويرجعوا. لأنهم أصبحوا تحت القضاء الالهي، ومهددين بالسبي. فبعت لهم رسالة أخيرة قبل مجئ السبي الآشوري. وكان هوشع النبي هو الصوت النبوي الأخير للمملكة الشمالية قبل سقوطها سنة 722 قبل الميلاد.
- هوشع النبي لمح عن السبي علشان يخوفهم ويخليهم يتوبوا.
- الفكرة الأساسية في السفر: بتيجي من خلال أسرة هوشع النبي. ربنا طلب من هوشع أنه يتجوز جومر المرأة الخائنة أو الزانية. البعض قال انها في البداية كانت شخصية كويسة. وبعدين انحرفت وسابت جوزها وارتبطت بإنسان تاني. وأنجبت منه 3 أبناء. ويحملون أسماء نبوية. وده واضح في الاصحاح الأول. يزرعيل و لُورحامة و لُوعمًي.
- هوشع وزوجته وأولاده: كانوا زي مثال او وسيلة ايضاح للشعب.
- هوشع يرتبط بهذة المرأة وتخونه وتتركه وتذهب لرجل آخر. وده واضح في الاصحاح التالت آية: "وَقَالَ الرَّبُّ لِي: اذْهَبْ أَيْضًا أَحْبِبِ امْرَأَةً حَبِيبَةَ صَاحِبٍ وَزَانِيَةً، كَمَحَبَّةِ الرَّبِّ لِبَنِي إِسْرَائِيلَ وَهُمْ مُلْتَفِتُونَ إِلَى آلِهَةٍ أُخْرَى"
فزي ما أنت بتحب زوجتك جومر، وهي زانية بتحب حد تاني. ده مثال محبة ربنا لبني اسرائيل وهم ملتفتون لآلهة آخري.
البعض قال قد تكون ديه مجرد رؤية أو قصة رمزية. لكن كتير من الدارسين يميلوا أنها قصة حقيقية في حياة هوشع النبي. علشان يكون درس عملي ونموذج قدام أعين الشعب، اللي مكانوش عاوزين يسمعوا لصوت ربنا.
تقسيم السفر
1) القسم الأول: الاصحاحات من ا ل 3: بيشرحوا المثل ده، وبيتكلم عن دعوة ربنا لهوشع النبي للزواج من جومر وانجابه لأبنائه التلاتة.
والاصحاحات ديه: خلفية لفهم الاصحاحات من 4 ل 14،
ونلاحظ أن كلمة الزنا: هي كلمة مفتاحية في السفر. وبتتكرر كتير كلمة: الزنا – زاني - تزني. اتكررت 20 مرة. وظهرت من أول الاصحاح الأول.
الزنا: في معناه المباشر، هو الزنا الجسدي.
لكن المعني الأقوي والمقصود: هو المعني الروحي. لأن ربنا شايف أن كل بُعد عنه هو نوع من أنواع الزنا الروحي.
معني كلمة الزنا: في المفهوم البسيط، أن شخص يترك علاقة مشروعة. علاقة حب شريك حياته ويتجه لآخر.
وهنا نفس المعني ربنا استخدمه علشان يطبقه علي حياتنا معاه. بـأننا بنسيب ربنا وبنرتبط بآخر. صحيح معندناش عبادة الأوثان حاليا. لكن مثلا انسان مرتبط ب: مركز – سطلة - شهوة – مال – مقتني معين وبيحبه أكتر من ربنا. فبكده هو بيترك ربنا ومحبة ربنا ويلتفت لآخر.
وهي ديه الفكرة الرئيسية اللي بيقدمها السفر.
وزي ماقولنا، أنها كانت الرسالة الأخيرة لشعب الممملكة الشمالية. وقدم فيها الخطية كزنا روحي. ونقض العهد مابين زوجين. وديه هنشوفها في الاصحاح التاني "حَاكِمُوا أُمَّكُمْ حَاكِمُوا، لأَنَّهَا لَيْسَتِ امْرَأَتِي وَأَنَا لَسْتُ رَجُلَهَا،" ... وده يوضح نقض عهد الزواج مابين ربنا وشعبه.
2) القسم التاني: الاصحاحات من 4 ل 14: تأديب وانذارات ربنا لشعب المملكة الشمالية. ولكن من محبة ربنا، تكثر الاشارات عن بركات مستقبلية للتائبين. ونبوات عن عودة اسرائيل... يعني: رجاء العودة في حالة التوبة.
خلفيات السفر
1) الخلفية التاريخية لخدمة هوشع النبي.
بدأ خدمته حسب الاصحاح الأول أيه 1، في عهد يربعام بن يوآش ملك اسرائيل ... وده كان الملك الرابع من أسرة ياهو. وكان علي رأسها ياهو ابن نَمشي: الذي قام بتأديب أسرة آخاب وابادتها.
وأسرة ياهو: حكم منها 5 ملوك، الرابع فيهم كان يربعام التاني. وحكم لأطول فترة في ملوك المملكة الشمالية. مملكة اسرائيل، لمدة 41 سنة.
وفترته تميزت بالازدهار السياسي. لأنه قدر يوسع حدود اسرائيل. زي ماهو مذكور في سفر ملوك التاني اصحاح 14 ... من ايات 23 ل 29، بتتكلم عن فترة هذا الملك. وكمان حصل توسع وازدهار اقتصادي.
لكن للأسف مع انحراف الشعب وانتشار الخطية، حصل ضلال للقادة والكهنة ومشاكل روحية كتير في حياة الشعب.
وبعد موت يربعام، ابتدأ يدب الضعف في المملكة الشمالية. وجه بعده 6 ملوك: زكريا – شلًوم – منحيم - فقح – فقحية – هوشع وده كان أخر ملوك اسرائيل.
فترة يربعام كانت فترة اتسمت بالاغتيالات السياسية. فنلاقي الست ملوك، اتقتل منهم 4.
واتحطوا تحت الجزية في وقت الامبراطورية الآشورية. وال 6 ملوك دول حكموا في وقت زمني حوالي 25 سنة. وديه كانت فترة أقل من فترة حُكم يربعام نفسه اللي كانت 41 سنة. وده يدل علي مدي ضعف مملكة اسرائيل. وابتدت الأحوال تتدهور حتي سقطت تماما مملكة اسرائيل في ايد مملكة آشور سنة 722 قبل الميلاد.
وكان هوشع النبي مُعاصر للمملكة، وقت سقوط السامرة (مملكة اسرائيل) في ايد الآشوريين.
والازدهار اللي كان حاصل في وقت يربعام الملك، ده سبب صعوبة لهوشع النبي. لأنه عمال يكلمهم عن السبي والتأديب وأن ربنا هينزع البركة من حياتهم. وطبعا الناس مكانتش مصدقة، لأنهم شايفين الازدهار ده قدامهم.
علشان كده رسالته كانت صعبة شوية.
2) الخلفية الدينية: اللي خدم فيها هوشع النبي.
كان مُعاصر ليه وخاصة في أيامه الأخيرة عاموس النبي.
ربنا بعت اتنين أنبياء للمملكة الشمالية، استكمالاً لسلسلة الأنبياء اللي بدأت : ايليا – اليشع – يونان – عاموس – هوشع.
ايليا واليشع النبي ... ملهومش نبوات مكتوبة.
يونان النبي ... كانت خدمته في المملكة الشمالية، مع رسالة رئيسية موجهة لنينوي.
عاموس النبي ... جاني الجميز البسيط. وكان من المملكة الجنوبية، لكن كان بيخدم في المملكة الشمالية.
هوشع النبي ... كان شاب يافع الي جوار عاموس النبي، الذي تقدم في الأيام في هذه الفترة. (يعني عاموس النبي كان في الأول، ولما جه هوشع النبي كان مُعاصر لخدمة عاموس الأخيرة)
3) الوضع الديني: علي مستوي الشعب.
. كان يربعام بن نِباط سنة 930 قبل الميلاد، بعد موت سُليمان الملك، قاد انشقاق كبير بالأسباط الشمالية، العشر أسباط. وأدخل عبادة عجول الذهب لاسرائيل، فديه كانت عبادتهم الأساسية. موجودة في ملوك الأول اصحاح 12.
. وبعد يربعام بن نِباط، ملوك المملكة الشمالية بدوأ ينحرفوا. زي آخاب الملك وايزابل الشريرة زوجته، أدخلا عبادة البعل.
وبدوأ كمان يأخذوا من عبادات تانية من الشعوب المحيطة بيهم.
عبادة الأوثان: هي ديه اللي أطلق عليها هوشع النبي في سفره: الزنا. وكمان ذكر خطايا كتير سقط فيها الشعب، زي خطايا: عدم المعرفة – الوثنية – التمرد والعُصيان – كسر العهد مع ربنا – الكبرياء - التحدث بالكذب علي ربنا – الارتداد عن ربنا – الزنا الجسدي – اختلاطهم بالشعوب – جمع الثروات بالظلم والغش - سفك الدماء والقتل.
. هوشع النبي علي مدار سفره بيكلمنا عن أخطاء وخطايا الشعب اللي ذكرناها. وربنا ذكر لهم الخطايا والضعفات ديه، علي سبيل التوبة، ويقودهم للحياة معاه.
الخطايا ديه ممكن تكون علي مستوانا الشخصي. فمحتاجين اننا نجاهد فيها.
الأنبياء المعاصرين لهوشع النبي
خدمته عاصرت خدمة اشعياء النبي وميخا النبي في المملكة الجنوبية.
السفر توجد فيه اشارات لربنا يسوع المسيح له المجد. هنلاقي نبوة شهيرة في الاصحاح 11: 1 ، بتتكلم عن عودة ربنا يسوع المسيح له المجد من مصر.. "لَمَّا كَانَ إِسْرَائِيلُ غُلاَمًا أَحْبَبْتُهُ، وَمِنْ مِصْرَ دَعَوْتُ ابْنِي."
وديه الآية اللي اقتبسها القديس متي البشير، علشان يُشير لعودة ربنا يسوع المسيح له المجد من أرض مصر.
هوشع 13: 4، بيتكلم عن ربنا المخلص. "وَأَنَا الرَّبُّ إِلهُكَ مِنْ أَرْضِ مِصْرَ، وَإِلهًا سِوَايَ لَسْتَ تَعْرِفُ، وَلاَ مُخَلِّصَ غَيْرِي." ... هو المخلص الوحيد لشعبه.
هوشع 6: 1- 3 ، فيها اشارات عن قيامة ربنا يسوع المسيح له المجد، وانتصاره علي الموت.. "هَلُمَّ نَرْجعُ إِلَى الرَّبِّ لأَنَّهُ هُوَ افْتَرَسَ فَيَشْفِينَا، ضَرَبَ فَيَجْبِرُنَا...يُحْيِينَا بَعْدَ يَوْمَيْنِ. فِي الْيَوْمِ الثَّالِثِ يُقِيمُنَا فَنَحْيَا أَمَامَه.. لِنَعْرِفْ فَلْنَتَتَبَّعْ لِنَعْرِفَ الرَّبَّ. خُرُوجُهُ يَقِينٌ كَالْفَجْرِ. يَأْتِي إِلَيْنَا كَالْمَطَرِ. كَمَطَرٍ مُتَأَخِّرٍ يَسْقِي الأَرْضَ."
هوشع 13: 14 "مِنْ يَدِ الْهَاوِيَةِ أَفْدِيهِمْ. مِنَ الْمَوْتِ أُخَلِّصُهُمْ. أَيْنَ أَوْبَاؤُكَ يَا مَوْتُ؟ أَيْنَ شَوْكَتُكِ يَا هَاوِيَةُ؟ تَخْتَفِي النَّدَامَةُ عَنْ عَيْنَيَّ." .. هنا شماتة ربنا يسوع المسيح له المجد من الموت والهاوية، لما خلص أولاده من فك الموت. فديه اشارة عن الخلاص.
وكمان السفر مملوء بإشارات مسيانية، تُشير لربنا يسوع المسيح له المجد.
تدريب روحي من خلال المقدمة
أن الله أمين في محبته لأولاده، وأمين تجاه العهد.
وأن الخيانة دايما بتيجي من طرفنا احنا، البشر.
فهنا هوشع النبي أمين تجاه جومر الخائنة ... وده يُمثل الله الأمين تجاه أولاده. نفوسنا الخائنة.
في كل مرة أنا بأكسر وصية ربنا، أو بأرتبط بآخر ضد محبة ربنا. فده نموذج من نماذج الخيانة.
ربنا دايما بكل الحب بيقودنا للتوبة. بس أوقات بيجي التأديب لما بنكون رافضين التوبة.